Yesus nair Ni tamata ovi rorang Ia ma raflurut
1 Amar isa,
na Yesus naflurut na'a wan isa.
Ti ma naflurut munuk,
na tamata isa tali Ni tamata ovi rorang Ia nfalak verin Ia ne,
“Duila'a,
mair ami ma amaflurut,
wean watan i Yohanes nair roak ni tamata ovi rorang ia ma raflurut.”
2 Ba Yesus nfalak verin ira ne,
“Wean i miflurut,
na fyalak wean ini,
Yamamami,
amalang Oa,
tevek naram a nmerat urun.
Mwa ovu Mu Fareta a ma fwareta ami.
3 Amera ma mala afamtahan verin ami ma naran ma ama'an amar ini.
4 Fara ma'i vatuk mami salasilan ra,
wean ami amabun roak tamata ovi rotu salasilan verin ami.
Deka mtorung ma tamata ra te nitdawan a rlabir teman ami.”
5 Yesus nfalak ewal verin ira ne,
“Wean i tamata isa ntali mia nti ni kida ni rahan a nafafruan tenan,
ma nfalak verin ia ne,
‘Kida,
er-teri mu roti itelu veki,
6 tevek ning kida isa na'a ni banbanan a,
beti nwelat ning rahan,
ovu ya'a wol ning afakataka ma ala ma na'an!’
7 Wean i ni kida nfalak tali rahan ralan ne,
‘Deka mlabir ya'a.
Ukusi roak falfolat a,
ovu vali ovun yanak ra amtuba roak.
Ya'a wol ukamlabir ma ubatar,
ovu ya'a wol bisma ala afa verin oa.’
8 Mryenar ma lolin afa ovi ufalak ini!
Velik ne irua rotu kida roak,
na'uk afa yai wol notu ma ni kida yai veka nbatar ma nala afa verin ia.
Na'uk tamata yai nera ma wol ntalik lahir,
tevek wol nma'it,
ba ni kida yai veka nbatar ma nala afa ovi nera ra.
9 Wean inyai bi ufalak verin mia ne,
myera verin Ubu na'a afa ovi ralabira ra rfalak ra,
na Ia veka nala verin mia.
Mdyava urun ia,
na veka mtyuan.
Myevan falfolat a,
na falfolat a veka natvadil verin mia.
10 Tamata ovi rera verin Ubu,
ira veka rala afa ovi rera yai tali Ia.
Tamata ovi rdava afa ovi ralarira ra rfalak ra,
ira veka rtuan vali.
Tamata ovi revan falfolat a,
falfolat a veka natvadil vali verin ira.
11-12 Tali bir tinemun,
na wean i yanabira nera ian tali mia,
na veka myala nifa verin ia?
Te wean i yanabira nera matatelur,
na veka myala afwatan i naran katkatan a verin ia?
13 Velik ne bira salasilan rivun,
na'uk mkya'a ma myala afa ovi lolin ra verin yanabira ra.
Ba Yamabira i na'a lanit ratan veka notu ma nlia tali inyai!
Ia veka nala Ni Roh verin tamata ovi rera tali Ia.”
Tamata ra rfalak ne Yesus nala Ni ngrebat tali nitdawan
14 Amar isa,
na Yesus naling vatuk nait sian tali tamata isa i nmanu a.
Ti ma nait sian yai nti talik tamata yai,
na ia nangrihi nala lahir.
Ba tamata rivun ovi rna'a inyai rtalkaka munuk.
15 Na'uk tamata boku rfalak ne,
“Ia naling vatuk nait sian yai,
tevek Beelzebul i notu dawan verin nait sian ra,
nala ngrebat verin Ia.”
16 Tamata boku vali mane rlabir teman Yesus,
ba rera ma notu mujizat,
boma rka'a ne,
Ni ngrebat yai ntali Ubu te wahal.
17 Na'uk Yesus nka'a afa ovi ranovak ra,
ba nfalak verin ira ne,
“Wean i rsiduk nuhu dawan isa na'ut ifira ma sidovung ra rotu rihi,
na nuhu dawan yai veka nama'ar.
Wean inyai vali wean i tamata ra rsingarahi na'a rahan teta isa,
na rira rahan teta veka nama'ar vali.
18 Nitdawan ni fareta a wean vali inyai.
Wean i nitdawan nsingarahi-sikual ovu ni nait sian ra,
na ni fareta veka nama'ar.
Ufalak wean ini,
tevek mia fyalak ne,
Ya'a aling vatuk nait sian ra ovu ngrebat tali Beelzebul.*
19 Wean i fyalak ne,
aling vatuk nait sian ra ovu ngrebat i ntali Beelzebul,
na tamata ovi rorang mia yai rala ngrebat tali iki ma raling vatuk nait sian avyai?
Tamata ovi rorang mia yai ka'i rfaturu lahir ne,
sala mia.
20 Na'uk wean i aling vatuk nait sian ra ovu Ubu Ni ngrebat a,
na inyai nfaturu lahir ne,
Ubu Raja Ia,
ma nma roak ma nfareta tamata ovi rorang Ia.
21 Wean i tamata ngrebat isa ni mneran ra rngora lahir ma nwanar ni rahan a,
na tamata ra wol rabrahi ma rala ni metan ra.*
22 Na'uk wean i tamata isa nangrebat lia ia nma ma notu rihi ma nfaleka ia,
na tamata i nangrebat lia ia yai veka nala munuk ni mneran ovi nanovak ne,
bisma nala ma al nfaleka tamata ovi rangal ia a.
Notu munuk wean inyai,
beti nsiduk tamata yai ni metan ra.
23 Tamata iki watan wol norang Ya'a,
na ia nangal roak Ya'a.
Tamata iki watan wol nkarya ovu Ya'a,
na ia not-visal karya.”
Nait sian ra rewal ira ti ma rna'a tamata ovi wol rorang Ubu
24 “Wean i nait sian nti talik roak tamata isa,
na nait sian yai veka nlilin watan nti wan ovi wol wear na'a ma ndava wan ma nyari ia,
na'uk wol ndav-nala wan.
Ba wean inyai,
na ia veka nfalak ne,
‘Ya'a veka ewal ya'a ma ti una'a ewal rahan i uti talik roak ia yai!’
25 Ba nait sian newal ia nti rahan yai ma nsi'ik,
na rahan yai rbitin roak ma nmerat,
ovu rasusan ma afakataka munuk rna'a warira ra.*
26 Nata nti murin,
ma nasweang nait sian ifitu ewal ma irmunuk rti ma rna'a tamata yai.
Nait sian avyai rira sian a nlia nait sian lan a.
Ba,
ti nata tamata yai ni vava'at a sian lia lan a.”
Ubu naflahar tamata ovi rot-orang Ni vaivatul ra
27 Na'ut i Yesus nangrihi obin,
na vata isa tali tamata rivun avyai nafwak ma vain a dawan urun,
ma nfalak verin Ia ne,
“Lolin urun verin vata i nlewan Oa,
ovu nsusu Oa.”
28 Na'uk Yesus nfalak verin ia ne,
“Lolin lia munuk verin tamata ovi rarenar Ubu Ni vaivatul ra ovu rot-orang!”
Tamata rivun rera verin Yesus ma notu mujizat i neluk faneak verin ira
29 Na'ut i tamata ra rtafal ma rivun ira ma rsi'ik Yesus,
na Ia nfalak verin ira ne,
“Tamata ovi rva'at na'a tuvu ini raktufan urun.
Ira rera ma otu faneak i tamata ra wol rala nala,
na'uk otu watan faneak i wean lan a Ubu notu roak verin nabi Yunus.*
30 Wean watan Yunus neluk faneak verin tamata Niniwe ra,
na Ya'a,
Tamata Yanan Ya'a ini,
veka wean vali inyai,
ma eluk faneak verin tamata ovi rva'at na'a tuvu ini.
31 Na'ut amar i Ubu veka nma ma nukun lanit ivavan a,
na ratu i ntali nuhu dawan isa i raroa ila'a na'a tranan a,
veka nfaturu lahir tamata ovi rva'at na'a tuvu ini rira sala ra.
Ratu ini nma ma nrenar Raja Salomo i ni kaka'a dawan tali Ubu.
Na'uk Ia i nana'a fiang ini,
Ni dawan a nlia Salomo!*
32 Na'ut amar i Ubu veka nma ma nukun lanit ivavan ini,
na tamata Niniwe veka rdiri vali ovu tamata ovi rva'at na'a tuvu ini ma rta'i nuang ira,
tevek tamata Niniwe avyai rahil ma rtalik roak tali rira salasilan ra na'ut i Yunus nangrihi verin ira.
Na'uk Ia i nana'a fiang ini Ni dawan a nlia Yunus!”
Ubu Ni vaivatul ra wean lahir lyawan
33 “Wol tamata isa ntutun damar ma nfonak te nulang teri ia ovu suran.
Na'uk ia nfadoku na'a damar wan,
boma tamata ovi rti rahan ralan a bisma rsi'ik munuk yeban a.
34 Matabira ra reluk damar verin tenabira ra.
Wean i matabira ra lolin,
na lyawan a nsoru lahir tenabira ra.
Na'uk wean i matabira ra lavlova,
na dedan a veka nsoru lahir tenabira ra.
35 Ba wean inyai,
na msyi'ik wabira ma lolin.
Deka mane lyawan i nana'a tenabira avyai ti ma nana'a dedan ralan.
36 Wean i tenabira munuk lahir lyawan,
ovu wol isa vali dedan,
na inyai nfaturu ne,
tenabira ra munuk lahir lyawan,
wean damar yeban a nyeba tenabira ra.”
Yesus nfasala tamata Farisi ra ovu Yahudi rira dawan ovi rair Musa ni inukun ra
37 Ti ma Yesus nsiair munuk roak,
na tamata Farisi isa nasweang Ia ma nafna'an na'a ni rahan a.
Ba nti rahan yai ralan a ma nafna'an.
38 Tamata Farisi yai nabrian lahir,
tevek Yesus wol nraming liman a obin,
na nafna'an roak.*
39 Na'uk Duila'a nfalak verin ia ne,
“Mia tamata Farisi ra ba'i mryaming watan bira kobi ovu bira binan muririra ra ma rmerat,
na'uk ralarira ra ngra-ngrodi.
Mia ralabira ra wean tamata ovi raktufan ra ovu tamata ovi inar ma rtafal ila'a rira metan ra.
40 Tamata boda averi!
Mia mkya'a roak ne,
Ubu ka'i notu afa ovi rna'a murin a,
ovu vali afa ovi rna'a ralan a.
41 Na'uk myala ovu ralabira urun afa ovi rna'a mia verin tamata kasian ra.
Myotu wean inyai,
na ralabira ovu tenabira veka rmerat urun na'a Ubu wahan ralan a.
42 Mia tamata Farisi ra myala bira persen vutu a tali bira va'i bumbu ra verin Ubu.
Bumbu avyai wean selasih ovu inggu,
ovu vali sayur liak ra.
Velik ne myotu wean inyai,
na'uk veka sian urun i lahir verin mia,
tevek wol myotu afa ovi rmalola ra verin tamata liak ra,
ovu wol mlyobang Ubu.
Ba mia musti myot-orang inukun ovi ula lalean avyai,
ovu vali deka miblufang ma myotu vali afa liak ovi Ubu nfareta roak.
43 Veka sian urun i lahir verin mia tamata Farisi ra,
tevek inabira ma mdyoku wan ovi tamata ra ba'i ralang mia,
na'a rahan falurut,
ovu inabira ma tamata ra ralang mia ma rala salam verin mia na'a wan i rfedi-rfaha afa na'a.
44 Mia tamata Farisi ra veka sian urun i lahir verin mia!
Mia weabira lahir kubur a,
na'uk wol rfaneak ne,
inyai kubur.
Ba tamata ovi rbana na'a ratan a,
wol rka'a ne,
matmatan ra rna'a ralan.
Mia myotu ma felabira ra wean tamata lolin mia,
na'uk ralabira ra sian urun.”
45 Tamata isa tali Yahudi rira tamata ovi ba'i rair Musa ni inukun ra nfalak verin Yesus ne,
“Tuan Guru,
tali afa ovi fwalak yai,
na Oa fwalak sian vali ami!”
46 Yesus nfalak ne,
“Tamata ovi ba'i myair Musa ni inukun ra,
veka sian urun i lahir verin mia vali.
Mia myala varvara aleman verin tamata ra tali afa ovi myair ra.
Ba tamata ra wol rvar-nala afa avyai,
na'uk mia wol mlyauk limabira ra ma al mlyobang ira.
47 Mia myotu ma nabi rira kubur ra lolin buas.
Na'uk velik aba,
mia weabira watan ububir-nusibira ovi rfedan roak nabi avyai,
ba veka sian urun i lahir verin mia.
48 Myotu wean inyai,
na ka'i fyaturu lahir ne,
mia mtyorung afa ovi ububir-nusibira ra rotu ra,
tevek ira rfedan nabi avyai,
ovu mia ini ka'i myotu warira ovi roving ira na'a.
49 Wean inyai bi Ubu i Ni kaka'a dawan a nfalak ne,
‘Ya'a veka usinir nabi ra ovu rasul ra verin ububir-nusibira ra.
Ira veka rfedan rasul ovu nabi boku,
ovu veka rwi-rwa boku vali!’
50 Ubu notu wean inyai,
boma nukun tamata ovi bya'at fiang ini,
tevek ububir-nusibira ra rfedan nabi ra munuk.
Ba mia byara rira matmatan ra,
tali na'ut i Ubu notu lanit ivavan a.
51 Tali lalan ana,
ububir-nusibira ra rsifedan.
Ira rfedan lan Habel.
Rfedan vali tamata liak ovi rira vava'at ra rmalola,
ti naran i rfedan Zakharia.
Ira rfedan ia na'a Rahan Dawan Falurut a,
ovu wan i ba'i rasnuri rira afwatan ra verin Ubu,
na'a wan irua yai fruarira ra.
Mia tamata ovi bya'at fiang ini,
mryenar ma lolin afa ovi ufalak ini!
Ubu veka nukun mia na'a ububir-nusibira ra rira afa sala avyai.
52 Mia dawan Yahudi ovi myair Musa ni inukun ra,
veka sian urun i lahir verin mia!
Mia wean i mtyaha kusi ma al byadil tamata rira fikiran ra ma rka'a kaka'a dawan i ntali Ubu.
Na'uk mia wol mdyava kaka'a yai,
ovu myotu teri tamata ovi inar ma rka'a vali!”
53 Ti ma Yesus nban-talik wan yai,
na Yahudi rira dawan ovi ba'i rair Musa ni inukun ra ovu tamata Farisi ra vairira dawan ma rorat lablabas watan Ia.
Ira rorat afa rivun rasan tali Ia,
boma nvalat ira na'a afa rivun ovi rorat ra.
54 Ira rotu wean inyai ma al rlabir teman Ia,
boma wean i nvalat sala afa boku,
na bisma rtaha Ia.