Puokuanu jaanm Kaana doug n ninŋ
2
1 L wontunm po g puokuanu jaanm be Kaana,
Galile diem n ninŋ,
g Yiesu naa gad.
2 B bo yiin Yiesu yen u *ŋuantieb mɔ l puokuanu jaanm.
3 G dimɔunŋ tan pɔd,
g Yiesu naa maad’o :
" B ji g mɔg daam. "
4 G Yiesu ŋmiɛn’o :
" Laabaal i ?
N youg daa g pund. "
5 K u naa maad yab nba gaan saanm nyan :
" U gii maad k yin tien yal nba kul,
yin tien. "
6 L sua g boba ŋanluob sie l buol.
B bo tug tana i g kpied l boba g tu tien nyum l n,
g niib ń gii kabi g nii,
nyan *Suif-nba jaandi n bo bual k ban tien nand gii ŋan Yendu nunŋ n nyan.
Bobl kul bo bu fid g gaal sɔciɛna ŋanmu lann i kaa ŋanluob.
7 G Yiesu maad sangaala ŋann :
" Luun man nyum g gbien boba ne.
" K b luun g gbien hal yen mɔgbana.
8 K u maad’b :
" Ji kabl man g daan te jaanm cɔgda daan.
" K b kabl g gad g tie’og.
9 G jaanm cɔgda daan lenm l nyum g sua k l kpand dimɔunŋ o.
U g bann l daam n nyiɛ naan buol,
ama sangaala nba bo luun nyum nuan bo ban ;
lann i k u yiin puodaan
10 g maad’o :
" B daa tu cind g nyan dimanm i,
niib tan gii nyuu g buo yaa youg,
ban ji nyan yal g ŋanm g man.
K fin nuan bo wuon dimanm g ji tan nyan mɔlane ii ? "
11 Yiesu n cind g tien yaalidug bonn nba n nyan Kaana doug n,
Galile diem n ninŋ,
g ŋɔn u yudand,
k u ŋuantieb dug u po.
12 L puol po i k u jiid Kafarnawunm doug n yen u naa yen u ninjanm yen u ŋuantieb.
B bo tien l po dana ŋanŋaa nne kua i.
Yiesu bel g nyan kpinkpenda jaanddeciɛɔnŋ n ninŋ
13 Suif-nba *fielu jaanm nba k b yi Pak nyan bo nag,
g Yiesu duo Serusalɛm,
14 g gad g kua *jaanddeciɛɔnŋ n ninŋ g la kpinkpenda k b kuad naabi yen pei yen lanjeli,
g yab nba cend ligli mɔ kal yen b tieba.
15 G Yiesu tug tɔnd g piɛn k l tie nyan naapunn nyan g bel b kul g nyan’m jaanddeciɛɔnŋ n,
banm yen b pei yen b naabi kul.
G pua g yad ligcendaa ligli,
g tud b tieba g lu lu.
16 G maad lanjekuada :
" Nyan man bona ne !
Yin daa tug n Baa ŋaag k lan te daag ! "
17 K u *ŋuantieb tiɛd k l diɛn Yendu Kadaaɔg n g maad :
" Yendu,
pasiɛdug nba k n mɔg a ŋaag po tan bu di’n nyan muu nyan i. "
18 G *Suif-nba yudanm gaal maam lann i g bual’o :
" A bu tien bɛ yaalidug bonn i,
g ŋɔn’ti k a mɔg yiko yen ŋan tien yal nba k a tien ne i ? "
19 G Yiesu ŋmiɛn’m :
" Mud man ŋaag ne,
n bu guan g maa daa ŋantaa. "
20 G Suif-nba maad’o :
" T tug piinna yen bina ŋanluob i g maa Yendu ŋaag ne.
K fin ji bu fid g guan g maa daa ŋantaa waa ! "
21 Yiesu n bo maad Yendu ŋaag nba nyan,
u bo maad u gbannand mɔno i.
22 Wan ji bo tan yied kpienm siign yaa youg u,
k u ŋuantieb tiɛd k u bo maad l maam,
g gaal g Yendu Kadaaɔg n diɛni yen wan bo maad yal nba tie mɔni.
23 Yiesu n bo be Serusalɛm,
*Fielu jaanm youg nyan,
u bo tien yaalidug bona nba yab g niib bonciɛnn la g ji cil g dug u po.
24 Ama wano Yiesu nuan yen bo g dug l niib po,
g dugn u bo ban b kul n tie yaa nibuoli nba.
25 L bo g tie g nil kaa ń ŋɔn’o nifosaal n tie yua nba,
wano mɔno bo ban yal nba be nifosaal pal n ninŋ.