Cetáma 9

Weèdi pa̰nà múnáma nà Nɔ̀wéè

¹ Kà Weèdi é kóná Nɔ̀wéè n'ɔ̀ɔ bííhí é pà caka è yɔ̀: Wɛ́dá-nà é sṵná teǹka wɛǹni. ² Teǹka nɔtí wɛǹni, mɛ̀ǹtì káá-ti tààka nà mɛ̀ǹtì fudì-ti ti pɛutí hḭ́ǹka, nà nɛ̀hi wɛǹni, nà nim̀bííhí wɛǹni, yè té nɛ n'káá wantafɔ̰̀di sukú. Ye wɛǹni n yè nɛ pɛ̰i-í-ma è yɔ̀ n'ɛ́ɛ̀ n'tee. ³ Mìì fòù-sa wɛǹni è nampú, nɛ kó nɛɛ́ yè dii-í-ma. N nɛ pɛ̰ḭ-í-ma ye wɛǹni, é n'yònà n de nɛ pɛ̰ḭ-má kú bookú míti bíící9:3 Dentá Cetáma 1:29. ⁴ Nɛ há̰ pú yònà é dii nɔtá nà ta hḭ̀ma è pú tà hɛ̰dà, mìì tee-sá ta fòùmu péé ta hḭ̀ma mɛhɛká-dà. ⁵ Nɛ́na mɛ̀ɛtékà, nɛ hḭ̀ma-dà yòǹ nɛ fòùmu. Kà nɔtá kɔù nìdo, n kó wáńtá tà béka-á-ma ye bàǹti. Kà nìdo-dà mɛ̀ɛ kɔù o tɔɔ̀o, nɛ́ n'yá̰á̰ n kó wáńtá ò béka-á-ma ye bàǹti. Nììdo pà kó kɔ̀ù-ko wɛǹni, n kó ya̰dá béka-á-ma o fòùmu bàǹti.

⁶ Kà nìdo bɛ́tà o tɔɔ̀ɔ wɔ̰ǹni,

tɔɔ̀ɔ-dà mɛ̀ɛ té kó wáńtá bɛ́tá o kpɛ́ɛdí,

mìì tee-sá n pa̰nà nìdo k'ò n yònà-á-ma.

⁷ Àmá, nɛ́ wɛ́dá sàma é sṵ́ná-hɔ̰ teǹka wɛǹni.

⁸ Kà Weèdi é tṵ́má caka Nɔ̀wéè n'ɔ̀ɔ bííhí è yɔ̀: ⁹ Mmi kú bɛ́ka, n ta̰kadà è kó bowá n múnáma nà nɛ́na-dà. Nɛ kú dàhàka, ká n mà sɔ̰kadá nà nɛ yaàbíiká, ¹⁰ nà mìì baà fòù-sa wɛǹni è pɛ́ɛ̀ nɛ péé-nà k'yé n'yònà: Nɛ̀hi, hɔ̰́ɔ̰́tà nɔtí nà yɛ̀ɛ̀di kpɛ́ɛ́tí, mìì baà yɛ̀ni-sá-ní wɛǹni nɛ́ɛmá dawɛ́ɛ̀ku mɛhɛká, nà tɔɔ̀sa mìì kó wáńtá m'péé-sa wɛǹni teǹka hḭ́ǹka è fòù. ¹¹ Ǹtɛ n múnáma nùdi n nɛ hḭ́nì-di: N koò pú kó wɛ́í-ní daadí yènì nɛ́ɛsṵ́náku sàku kà kú dii mìì fòù-sa wɛǹni. N mɛ̀ɛ koò pú kó teha kà kú tɛ̀ni é dii pemá. ¹² Kà ní tuɛ̀ha è yɔ̀: Múnáma yḭdó mɛ̀ǹǹ kó m'péé-ko ti cɔhɔ̀ka, mmí nà nɛ́na wɔ̀ǹci wɛǹni mɛhɛká, è kó tṵ́má m'péé-nà mìì káá-sa wɛǹni fòùmu, mɛnń-dà héé: ¹³ N tṵṵnà n táńyandikú wɔ́ɔ̀di mɛhɛká. Mɛnkú-dà yòǹ yḭdó mɛ̀ǹǹ kó m'bɛkú-ko è yɔ̀ múnáma péé mmí nà teǹka ti cɔ̀hɔ̀ka. ¹⁴ Kà n té tíkánà wɔ́ɔ̀ka hḭ́ǹka kà táńyandikú fodà-ní, ¹⁵ n té kó deǹta-á-ma-ní è yɔ̀ n nɛ pa̰à̰-nà múnáma, é yídá é mà pa̰á̰-nà mìì fòù-sa wɛǹni. Ye wɔ̀ni, nɛ́ɛsṵ́náku koò pú kó pa̰ná é dii fòùmu kpɛ́ɛsá wɛǹni. ¹⁶ Táńyandikú-dà té kó fodá-ní wɔ́ɔ̀ka mɛhɛká, ká n kù dɛ́há é deǹta è yɔ̀ n pa̰nà múnáma kà mà kɔ́ɔ́ é yɔ̀ɔ, nà mìì péé-sa wɛǹni teǹka hḭ́ǹka è fòù. ¹⁷ Kà ní tṵ́má caka Nɔ̀wéè è yɔ̀: N múnáma yḭdó-dà kó n'dɛɛ̀ ye pesà-ní, nà bá mìì fòù-sa wɛǹni teǹka hḭ́ǹka.

Nɔ̀wéè n'ɔ̀ɔ bííhí wɛɛkú

¹⁸ Nɔ̀wéè bííhí mɛ̀ǹhì de yɛɛ̀ni-hí-ní nɛ́ɛmá dawɛ́ɛ̀ku mɛhɛká, hi yèèka-dà de dɛɛ̀: Sɛ́mù, Kámù nà Sàfɛ́tì. Kámù-dà de pɛdà Kànàáà. ¹⁹ Nɔ̀wéè de pɛdà-pa-dà ye pesà pa ta̰à̰ka. Nà mɛmpá kú fɔ̰̀di-dà mɛ̀ɛ dɛɛ̀ nììpa wɛǹni yɛɛ̀ni-má-ní é sṵ́ná teǹka. ²⁰ Kà Nɔ̀wéè é ká̰ńta teǹka, é n'yòǹ cecedó é híúwá pɛ́ɛ̀sɔ̰ná teená. ²¹ Daadí yènì, k'ó nìì pɛ́ɛ̀sɔ̰ɔ̰̀ka naàma é bɔń. Ye wɔ̀ni é dúú o fḭ́ḭkú mɛhɛká, é taá bátá o nɛǹti wɛǹni é dɔɔ́ o kpeèdi. ²² Kà Kámù, Kànàáà báàa é dúú é tɛ̀i óò dɛ́há k'ò dɔɔ́ è foó, k'ó yɛɛ̀ni é tɛ̀ni é mà caka o kúcààpa pa dɛ́ɛ̀di tapaàdi. ²³ Ye wɔ̀ni kà Sɛ́mù nà Sàfɛ́tì é tódá tókesààdi é nì baká pa bakayuùka hḭ́ǹka, ye wɔ̀ni é cèn dàkàǹdáǹni háá é yɔ̀ɔ é dúú-nà ye fḭ́ḭkú mɛhɛká é tɛ̀i é sɔɔ̀na pa báàa fɛ̀ɛ̀ci. Pà de pú teháà kà pa yìhìka é coá o bɛ́ka kà pà dá dɛ́há o fɛ̀ɛ̀ci. ²⁴ Naàma ò cḭ̀ǹtà tḭ́ń wɔ̀ni k'ó heǹta-ní, kà p'óò caka o ya̰tá cetà ò pa̰à̰-sa. ²⁵ Ye wɔ̀ni k'ò yɔ̀:

Nɔdàdi é m'péé-nà Kànàáà!

Ó ya̰dá é n'yòǹ o kúcààpa núm̀ma kú núǹn.

²⁶ K'ó tuɛ̀ha è yɔ̀:

Kɔ́yɔ̀ɔ yèdi é n'toó fa̰ntàma,

mɛnń mɛ̀ǹǹ yòǹ-ko Sɛ́mù Weèdi!

Ó hédá kà Kànàáà é n'yòǹ Sɛ́mù núǹn.

²⁷ Weèdi é pa̰a̰ Sàfɛ́tì teǹka kà ká n'wɛhi.

Àmá, Sɛ́mù hɔ̰́ɔ̰́tà kpɛ́ɛpá é ya̰dá codá sukú o yaàbíiká pa fḭ́ḭná mɛhɛká, kà Kànàáà é n'yòǹ pa núǹn.

²⁸ Nɛ́ɛsṵ́náku pa̰nà-ma é yɔ̀ɔ, kà Nɔ̀wéè é tṵ́má dii fòùmu mɛhɛká, beeká kɔ̀ɔnà ta̰a̰ nà púnùm̀-dà. ²⁹ O fòùmu beeká wɛǹni de yòǹ beeká kɔ̀ɔnà wɔ́ì nà púnùm̀-dà k'ó nɛɛ́ é kpíí.