Cetáma 8

Nɔ̀wéè yɛ̀ni nɛ́ɛmá dawɛ́ɛ̀ku mɛhɛká

¹ Àmá Weèdi de pú dúi Nɔ̀wéè kpɛ́mú. Nì mɛ̀ɛ de pú dúi yɛ̀ɛ̀di nɔtí nà hɔ̰́ɔ̰́tà-kpɛ́ɛ́tí mɛ̀ǹtì de pɛ́ɛ̀ òò péé-nà-ti wɛǹni nɛ́ɛmá dawɛ́ɛ̀ku mɛhɛká. Kà ní heé-ní yakú teǹka hḭ́ǹka, ye wɔ̀ni kà nɛ́ɛmá é cetá yakàtapú. ² Nɛ́ɛmá mɛ̀mà de yɛɛ̀hu-má-ní teǹka nɛ́ɛkɔǹka wɛǹni, nà hḭ́ǹka nɛ́ɛnɔ̀ǹci wɛǹni, ma wɛǹni kà má cɛ̰́ṵ́dá. Ye wɔ̀ni kà taafá é nɛɛ̀hi, fà koò pú dɔdì. ³ Kà nɛ́ɛmá é cetá niìdapú cɛ̰́ma cɛ̰́ma teǹka hḭ́ǹka. Mà mɛ̀ɛ de cetà niìdapú, nɛ́ɛsṵ́náku ku daàka kɔ̀ta nà púnùm̀ dàhàka-dà. ⁴ K'yé ta̰ntá cḭ̀ma yehìmá, ma dapíì-yehìdí daadí k'yèe nɛ́ɛmá dawɛ́ɛ̀ku é taá é basí ta̰à̰di nìcɔ̰́nì kú hḭ́ǹka kà nì péé bɛ̀m̀bɛ̀ni pà toò-di Àdàdátì^a. ⁵ Kà nɛ́ɛmá baà é n'ká è yàkù, háá kà cḭ̀ma pítamá é yɔ̀ɔ é nɛɛ̀hi. Ye cḭ̀ma ma dacecedí daadí, kà pá dɛ́há kà ta̰à̰ka yóòma é fodá-ní.

⁶ K'yé tṵ́má pa̰ná daàka púnàhì, kà Nɔ̀wéè é kpetá fènɛ́tì ò de pa̰à̰-ko ye nɛ́ɛmá dawɛ́ɛ̀ku hḭ́ǹka. ⁷ Ye wɔ̀ni k'ó deèna-ní càǹkàǹto^b óò wɛ́í k'ó pùdi é ka̰há, k'yé m'péé k'ó tóní. Ò baà de ka̰hù mɛmá-dà è tóǹ-ní háá kà nɛ́ɛmá é yɔ̀ɔ é niìda teǹka hḭ́ǹka. ⁸ K'ó tṵ́má é deèna-ní pàǹdɔ̀ùdi é nì wɛ́í, è kpɛ̀i é dɛ́há kà nɛ́ɛmá yakàdà teǹka. ⁹ Ò nì wɛ́i-má mɛma, kà ní ka̰há é tɛ̀i nì pú dɛ́hà nì kó dóḿ-sa, mìì tee-sá nɛ́ɛmá-dà de káà dádí teǹka wɛǹni. Ye wɔ̀ni kà ní tóní ye nɛ́ɛmá dawɛ́ɛ̀ku pesá ò de péé-sa, k'ó deèna-ní o nɔ̀ku é nì cɛ̰ɛ̰́ é nì dúù-ho ye mɛhɛká. ¹⁰ K'ó ceí daàa kàyehì, é tṵ́má nì dèna-ní é nì wɛ́í kà ní ka̰há. ¹¹ Kà n'ní kó tóní o pesá, é tóní k'yè yòǹ yohokú è ayí-ní teepú pà toò-pu òdìfíè fa̰a̰pàǹku. Ye wɔ̀ni-dà ò bantà-ma è yɔ̀ nɛ́ɛmá yakàdà teǹka. ¹² K'ó tṵ́má ceí daàa kàyehì tɔɔ̀ka, é tṵ́má nì dèna-ní é nì wɛ́í, ye wɔ̀ni kà ní ka̰há nì koò pú tóní o pesá.

¹³ Ò káá tḭ́ń benní beeká kɔ̀ɔnà kɔ̀dì nà nìcɔ̰́, ye cḭ̀ma cecemá ma dacecedí daadí, k'ó pḭ́ńtá ye nɛ́ɛmá dawɛ́ɛ̀ku pḭ́ḿpḭ́ǹti. Ye wɔ̀ni k'ó wáńtá-ní teǹka, é n'hɔ̰́tà nɛ́ɛmá nidà-á-dà kà hḭ́ǹka kà kà kpɛù-ní. ¹⁴ Yebenní cḭ̀ma dɛ́ɛ̀má mɛhɛká, ma daàka púdɛ́ɛ́ nà kàyehì daadí, k'ó n'hɔ̰́tà teǹka kpɛí-dà dɛ́dɛ́í.

¹⁵ Ye wɔ̀ni kà Weèdi óò caka è yɔ̀: ¹⁶ Tódá a poòo, n'àa bííhí nà hi kú poòpa kà nɛ́ yɛ̀dì ye nɛ́ɛ́mà dawɛ́ɛ́kù mɛhɛkà. ¹⁷ Pɛ́ɛ́ é deèna-nà ye nɔtì mɛ̀ǹtì pɛ́ɛ̀ àà péé-nà-tì wɛnnì ye dawɛ́ɛ́kù mɛhɛkà: Ye nɛ̀hì, n'ɛ̀ɛ nɔtí mɛ̀ǹtì káá-ti tààka, nà mɛ̀ǹtì fudì-tì ti pɛutì hḭ́ńkà, ye boocì ci wɛnnì. Yè dèna k'yé teha k'yé wɛ́dá dɔ́ɔ́di é sṵ́ná teǹka. ¹⁸ Ye wɔ̀ni kà Nɔ̀wéè é yɛɛ̀ni ye nɛ́ɛmá dawɛ́ɛ̀ku mɛhɛká, mɛnń n'ɔ̀ɔ poòo, n'ɔ̀ɔ bííhí nà hi poòpa. ¹⁹ Pa kú dàhàka, kà nɔtí é tṵṵ̀na é yɛɛ̀ni: Mɛ̀ǹtì káá-ti tààka nà mɛ̀ǹtì fudì-ti ti pɛutí hḭ́ǹka, nà nɛ̀hi, nà mìì baà nampú-sa wɛǹni teǹka hḭ́ǹka. Ye wɛǹni k'yé yɛɛ̀ni bá mìì dɛ̀ɛ̀-sa n'ɛ̀ɛ bookú.

²⁰ Kà Nɔ̀wéè é maá dɔ̀hɔ̀di cɔ̰̀ǹcɔ̰̀ni Kɔ́yɔ̀o kpɛ́mú. K'ó yídá é baàta nɔtí pà pa̰kú-nà-ti dɔ̀hɔ̀di, bookú bá mɛ̀ǹkù dɛ̀ɛ̀-ku mɛhɛká, nɔtá tàcɔ̰́ tàcɔ̰́, é baàta nɛ̀hi pà pa̰kú-nà-hi dɔ̀hɔ̀di, bookú bá mɛ̀ǹkù dɛ̀ɛ̀-ku mɛhɛká nɛ̀ta tàcɔ̰́ tàcɔ̰́, ye wɔ̀ni éè pa̰á̰ dɔ̀hɔ̀di Kɔ́yɔ̀ɔ kpɛ́mú,^c éè pṵ́ná kà ha̰mú éè dii pépédí ye cɔ̰̀ǹcɔ̰̀ni hḭ́ǹka. ²¹ Kà Kɔ́yɔ̀ɔ é yekà ye dɔ̀hɔ̀di nɔ́kú naakú, k'òo fɔ̰́di é dɔdi, k'ó caka o cɔ̰́ɔ̰̀di è yɔ̀: N koò pú kó tṵ́má nɔda teǹka daadí yènì nà nìdo kpɛ́mú. N'ɔ̀ɔ bíkáḿbíikú-dà o yàma hɔ̰́ m'pée-ma sḭ̀ḭ̀ma pa̰á̰ma hḭ́ǹka. N'ɔ̀ɔ̀ baà yòǹ-mà mɛma, n koò pú kó fíɔ́wá daadí yènì mìì fòù-sa wɛǹni k'yé n'yònà n mà hḭmpù mɛmà.

²² Kà pemá-dà pú yó yɔ̀ɔ,

dití bɔɔ́ma nà ti kɔ̰ṵmá pú kó yɔ̀ɔ daadí yènì,

wìku nà sémú pú kó yɔ̀ɔ daadí yènì,

paàdi nà yɔ̰ɔ̰dí é yídá

wèǹku nà yèǹka mɛ̀ɛ pú kó yɔ̀ɔ daadí yènì.