Yiesu sun u ŋuantieb piinlile yen banle
10
1 L po n yaan pend,
g Yonmdaan lugd nilieb piinlile yen banlea,
g yegn’m banle-le,
g sun’m k ban gad doi n yen dingbana nba kul n ninŋ,
k wano mɔno bo bu gad.
2 U bo maad’b nne :
" Bonkukuod bie g yab,
g tuonsunna yen g yab.
Lann,
miɛl man kpaabdaan,
k wan sun tuonsunna u kpaab n ninŋ.
3 I saa man.
Min n suun’i nyan pebid nyan fuabɔjad sinsiign ninŋ.
4 Daa kub man ligli,
daa kub man kɔl g bual taacaad.
I biɛ daa biɛl man fuondi n ninŋ sɔnu po.
5 I gii kua ŋaag nba kul n ninŋ,
yin cind g maad :
Yanduanm ń gii be ŋaag ne ninŋ.
6 L gii tie g nil be l ŋaag n,
g kpaan g niib yam ń gii dua,
l nil yam bu duan.
L yen gii g tie nnyan l yanduanm bu guan i buol.
7 I be man ŋaag nba ninŋ k b gaal’i,
gii di g nyu ban mɔg yal.
K l maa tuonsunn kan luol u paaɔg.
Daa waa man g tuan ŋai.
8 I gii kua doi nba kul n ninŋ,
g niib gaal’i,
yin gii di yal nba kul k b tien’i,
9 gii paagd l ninŋ yiɛnm,
g maad l doug n niib g Yendu *bal nag b buol n nyan.
10 Ama i gii kua doi nba kul n ninŋ,
g niib g gaal’i,
yin nya g sed sɔnjala po g maad :
11 Baa i doug ne tangulunŋ nba tab t titala po,
t pid lann n nyan,
g ŋaa yen’i.
Ama,
i yen gii ban g Yendu bal nag o.
12 N maad’i,
g Yendu n bu bu niib kul yaa daal,
*Sɔdɔm yab yal baa su yen l doug n yab.
Doi nba ninŋ g niib yie Yiesu Laabamann
13 Yinm Korasinn yab yen yinm Bɛtsayida yab,
fala bu gbad’i !
Yaalidug bona nba tien i doug n ne,
l bo gii tie Tiir yen Sidɔn doi n ninŋ i yaa aa,
man b liɛ kpalpiɛd g pug fantam hal youg,
g ŋɔn k b ŋaa b tuonbiid o.
14 Mɔni,
buud daal,
Tiir yen Sidɔn yab yal baa su yen’i.
15 K yinm Kafarnawunm yab,
i mali k i bu fid g te i doug sann ń do polu po yaa aa ?
Yendu bu jiin i doug hal tinkpiiug n.
16 Yua nba cenŋ i maam,
u cenŋ min i.
Yua nba yie’i,
u yie min i.
Yua nba yie’n mɔ,
u yie yua nba sun’n i. "
17 K l piinlile yen banle tan guan k b pala man,
k b maad :
" Yonmdaan,
a sann po,
baa *sanpola mɔno gbal g tuo tin yed yal i. "
18 K u maad’b :
" N bo la *Sitaan k u nyiɛ polu po nyan tanyigdu nyan,
g baa.
19 I la i,
n tie’i paalu nba k i baa ŋmaad nani yen wai,
g biɛ paad i ninnand Sitaan paalu kul,
g baa siɛl kan fid g tien’i bonbiil.
20 Yen l yaa kul,
daa kpanm man g dugn sanpola n gbal g tuo i maam kaa.
I kpanm man yen pamann,
g dugn i sana diɛn Yendu *ŋaag n ninŋ. "
Yiesu ŋɔn u Baa n tie yua
21 L youg mɔno,
g Yiesu kpanm yen pamann *Foŋanm paalu po,
g maad :
" N Baa,
polu yen tinŋ Yonmdaan,
n dond’a g tiend’a balg yen ŋan ŋɔn yab g ban siɛl bona nba k a g cab g yanfodanm yen ninfandanm ń bann.
Ɛɛn n Baa,
a buam n i,
k l tien nnyan.
22 N Baa Yendu tie’n paalu bonn kul po.
Sua g ban yua n tie Yendu Bija,
u Baa kua i kaa.
Sua biɛ g ban Baa mɔ,
Yendu Bija kua i kaa,
yen yua nba g Yendu Bija tuo g ŋɔn’o Yendu. "
23 K u ŋmagd u *ŋuantieb po,
g maad yen banm kukua :
" Yab nba nyuan yin nyuan yal nba,
pamann tie b yal i.
24 K l maa n maad’i,
g Yendu *sogni-nba yen batieb bonciɛnn bo bua k ban la yin nyuan yal,
g g la,
g bua k ban gbad yin gbiɛ yal ne,
g g gbad. "
Samari janimɔn makpanjam
25 Yendu Kadaaɔg *gbanband nne bo fiil k wan bign Yiesu,
g bual’o :
" Canbaa,
n bu tien nle i,
g tan la *miɛl nba kan ban g gbenn i ? "
26 K u ŋmiɛn’o :
" Bɛ n diɛn Yendu *Mɔmaam kadaaɔg n ninŋ i ?
A gbiɛ’l nle i ? "
27 K u ŋmiɛn g maad :
" A baa bua Yonmdaan a Yendu yen a pal kul,
yen a munn kul,
yen a paalu kul,
yen a maalm kul,
g biɛ gii bua a lua nyan a kua nyan. "
28 G Yiesu maad’o :
" A maad lann n nyan.
I tiend nnyan,
a bu la miɛl. "
29 Ama k l jua bua wan ŋɔn k u buali mɔg niimn,
g guan g bual :
" Ŋmaa n tie n lua i ? "
30 G Yiesu gaal maam g maad :
" Jua nne bo nyiɛ Serusalɛm g ji Seriko,
g bibiɛdi cend g suol’o,
g fiel u tiɛd,
g pua pua’ɔg,
k u tan nubl kuum,
k b yaad g ŋaa’ɔg.
31 K l tuu g *salg-yidkua nne tuag l sɔnu g ji,
g la’ɔg g kogn g pend.
32 G *jaanddeciɛɔnŋ n tuonsunn nne mɔ baal l buol,
g la’ɔg g mɔ kogn g pend.
33 Samari jua nne mɔ bo paa l sɔnu po.
Wano n tan baal u buol g la’ɔg,
g ninbaaɔg suol’o,
34 k u nagn g tien kpam yen dimɔunŋ u yiɛd n ninŋ,
g fin fin,
g jagn’o u bonŋ po,
g gad yen’o saanm gaal buol,
g nyuand u ninŋ.
35 Lan fann,
k u nyan dibala ŋanle,
g tie yua nba guu saanm gaal buol,
g maad :
“ Ŋanm gii kub’o.
L gii tie k a biɛ nyan siɛl g pugn l po,
n tan gii guan,
n bu ŋmiɛn’a. ”
36 A yaa po,
niib bantaa ne ninŋ,
ŋmaa n ŋɔn k u tie yua nba g bibiɛdi cend’o nyan lua i ? "
37 K u maad :
" Yua nba jie’og ninbaaɔg.
" G Yiesu maad’o :
" I saa,
g mɔ ń gii tiend nnyan. "
Yiesu kua Mart yen Mari-nba ŋaag
38 Yiesu yen u *ŋuantieb bo paa sɔnu po,
k u kua dingbanbig nne ninŋ,
g puo nne gaal’o u ŋaag n ninŋ.
L puo bo yi Mart i.
39 Mart bo mɔg niipuo k b yi’ug Mari.
G Mari baal g kal Yonmdaan buol g cenŋ u maam.
40 Mart nuan bo liɛd yen tuona i,
g tan baal b buol g maad :
" Yonmdaan,
a baga yen n niipuo n ŋaa k n liɛd yen tuona n kukua aa ?
Lann,
maad’o k wan taan’n. "
41 G Yonmdaan ŋmiɛn’o :
" Mart,
Mart,
a kuand a kua maalm,
g bibd bona bonciɛnn.
Bonyenn kua n be g tie bonmɔnn.
42 Mari lugd yal nba mand g tie bonmɔnn,
g sua kan fid g fiel. "