¹ ‑Tɛ dɛ a 'mʋ, ɛ ‑hi, ‑ɛ ‑bɩ Nyɩsʋa a ‑Hihiu* gba 'lɩ ‑Yusu ‑tɩtɛ ‑mʋ', 'dʋ bii 'lɩ yɩ, ‑ɛ di꞊e nu, 'kuo ‑hʋɩn a nyiblo gbagbʋ Satan* 'mʋ 'ʋ꞊ʋ lɛ ꞊tɛɛ ‑nɩ. ² 'Kɩ 'lɩ ‑tɩtɛ a 'mʋ, 'kɩ ɛ ‑hi 'lɩ ‑nyrɔwɩ a ‑wlɩ nɩ 'hʋɛn kɔ 'tɔlʋwɩ a ‑wlɩ nɩ 'hʋɛn. 'Kɩ ‑nyrɔwɩ a 'mʋ 'kwli, ɛ 'yɩ dɛ ‑di. ‑Tɛ ‑nyrɔwɩ a ꞊wlɩ nɩ 'hʋɛn a 'mʋ, ʋ ‑hi, ‑ɛ ‑bɩ 'kanʋ ‑tʋa la 'a nunuo. ³ Ɛ nɔ‑ mɔ 'kuo ‑hʋɩn a nyiblo gbagbʋ bʋ 'yɩya 'ʋ꞊ʋ 'hʋɩ bʋ, bʋ lee ꞊nɛ: «'Bʋ mɔ, ꞊nɩ mɔ Nyɩsʋa a 'Yu, lee 'hɩ ‑bʋ, bʋ ‑hɛ 'flɔɔ.» ⁴ ‑Ɛ ‑bɩ ‑Yusu ꞊tu꞊o ꞊wɔn, ɛ wɛn: «Ʋ 'crɩ꞊ɩ nɩ, 'kɩ 'lɩ Nyɩsʋacrɩɛn 'kwli, ‑ɛ mɔ, ɛ 'yɩ dididɛ nɩ ‑do 'pa‑, ɛ 'nɩ ‑nu꞊o lɩ꞊ɩ, ‑tonyiblo 'nɩ ‑nɩ꞊ɩ 'klɔ, kɛɛ, win a pɛpɛ, ‑ɛ ‑hʋɛn 'lɩ Nyɩsʋa wlɔn, ɛ nɔ‑ ni꞊e, 'tɩ‑ ‑tonyiblo 'ɛ yɩ 'klɔ nɩ.»

⁵ ‑Tɛ ɛ ‑hi, ‑ɛ ‑bɩ 'kuo ‑hʋɩn a nyiblo gbagbʋ gba 'lɩ꞊ɩ Jrusrɛdɩɔ 'kwli, ‑ɛ mɔ Nyɩsʋa a dakɔ a 'dɩɔ gbagbʋ, 'ɛ 'yaa 'lɩ꞊ɩ Nyɩsʋa a 'kagbaʋ* kɩ, ⁶ 'tɩ‑ 'ɛ yɩ 'kɩ꞊ɩ ‑lee ‑nɩ, ‑ɛ mɔ: «'Bʋ mɔ, ꞊nɩ mɔ Nyɩsʋa a 'Yu, ‑ɛ ‑bɩ ꞊pluu 'lɩ ꞊hlɔn, ‑ɛ nu꞊o, ʋ 'crɩ꞊ɩ nɩ, 'kɩ 'lɩ Nyɩsʋacrɩɛn 'kwli, ‑ɛ mɔ:

⁸ ‑Ɛ ‑bɩ 'kuo ‑hʋɩn a nyiblo gbagbʋ gba꞊a nɩ de, 'kɩ 'lɩ dʋgba blɔblʋ 'lu, 'ɛ tɔɔ ꞊nɛ 'klɔ kɩ a 'blʋgbɩ a pɛpɛ, kɔ 'waa ‑tɩ a 'yi'bʋbʋa, ɛ wɛn: ⁹ «'N kɔ ꞊bʋ ‑nyi ‑mʋ 'a pɛpɛ, 'bʋ mɔ, ꞊nɩ bla 'mʋ kwlɩ yɩ bʋ, 'kɩ 'ʋ 'na 'ʋ꞊tuulɛ a ‑ta'.» ¹⁰ ‑Ɛ ‑bɩ ‑Yusu wɛn: «Mu, Satan, hlɔɔ 'mʋ ‑mɔ lɛ, ‑ɛ nu꞊o, ʋ 'crɩ꞊ɩ nɩ, 'kɩ 'lɩ Nyɩsʋacrɩɛn 'kwli, ‑ɛ mɔ: ‑Na Kʋkɔnyɔ Nyɩsʋa nɩ ‑do, ɛ nɔ‑ ‑blɛɛ yɩ ‑bʋ bla kwlɩ yɩ bʋ, 'kɩ 'ʋ 'a 'ʋ꞊tuulɛ a ‑ta', nɔ‑ blɛɛ ‑tɩ a 'yi'bʋalɛ yɩ.» ¹¹ ‑Tɛ ɛ ‑yrɛ, ‑ɛ ‑bɩ 'kuo ‑hʋɩn a nyiblo gbagbʋ ‑ha꞊a mɛ lɛ. Ti nɩ ‑do a ti 'yri, ‑ɛ ‑bɩ Nyɩsʋa a lɛlenyʋ* nyre 'ʋ꞊ʋ 'hʋɩ, 'ʋ ‑tʋa 'a ‑hɛɛlɛ.

^12-13 ‑Yusu 'wɩn nɩ, ‑ɛ mɔ, ʋ pʋ Saan* Batisɩ ꞊jɩ'. Ɛ nɔ‑ kɔ ‑tɩ 'ɛ ‑hɔn 'lɩ Sudeblʋgba 'kwli, 'ɛ mu 'lɩ 'a 'dɩɔ, ‑ɛ mɔ Nasalɛtɩ 'kwli, 'kɩ 'lɩ Galileblʋgba 'kwli. Kɛɛ, ɛ 'yɩ 'lɩ ‑wlɛɛn ‑nɩ, 'ɛ mu 'lɩ 'dɩɔ ‑mʋ', ‑ɛ mɔ Kapɛnaɔ 'kwli, ‑ɛ nɩ 'ʋ Galileblʋgba a 'yru wien, 'kɩ 'lɩ Sabuloblʋgba kɔ Nɛfʋtaliblʋgba 'kwli. ¹⁴ Ɛ nu꞊o nɩ, ‑ɛ di꞊e nu, ‑tɩ ‑mʋ', Nyɩsʋa a winwlɔn‑hanyɔ Esai* hla la, ɛ 'mʋ 'ʋ nyre. ‑Tɩ a 'mʋ, ɛ nɔ‑ ‑bʋ:

¹⁷ Kʋɛ 'ʋ ti a 'mʋ 'yie bʋ, ‑Yusu ‑tʋa la Nyɩsʋa a ‑tɩ a ‑mɔlɛnɩna, ɛ wɛn: «Ba yru꞊o, 'kɩ 'lɩ 'aan ꞊wlɩ kɩ, ‑ɛ mɔ, a ni ‑tɛblɩ, 'ɛ nyre yɩ, 'kɩ 'ʋ Nyɩsʋa ye'. Ba hie 'ʋ yɩnyre‑tɛblɩ a 'mʋ bʋ, ba ‑nyi 'aan 'klɔ a pɛpɛ Nyɩsʋa, ‑ɛ nu꞊o, ti ‑mʋ' ‑kɔ 'yri Nyɩsʋa di nyibli a pɛpɛ win kɩ ‑kɔɔ ‑nɩ, ɛ 'mʋɛ yrɛ.»

¹⁸ ‑Nyrɔwɔ ꞊dʋ 'kwli, ‑Yusu mu la 'lɩ Galileblʋgba a 'yru wien. Bʋ yɩ 'kɩ 'yru wien lɛ nɩ 'yrɛɛ ‑nɩ, ‑ɛ ‑bɩ ɛ yɛ 'dɩayɩnʋ nɩ 'hʋɛn kɩ. 'Waa 'nyrɛ mɔ Simɔ, ʋ dɛɛ Piɛlɩ, kɔ Adre. Ʋ mɔ 'pʋpanyibli ꞊nɩɔ. 'Kɩ ʋ nɩ 'lɩ 'waa 'blagbɩ 'kwli, 'ʋ pɩ 'waa ‑tatɩ. ¹⁹ ‑Ɛ ‑bɩ kɛ‑ ɛ pɩ ꞊nʋ yɩ, ɛ wɛn: «Ba di 'lɩ, a 'mʋ 'mʋ ꞊wien lɛ kʋɛ, a 'mʋ 'na ‑nagbopʋ ‑hɛ. 'N di꞊e 'nɩ nu, a 'mʋ ‑tonyibli lɛ 'kukue ‑nɩ. Ɛ 'wɩ yɩ, ‑tɛ a ni, 'a pɩ ‑tatɩ 'a yɩ ‑hrin lɛ 'kukue ‑nɩ, kɛ‑ ba nu, ba 'kukue ‑tonyibli lɛ, ʋ 'mʋ 'na ‑nagbopʋ ‑hɛ ‑wɛ.» ²⁰ ‑Tɛ ɛ lee 'kɩ ꞊nʋ ‑tɩ a 'mʋ, ‑ɛ ‑bɩ ti nɩ ‑do a ti 'yri, ʋ hie 'ʋ 'waa ‑tatɩ bʋ, 'ʋ ‑tʋa 'a ꞊wienlɛkʋkʋɛ.

²¹ Bʋ 'yɩya 'ʋ ye' bʋ, ‑ɛ ‑bɩ ɛ yɛɛ 'ʋ 'dɩayɩnʋ nɩ 'hʋɛn ‑bɩ bʋ. 'Waa 'nyrɛ mɔ Sakɩ kɔ Saan*. 'Waa 'baɩ a 'nyrɛ mɔ Sebede. 'Kɩ ʋ nɩ 'lɩ 'waa 'blagbɩ 'kwli, ʋ kɔ 'waa 'baɩ 'hʋɛn‑, 'ʋ yɩ 'waa ‑tatɩ ꞊hrɛntɩ ‑nɩ. ‑Tɛ ɛ yɛɛ 'ʋ 'dɩayɩnʋ nɩ 'hʋɛn a 'mʋ bʋ, ‑ɛ ‑bɩ ɛ da ꞊nʋ nɩ, 'kɩ bʋ ‑hɛ 'a ‑nagbopʋ, ²² ti nɩ ‑do a ti 'yri, 'ʋ hie 'ʋ 'waa 'baɩ kɔ 'waa 'blagbɩ bʋ, 'ʋ ‑tʋa ‑Yusu a ꞊wienlɛkʋkʋɛ.

²³ ‑Tɛ dɛ a 'mʋ, ɛ ‑hi, ‑ɛ ‑bɩ ‑Yusu ‑tʋa Galileblʋgba a pɛpɛ a kɩnɩna, 'ɛ tʋɛ Nyɩsʋa a ‑tɩ, 'kɩ 'lɩ Nyɩsʋa a 'kayo* blɛ, 'ɛ hlɛ꞊ɛ, ‑tɛ Nyɩsʋa di ‑tonyibli a win a kɩkɔɔlɛ nu, 'ɛ ni꞊e, nyibli a 'kʋɛ a pɛpɛ 'ɛ yɩ ‑wɛ, kɔ 'waa kɩkla‑tɛblɩ a pɛpɛ 'hʋɛn‑. ²⁴ Ɛ nɔ‑ kɔ ‑tɩ, 'a 'nyrɛ 'ɛ 'hɛɛn bʋ, 'kɩ 'lɩ Galileblʋgba a pɛpɛ 'kwli, nyibli ‑nɩ 'lɩ Siliblʋgba 'kwli, 'ʋ 'wɩn 'a 'nyrɛ. Ɛ nɔ‑ kɔ ‑tɩ 'ʋ gbɛ 'lɩ꞊ɩ 'hʋɩhrennyʋ ‑hʋɔhʋɩ ‑mɔ, ɛ kɔ nyibli ‑mʋ', 'a ‑nɛ kɩkladɛ ꞊dʋ ni. Nyibli a 'mʋ, 'waa dɛ ‑bɩ nɩ 'ʋ, 'kuo ‑hʋɩn* nɩ 'ʋ ꞊nʋ ke', ‑gbugbukʋɛ 'ɛ ni ‑ʋ ‑bɩ, 'waa dɛ ‑bɩ 'ʋ ‑yɩyrɛ lɛ. 'Waa pɛpɛ a 'mʋ, ‑Yusu nu꞊o nɩ, 'waa 'kʋɛ 'ɛ ‑wɛ. ²⁵ Ɛ nɔ‑ kɔ ‑tɩ nyibli ‑hʋɔhʋɩ 'ʋ yɩ꞊ɩ ꞊wien lɛ kʋɛ. 'Kɩ ʋ ‑hʋɛn 'lɩ Galileblʋgba kɔ Dekapɔblʋgba, kɔ Jrusrɛ kɔ Sudeblʋgba a pɛpɛ 'kwli, kɔ 'blʋgba ‑mʋ', ‑ɛ nɩ 'lɩ Sudɛn a 'nikɩ.