Cetáma 11

25 Avril. KOUDI Pascal et BONDE Martin.

Hɔ̰́dìdìkàta sàta maáma Bàbɛ́dì yɔtí mɛhɛká.

¹ Ye kú wɔ̀ni-hɔ̰ yè de hɔ̰́tà nììpa wɛǹni wɛì wɛmá màcɔ̰́-dà nà wɛɛnɔ̀ka kàcɔ̰́ teǹka hḭ́ǹka. ² Kà pá yíí-ní weèdi yɛɛ̀hu-ká-ní bɛ́ka, é tɛ̀ni é dɛ́há bandikú kùcɔ̰́kù kà kù péé Sìnɛ̀áà teǹka mɛhɛká. Kà pá bátá ye pesá é kaàdi. ³ Ye wɔ̀ni kà pá caka pa tɔɔ̀pa è yɔ̀: Héé-nà kà tí pa̰á̰ bìdíkìpa é pà pṵ́ná ha̰mú kà pá kpeka. Mɛmá-dà pà de hḭn-má, ye wɔ̀ni k'yèe bìdíkìpa é kpáńtà pa tá̰à̰ka pà kó maá-nà-ka, kà kùtìnɔ́ɔ̀ tá̰a̰-kɔ̀ma é n'yòǹ pa tá̰à̰ti pà kó n'cɔ́kù-nà-ti ye bìdíkìpa. ⁴ Kà pà tṵ́mà yɔ̀: Yàà tí maá-nà yɔtí tìcɔ̰́, nà hɔ̰́dìdìkàta sàta kà ta yóòma é m'pḭ́ńtí-ní hḭ́ǹka, k'yé teha kà ti yèdi é yíí, ye wɔ̀ni ti koò pú kó n'ya-yahí páàti wɛǹni teǹka hḭ́ǹka.

⁵ Kà Kɔ́yɔ̀ɔ é cútá-ní nà hḭ́ǹka, é tɛ̀ni é dɛ́há ye yɔtí n'ɛ̀ɛ hɔ̰́dìdìkàta nììpa de maà-ta. ⁶ W'èè dɛ́hà-ma mɛma, ye wɔ̀ni é caka o cɔ̰́ɔ̰̀di è yɔ̀: Ǹtɛ nììpà mɛmpà kà pà yòǹ bookú kùcɔ̰́, è tṵ́mà wɛì wɛmá màcɔ̰́ é mahà è kó pa̰á̰ miì. Kà pà yòǹ mɛma, yècɛ̰́ɛ̰̀ koò pú kó m'péé mìì kó pà kpaná-sa pà kó n'kpɛ̀i é pa̰á̰-sa wɛǹni mɛhɛká. ⁷ Ye kú kpɛ́mú, yàkà tí cútá-nà é taá kɔkapa pa wɛmá, k'yé teha kà pà koò dá n'you pa tɔɔ̀pa tonàpu. ⁸ Ye mɛmá-dà, kà Kɔ́yɔ̀ɔ é tɛ̀ni é pà wìhìna kà pá ya-yahí páàti wɛǹni teǹka hḭ́ǹka é nátá-nà ye pesá, ye wɔ̀ni k'èe yɔtí maáma é nɛɛ̀hi. ⁹ Ye kpɛ́mú-dà tee kà pá yíí ye yɔtí è tì yɔ̀ Bàbɛ́dì^a, mìì tee-sá ye pesá-dà Kɔ́yɔ̀ɔ de kɔkapáà-ma nììpa wɛmá. Nà mií-dà mɛ̀ɛ dɛɛ̀-ní, ò de pà yahí-ma teǹka wɛǹni hḭ́ǹka.

Sɛ́mù yaàbíiká háá é ta̰ntá-nà Àbádám̀

¹⁰ Ǹtɛ Sɛ́mù yaàbíiká fùdi yɛɛ̀kaàma: Ò de káá beeká kɔ̀ta-dà, é pɛdá bíidatá kà ta yèdi tonà Ààpàkìsádì. Nɛ́ɛsṵ́náku de pa̰nà é yɔ̀a, kà beeká kàdɛ́ɛ́-dà é ka̰há k'ó nɛɛ́ tà pɛdá. ¹¹ Ààpàkìsádì pɛdáma dàhàka, k'ó tṵ́má pa̰ná fòùku mɛhɛká, beeká kɔ̀ɔnà nùm̀. Ò de pɛdà-á-ma bííhí tɔɔhí, dahí nà pohí. ¹² Kà Ààpàkìsádì é n'káá beeká púta̰a̰ nà kànùm̀ é pɛdá bíidatá kà ta yèdi tonà Sèdáà. ¹³ Sèdáà pɛdáma dàhàka, k'ó tṵ́má pa̰ná fòùku mɛhɛká, beeká kɔ̀ɔnà nàhì nà kàta̰a̰. Ò de pɛdà-á-ma bííhí tɔɔhí, dahí nà pohí. ¹⁴ Kà Sèdá é n'káá beeká púta̰di, é pɛdá bíidatá kà ta yèdi tonà Hèbɛ́ɛ̀. ¹⁵ Hèbɛ́ɛ̀ pɛdáma dàhàka, k'ó tṵ́má dii fòùku mɛhɛká, beeká kɔ̀ɔnà nàhì nà kàta̰a̰. Ò de pɛdà-á-ma bííhí tɔɔhí, dahí nà pohí. ¹⁶ Kà Hèbɛ́ɛ̀ é n'káá beeká púta̰a̰ nà kànàhì é pɛdá bíidatá kà ta yèdi tonà Pèdɛ́kì. ¹⁷ Pèdɛ́kì pɛdáma dàhàka, k'ó tṵ́má pa̰ná fòùku mɛhɛká, beeká kɔ̀ɔnà nàhì nà púta̰a̰. Ò de pɛdà-á-ma bííhí tɔɔhí, dahí nà pohí. ¹⁸ Kà Pèdɛ́kì é n'káá beeká púta̰a̰ é pɛdá bíidatá kà ta yèdi tonà Hèdèúù. ¹⁹ Hèdèúù pɛdáma dàhàka, k'ó tṵ́má pa̰ná fòùku mɛhɛká, beeká kɔ̀ɔnà dɛ́ɛ́ nà kàwɔ́ì. Ò de pɛdà-á-ma bííhí tɔɔhí, dahí nà pohí. ²⁰ Kà Hèdèúù é n'káá beeká púta̰a̰ nà kàdɛ́ɛ́ é pɛdá bíidatá kà ta yèdi tonà Sèdúkì. ²¹ Sèdúkì pɛdáma dàhàka, k'ó tṵ́má pa̰ná fòùku mɛhɛká, beeká kɔ̀ɔnà dɛ́ɛ́ nà kàyehì. Ò de pɛdà-á-ma bííhí tɔɔhí, dahí nà pohí. ²² Kà Sèdúkì é n'káá beeká púta̰a̰ é pɛdá bíidatá kà ta yèdi tonà Nàhɔ́ɔ̀. ²³ Nàhɔ́ɔ̀ pɛdáma dàhàka, k'ó tṵ́má pa̰ná fòùku mɛhɛká, beeká kɔ̀ɔnà dɛ́ɛ́. Ò de pɛdà-á-ma bííhí tɔɔhí, dahí nà pohí.

²⁴ Kà Nàhɔ́ɔ̀ é n'káá beeká púdɛ́ɛ́ nà kà wɔ́ì é pɛdá bíidatá kà ta yèdi tonà Tèdáà. ²⁵ Tèdáà pɛdáma dàhàka, k'ó tṵ́má é pa̰ná fòùku mɛhɛká, beeká kɔ̀ta nà píta nà kàwɔ́ì. Ò de pɛdà-á-ma bííhí tɔɔhí, dahí nà pohí. ²⁶ Kà Tèdáà é n'káá beeká púyehì é pɛdá bíidahí hìta̰a̰, Àbádám̀, nà Nàhɔ́ɔ̀ nà Hàdánì.

²⁷ Ǹtɛ Tèdáà yaàbíiká: Mɛnń-dà pɛdà Àbádám̀, nà Nàhɔ́ɔ̀ nà Hàdánì. Kà Hàdánì é pɛdá bíidatá é tà yíí è yɔ̀ Dɔ̀ɔ́tì. ²⁸ Dɔ̀ɔ́tì pɛdáma dàhàka, k'ó kpíí kà pa báàa Tèdáà káà fòù. Ò de kpíi, yɔtí p'òò pɛdà-ti mɛhɛká-dà, kà pà tì yún è tonà Údì kà tì péé Sàdìdéè teǹka mɛhɛká. ²⁹ Kà Àbádám̀ é tódá poòo k'òo yèdi tonà Sàdàyíì. Kà Nàhɔ́ɔ̀ mɛ̀ɛ té tódá o kóoó k'òo yèdi tonà Mììkáà, k'ò yòǹ Hàdánì bíipoòta. Ye Hàdánì-dà de tṵ́mà pɛdà Yìsìkáà. ³⁰ Sàdàyíì há̰ de Yɛ̰dí-ma, ò de pú káá bíída.

³¹ Kà Tèdáà é tódá o bíitá Àbádám̀ nà ta poòo Sàdàyíì, é pɛ́ɛ́ é tódá nà o yaàbíidí Dɔ̀ɔ́tì, Hàdánì pɛdà-ko kà pá yídá Údì yɔtí, Sàdìdéèpa teǹka é tadí Kànàáà teǹka mɛhɛká. Kà pá n'tɔdì, é ta̰ntá yɔtí tìcɔ̰́tì kà pà tì tonà Kàdáǹ é tɛ̀i é kaàdi ye pesá. ³² Tèdáà fòùmu beeká wɛǹni de yòǹ beeká kɔ̀ɔnà dɛ́ɛ́ nà kànùm̀-dà, k'ó kpíí Kàdáǹ yɔtí mɛhɛká.