Buam n cie bonn kul
13
1 To,
baa n gii bu fid g maad nifosaal mabuoli kul,
yen *malɛg-nba maam mɔno,
g yen g bua n lieb,
n maam tie nyan sanbual lann i kaa gingann nba k b pua k l mɔg fuug nyan i.
2 Baa n gii mɔg Yendu paab k l tie k u maad yen’n k n gɔ g sɔgnd niib,
n gii ban yal nba l be g tie ŋasiil kul,
yen yal nba l be g tie banm kul,
n gii mɔg baa *dindann nba n bu fid g te g jɔa ń figd g gad g fign siɛl po mɔno,
n gii g bua n lieb,
n g tie siɛl.
3 Baa n gii tug min mɔg yal nba kul g biid tali,
n gii cab n gbannand mɔno k ban juu muu,
n gii g bua n lieb,
l kan pugn’n siɛl.
4 Buamdaan mɔg pasɔnŋl,
yen nimɔndug,
u g nan nil,
u g mɔg jipaad,
u g mɔg jigbelm,
5 u g suun tuonkpiɛdl,
u g kpaan u yal kua,
u g mɔg mutuol,
u g diɛ u pal n ninŋ lieb n biil’o yal nba.
6 Bonbiiug gii tien,
buamdaan g kpanm l po,
mamɔni n manŋd u pal.
7 U di sugl bonn kul po,
bonn kul n ninŋ u dug Yendu po g daan,
u mɔg juunn bonn kul n ninŋ.
8 Buam g mɔg gbennu.
G nyaan Yendu n tu te niib maam nba ban guan g sɔgn lieb nuan bu gbenn.
Mabuolfani nba ninŋ g niib maad mɔ bu bod diyenn.
Banm po mɔ biɛ tan bu juab diyenn.
9 Yen mɔni,
tin ban yal nba,
t g ban g gbenn,
tin sɔgnd Yendu maam nba mɔ,
t g sɔgnd l kul.
10 Ama bonn kul youg tan gii pund canyiin,
yal nba tie bonjenn kul ji bu bod i.
11 Min bo tie big,
n bo maad bimɔnmaam i,
n maalm yen n dudugd kul bo tie big yal i.
Ama min tan cegd g te nil g gbenn,
k n ŋaa yal tie bimɔnm kul.
12 Mɔlane t daa nyuan gala gala nne i nyan ninnyuandg nba g ŋanm g nyuan ń tien junjunŋ nba nyan,
ama l youg tan gii pund t bu la ninprurr jig i.
Min daa ban yal nba mɔlane,
n ban bɔgl i,
ama l youg n tan baa ban i canyiin,
nyan Yendu n ban’n nand nyan.
13 Lann,
bona ŋantaa ne n be youg kul :
gii dug Yendu po,
yen *dindann yen buam.
Ama l kul ne ninŋ buam n yen cie.