Pɔl n cind g diɛn kadaaɔg nba g tie
KORƐNT KRISTO-YAB
Fuondi
1
1 Min Pɔl,
Yendu yanbuam po i k u yiin’n k n te Yiesu Kristo *sundu.
Min n da kadaaɔg ne,
min yen t ninja Sostɛnn,
2 g fuond Yendu *tintaanu niib nba be Korɛnt doug n,
yab nba g Yendu te k b tie u niib g dugn Yiesu Kristo po.
Yendu yiin banm i,
k ban gii be binbem nba ŋan g dagd u po,
banm yen yab nba l be naan buol kul g taan t Yonmdaan Yiesu Kristo sann,
wano nba tie tinm yen banm kul yaa Yonmdaan.
3 T Baa Yendu yen t Yonmdaan Yiesu Kristo ń yad yedŋanm i po g te k i yam ń gii dua.
Pɔl tiend Yendu balg u ŋanm po
4 N tiend n Yendu balg youg kul i po yen wan tien’i yaa ŋanm nba g dugn i be yen Yiesu Kristo.
5 Yen mɔni,
yin be yen *Kristo nyan po n te g Yendu pii’i paab nba yab bonn kul n ninŋ,
mandg maam n ninŋ yen banm n ninŋ.
6 G dugn i tuo g gaal ban muand’i yal nba Kristo po g diɛ k l paa.
7 L po n te g Yendu pii’i paab kul g siɛl g pɔd’i,
yinm nba guu youg nba k t Yonmdaan Yiesu Kristo tan bu dɔgd.
8 Wano n bu te yin gii sie k l paa saa yen juog,
k t Yonmdaan Yiesu Kristo guanu daal yin daa mɔg ban bu jalg’i yal nba po.
9 Yendu gii puon k u bu tien yal nba u tu tien i.
Wano n yiin’i k yin taan gii be yen u Bija,
t Yonmdaan Yiesu Kristo.
Paadu tien Korɛnt Kristo-yab siign
10 N naataani,
n miɛd’i,
t Yonmdaan Yiesu Kristo sann po,
k i gii taa mɔb,
g siɛl yaa paadu ń daa be i siign.
Mɔnd man gii taa mɔb,
gii mɔg maalyenm kua g biɛ tu taan g suol bonyenn kua.
11 N naataani,
Klowe ŋaag yab yen daan maad’n g kunkɔna be i siign ninŋ.
12 Min bua n maad yal nba tie k i ninŋ,
yend tu yed :
" min ŋua Pɔl i ",
lua ń yed :
" min ŋua Apolɔs i ",
lua ń yed :
" min ŋua Kefasa i ",
lua mɔ k :
" min ŋua *Kristo i ".
13 Kristo bɔgd caga caga yaa aa ?
B bo kpaa Pɔl i *dapunpɔnn po k u kpe i po ii ?
Bii Pɔl sann po i k b bo *wul’i nyum i ?
14 N tiend Yendu balg yen min g wul i ninŋ ne baa sua,
l gii g tie Krispus yen Gaayus i kaa.
15 Lann,
sua kan fid g maad k n sann po i k i bo wul nyum.
16 Aaan,
mɔni i,
n bo wul Stefanas ŋaag yab mɔ,
l gii nyiɛ l buol,
n ji g mali k n wul sua g pugn.
17 G dugn Kristo bo g sun’n k n gii wuul niib kaa,
u bo sun’n k n gii muand *Laabamann i,
ama u g yed k n tug nifosaal yanfomaam kaa gii muand,
g dugn n gii tien nnyan Kristo kuum dapunpɔnn po bu te fam i.
Kristo n ŋɔnŋ Yendu paalu yen u yanfuom
18 L tie mɔni i g *Kristo kuum *dapunpɔnn po tie waadmaam i yab nba paa biɛlfam sɔnu po,
ama tinm nba paa *fielu sɔnu po nuan,
t yaa po l ŋɔnŋ Yendu paalu i.
19 G dugn l diɛn g maad g Yendu yed :
" N bu te g yanfodanm yam ń juan,
n bu te g ninfandanm ninfanm ń te fam. "
20 Yanfodaan biɛ be lɛ ?
Gbanband be lɛ ?
Yua nba nai yen niib ŋanduna ne ninŋ be lɛ ?
Yendu g te g ŋanduna ne yanfuom te waadm ii ?
21 Ŋanduna niib n l mɔg yanfuom nba kul,
b yen g fid g bann Yendu,
yaa youg nba g Yendu ŋɔn u yanfuom.
L po n te g Yendu mɔ jag g suol k u bu fiel yab nba k b muand’b waadmaam k b tuo g gaal nyan.
22 *Suif-nba bua ban la yaalidug tuona i,
g *buolfanu yab kpaan yanfuom,
23 k tinm yen muand k b kpaa Kristob dapunpɔnn po.
Suif-nba n kan fid g tuo yal nba n nyan,
g buolfanu yab mɔ mali k lann tie waadmaam i.
24 Ama Yendu n yiin yab nba nuan,
ban tie Suif-nba ii,
ban tie buolfanu yab ii,
Kristo tie Yendu paalu yen Yendu yanfuom i b po.
25 G dugn Yendu tuonn nba naan waadtuonn cie nifosaal yanfuom tuonn,
Yendu tuonn nba naan gbalm tuonn cie nifosaal paalu tuonn.
26 N naataani,
ŋanm g diid man yin tie niib nba g Yendu yiin’i.
I siign ninŋ,
nifosaal n nyuan g yab nba tie yanfodanm nyan g yab,
nigbenŋa g yab,
badbijanm mɔ biɛ g yab.
27 Ama Yendu nuan yen lugd niib n nyuan g yal nba tie waadbonn nyan i g fiɛg yanfodanm,
g tug niib n nyuan g yal tie gbalm bonn g fiɛg paaludanm.
28 *Ŋanduna niib n nyuan g yal nba ji l juod k b nund nyan,
yal nba k b nyuan k l g tie siɛl nyan,
u lugd lann i g bu biɛn yal nba tie bonmɔnn.
29 U tien nnyan g nifosaal kul ń daa fid g don u kua u nunŋ n i.
30 Wano n taan’i yen Yiesu Kristo g biɛ te g Kristo te t yanfuom.
Kristo po i k t te *nimɔnm Yendu nunŋ n ninŋ,
k u lugd’ti k tin gii tie Yendu kukua yaa yab,
g biɛ nyan’ti biid n ninŋ.
31 Lann,
nyan lan diɛn Yendu Kadaaɔg n nand nyan :
" nil nba bua wan don u kua kul,
wan don u kua Yonmdaan n tien yal nba po ".