Foŋanm paab
12
1 N naataani,
n g bua g yal nba nyuan *Foŋanm paab po,
siɛl ń gii duag’i.
2 Yinm mɔno ban k yin daa bo g tie Kristo-yab yaa youg,
tingbana n bo mɔg nuu i po,
k i g mɔg ciɛlu,
k b yen g maad mɔno.
3 L po n te k n bua n ŋanm g maad’i ne :
L nil g be g Yendu *Fuom bu ŋmagd’o wan maad g " Yiesu ń biɛl fam ".
Sua mɔ biɛ kan fid g yaad g maad g " Yiesu tie Yonmdaan ",
g Foŋanm g ŋmagd’o k wan maad nnyan.
4 Paab be jiɛg jiɛg,
ama l kul nya Foŋanm yend ne buol i.
5 Tuona mɔ biɛ be jiɛg jiɛg,
ama l kul tie Yonmdaan yend ne tuonn i.
6 Tuonbuoli-buoli be,
ama Yenduyeno ne n te g niib kul suun l kul.
7 Foŋanm ŋɔnŋ k u be nil kul n ninŋ k lan ŋanm *tintaanu niib kul i.
8 Foŋanm tu te niyend yanfomaam,
g te lua maband,
Foŋanm yend ne n tien l kul.
9 Wano Foŋanm yend ne kua n tu te yend *dindann,
g te lua paab k wan gii paagd yiɛnm.
10 Wano n tu te niyend ń gii suun yaalidug tuona,
g te lua ń gii gaan Yendu maam g gɔ g sɔgnd niib,
g te lua ń gii ban tuona nba tie Foŋanm yal yen yal nba g tie Foŋanm yal,
g te lua ń gii maad mabuolfani n ninŋ,
g te lua ń gii bund l mabuolfani niimn.
11 L kul ne,
Foŋanm yend ne kukua yaa tuona n nyan,
u tien yua kul u paab u kua i,
wan bua nand.
Gbannand bɔga yab, ama gbannand nuan tie gbannanyend i
12 Yen mɔni,
gbannand tie gbannanyend i g yen mɔg bɔga k l yab,
ama yen l bɔga n l yab nand nba kul,
l kul taan g tie gbannanyend i.
L tie nnyan i *Kristo mɔ yaa po.
13 T kul,
*Suif-nba yen yab nba g tie Suif-nba,
yonmi yen yab nba g tie yonmi,
*Foŋanm yend ne ninŋ i k b *wul t kul nyum,
k tin taan gii tie gbannanyend,
t kul taan g gaal Foŋanm yend i,
nyan nyum nyan g nyuu.
14 Gbannand g mɔg bɔgyenn kukua kaa,
u bɔga yab.
15 Tital bo gii maad :
" Min yaan g tie nuu nyan,
lann min g tie gbannand bɔgl ".
L maam n ji bu te k u kan gii tie gbannand bɔgl ii ?
16 G tubl bo gii maad :
" Min yaan g tie ninbinn nyan,
lann min g tie gbannand bɔgl ".
L maam n ji bu te k u kan gii tie gbannand bɔgl ii ?
17 Gbannand kul bo gii tie ninbinn,
t bo bu tien nle i gii gbiɛ i ?
Lann i kaa,
gbannand kul bo gii tie tubl,
t bo bu tien nle i gii gbiɛ nublu u ?
18 Yen mɔni,
Yendu tien bɔgl kul gbannand n ninŋ wan bua nand i.
19 L kul bo gii taan g tie bɔgyenn kukua,
gbannand bo baa be lɛ ?
20 Lan tie nand n nyan.
Bɔga be g yab g nyaan gbannand nuan tie gbannanyend i.
21 L po n te g ninbinn kan fid g maad nuu :
" N g bua a todl ".
Yul mɔ biɛ kan fid g maad titala :
" N g bua i todl ".
22 Lann g be.
Gbannand bɔga nba naan k l g mɔg paalu mɔno tie bonmɔnn i.
23 Yal nba tie nyan l g mɔg sel nyan,
t ŋanm g seln lann i,
bɔga nba tie fai bonn nyan,
t ŋanm g ban l yaa kubnu i,
24 ama yal nba mɔg naasend nuan ji g bual siɛl.
Yendu n tien gbannand nnyan,
g tug sel g tie bɔga nba bo g mɔg sel.
25 U tien nnyan g paadu ń daa be gbannand n ninŋ i,
g gbannand bɔgl kul ń gii tiɛn lieb po.
26 Bɔgyenn gii be fala n ninŋ,
bɔga nba tenn tu taan yen’o i gii be l fala n ninŋ.
Bɔgyenn gii la sel,
bɔga nba tenn mɔ baa kpanm yen’o i.
27 Yinm n taan g tie *Kristo gbannand,
g sua kul tie u gbannand bɔgyenn.
28 L tien nnyan i,
g Kristo *tintaanu n ninŋ,
Yendu sen yua kul u sinsienu n.
Cincinn,
Yiesu *sundi,
munle po Yendu *sogni-nba,
muntaa po yab nba tund Yendu maam,
g tuan yab nba suun yaalidug tuona,
g tuan yab nba k u pii’b u paab k b paagd yiɛnm,
yen yab nba tod lieb,
yen yab nba ŋmagd lieb,
yen yab nba maad mabuolfani n ninŋ.
29 B kul tie Yiesu sundi yaa aa ?
B kul tie Yendu sogni-nba yaa aa ?
B kul tund Yendu maam yaa aa ?
B kul n suun yaalidug tuona aa ?
30 B kul n gaal Yendu paab g paagd yiɛnm ii ?
B kul n maad mabuolfani n ninŋ ii ?
Bii b kul n bu fid gii bund niib l mabuolfani niimn i ?
B kul kaa.
31 Lann,
mɔnd man k i pala ń gii kɔn paab nba ŋanm g tie bonmɔnn po.
N ji bu ŋɔn’i mɔlane sɔnu nba cie liel-nba kul.