8
1 g Yiesu nuan duo Oliif tiidi jual po.
2 K l fann siŋapanpan,
k u lebd g gad *jaanddeciɛɔnŋ n ninŋ.
G niib kul tigl u buol k u kal g ji tund’b.
3 G Yendu Kadaaɔg *gbanbanda yen *Farisiɛn-nba tan baal yen puo nne k b bo pibl’o k u tie cunconm.
K b sen’o sinsiign g ji bual Yiesu :
4 " Canbaa,
t pibl puo ne k u tie cunconm i.
5 To,
Yendu *Mɔmaam kadaaɔg n ninŋ,
*Moyis bo cab mɔb k ban tu jaa l puobuolu tana g kpi’b.
A mɔ la nle ? "
6 B bo maad nnyan g kpaan k wan kpiɛd,
k ban la ban bu jalg’o yal nba po i.
Lann i g Yiesu tibn g ji da diɛni tinŋ n ninŋ yen u nuubil.
7 Ban bo bual’o buali g kuud’o nyan,
k u yaad yul g maad :
" I ninŋ ne,
yua nba g ban g tien biid ń kpiɛ g jaa’ɔg tann. "
8 Lann i g guan g tibn g da tinŋ n ninŋ.
9 Ban gbad nnyan,
g nikpela gaal liig,
k b ji yad yend yend,
g tan ŋaa Yiesu kukua yen puo ŋano k u sie l buol.
10 G Yiesu yaad yul g maad :
" Puo,
b be lɛ ?
Sua g jiɛl a buud g yed k a biil ii ? "
11 K l puo ŋmiɛn’o :
" Yonmdaan,
baa sua g yed siɛl.
" G Yiesu maad’o :
" N mɔ kan jiɛl a buud.
I saa g ji daa fann g tien biid. "]a
Yiesu n tie ŋanduna yinyiem
12 Yiesu biɛ bo maad yen niwulug g yed k nne :
" Min n tie *ŋanduna yinyiem.
Yua nba ŋua’n,
u kan ban g sonm bunbɔnn n ninŋ.
Yinyiem nba tien miɛl baa tie u yal i. "
13 G *Farisiɛn-nba maad’o :
" A kun mɔni a kua po,
a mɔnkund g tie mɔni. "
14 G Yiesu guan g ŋmiɛn’m :
" Baa n gii kun mɔni n kua po mɔno,
n mɔnkund tie mɔni i,
g dugn n ban min nyiɛ naan buol yen min saa naan buol ;
k yinm yen g ban min nyiɛ naan,
g bual min saa naan.
15 Yinm ja buud nyan nifosaal n ban nand i.
Min nuan g ja sua buud.
16 L gii bual k n jiɛl buud mɔno,
n buud tuag mamɔni sɔnu,
g dugn n g bu n kukua kaa,
n Baa nba sun’n be yen’n.
17 I *Mɔmaam kadaaɔg n ninŋ,
l diɛn mɔno k l dagd yen ban tuo niib banle n yaan taan g kun mɔni nba.
18 Min kun mɔni n kua po,
k n Baa nba sun’n mɔ kun mɔni n po. "
19 Lann i k b bual’o :
" A baa be lɛ ?
" G Yiesu ŋmiɛn :
" I g ban’n,
i biɛ g ban n Baa mɔ.
I bo gii bann’n,
i bo bu bann n Baa mɔ. "
20 Yiesu bo maad l lanbona yaa youg nba k u bo be ban bo tu kpiend *salg paab naan buol *jaanddeciɛɔnŋ n,
g tien niib tundl i.
Sua yen bo g suol’o,
g dugn u youg daa bo g pund.
21 G Yiesu biɛ maad’b :
" Min nuan saa n nyan,
i tan bu kpaan’n.
I bu kpe yen i biid i.
Min saa naan nyan,
i kan fid g gad l buol. "
22 Lann i g *Suif-nba yudanm ji maad yen lieb :
" U ne bua n kpi u kua yaa aa ?
Bii bɛ po n te k u yed k wan saa naan,
t kan fid g gad l buol i ? "
23 G Yiesu ŋmiɛn’m :
" Yinm tie tinŋ n ne yab i,
k min tie polu po yua.
I tie ŋanduna ne yab i,
min g tie ŋanduna ne yua kaa.
24 L po n te k n maad’i mii i bu kpe yen i biid.
I gii g tuo g gaal k n tie min tie yua nba,
i bu kpe yen i biid i. "
25 K b bual’o k u tie ŋmaa i ?
G Yiesu ŋmiɛn’m :
" Min yaan l maad’i k n tie yua nba hal cilg youg.
26 N mɔg maam bonciɛnn i po,
g bo bu maad,
g jiɛl i buud.
Ama yua nba sun’n n tie mamɔnmaad nyan,
yal nba k n gbad u buol i,
k n maad ŋanduna niib ".
27 B bo g bann k u maad u Baa i.
28 Lann i g Yiesu biɛ maad’b :
" I tan gii don *Nifosaal Bija yaa youg u,
k i bu bann min tie yua.
I bu bann k n g suun siɛl n yul po,
k n maad yal nba k n Baa banŋ’n i.
29 Yua nba sun’n be yen’n.
U g ŋaa’n n kukua,
g dugn youg kul n suun wan bua yal nba. "
30 Yiesu n bo maad nnyan g niib bonciɛnn tug b *dindann g tien u ninŋ.
Yendu nil n cenŋ Yendu maam
31 Yiesu bo maad *Suif-nba nba bo tug b *dindann g tien u ninŋ nyan k nne :
" I gii gaal n maam,
i baa tie n *ŋuantieb i yen mɔni.
32 Nnyan,
i bu bann mamɔni,
l mamɔni ń nyan’i yonmd n ninŋ. "
33 K b guan g ŋmiɛn’o :
" T tie *Abraham yaabuona i,
t g ban g te sua yaa yonmi.
A bu tien nle i g maad k t bu nya yonmd n ninŋ i ? "
34 G Yiesu maad’b :
" Yen mɔni n maad’i,
nil nba tie biid,
u tie biid yonm i.
35 Yonm n be ŋaag nba ninŋ g tie u ŋaag kaa.
U kan fid gii tun g be l ŋaag n.
Ama ŋaagdaan bija nuan l be u ŋaag n i youg kul.
36 Lann Yendu Bija gii nyan’i yonmd n,
i kon l nyiɛ yonmd n ninŋ i yen mɔni.
37 N ban k i tie Abraham yaabuona.
Ama i yen kpaan k yin kpi’n,
k l maa n maam g kua i tuba n ninŋ.
38 Min n la yal nba n Baa buol,
n maad’i lann i,
k yinm suun i baa n maad’i yal nba. "
39 K b ŋmiɛn’o :
" Abraham n tie t baa.
" G Yiesu maad’b :
" I bo gii tie Abraham yaabuona,
i bo baa suun Abraham n bo sun yal nba i.
40 N maad’i mamɔni nba k n gbad Yendu buol i,
k i ji kpaan k yin kpi’n.
Abraham bo g ban g sun lann palb.
41 Yinm nuan suun i baa tuona i.
" K b yie g maad :
" T g tie kpiɛba kaa.
T mɔg baayend kua i,
wano n tie Yendu. "
42 G Yiesu ŋmiɛn’m :
" Yendu bo gii tie i Baa,
i bo baa bua’n,
g dugn n nyiɛ Yendu buol i g baal ne.
N g baal n yul po kaa,
wano n sun’n.
43 I ban yal po te k i g gbiɛ n maam ii ?
I kan fid g cenŋ min maad’i yal nba.
44 *Sitaan n tie i baa,
k i kpaan k yin sun i baa n bua yal nba.
Hal cilg youg,
u bo l tie nikpiil i.
U g ban g tɔgn mamɔni sɔnu,
k l maa mamɔni g be u ninŋ.
U gii yaad mɔb faaɔg kua n bu fid g nya,
g dugn wano mɔno tie faaɔgdaan i,
g biɛ tie faaɔg baa.
45 Min nuan n maad’i mamɔni nyan i,
k i g tuod g gaan n maam.
46 I ninŋ ne,
ŋmaa n bu fid g ŋɔn n biid i ?
Bɛ po i k n yen maad’i mɔni,
k i g gaan n maam i ?
47 Yua nba tie Yendu yua n cenŋ Yendu maam.
Yin g tie Yendu yab nyan,
l po n te k i g cenŋ n maam. "
Yiesu yen Abraham, ŋmaa n tie ciɛn i ?
48 *Suif-nba bo guan g ŋmiɛn Yiesu g maad :
" L g mɔg mɔni yen tin maad k a tie Samari yua a,
g *sanpol ŋua g mabnd’a nii ? "
49 G Yiesu ŋmiɛn :
" Sanpol g ŋua min.
N cɔln n Baa i,
k yinm yen g cɔlm’n.
50 Min taan g kpaan yudand n kua po.
Ama sua be g kpaan n po wano n biɛ bu buud.
51 Yen mɔni,
n maad’i,
yua nba cɔln n maam,
u kan ban g kpe. "
52 G Suif-nba maad :
" Mɔlane t ji bann yen mɔni g sanpol ŋua’a.
*Abraham bo kpe,
g Yendu *sogni-nba mɔ biɛ kpe,
k fin ji tan baal g yed g yua nba cɔln a maam,
u kan ban g kpe.
53 Fin n cie t yaaja Abraham ii ?
Wano mɔno bo tan kpe i,
g Yendu sogni-nba mɔ kpe.
A yi a kua ŋmaa i ? "
54 G Yiesu ŋmiɛn’m :
" N gii pag n kua,
n pinpagd tie fam i.
Ama n Baa,
yua nba k i tua k u tie i Yendu nyan,
wano n pag’n.
55 I g ban’o.
Min nuan yen ban’o.
N gii yed k n g ban’o,
n mɔ ji baa tie faaɔgdaan nyan yinm nyan i.
Min ban’o g biɛ cɔln u maam.
56 I yaaja Abraham bo mali k wan la n baal daal,
k u pal man.
K u kon tan l la l daal,
k u pal manŋ g pend. "
57 Lann i g Suif-nba bual’o :
" Fin daa g pund baa bina piinmu mɔno g yed k a bo la Abraham ii ? "
58 G Yiesu ŋmiɛn’m :
" Yen mɔni,
n maad’i,
n be g sua k b daa g mal Abraham. "
59 Lann i k b gann tana g bu jaa’ɔg.
G Yiesu wuon g nyiɛ *jaanddeciɛɔnŋ n ninŋ.