Pɔl n bo muand Korɛnt yab laabaal nba k l nyuan Kristo kuum dapunpɔnn po
2
1 N naataani,
min bo baal i buol g bu dɔgd Yendu ŋasiil g ŋɔn’i nyan,
n bo g diɛ maband lann i kaa yanfomaam kaa g muand’i.
2 G dugn min bo be i siign nyan,
n bo jag g suol g Yiesu Kristo po kua i kaa,
min g ban siɛl g bu maad l po,
*Kristo nba k b kpaa’ɔg *dapunpɔnn po kua i kaa.
3 Min nuan bo baal i buol g tie nyan yiɛn nyan i,
g jiwaani mɔg’n k n jegl tɔn tɔn tɔn.
4 N bo g diɛ maband yen yanfomaam kaa g tund n tundl g biɛ muand n laabaal,
ama n maam n ninŋ yen n tundl n ninŋ *Foŋanm n bo ŋɔnŋ u paalu.
5 L bo tien nnyan k yin daa tug i *dindann g tien nifosaal yanfuom n ninŋ kaa,
ama k yin gii dug Yendu paalu po i.
6 Ama yen l kul,
yanfuom i k t ŋɔnŋ yab nba k b yam gagd Kristo ŋuanu n ninŋ.
L yanfuom yen g tie *ŋanduna ne yal,
l biɛ g tie ŋanduna ne badbijanm yal mɔ ;
banm nuan bu biɛl b kul o.
7 T maad Yendu yaa yanfuom i.
L bo tie ŋasiil i g wuo,
k u bo tuod g bobn t yudand po g sua g ŋanduna daa g be.
8 Ŋanduna badbijanm ne,
baa sua yen g bann l yanfuom,
g dugn b bo gii bann l yanfuom b bo kan te ban kpaa Yonmdaan,
yudanddaan dapunpɔnn po.
9 Ama nyan lan diɛn Yendu Kadaaɔg n nand nyan :
" Nil ninbinn n g ban g la yal,
nil tubl n g ban g gbad yal,
maalm nba g ban g kua nil pal n ninŋ palb nyan,
Yendu bobn lann i yab nba bua’ɔg po. "
10 Tinm i g Yendu te g *Foŋanm ŋɔn’ti u ŋasiil.
Yen mɔni,
Foŋanm nuan nyuan bonn kul,
baa yen yal nba wuo hal Yendu pal n ninŋ mɔno.
11 Ŋmaa ban yal nba be nifosaal pal n ninŋ i ?
Nifosaal kukua n ban u yam n ninŋ yal nba be u pal n.
Yendu mɔ,
l tie nnyan i,
Yendu *Fuom kua i kaa,
sua g ban yal nba be Yendu pal n ninŋ.
12 Tinm nuan yen g diɛ *ŋanduna ne yam kaa g suun yenn tuonn,
Yendu n tie’ti u Fuom k tin fid g bann wano Yendu n pii’ti paab nba kul.
13 Tin maad yal nba n nyan :
T g maad nyan nifosaal yanfomaam n bual nand nyan kaa,
t maad nyan Yendu Fuom n tund’ti k tin gii maad nand i.
Nnyan i k t ŋɔnŋ yab nba mɔg Yendu Fuom yal nba tie Yendu Fuom yal.
14 Nil nba g mɔg Yendu Fuom kan fid g tuo yal nba nyiɛ Yendu Fuom buol.
U yaa po l tie waadmaam i,
u kan fid g gbad l niimn,
g dugn Yendu Fuom n tu te nil l banm.
15 Yua nba mɔg Yendu Fuom bu fid g bann bonn kul niimn,
ama sua yen kan fid g bann u yaa niimn.
16 G dugn,
nyan lan diɛn Yendu Kadaaɔg n nyan :
" Ŋmaa ban Yonmdaan maalm i ?
Ŋmaa bu fid g te’og cegli i ? "
Tinm nuan yen mɔg *Kristo maalm i.