Cetáma 17

Àbádám̀ yèdi cehènamá, nà yḭdó Weèdi ò kɔ̰́ɔ̰̀-ko k'ò yòǹ pa múnáma kóoó

¹ Kà Àbádám̀ ní n'káá beeká púwɔ́ì nà kà wɔ́ì, kà Kɔ́yɔ̀ɔ Weèdi óò fodá-ní, óò caka è yɔ̀: Mmí-dà yòǹ Weèdi nɔɔ̀ti wɛǹni kpɛ́ɛdí. Ní n'tṵ̀n n cɔ̀ku coóma hḭ́ǹka, é n'kɔ́ɔ́ pa̰á̰kpákpààma màcɔ̰́mà. ² N kó pa̰ná n múnáma nà fɔ̰́ń-dà, é tṵ́má ya̰dá wɛ́kàna a yaàbíiká sàma. ³ Ò yèkaà-ma mɛma, k'ó cemá sḭ́ná o yuudí é hìu háá nà teǹka, kà Weèdi é sɔ̰kadá è yɔ̀: ⁴ Ǹtɛ múnáma m'a pa̰kú-nà-ma: A kó ya̰dá n'yòǹ heèka dɔ́ɔ́di yàdo-dà. ⁵ Pà koò pú kó n'à n'tonà Àbádám̀, a yèdi-dà kó n'dɛɛ̀ Àbààhám̀, mìì tee-sá m'a kpáhìnì heèka dɔ́ɔ́di yàdo-dà. ⁶ N kó ya̰dá wɛ́kàna-á-ma a yaàbíiká kà ká n'wɔ̰ǹti sàma. Heèka dɔ́ɔ́di nà wóópa mɛ̀ɛ kó ya̰dá yɛɛ̀ni-í-ma-ní a fɔ̰̀di. ⁷ N múnáma kó m'péé nà fɔ̰́ń-dà. Fɔ̰́ń kú dàhàka, ká n mà sɔ̰kadá n'àa yaàbíiká wɔ̀ǹti wɛǹni mɛhɛká. Ye múnáma-dà héé: N kó n'yòǹ a Weèdi-dà n'àa yaàbíiká kpɛ́ɛdí, k'yé n'kɔ́ɔ́ yɔ̀ɔmá. ⁸ N kó ya̰dá feèda-á-ma Kànàáà tenkà a péé-kà kú hḭ́ńkà è yòǹ cà̰ǹn, é kà n'àà pa̰a̰. A kú dàhàka, ká n kà pa̰a̰ a yaàbíiká, kà ká kà n'tee k'yé n'kɔ́ɔ́ yɔ̀ɔmá, kà n ní n'yòǹ ka Weèdi. ⁹ Kà ní tṵ́má tuɛ̀ha è yɔ̀: Nɛ ní m'púsí sukú n múnáma n nɛ kɔ̰́ɔ̰̀-ma, fɔ̰́ń n'àa yaàbíiká wɔ̀ǹti wɛǹni mɛhɛká. ¹⁰ Ǹtɛ nɛ yònà é m'pa̰kú-sa ye múnáma mɛhɛká, fɔ̰́ń n'àa yaàbíiká: Mɛ̀ǹǹ yòǹ-ko dɔɔ̀o wɛǹni nɛ cɔhɔ̀ka yònà ó ca̰ntá-ma. ¹¹ Ye ca̰ntámà-dà mɛ̀ɛ kó n'yòǹ yḭdó mɛ̀ǹǹ kó m'bɛkú-ko è yɔ̀ mmí nà nɛ́na, ti pa̰à̰ múnáma. ¹² É tódá sá̰mà, háá nà yààyó, bíídatá wɛǹni pà kó pɛdá-ta a hɔ̰́ɔ̰̀ta mɛhɛká, a yònà é tà ca̰ntá-ma ta daa-niì daadí. Yè mɛ̀ɛ pú kó n'yòǹ a mɔ́nń kpɛ́ɛhí cɔ̰́ɔ̰̀di, bá n'àa núm̀ma kpɛ́ɛhí, a yònà é hì ca̰ntá-ma. Núncà̰ma a kó tṵ́má dontá-pa kà pà pú yòǹ a hɔ̰́ɔ̰́tà-kpɛ́ɛpá, a mɛ̀ɛ té yònà é pà ca̰ntá-ma. ¹³ Nììdo pà baà pɛdà-ko a hɔ̰́ɔ̰̀ta mɛhɛká k'ò yòǹ a núǹn, n'àa kó dontá-ko nà díífa, pa wɛǹni yònà é ca̰ntá-ma, k'yé teha kà n múnáma yḭdó é m'péé nɛ nawɔ̰̀ǹku hḭ́ǹka è bɛkú è yɔ̀ ye múnámà kɔ́ɔ́ yɔ̀ɔmá. ¹⁴ Dɔɔ̀o mɛ̀ǹǹ pú kó teha-kó é ca̰ntá, kà n'ɔ́ɔ̀ dèda o nìku cɔhɔ̀ka óò kɔ̀ù, mìì tee-sá ò pú tṵnà n múnáma nùka hḭ́mpú.

¹⁵ Kà Weèdi tṵ́má caka Àbààhám̀ è yɔ̀: A koò dá yíí a poòo è yɔ̀ Sàdàyíì, á ò n'tonà sá̰mà Sàdáà. ¹⁶ N k'óò kóná-ma, áa pa̰a̰ bíitá nà mɔnń. N k'óò kóná-ma, k'ó hḭn heèka dɔ́ɔ́di màa. Bá boocí dɔ́ɔ́di wóópa kó yɛɛ̀ni-nà-ní o pɛdáma mɛhɛká-dà. ¹⁷ Kà Àbààhám̀ é tṵ́má sḭ́ná o yuudí, é hìu háá nà teǹka, é dɛhí. Ò de maàhu o yàma mɛhɛká è tonà: Mmí mɛ̀ǹǹ káá-ko beeká kɔ̀ta, n kó nɛɛ́ tṵ́má pɛdá-dà? Sàdáà mɛ̀ǹǹ mɛ̀ɛ té káá-kò beeká púwɔ́ì, ntɛ́ ò kó tṵ́má hḭmà é pɛ̰ɛ̰̀da bíitá? ¹⁸ K'ó caka Weèdi è yɔ̀: Kà fɔ̰́ń baà kó hédá kà Ìsìmàyɛ́dì é n'fòù, k'à ò púsí sukú, yè n sà-á-ma. ¹⁹ Kà Weèdi yɔ̀: Á̰à̰, mɛma dɔ. A poòo Sàdáà k'áa pɛɛ́-nà-á-ma bíídatá, k'á tà yíí è yɔ̀ Ìsáákì. Nà mɛnń-dà n kó pa̰á̰-ma n múnáma mɛ̀mà kɔ́ɔ́-ma yɔ̀ɔmá, o kú dàhàka, ká n mà sɔ̰kadá n'ɔ̀ɔ yaàbíiká. ²⁰ Há̰kà, cɔhàdi a pa̰à̰-di Ìsìmàyɛ́dì hḭ́ǹka, n nì yèkaà-á-ma. N k'óò kóná-ma, k'ò mɛ̀ɛ té wɛ́dá dɛ́dɛ́í, é dɛ́tá yaàbíiká sàma. Ò kó pɛdá bíídahí píì-hìdɛ́ɛ́-dà, hi wɛǹni kà hì mɛ̀ɛ ya̰dá hḭn wóópa. Ò kó ya̰dá n'yòǹ bookú sàku yàdo-dà. ²¹ Àmá, nà Ìsáákì-dà n múnáma kó m'péé-nà-ma, bíitá Sàdáà k'áa pɛdá-ta fòma sá̰mà kú wɔ̀ni. ²² Weèdi ò wɛɛ̀-nà-ma mɛma é yɔ̀ɔ, kà n'ɔ́ɔ̀ hédá é tón é dìsi hḭ́ńkà bɛ́ka. ²³ Ye daadí ni cɔ̰́ɔ̰̀di, kà Àbààhám̀ é pa̰á̰ Weèdi de hḭ́n ó pa̰á̰-sa. K'ó tódá o bíitá Ìsìmàyɛ́dì, nà nún-daapá pà de pɛháà-pa o hɔ̰́ɔ̰̀ta mɛhɛká, é pɛ́ɛ́-nà ò de dom-pá nà díící, bíídahí mɛ̀ǹhì baà de yòǹ-hi wɛǹni o hɔ̰́ɔ̰́tà-kpɛ́hí, é hì ca̰ntá. ²⁴ Ò de káá beeká púwɔ́ì nà kà wɔ́ì-dà, ò de ca̰ntà tḭ́ń benní o cɔ̰́ɔ̰̀di. ²⁵ K'òo bíitá Ìsìmàyɛ́dì mɛnta káá, beeká píì-kàta̰a̰. ²⁶ Ye daadí ni cɔ̰́ɔ̰̀di, kà pá pɛ́dá é ca̰ntá mɛnń n'ɔ̀ɔ bíitá. ²⁷ O hɔ̰́ɔ̰́tà-kpɛ́ɛpá wɛǹni mɛ̀m̀pà de yòǹ-pa daapá kà pà pà pɛdà o hɔ̰́ɔ̰̀ta mɛhɛká, yoo k'ò pà dontà nà díící cà̰ma pesá, pà de pɛ́dà é pà ca̰ntá-ma nà mɛmpá.