EJIPITI LƖƲ TƆM
TAKAYAƔ
1
ƐSƆ LƖZƲƲ IZIRƐƐLƖ ÑƖMA EJIPITI ƐJAƉƐ TAA YƆ 1-15
Izirɛɛlɩ ñɩma kɛʋ yomáa Ejipiti ɛjaɖɛ taa yɔ
1 Yaakɔɔbʋ weyi payaɣ-ɩ ɖɔɖɔ se Izirɛɛlɩ yɔ, ɛ-pɩyalaa mba pa nɛ ɩ powobi Ejipiti yɔ, pa-hɩla yɔ: 2 Ruubɛɛnɩ nɛ Siimeyɔɔ nɛ Leevii nɛ Yuuda. 3 Isaakaarɩ nɛ Zabulɔɔnɩ nɛ Bineyaamiini. 4 Daanɩ nɛ Nɛfɩtaalii nɛ Gaadɩ nɛ Asɛɛrɩ. Paa weyi, ɛ nɛ ɛ-hɔʋ taa ñɩma paawobina. 5 Yaakɔɔbʋ pɩyalaa nɛ ɛ-sɛyɩnaa mba, pa-tɩŋa paawɛ nɩɩnʋwa nɛ nɩɩlɛ (70). Piyele ɛ-pɩyalʋ weyi payaɣ se Yoosɛɛfʋ yɔ, ɛ́lɛ ñaatɛma wɛʋ Ejipiti ɛjaɖɛ taa. 6 Pʋwayɩ lɛ, Yoosɛɛfʋ nɛ ɛ-ɖalaa pasɩ pa-tɩnɛ pa-kpaɖʋʋ ŋgʋ kɩ-taa. 7 Pʋbʋ wayɩ lɛ, Izirɛɛlɩ ñɩma lʋlɩ piya sakɩyɛ nɛ pɛtɛzɩɣ ɖɔʋ pɩtɩɩfɛyɩ nɛ pɛwɛɛ ɖoŋ siŋŋ nɛ posu ɛjaɖɛ.
8 Pʋwayɩ lɛ, wiyaʋ kɩfalʋ nɔɔyʋ pazɩ Ejipiti yɔɔ cɔnaʋ. Ɛlɛ, ɛ́lɛ́ ñataatɩlɩ Yoosɛɛfʋ. 9 Eheyi ɛ-samaɣ se, kana! Izirɛɛlɩ ñɩma samaɣ kɩlɩ ḿba ñɩŋga ɖɔʋ nɛ kɛtɛ kakɩlɩ ḿba ñɩŋga ɖoŋ. 10 Se, pɩwɛɛ se ḿba ɛmaɣzɩ ɖeu nɛ pana ɛzɩma ḿbʋ ḿbá ɛla nɛ ḿbá ɖɩɣ-wɛ nʋmɔʋ nɛ pataatasɩ hùúú yɔ. Se, pɩtɛkɛ ḿbʋ́, ye you ɛlɩwa yɔ, pɛkpɛndɩɣ ḿba koyindinaa yɔɔ nɛ pakʋyɩ ḿba yɔɔ nɛ pese palɩɩ ḿba ɛjaɖɛ taaa. 11 Ɖɩnɛɛ, Ejipiti ñɩma lɩzɩ pa-taa tʋma yɔɔ cɔnɩyaa se pawɩlɩ Izirɛɛlɩ ñɩma kʋñɔŋ nɛ tʋma ana a-labʋ. Ḿbʋ́ʋ́, paɖʋ Izirɛɛlɩ ñɩma tʋma ɖoŋ ñɩna nɛ halɩ paba ma Piitom nɛ Ramɩsɛɛsɩ pɛ-tɛtʋ. Tɛtʋ ndʋ tɩ-taa pɛmɛsaɣ Ejipiti wiyaʋ Farawɔɔ tɔɔnaɣ ŋ́gá kakazaa yɔ. 12 Ɛlɛ, pɛtɛzaɣ Izirɛɛlɩ ñɩma nazʋʋ lɛ, paba tɛzɩɣ ɖɔʋ kʋɖɔʋ nɛ pɛtɛzɩɣ mʋʋ tɛtʋ. Pʋ-yɔɔ Ejipiti ñɩma taanaɣ-wɛ nɛ ɛsɩyɛ. 13 Ḿbʋ́ʋ́, Ejipiti ñɩma ɖʋ Izirɛɛlɩ ñɩma kʋñɔŋ ɛzɩ paba kɛ yomaa yɔ. 14 Panazɩ-wɛ pɩtɩɩfɛyɩ nɛ tʋmɩyɛ ɖoŋ ñɩnɖɛ ɛzɩ tɛtʋ fɛyʋʋ nɛ filikinaa lɩzʋʋ nɛ hayɩm taa tʋma tɩŋa labʋ. Tobi se, Ejipiti ñɩma ɖʋ-wɛ kʋñɔŋ nɛ tʋma ɖoŋ ñɩna tɩŋa labʋ.
Farawɔɔ nazʋʋ Izirɛɛlɩ ñɩma yɔ
15 Ebire ñɩma taa lɛ, halʋlʋsʋyaa naalɛ kaawɛɛ. Payaɣ lɛlʋ se, Sifiraa nɛ lɛlʋ se, Puwaa. Ḿbʋ́ʋ́, nakʋyʋwiye Ejipiti wiyaʋ ya-wɛ nɛ ɛ-paɣ-wɛ se, 16 alɩwaatʋ ńdʋ pasɩŋnɩ Ebire ñɩma halaa se paba ɛlʋlɩ lɛ, pefeŋ ɖeu nɛ pana se, abalɩbɩɣa naa halɩbɩɣa. Se, ye pɩkɛ abalɩbɩɣa lɛ, pakʋ-kɛ saʋdaa kpaagbaa. Ɛlɛ, se, ye pɩkɛ halɩbɩɣa lɛ, peyele-kɛ nɛ kacaɣ wezuu. 17 Ɛlɛ, halʋlʋsʋyaa ḿbá, pekizi patala ɛzɩ Ejipiti ɛjaɖɛ wiyaʋ pɔzʋ-wɛ yɔ nɛ peyele abalɩbiya caɣ wezuu. Ḿbʋ pʋyɔɔ yɔ, pañaŋaɣ Ɛsɔ. 18 Peeye, wiyaʋ ya-wɛ nɛ ɛpɔzɩ-wɛ se, ɛbɛ yɔɔ palakɩ ḿbʋ́? Se, ɛbɛ yɔɔ paakʋ abalɩbiya? 19 Paba ñocosi-i se, Ebire ñɩma halaa fɛyɩ ɛzɩ Ejipiti ñɩma yɔ. Se, pɛwɛ abalɩtʋ nɛ palʋlʋʋ pi-piya nɛ pʋcɔ halʋlʋsʋyʋ talɩ.
20 Pʋ-yɔɔ Izirɛɛlɩ ñɩma ɖɔ pɩtɩɩfɛyɩ nɛ pɛwɛɛ ɖoŋ siŋŋ. Pɩlabɩ ḿbʋ́ lɛ, Ɛsɔ haɣzɩ ɛ-kʋjɔŋ halʋlʋsʋyaa mba 21 nɛ ɛha-wɛ sɛyɩnaa sakɩyɛ. Ḿbʋ́ pʋyɔɔ yɔ, pañam-ɩ. 22 Pʋwayɩ lɛ, Ejipiti wiyaʋ ɖʋ ɛ-samaɣ tɩŋa paɣtʋ se, kakpaɣ abalɩbiya nzɩ Ebire ñɩma lʋlʋʋ yɔ, sɩ-tɩŋa nɛ pɔlɔ pɔɔ ŋga payaɣ se, Niili yɔ, ka-taa. Ɛlɛ, pataalɔ halɩbiya.