Laabamann nba g
SAN
diɛn
Yendu Maam n tie yinyiem yen miɛl
1
1 Cilg youg Yendu Maam bo be.
L Maam yen Yendu n bo taan g be.
L Maam bo tie Yendu i.
2 Wano yen Yendu n bo taan g be cilg youg.
3 Yendu tag bonn kul yen wano i.
Siɛl g be g Yendu tag k l g tie yen wano.
4 Miɛl bo be u ninŋ i.
L miɛl n bo tie yinyiem niib po.
5 K l yinyiem yien bunbɔnn n ninŋ,
g bunbɔnn g tuo g gaal’oa.
6 G Yendu sun jua nne k u baal.
L jua sann n nyan San.
7 U baal g tie sieda i,
k wan kun mɔni yinyiem po,
g niib kul ń gii mɔg *dindann g dugn wano San po.
8 Wano mɔno kaa bo tie yinyiem.
Wano nuan bo bua n kun mɔni yinyiem po i.
9 Maam ŋano n bo tie yinyiem yen mɔni.
L yinyiem n baad ŋanduna n ninŋ g fand nil kul.
10 U bo be ŋanduna n ninŋ i.
Yendu te g ŋanduna nyiɛ u ninŋ i.
Ŋanduna niib yen g bann’o.
11 U baal u doug n ninŋ mɔno,
k u doug n niib g gaal’o.
12 Ama yab nba gaal’o,
g dug u sann po,
u cab b kul mɔb,
k b te Yendu bid.
13 B g te Yendu bid nyan jua yen puo sɔm n tu taan liel g te big nand nyan kaa,
l biɛ g tie nifosaal gbannand n tu bua lan tien nand.
L biɛ g tie jua buam n ninŋ mɔ.
Yendu buam n i k b te u bid.
14 L Maam bo te nifosaal i,
g baal g be t siign ne,
k t la u yudand,
wano Bijayenml yudand nba k u gaal u Baa buol.
U bo baal g gbie yen *ŋalbalg yen mamɔni i.
15 San bo kun mɔni u po i g tand g tua :
" N daan maad wano i g tua mii sua ŋua n puol g tie n liig yua,
g dugn u bo be g sua k n daa g be.
16 U pal n ninŋ n gbie yen ŋanm nba i k u pii t kul paab g biɛ pugn’ti paab.
17 Yen mɔni,
Yendu bo te g *Moyis tie’ti u *Mɔmaam,
ama Yiesu Kristo n baal yen ŋalbalg yen mamɔni.
18 Sua g ban g la Yendu,
Bijayenml nba be u Baa buol n ŋɔn Yendu n tie yua nba. "
San Nyunwultua laabaal
19 Serusalɛm *Suif-nba yudanm bo sun Yendu *salg-yidkab yen *Lefi cugl n ninŋ yab San buol,
k b gad g bual’o :
" A tie ŋmaa i ? "
20 G San maad mɔni g g wuon :
" Min kaa tie *Kristob. "
21 K b guan g bual’o :
" A yen tie ŋmaa i ?
A tie *Eli yaa aa ?
" G San yed k :
" N n,
n g tie Eli.
" K b bual’o k wano n tie Yendu *sogni ii ?
K u yed k " N n ".
22 Lann i k b ji bual’o :
" K a yen ji tie ŋmaa i ?
Maad’ti ŋan tie yua k tin guan g daan maad yab sun’ti naa !
A maad bɛ i a kua po i ? "
23 G San maad :
" Nyan Yendu sogni Esaayi n bo maad nand nyan :
“ Min n tie nil nba yign *tinkuonŋ n ninŋ g tua :
Piin man buod Yonmdaan sɔnu po ”. "
24 Ban bo sun yab nba nyan bo tie *Farisiɛn-nba i.
25 K b bual’o :
" A yed k a g tie Kristo,
k a g tie Eli,
k a biɛ g tie Yendu sogni mɔ,
l tien nle i k a yen *wuul niib nyum i ? "
26 G San ŋmiɛn’m g maad :
" Min nuan wuul niib nyum n i.
Sua be i siign ninŋ ne k i g ban’o.
27 U tie n puol po yua i,
ama n yen g dagd yen k n lod baa u taacagbani. "
28 L kul ne bo tie Betani i,
doug nba be Suurdɛn bɔnpuol po,
San n bo wuul niib naan buol.
Yiesu tie Yendu Pebig i
29 K l fann g San la g Yiesu baad u buol k u maad :
" Diid man,
*Yendu Pebig n nyan.
Wano n piind *ŋanduna biid.
30 N won maad wano i g tua g jua nne ŋua n puol g tie n liig yua,
g dugn u bo be g sua k n daa g be.
31 N mɔ bo g ban’o,
ama n baal g *wuul niib nyum n ninŋ,
k lan te k Israyɛl yab ń bann’o i. "
32 G San biɛ kun mɔni,
g maad :
" N la g *Foŋanm nyiɛ polu po nyan lanjelg nyan g jiid g be u po.
33 N mɔ bo g ban’o.
Yua nba sun’n k n wul niib nyum n ninŋ n bo maad’n k nne :
“ A gii la yua nba g Foŋanm jiid g be u po,
ŋan gii ban k wano n baa wuul niib yen Foŋanm. ”
34 K n kon la nnyan,
g ji kun mɔni mɔlane,
k wano n tie Yendu Bija. "
Yab nba cind g ŋuan Yiesu
35 K l yaan biɛ fann g San sie yen u *ŋuantieb n ninŋ banle,
36 g tan la g Yiesu pend,
k u maad :
" *Yendu Pebig n nyan. "
37 K u ŋuantieb banle ŋann gbad wan maad yal,
g paan g ŋua Yiesu.
38 G Yiesu gbeg g sua k b ŋua’ɔg,
k u bual’b :
" I kpaan bɛ i ?
" K b ŋmiɛn’o :
" Rabi (Rabi bo tie yua nba tund niib Yendu maam i),
a kua lɛ buol i ? "
39 K u maad’b :
" Baal man,
i bu la.
" K b gad g la wan be naan,
l bo sua k l tie kud munna po i.
K b tund u buol l daal.
40 Banm banle nba bo gbad San n maad yal nba,
g ŋuan Yiesu nyan,
b bo yi yend Andre i.
U bo tie Simɔn Piɛr ninja i.
41 K wano Andre kpiɛ g la u ninja Simɔn g maad’o :
" T la Mɛsic. "
42 Lann i k Andre gad yen u ninja Yiesu buol.
G Yiesu nyuan’o suoo g tan maad :
" B yi fin i Simɔn,
San bija.
B ji baa yi’a Kefasd i (l niimn tie tantiɛɔg). "
Yiesu yiin Filiip yen Natanayɛl
43 K l fann g Yiesu fiil k u saa Galile diem n ninŋ,
g cend Filiip g maad’o :
" I ŋua’n ".
44 Filiip bo tie Bɛtsayida doug n jua i.
Andre yen Piɛr mɔ yaa doug n nyan.
45 G Filiip mɔ la Natanayɛl g maad’o :
" T la yua nba g *Moyis bo diɛn Yendu *Mɔmaam kadaaɔg n ninŋ g maad u po,
g Yendu *sogni-nba mɔ biɛ bo maad u po nyan,
b yi wano i Yiesu,
Sosɛf bija,
u nyiɛ Nasarɛt i. "
46 G Natanayɛl bual’o :
" Bonmɔnn bu fid g nya Nasarɛt ii ?
" G Filiip guan g ŋmiɛn’o :
" Baal g diid. "
47 Yiesu n la g Natanayɛl baad u buol,
k u maad :
" U ne l tie Israyɛl buolu jua i yen mɔni,
u pal n pien. "
48 G Natanayɛl bual’o :
" A ban’n lɛ i ?
" G Yiesu ŋmiɛn’o :
" N bo la’a k a kal kinkanŋ nyagl n,
l sua g Filiip daa g yiin’a mɔno. "
49 Lann i g Natanayɛl maad :
" Canbaa,
a tie Yendu Bija i.
Fin n tie Israyɛl bad. "
50 G Yiesu guan g ŋmiɛn’o :
" Min yaan maad’a k n bo la’a kinkanŋ nyagl n nyan i,
k a ji dug n po waa !
A bu la yal nba cie lann. "
51 G Yiesu guan g pugn :
" Yen mɔni n maad’i,
i tan bu la g polu po luod,
g *malɛg-nba nya *Nifosaal Bija buol g do Yendu buol g gɔ g ji u po. "