Yiesu ninjanm g mɔg dindann u ninŋ
7
1 L po n pend g Yiesu saa Galile dingbana n.
U bo g bua k u waa Suude g dugn *Suif-nba yudanm bo kpaan k ban kpi’ug u.
2 Suif-nba jaanm nba k b yi *Jond jaanm nyan bo nag.
3 Lann i g Yiesu ninjanm maad’o :
" Nya ne g gad Suude,
k a *ŋuantieb mɔ ń daan la tuona nba k a suun.
4 Yua n bua g niib ń bann’o u g wuod wan suun tuona nba.
Ŋan yaan suun tuona nba ne,
mɔnd g ŋanduna niib kul ń la’a. "
5 U ninjanm mɔno bo g mɔg *dindann u ninŋ.
6 Lann i g Yiesu maad’b :
" Min yaa youg daa g pund.
Yinm nuan,
youg kul dagd i po.
7 Ŋanduna niib kan fid gii nan yinm.
Min nuan b yen nan’n,
g dugn n kun mɔni k ban suun tuona nba g ŋan.
8 Yinm ń gii saa jaanm.
Min nuan kan gad l jaanm,
g dugn n yaa youg daa g pund. "
9 Wan maad’b nnyan,
k u nyind g be Galile.
Yiesu gad Jond jaanm
10 U ninjanm bo gad jaanm yo,
k u mɔ tan yuand g gad.
Ama u bo g gad g niib kul ban kaa.
U bo wuon i,
g gad.
11 *Suif-nba yudanm bo kpaan’o jaanm n ninŋ g tua k u be lɛ ?
12 Niwulug n ninŋ bonciɛnn bo sɔbn sɔbn g maad u maam.
Yenm bo tua k u tie nimɔn i,
g lieb tua g kai,
k u bɔnd niib i.
13 Ama sua yen bo g kad g maad u maam niib kul nunŋ n,
g dugn b bo jie Suif-nba yudanm i.
14 B bo dii jaanm g kua siign yo,
g Yiesu gad *jaanddeciɛɔnŋ n g cil g tund niib.
15 K l yaa g lid Suif-nba k b maad :
" U ne tien nle i g ban kadaaɔg g yen g kua kalaatu i ? "
16 Lann i g Yiesu ŋmiɛn’m g maad :
" N tundl g nyiɛ n buol kaa,
l nyiɛ yua nba sun’n buol i.
17 Yua bua wan tien Yendu buam,
u bu bann n tundl buol i,
g liɛ l nyiɛ Yendu buol bii n maad n yul po i.
18 Yua nba maad u yul po,
u kpaan wano mɔno yudand i.
Yua nba kpaan yua sun’o yudand,
wano n tie mamɔnmaad,
u biɛ g mɔg siɛl yaa faaɔg.
19 *Moyis bo g tie’i Yendu *Mɔmaam ii ?
I ninŋ ne sua g cɔln l Mɔmaam n bual yal.
Bɛ po i k i kpaan k yin kpi’n i ? "
20 G niwulug guan g ŋmiɛn’o :
" A mɔg *sanpol i.
Ŋmaa kpaan k wan kpi’a nii ? "
21 G Yiesu ŋmiɛn g maad’b :
" Tuonyenn kua i k n sun,
k l yaa g lid i kul nne.
22 L po n te g Moyis bo tie’i *kɔnd.
Yen mɔni,
kɔnd taan bo g nyiɛ wano Moyis buol mɔno kaa,
l bo cil i yaajanm buol i,
k i tu kɔnd nil *Saaba daal mɔno.
23 L gii tie k i bu fid g kɔnd nil Saaba daal,
k yin daa kand Moyis Mɔmaam po,
bɛ po i k n teb nifomunn Saaba daal k i pala ji be n po i ?
24 Daa tu la man bonn g kpil g maad siɛl l po,
tu jiɛl man buud nba dagd. "
Niib kpaan k ban bann Yiesu n tie yua
25 Yab nba bo kua Serusalɛm nyan,
siɛb bo maad :
" U ne kaa k b kpaan k ban kpi’ug uu ?
26 K u yen maad g g wuod k b g maad’o baa siɛl ii ?
Bii yudanm ji tan tuo k wano n tie *Kristo i ?
27 U ne nuan t ban wan nyiɛ naan.
Ama Kristo nuan tan gii baal sua kan gii ban wan nyiɛ naan. "
28 L sua g Yiesu tund niib *jaanddeciɛɔnŋ n i,
k u tand g maad :
" I yed k i ban’n,
g ban min nyiɛ naan.
N yen g baal n yul po baalu kaa.
Yua nba sun’n be yen mɔni,
i g ban’o.
29 Min nuan yen ban’o.
G dugn n nyiɛ u buol i,
wano n biɛ sun’n. "
30 Lann i k b ji kpaan k ban suol’o.
Ama sua g sun nuu u po,
g dugn u youg daa bo g pund.
31 Ama niwulug n ninŋ bonciɛnn bo tuo g gaal u maam,
g ji bual b ŋmiɛl n :
" Kristo tan gii baal,
u bu fid g sun yaalidug tuona nba cie u ne n tien yal ii ? "
32 *Farisiɛn-nba bo gbad g niwulug sɔbn g maad l bona Yiesu po,
k banm yen *salg-yidkab ciɛnm sun b sijenm k ban suol’o.
33 G Yiesu maad :
" N bu tien waam nne i yen’i,
g guan g lebd yua daan sun’n po.
34 I tan bu kpaan’n,
i kan la’n,
g dugn min tan baa be naan,
i kan fid g gad l buol. "
35 G *Suif-nba ji maad b ŋmiɛl n ninŋ :
" U ne bua n gad lɛ i k t kan la’ɔg u ?
Bii u bua n gad Suif-nba nba yad g be buolfanu yab doi n ninŋ buol yaa aa,
g daan gii tund buolfanu yab i ?
36 Wan maad u maam nba g yed k t tan bu kpaan’o,
t kan la’ɔg ;
k wan tan baa be naan,
t kan fid g gad l buol,
l maam niimn i ? "
Nyum nba baad yen miɛl
37 Jaanm dijijuog daal,
yaa daal nba ŋanm g tie dimɔnn n nyan,
g Yiesu fiil g tand g maad :
" Nyunnyuglu gii mɔg yua nba wan baal n buol g nyu.
38 Nyan lan diɛn nand nyan,
“ yua dug n po,
miɛl nyum n baa puub nyan bɔnŋ n nyum nyan g nya u pal n ninŋ ”. "
39 U maad Yendu *Fuom nba g yab nba dug u po bu gaal i,
g dugn Yiesu n daa bo g gaal u yudand nyan,
Yendu Fuom mɔ daa bo g baal.
40 Niwulug n ninŋ siɛb bo gbad u maam g yed k :
" U ne n l tie Yendu *sogni yen mɔni. "
41 G lieb yed k :
" Wano n tie *Kristo.
" G lieb mɔ yed g " Kristo bu nya Galile yaa aa ?
42 G Yendu Kadaaɔg g diɛn g maad g Kristo baa tie Bad *Dafiid yaabuonn kaa aa,
l g yed k b bu mal’o Bɛtlɛm,
wano Dafiid mɔno danm doug n ninŋ kaa aa ? "
43 Paadu tien n nyan niwulug ŋann siign g dugn Yiesu po.
44 B ninŋ siɛb bo bua ban suol’o,
ama sua g tuo g sun nuu u po.
Suif-nba liig yab g dug Yiesu po
45 Sijenm ŋann n guan,
g Yendu *salg-yidkab ciɛnm yen *Farisiɛn-nba bual’b :
" Laabaal k i g guan yen’o i ? "
46 G sijenm ŋmiɛn :
" Sua daa g ban g maad maam nyan jua ne nyan. "
47 Lann i g Farisiɛn-nba guan g bual :
" I mɔ ŋaa k u bɔnd’i yaa aa ?
48 I ban g la k t liig yab n ninŋ,
lann i kaa Farisiɛn-nba ninŋ baa sua dug u po i ?
49 Ama niwulug ne nuan yen g ban Yendu *Mɔmaam,
banm biɛl fam n nyan. "
50 G Nikodɛm nba mɔ bo tie Farisiɛn,
g bo gad g la Yiesu siɛnyoug nyan,
bual u lieb :
51 " T *yiko cab k tin bu nil buud g daa g gbad u mɔb n maam,
g biɛ g bual g bann wan tien yal ii ? "
52 K b guan g ŋmiɛn’o g maad :
" A mɔ nyiɛ Galile yaa aa ?
A gii lii Yendu Kadaaɔg a bu bann g Yendu *sogni g ban g nyiɛ Galile tinŋ n. "
Puo nba k b pibl’o k u tie cunconm