B gad yen Yiesu Pilat buol
15
1 L fann siŋapanpan g *salg-yidkab ciɛnm taan g kal yen doug n nikpela yen Yendu Kadaaɔg *gbanbanda yen buuddanm kul g taan mɔb,
g lol Yiesu g gad yen’o g daan tie’og *Pilat.
2 G Pilat bual Yiesu :
" A tie *Suif-nba bad yaa aa ?
" K u ŋmiɛn’o :
" Fin n maad. "
3 Lann i g salg-yidkab ciɛnm maad maam bonciɛnn g jalg Yiesu.
4 G Pilat guan g bual Yiesu :
" A kan jiin baa siɛl ii ?
A g gbiɛ ban jalg’a yal nba kul po ne ii ? "
5 Ama g Yiesu g jiin baa siɛl,
k l yaa g lid Pilat.
6 Suif-nba *fielu jaanm kul,
Pilat bo tu luod dansalyenŋ i,
g ŋaa’ɔg,
yua nba g niib taan g bual k wan luod’o.
7 L bo sua g jua nne be dansaldieog n k b yi’ug Barabas.
Wano yen u bibiɛdlei n bo kpid wounŋ g kpii nil,
k b suol’b g luon.
8 G niwulug duo Pilat buol g miɛl’o k wan tien wan tu tie yal b po jaanm kul nyan.
9 Lann i g Pilat ŋmiɛn’m k b bua wan ŋaa Suif-nba bad yaa aa ?
10 U bo maad nnyan g dugn u bo ban g nanŋ po i,
g salg-yidkab ciɛnm suol Yiesu g baal yen’o u buol.
11 Ama g salg-yidkab ciɛnm tud tud niwulug k ban maad k b bua wan luod Barabas i.
12 G Pilat guan g bual’b :
" Yua k i yi’ug Suif-nba bad nyan i,
n tien’o nle ? "
13 K b kul guan g yign g maad :
" Te k ban kpaa’ɔg *dapunpɔnn po ! "
14 Lann i g Pilat bual’b k u biil bɛ i ?
K b biɛ ŋanm g yign g maad :
" Te k ban kpaa’ɔg dapunpɔnn po ! "
15 Pilat n bo bua k wan manŋ niib pala nyan k u luod Barabas g ŋaa’ɔg,
g nyaan te k b pua Yiesu gbana,
k u cab k ban tug’o g daan kpaa’ɔg dapunpɔnn po.
Sijenm laa Yiesu
16 G sijenm tug Yiesu g kua yen’o buuddaan ŋaag,
wan kaal naan g bu buud,
g yiin b sijelieb kul.
17 Lann i g lan’o gaalmɔunŋ g lug kunkoni feglg g yilm’o,
18 g ji tu fuond’o g maad :
" T fuond’a naa,
*Suif-nba bad ! "
19 G tug lanbann g pua u yul po,
g sii mɔsand u po,
g nyaan gbaan u nunŋ n ninŋ nyan b bua n pug’o nyan.
20 Sijenm n laa laa’ɔg g gbenn,
k b land gaalmɔunŋ ŋann g guan g lan’o u tiɛd g ji tug’o g saa g daan bu kpaa’ɔg *dapunpɔnn po.
B kpaa Yiesu dapunpɔnn po
21 Ban bo nyiɛ yen Yiesu g saa g daan bu kpaa’ɔg g la Siirɛnn jua nne k b yi’ug Simɔn,
yua tie Alɛksandr yen Rufus baa,
k u nyiɛ kpaab n g kun,
k b niin’o k u tug Yiesu *dapunpɔnn.
22 K b gad yen Yiesu naan buol nba k b yi Gɔlgota nyan.
L niimn n tie g Yukpabug buol.
23 G tug dimɔunŋ k l ŋmad yen bonn nne k b yi *miir g tie Yiesu k wan gaal g nyu.
K u yie g g nyuu.
24 Lann i k b kpaa’ɔg dapunpɔnn po g tug u tiɛd g tɔ tiɛ tiɛ g biid biid.
25 L bo tie siŋaaɔg n kud munwai i,
k b kpaa’ɔg dapunpɔnn po.
26 G diɛn diɛni nne k l ŋɔnŋ wan biil yal nba k b kpaa’ɔg,
g tabn l dapunpɔnn po.
Ban bo diɛn yal nba n ne :
" *Suif-nba bad. "
27 B bo kpaa bibiɛdi banle nne mɔ g pugn Yiesu po.
Yend bo be u nuujendu po,
g lua be u nuuganŋ po.
28 [K l ji tien nyan Yendu Kadaaɔg n bo maad nand nyan :
" B tug’o g taan yen bibiɛdi. "]
29 G niib nba pend l buol ji tu sugd’o g gum gum yul g maad :
" Fin i,
a daan g yed k a bu fid g mud *jaanddeciɛɔnŋ g guan g maa daa ŋantaa g gbenn ii ?
30 Ji fiel a kua g nya dapunpɔnn po g jiid k t diid. "
31 G *salg-yidkab ciɛnm yen Yendu Kadaaɔg *gbanbanda mɔ ji tu laa’ɔg g maad b kua n ninŋ :
" U daan fiel nilieb,
wan ji mɔnd g fiel u kua mɔ.
32 Israyɛl bad *Kristo ń ji fiel u kua g nya dapunpɔnn po g jiid,
k tin la g bann k u tie Kristo yen mɔni,
gii dug u po.
" G bibiɛdi nba k b bo kpaa’b g kpiɛn’o nyan mɔ ji sugd’o.
Yiesu kuum
33 Piig yen kud munle po,
g doug kul bɔnn cinmm,
saa yen daajuoug kud muntaa.
34 L kud muntaa youg u,
g Yiesu yign yen paalu g maad :
" Eloyi Eloyi,
lama sabaktani ?
" L niimn n tie k :
" N Yendu,
n Yendu bɛ po i k a ŋaa’n i ? "
35 G niib nba bo be l buol nyan,
yenm gbad g maad k u ji ta g yi *Eli i.
36 L youg g yend san g gad g daan tug ciesuobu g nyua dimiigl n,
g tuun laalu po,
g tie’og k wan nyu,
g nyaan maad k ban ŋaa k ban diid g liɛ Eli bu baal g fiel’o o ?
37 Lann i g Yiesu yign yen paalu,
g jiin.
38 L youg g cincenciɛɔnŋ nba bo juan *jaanddeciɛɔnŋ n ninŋ nyan cil polu g pad g daan jiid tinŋ.
39 Sijeciɛn nba bo be l buol n la wan kpe nand,
k u maad :
" Yen mɔni,
jua ne tu l tie Yendu Bija i. "
40 L sua g puob nne mɔ be l buol g sie fagm g nyuan.
B siign ninŋ Magdala Mari bo be,
g Mari nba tie Sose yen Saakbig naa be,
g Salome mɔ be.
41 Banm puob bantaa ne n bo ŋua Yiesu,
g tie’og wan bua yal,
wan bo be Galile yaa youg.
Puolieb bonciɛnn mɔ bo be.
B kul n bo ŋuan Yiesu k b duo Serusalɛm.
Arimati Sosɛf pii Yiesu
42-43 L bo tie *Saaba n cilg daajuoug nba i k Arimati jua nne baal k b yi’ug Sosɛf, g sua b daa baand Saaba i. U bo tie *Suif-nba buuddanm n ninŋ yua nba k b cɔlm’o i. U bo tie yua mɔ bo guu Yendu *bal baalu i. Wano n bo paan pal g gad g daan la *Pilat g miɛl Yiesu gbannand.
44 L bo yaa g lid Pilat yen wan gbad g Yiesu taan kpe o.
Lann i k u sun g yiin sijeciɛn ŋano g bual’o g Yiesu kpe k l wai yo oo ?
45 K l sijeciɛn maad’o wan kpe yaa youg.
G Pilat cab Sosɛf Yiesu gbannand.
46 Lann i g Sosɛf daa cabpienn,
g nyan Yiesu gbannand *dapunpɔnn po,
g kadm’o,
g kua g duan’o kakul nba ninŋ k b bo lugl tangbaɔnŋ n.
G ji bind tanciɛɔnŋ g biin kakumɔb.
47 L sua g Magdala Mari yen Mari nba bo tie Sose naa be l buol g nyuan ban pii Yiesu naan.