Cetáma 7

Nɔ̀wéè dúú nɛ́ɛmá dawɛ́ɛ̀ku mɛhɛká

¹ Mii kú dàhàka kà Kɔ́yɔ̀ɔ é caka Nɔ̀wéè è yɔ̀: N cɔ́dí é n'hɔ̰́tà fɔ̰́ń kú cɔ̰́ɔ̰̀di-dà cɔ́dí a wɔ̀ǹku tɔɔ̀pa wɛǹni mɛhɛká. Ye kú kpɛ́mú, dúú ye nɛ́ɛmá dawɛ́ɛ̀ku mɛhɛka fɔ̰́ń n'àa hɔ̰́ɔ̰́tà-kpɛ́ɛpá wɛǹni. ² Tódá-nà nɔtí mɛ̀ǹtì kú wɛǹni pú cií-ti dipú yoo dɔ̀hɔ̀di. Ti boocí mɛhɛká, á deèda tìdɛ́ɛ́ tìdɛ́ɛ́, datá nà nitá háá cɔ̀ku màyehì. É yída, mɛ̀ǹtì mɛ̀ɛ cií-ti wɛǹni dipú yoo dɔ̀hɔ̀di, á tódá mɛnti kú boocí mɛhɛká tìdɛ́ɛ́ tìdɛ́ɛ́ sá̰à̰di, datá nà nitá. ³ Nɛ̀hi kú bɛ́ka, á tódá hi bookú báà mɛ̀ǹkù dɛ̀ɛ̀-ku mɛhɛká, dahí hìyehì, nihí hìyehì é taàa ye nɛ́ɛmá dawɛ́ɛ̀ku mɛhɛká k'yé teha kà hi boocí dá féé teǹka hḭ́ǹka, ⁴ mìì tee-sá daàka kàyehì mɛhɛká, n kó hɛ́í-ní taafá-dà teǹka hḭ́ǹka. Fà kó tɛ̀ni é dɔdi é n'yòǹ wèǹci púnàhì-dà, yèǹka púnàhì. N baà kó fíɔ́wá-ma n pa̰à̰-sa wɛǹni teǹka hḭ́ǹka. ⁵ Ye wɔ̀ni, kà Nɔ̀wéè é pa̰ná Kɔ́yɔ̀ɔ d'oò cakáà-sa wɛǹni.

⁶ Yè de hɔ̰́tà ò káá beeká kɔ̀ɔnà kɔ̀ɔ̀-dà, nɛ́ɛsṵ́náku pa̰à̰ tḭ́ń benní teǹka hḭ́ǹka. ⁷ K'ó dúú ye nɛ́ɛmá dawɛ́ɛ̀ku mɛhɛká, mɛnń n'ɔ̀ɔ poòo, n'ɔ̀ɔ bííhí nà hi kú poòpa, è kpɛ̀i é dontá pa wɔ̰ǹni ye nɛ́ɛsṵ́náku nɛ́ɛsàma wɔ̀ni. ⁸ Nɔtí wɛǹni, mɛ̀ǹtì pú cií-ti dipú nà dɔ̀hɔ̀di, mɛ̀ǹtì cií-ti dipú nà dɔ̀hɔ̀di, é yídá mɛ̀ǹtì fudì-ti ti pɛutí hḭ́ǹka, nà nɛ̀hi, ⁹ ye wɛǹni k'yé tɛ̀ni Nɔ̀wéè pesá è yòǹ yèdɛ́ɛ́ yè dɛ́ɛ́, dasá nà nisá. K'yé tɛ̀ni é dúú ye nɛ́ɛmá dawɛ́ɛ̀ku mɛhɛká é n'yònà Weèdi baà de mà hḭ́mpú Nɔ̀wéè. ¹⁰ Kà daàka kàyehì é ka̰há, k'yèe nɛ́ɛsṵ́náku sàku mɛ̀ɛ é bintá-ní é tɛ̀ni é dáná teǹka.

Nɛ́ɛsṵ́náku sàku dánà teǹka wɛǹni

¹¹ Yè de hɔ̰́tà Nɔ̀wéè káá ye kú benní, beeká kɔ̀ɔnà kɔ̀ɔ̀-dà. Ye benní, nì cḭ̀ma dɛ́ɛ̀má mɛhɛká, ma dapíì-yehìdí daadí, kà nɛ́ɛsààma ^a é hḭ-hḭḭ̀ta-ní teǹka nɛ́ɛkɔɔ̀ka wɛǹni, é yídá kà hḭ́ǹka nɛ́ɛnɔ̀ǹci é kpe-kpetá-ní ci wɛǹni, kà tafá é tidì-ní nɛ́ɛmá. ¹² K'yèe taafá é n'dɔdì mɛma yèǹka nà wèǹku háá é n'yòǹ daàka púnàhì. ¹³ Fà cetà tḭ́ń daadí mɔ́nní-dà, Nɔ̀wéè de dúú-ma nɛ́ɛmá dawɛ́ɛ̀ku mɛhɛká n'ɔ̀ɔ hɔ̰́ɔ̰́tà-kpɛ́ɛpá. K'ó dúú mɛnń n'ɔ̀ɔ poòo, n'ɔ̀ɔ bííhí hi ta̰à̰ka: Sɛ́mù, nà Kámù nà Sàfɛ́tì, nà pa kú poòpa pa ta̰à̰ka. ¹⁴ K'ó pɛ́ɛ́ é dúú-nà nɔtí boocí wɛǹni: Yɛ̀ɛ̀di nɔtí ti bodú ti bodú, hɔ̰́ɔ̰́tà kpɛ́ɛ́tí ti bodú ti bodú, nɔtí mɛ̀ǹtì fudì-ti ti pɛutí hḭ́ǹka, nà nɛ̀hi é pɛ́ɛ́-nà mìɔ̀hi, ye wɛǹni ye bodú ye bodú. ¹⁵ Niíya̰ mìì baà fuehí-sa wɛǹni de tɛ̀ni-í-ma-ní Nɔ̀wéè pesá nɛ́ɛmá dawɛ́ɛ̀ku mɛhɛká. Yè mɛ̀ɛ de kɔ́dì-ní bookú bá mɛ̀ǹkù dɛ̀ɛ̀-ku wɛǹni, niìya̰ n'ɛ̀ɛ poòo-dà. ¹⁶ K'yè té tɛ̀ni dasá nà nisá é tɛ̀ni é dúú ye nɛ́ɛmá dawɛ́ɛ̀ku mɛhɛká é n'yònà Weèdi baà de mà hḭ́mpú Nɔ̀wéè. Niìya̰ boocí wɛǹni-dà de tɛ̀ni. Ye kú wɛnnì-dà de dúú, kà Kɔ́yɔ̀ɔ há̰ nɛɛ́ é kpená cɔ̀di Nɔ̀wéè dàhàka.

¹⁷ Kà taafá é dɔdì yèǹka nà wèǹku, háá daàka púnàhì. Kà nɛ́ɛmá é múdí é yohòna ye dawɛ́ɛ̀ku teǹka hḭ́ǹka, kà kù pòsi nɛ́ɛmá hḭ́ǹka. ¹⁸ Kà nɛ́ɛmá é dɔ̀hà é múdí é dìsi hḭ́ǹka sàma, k'yèe dawɛ́ɛ̀ku pòsi ma hḭ́ǹka kà mà kù toó. ¹⁹ Kà ma múukú baà é dɔ̀hà è wɛhikú sàma, háá é yɔ̀ɔ dáń-dáná pépédí ta̰dɛùka mɛ̀ǹkà péé-ka wɛǹni teǹka hḭ́ǹka. ²⁰ Kà má dáná ye ta̰à̰ka, hádí é kà ha̰tá dɛumú hḭ́ǹka, k'yèe dɛumú yòǹ mɛ́tídìpa pàyehì. ²¹ Mìì de fòù-sa wɛǹni teǹka hḭ́ǹka è nampú, k'yé kpíí fɛ́: Nɛ̀hi, hɔ̰́ɔ̰́tà-nɔtí, yɛ̀ɛ̀di kpɛ́ɛtí, mɛ̀ǹtì fudì-ti ti pɛutí hḭ́ǹka é pɛ́ɛ́-nà nììpa. ²² Mìì baà de péé-sa wɛǹni kpeèdi hḭ́ǹka è fuehí, k'yé sèǹ ye wɛǹni. ²³ Mɛmá kú bookú-dà, Kɔ́yɔ̀ɔ de fíɔ́wà-ma mìì kú wɛǹni de péé-sa teǹka hḭ́ǹka è fòù. É cɛ̰ɛ̰́-nà nìdo, háá nà nɔtí mɛ̀ǹtì káá-ti tààka, nà mɛ̀ǹtì fudì-ti ti pɛutí hḭ́ǹka, é pɛ́ɛ́ nà nɛ̀hi, ye wɛǹni kà Kɔ́yɔ̀ɔ éè kɔ̀ù páí. Nɔ̀wéè cɔ̰́ɔ̰̀di-dà de héé mɛ̀ǹǹ fḭ́tà-ko, n'ɔ̀ɔ hɔ̰́ɔ̰́tà kpɛ́ɛpá, nà mìì de péé-nà-sá ye nɛ́ɛmá dawɛ́ɛ̀ku mɛhɛká. ²⁴ Ye nɛ́ɛsṵ́náku de pa̰nà é n'yòǹ daàka kɔ̀ta nà púnùm̀-dà teǹka hḭ́ǹka.