Cetáma 18

Weèdi tṵ́mà wɛdà è yɔ̀ Sàdáà kó pɛdá bíitá

¹ K'yé m'péé, kà kɔ́yɔ̀ɔ Weèdi é tṵ́má fodá Àbààhám̀ Màmùdéè teesàna mɛhɛká, k'ò kàdi o fḭ́ḭkú há̰ńnùdi. Nì de ò fodà-ní k'yè yòǹ wèǹku sekiseki-dà. ² K'ó yoòda o nɔ̀ǹci, é n'hɔ̰́tà nìi pàta̰a̰ nɛɛ̀hi òò tɔ́sí-nà. Ò pà dɛ́hà-ma, é cemá yídá-ní n'ɔ̀ɔ nàmɔ̀ni há̰ńnùdi pesá, é cocí é taá pà codá-ní. K'ó tɛ̀i é hìu dúùka é dɔɔ́ háá nà teǹka, ³ ye wɔ̀ni é caka p'oòcɔ̰́ è yɔ̀: Diìda Weèdi n dakpɛ̰́ǹn! Dá teha é ka̰há n hɔ̰́ɔ̰̀ta è pú n'nɛɛ̀hi é yà̰à̰ nɛ́ɛmá. ⁴ Yàà pá pɛhɛ-ní nɛ́ɛmá kà nɛ́ pɔkàda nɛ tààka, é muhipa teepù mɛmù kú fɔ̰̀di, ⁵ ká n taá pɛha-ní dipú cɛ̰́ma é nɛ kɔ̰́ɔ̰́, kà nɛ́ dii é dɛ́tá nɔɔ̀ti é nɛɛ́ sɔ̰kadá cɔ̀ku. Mɛma, nɛ koò pú kó n'yɛɛ̀ni n hɔ̰́ɔ̰̀ta hécí. Kà p'óò tɛ̰́ná è yɔ̀: Toò! Taá pa̰ná a hḭ́mpú. ⁶ K'ó fitá é tón fen-fem̀ma o poòo Sàdá pesá, pa fḭ́ḭkú mɛhɛká, é tɛ̀i è yɔ̀: Beé fem̀ma yòmu waǹni màta̰a̰, é butá é pa̰ná pɛ̰́ḿpɛ̰́ǹti. ⁷ K'ó yídá é cocí é taá naàpḭ́ḭ̀di mɛhɛká, é tɛ̀i é baàta-ní naàbíidí cɛ̰́hídi mɔ́nní, kà ni màǹci kó n'naa cécíma, é tɛ̀ni é nì kɔ̰́ɔ̰́ o dapàǹn òcɔ̰́, k'ó nì dɔ̀hà fen-fem̀ma, é nì béná. ⁸ Màǹci bii tḭ́ń wɔ̀ni, k'ó cì tóó-ní é cì hḭ́ná ye cà̰ma yìhìka. K'ó tóó-nà-ní naà-mɛhika̰ntáma, nà naà-mɛhibɛ́m̀ma é tɛ̀ni é pà hḭ́ná. Kà pá n'yon, k'ó taá pà pɛ̀na-nà, é kaàdi bɛ́ɛ́kú ye teepú fɔ̰̀di è pà wáń kà pà yon é n'yònà pa kú bookú pa̰á̰ma.

⁹ Kà p'óò béka è yɔ̀: A poòo Sàdá péé ya? K'ò yɔ̀: Ò péé fḭ́ḭkú mɛhɛká. ¹⁰ K'yèe cà̰ma, p'oòcɔ̰́ yɔ̀: Fòma, sá̰mà kú wɔ̀ni, n kó n'tóńti-ní miì k'àa poòo Sàdá húí bíidatá-dà. È hɔ̰́tà Sàdá kaàdi ye fḭ́ḭkú há̰ńnùdi, Àbààhám̀ dàhàka è besí. ^11-12 K'ó dɛhí o yàma mɛhɛká, mìì tee-sá mɛnń n'ɔ̀ɔ dɔɔ̀ɔ pà de kpɛ̰́ń-ma sàma. Ò de ha̰tà-á-ma pɛdá wɔ̀ni. K'ó wɛdá o yàma mɛhɛká è yɔ̀: N kpɛ̰́ń-dà-ma kà n dɔɔ̀ɔ mɛ̀ɛ té kpɛ̰́ń, n tṵ́mà yòǹ poòo nkɛ́ɛ̀ kà dɔɔdí múnáma bìnɔ kó nà n káá? ¹³ Kà Kɔ́yɔ̀ɔ é caka Àbààhám̀ è yɔ̀: Badà tee kà Sàdá é dɛhí, é wɛdá o yàma mɛhɛká è yɔ̀, ò koò pú kó nɛɛ́ pɛdá bíitá, ò kpɛ̰́ń-dà sàma? ¹⁴ Yècɛ̰́ɛ̰̀ péé-ma mìì dɔǹ-nà-sa Weèd'aa? Mmí-dà mà n'à hḭ́n, fòma sá̰mà kú wɔ̀ni n kó n'tóńti-ní miì kà Sàdá húí-ma bíídatá. ¹⁵ Ò yèkaà-ma mɛma, kà wantafɔ̰̀di óò cɛ̰dí, k'ó nɔ̀hì è yɔ̀ ò pú dɛhí. Kà Kɔ́yɔ̀ɔ yɔ̀: Dá nɔ̀hì, a dɛhí-ma.

Àbààhám̀ cɔ̀haà Weèdi sùúdo Sòdɔ́mù hḭ́ǹka

¹⁶ Mii yɔ̀ɔ-má, k'yèè nììpa é yídá é cɛ̰ɛ̰́ cèmu, é coá Sòdɔ́mù bɛ́ka. Kà Àbààhám̀ é yídá é pà bɛ́hìna é pà hḭ́ná cɔ̀ku. ¹⁷ Mɛmá-dà, kà Kɔ́yɔ̀ɔ Weèdi é caka o cɔ̰́ɔ̰̀di è yɔ̀: Niyà̰ n kó pa̰á̰-sà-ní, yè pú sudi n yè sɔ̀na Àbààhám̀ è p'éè n'ɔ̀ɔ̀ cakáà. ¹⁸ Ò kó ya̰dá hḭn bookú sàku mɛ̀ǹkù kpenì-ku yàdo-dà. N'ɔ̀ɔ kú yèdi-dà teǹka boocí wɛǹni kó ya̰dá dɛ́tá-ma kónáma. ¹⁹ N ò ta̰kadà è yɔ̀ ó kɔ̰́ɔ̰́ nùdi o bííhí, n'ɔ̀ɔ bookú kpɛ́ɛpá wɛǹni kà pá n'tṵ̀n n Weèdi kpɛ̰́ǹti nùùka nùka hḭ́mpú, é m'pa̰kú mìì suu-sá è cɔ́dí, k'yé teha ká n deèda n nùka n hḭ́nà-ka è yɔ̀ n kó kà pa̰ná o hḭ́ǹka. ²⁰ Kà Kɔ́yɔ̀ɔ Weèdi é caka Àbààhám̀ è yɔ̀: nìku kɔǹ-nà sàma Sòdɔ́mù yam̀ma nà pa pa̰á̰kpákpààma kpɛ́mú, mìì tee-sá pa sḭ̀ḭ̀ma wɛhikáà sàma. ²¹ N kó cútá-ma ka bɛ́ka é taá dentá, kà pà pa̰kú-dà nà mɔ́masí n you kà nììpa pà kɔǹ-nà-sa kú hḭ́ǹka. Kà pà pa̰kú-dà ye kú kpákpààmà ma wɛnnì, kà n ní n'yá̰á̰

²² Ye wɔ̀ni, cà̰ma mɛhɛká, kà pàdɛ́ɛ́ yídá ye pesá é coá Sòdɔ́mù bɛ́ka, kà Kɔ́yɔ̀ɔ Weèdi mɛnn é cá̰ńtá ye pesá è nɛ̀hi-nà Àbààhám̀. ²³ Kà Àbààhám̀ é cèn óò pàa-ho, è yɔ̀: N teù, bemú hḭ́ǹka, a kó pɛ́dá kɔ̀ù-ú-dà niìsudó nà niìsḭ̀ǹn? ²⁴ K'yè púdí a kó tɛ̀i é dɛ́há-ma niìsuupá púnùm̀ ye yɔɔtì mɛhɛkà kà pà pa̰kú a yàma kpɛ̀i-sá. Nà mɛma baàkaà, a kó tì pɔ́dá-dà? A pú kó tì kɔń ti sḭ̀ḭ̀ma náńkú é tì hédá n'ɛ̀ɛ nììpa púnùm̀ kpɛ́mú? ²⁵ Mii kó n'kɔ́ɔ́ cɔ̀ku, k'à pɛ́dà niìsḭ̀ǹǹ nà niìsudó è fíɔ́wà, kà pa toòka yɔ̰́ḿma sá̰á̰. Ye kú niyà̰ p'áa sàà-nà. Fɔ̰́ń mɛ̀ǹǹ kó sída-kó nìku wɛǹni, a pú kó bɛka a coóma? ²⁶ Kà Kɔ́yɔ̀ɔ Weèdi óò tɛ̰́ná è yɔ̀: Kà n dɛ́hà niìsuupá púnùm̀ Sòdɔ́mù yɔtí mɛhɛká, n kó tì kɔń-ma ti sḭ̀ḭ̀ma náńkú é tì hédá ti wɛǹni nà mɛmpa kú nɔɔ̀ti. ²⁷ Kà Àbààhám̀ é tṵ́má wɛdá è yɔ̀: Ǹtɛ ká n nɛɛ́ potá kṵnnɔ̀ǹfa é wɛɛ́-nà Kɔ́yɔ̀ɔ n Weèdi, mmí mɛ̀ǹǹ yòǹ-ko tá̰pùdùmu nà tápémú. ²⁸ K'yè púdí k'á tɛ̀i é mɔ́ńka niìsuupá púnùm̀ é dɛ́há púnàhì nà pànùm̀. Pànùm̀ mɛ̀m̀pà dóńtà-pà kpɛ́mú kó nɛɛ́ n'tee-é-dà k'á pɔ́dá ye yɔɔtì wɛnnì? Kà Kɔ́yɔ̀ɔ Weèdi yɔ̀: Óò! Kà n tɛ̀i è dɛ́há niìsuupá púnàhì nà pànùm̀, n pú kó tì pɔ́dá. ²⁹ K'ò tṵ́mà yɔ̀: K'yè púdí k'á tɛ̀i é dɛ́há niìsuupá púnàhì sá̰à̰di. Kà Kɔ́yɔ̀ɔ Weèdi yɔ̀: N pú kó pa̰ná yècɛ̰́ɛ̰̀ nà mɛmpa kú nɔɔ̀ti. ³⁰ K'ó tṵ́má wɛdá è yɔ̀: Diìda Weèdi n Teù! Fɔ̰́ɔ́di dá yetá áa cɛ̰dí kà n tṵ́mà wɛdà. K'yè púdí k'á tɛ̀i é dɛ́há niìsuupá púta̰di ye pesá. Kà Kɔ́yɔ̀ɔ Weèdi yɔ̀: N pú kó pa̰á̰ yècɛ̰́ɛ̰̀, kà n tɛ̀i è dɛ́hà ye pesá niìsuupá púta̰di. ³¹ K'ò yɔ̀: Pa̰á̰ mùyɔ̰ n Teù nà békàbékàfa n káá-fa. K'yè púdí k'á tɛ̀i é dɛ́há niìsuupá púdɛ́ɛ́ sá̰à̰di. Kà kɔ́yɔ̀ɔ Weèdi yɔ̀: N pú kó pɔ́dá ye yɔtí nà ye nììpa púdɛ́ɛ́ kpɛ́mú. ³² Ye wɔ̀ni k'ò yɔ̀: Fɔ̰́ɔ̰́di dá a cɛ̰dí n Teù, n dèǹdèma-dà n kó wɛdá-ma. K'yè púdí niìsuupá píta-dà a kó tɛ̀i é dɛ́há-ma ye yɔtí mɛhɛká. Kà Kɔ́yɔ̀ɔ Weèdi yɔ̀: N pú kó tì pɔ́dá nà mɛmpa kú yuudí kpɛ́mú. ³³ Kɔ́yɔ̀ɔ Weèdi ò yɔ̀ɔ-nà-ma wɛmá, é ka̰há̰, kà Àbààhám̀ mɛnn é tón é kòǹ o hɔ̰́ɔ̰̀ta.