Cetáma 19

Sḭ̀ḭ̀ma Sòdɔ́mù yam̀ma de pa̰kú-ma

¹ K'yèe Weèdi tɔntɔndipá pa dɛ́ɛ̀ka é ta̰ntá-ní Sòdɔ́mù yɔtí mɛhɛká k'yè yòǹ yokamá. È hɔ̰́tà Dɔ̀ɔ́tì kàdi ye yɔtí há̰ńnùdi, bɛ̀m̀bɛ̀ni ye yɔtí kpɛ̰́m̀ma de peèku-dí. Ò pà dɛ́hà-ma, é cemá yídá é taá pà codá-ní. K'ó tɛ̀i é hìu dúùka é dɔɔ́ háá nà teǹka. ² Ye wɔ̀ni é pà caka è yɔ̀: N dakpɛ̰́m̀ma-nà, diìi nà Weèdi é dɔdá nɛ dapàǹn hɔ̰́ɔ̰̀ta, é taá pɔkàda nɛ tààka é weń ye pesá, ká̰ńweǹni ká̰ńyɛ̰̀ǹfa é nɛɛ́ sɔ̰kadá nɛ cɔ̀ku. Kà pá yeda è yɔ̀: Óò, ti pú yɛtì a hɔ̰́ɔ̰̀ta, ti kó taá weń tapaàdi-dà. ³ K'ó pà pɛ̰́kapa dɛ́dɛ́í háá kà pá yó teha é dɔdá o hɔ̰́ɔ̰̀ta. K'ó tɛ̀i é pà béná dasààdi dipú, é pà pa̰á̰-nà pɛ̰́ɛ̰̀ka mɛ̀ǹkà kɔ́ɔ́-ka yòmu *yíkànasá, é pà hḭ́ná kà pá dii. ⁴ Pà yɔ̀ɔ ye dipú-dà è há̰ mum pú dɔɔ́, kà Sòdɔ́mù yam̀ma é tɛ̀ni é yéńtá ye hɔ̰́ɔ̰̀ta, é tódá dapàm̀-bííhí háá dakpɛ̰́nhí. Ye yɔtí nììpa wɛn-wɛǹni de yè péé-ma, òcɔ̰́ǹ de pú sɔ̰́ńtà. ⁵ Kà pá yíí Dɔ̀ɔ́tì óò béka è yɔ̀: Ntɛ́ nììpa mɛ̀m̀pà a bátà-pa yohokù? Pà dèna-ní kà tí pà dɔɔ́-nà 19:5 Sòdɔ́mù nììpa de dɔɔ̀-nà pa tɔɔ̀pa kpákpààma-dà: Dɔɔ̀ɔ de hɔ̰́ nɛɛ́ dɔɔ́-nà-á-dà o daatɔɔ̀o, kà poòo é dɔɔ́-nà o potɔɔ̀o. Mií-dà tee kà pà de kpɛ̀i é dɔɔ́-nà Weèdi tɔntɔndipá, kà pà yòǹ daapá. ⁶ Kà Dɔ̀ɔ́tì é yɛǹni tapaàdi pa pesá, é nɛɛ̀hi o hɔ̰́ɔ̰̀ta há̰ńnùdi, é tɛ̰́ná kpená cɔ̀di o dàhàka. ⁷ K'ó pà caka è yɔ̀: N dópàpa-nà, n nɛ sɛ́úkú-ma. Nɛ dá teha é pa̰á̰ ye kú sḭ̀ḭ̀mà. ⁸ N káá bíípohí hìdɛ́ɛ́ kà hì mum pú yá̰á̰ daapá. Nɛ́ héé ká n hì nɛ deèna-ní é hì nɛ kɔ̰́ɔ̰́ kà nɛ́ hì pa̰á̰ nɛ yàma kpɛ̀i-sá. Há̰kà, mìì héé-sa ye nììpà-ní, nɛ́ wɛ̰́ɛ̰́ é pà héé-ho nɛ dá pà pa̰ná yècɛ̰́ɛ̰̀, mìì tee-sá pà yòǹ n cà̰ma-dà. ⁹ Kà p'óò tɛ̰́ná è yɔ̀: Yídá ye pesà-ní! Cà̰ǹǹ fɔ̰́ń, fɔ̰́ń-dà mɛ̀ɛ té kó ti sída? K'à hɔ̰n mɛma kà t'áa pa̰ná mìì kó n'wɛhi-nà-sa pa kpɛ́ɛsá. Kà p'óò sùsì kpeéma, é pàdi há̰ńnùdi è kó pɔ́dá cɔ̀di. ¹⁰ K'yèe cà̰ma é dokàda é cɛ̰ɛ̰́ Dɔ̀ɔ́tì nà pa nɔ̀hi, óò yɔ̰́ń óò dúù-ho hɔ̰́ɔ̰̀ta mɛhɛká, é tɛ̰́ná kpená cɔ̀di. ¹¹ Ye wɔ̀ni kà pá yɔɔ̀na mɛ̀m̀pà de tísí-pa wɛǹni ye hɔ̰́ɔ̰̀ta há̰ńnùdi é cɛ̰ɛ̰́-nà pa dapàm̀-bííhí háá nà pa kpɛ̰́m̀ma mɔ́mpá, kà pá pɛha há̰ńnùdi é nì mɔ́ńka.

Dɔ̀ɔ́tì yɛ̀ɛ̀ma Sòdɔ́mù mɛhɛká

¹² K'yèe cà̰ma é caka Dɔ̀ɔ́tì è yɔ̀: A kpɛ́ɛpá mɛ̀m̀pà péé-pa wɛǹni ye yɔɔtì mɛhɛkà, a cɛ̀kàpa mɛ̀m̀pà káá-pa a sepam̀ma, a bíídahí yoo a bíípohí, mɛ̀m̀pà baà yòǹ-pa wɛǹni a kpɛ́ɛpá, á pà dèna yɔɔtì mɛntì kú mɛhɛká. ¹³ Ti kó tì pɔ́dá-ma, mìì tee-sá nììpa kɔn-nà sàma ti yam̀ma pa̰á̰kpákpààma kà pa dawòka é ta̰ntá Weèdi pesá. Mɛmá-dà tee kà ní ti tɔn-ní è yɔ̀ tí tɛ̀ni é tì pɔ́dá. ¹⁴ Kà Dɔ̀ɔ́tì é taá dɛ́há o cɛ̀kàpa mɛ̀m̀pà káá-pa o sepàm̀ma é pà caka è yɔ̀: Yɛ̀ɛ̀-nà fem̀ma yɔɔtì mɛntì kú mɛhɛká, mìì tee-sá Kɔ́yɔ̀ɔ Weèdi kó tì fíɔ́wá-ma. Há̰kà kà pá tódá o wɛmá é mà tàa yɔɔdí. ¹⁵ K'yé n'wekàta, k'yèe Weèdi tɔntɔndipá é pɛ̰́kapa Dɔ̀ɔ́tì è yɔ̀ ó pa̰á̰ fem̀ma. Pà de ò kpákádí è tonà: Yídá é tódá a poòo n'àa sepàm̀ma pa dɛ́ɛ̀ka kà nɛ́ yɛ̀ɛ̀ ye yɔɔtì mɛntì-ní, kà mɛma dɔ, nɛ kó féná nɛ wɔ̰ǹni-dà Kɔ́yɔ̀ɔ Weèdi kó fíɔ́wá tḭ́ń wɔ̀ni ye yɔɔtì-ní. ¹⁶ K'ó n'hɔ̰n hɔ-hɔda, kà pá cɛ̰ɛ̰́ o nɔ̀hi, n'ɔ̀ɔ poòo kpɛ́hí, n'ɔ̀ɔ bíípohí hi dɛ́ɛ̀ka kpɛ́hí, é pà dèna ye yɔtí mɛhɛká, mìì tee-sá Kɔ́yɔ̀ɔ Weèdi de kpɛ̀i é dontá pa wɔ̰ǹni-dà. ¹⁷ Pà pà dènà-ma mɛma ye yɔtí, k'yèe Weèdi tɔntɔndipá p'oòcɔ̰́ yɔ̀: Cocí é dontá a wɔ̰ǹni. A dá yetá wáńtá a dàhàka, a mɛ̀ɛ dá nɛɛ̀hi yècɔ̰́ bɛ̀m̀bɛ̀nì mɛnì kú mɛhɛká. Cocí é taá sɔ̀di ta̰à̰ka hḭ́ǹka, k'à kpɛ̀i é n'fòù. ¹⁸ Kà Dɔ̀ɔ́tì óò tɛ̰́ná è yɔ̀: Óò n dakpɛ̰́ǹn, yè pú cédí mɛma. ¹⁹ N yá̰á̰-ma è yɔ̀ a m'bɛkáà a pa̰á̰suumá n'àa nììma sá̰ma é dontá-nà n wɔ̰ǹni. N há̰ a síɔ́kú-ma, mìì tee-sá n pú kó nɛɛ́ cocí é ta̰ntá ye ta̰à̰kà k'yèe sḭ̀mu mum pú n tɛ̀ni, ye wɔ̀ni n mɛ̀ɛ kó kpíí-ma. ²⁰ A mádí yɔɔ-bíísà miì, héé ká n cocí é taá sɔ̀di ye mɛhɛká. Miya̰ nà miì yè pú nátà-nà ye tɔɔ̀sa, n kó nɛɛ́ ta̰ntá-ma ye pesá é dontá n wɔ̰ǹni, nkɛ́ɛ̀ yè pú bíí-áa? ²¹ Kà Weèdi tɔntɔndikó óò tɛ̰́ná è yɔ̀: Toò, n teháà a hḭ́mpú. N kó tṵ́má áa pa̰á̰-ma nììma é hédá ye yɔɔtì a wɛì-tì. ²² Há̰ cocí fem̀ma é taá sɔ̀di ye pesá. K'à pú ta̰ntà n mum pú kó nɛɛ́ pa̰á̰ yècḭ́ḭ̀. Mɛmá-dà tee kà pá pa̰a̰ ye yɔtí yèdi è yɔ̀: Sòwáà, mìì kpɛ̀i é n'yɔ̀-sa sàmɔ́ǹya̰. ²³ Kà wèǹku é n'kó náá-ní, k'ò dúti Sòwáà yɔtí mɛhɛká. ²⁴ Ye wɔ̀ni-dà há̰ dɛɛ̀ Kɔ́yɔ̀ɔ Weèdi wɛ́i-má-ní nà hḭ́ǹka ha̰yɔ̰́kamú 19:24 Niìya̰-dà k'yè yònà tá̰à̰di è yònà nɔ́mú, è cɛ̰hú ha̰mú feǹ-fem̀ma. Mií-dà pà tṵ́mà toò-ma ha̰teepú tafá nà ha̰mú kà mú dɔdi Sòdɔ́mù nà Kòmɔ́ɔ̀ yɔtí hḭ́ǹka. ²⁵ K'ó fíɔ́wá pápáí ye yɔtí ti dɛ́ɛ̀ka nà ti nììpa, nà ti teǹka yɔɔ-bíímú wɛǹni, nà mìì yɛ̀ɛ̀-sa wɛǹni ti teǹka hḭ́ǹka. ²⁶ Kà Dɔ̀ɔ́tì poòo é wáńtá dàhàka, é kpáńtá é hḭn kɔ́ká-tá̰hà̰ku.

²⁷ K'yé weka ká̰ńyɛ̰̀ǹfa, kà Àbààhám̀ é pìi é taá nɛɛ̀hi bɛ̀m̀bɛ̀ni ò wontà nɛ̀hi-nà-di Weèdi kà pà kɔ̰̀di. ²⁸ K'ó diìda-ho Sòdɔ́mù nà Kòmɔ́ɔ̀ yɔtí bɛ́ka, é n'hɔ̰́tà nà ti bɛ́ɛ́cí wɛǹni, yúudaadí toó è yònà pà tɔ̀n-má fonsàdi. ²⁹ Weèdi de pɔ́ù tḭ́ń wɔ̀ni ye yɔtí Dɔ̀ɔ́tì de fòù-ti kú mɛhɛká, é deǹta-á-ma Àbààhám̀ kpɛ́mú. Nì de pú teháà k'yèe sḭ̀mu é dɔdi Dɔ̀ɔ́tì hḭ́ǹka.

Dɔ̀ɔ́tì n'ɔ̀ɔ bíipoohí, Mɔ̀hábùpa nà Àmɔ́nìpa boocí yɛɛ̀ni-sá-ní

³⁰ K'yé m'péé, kà Dɔ̀ɔ́tì é yídá Sòwáà yɔtí n'ɔ̀ɔ bíípoohí hidɛ́ɛ̀ka, é póńtá é taá kaàdi ta̰à̰ka hḭ́ǹka. Ò de wani-í-ma ò kó kaàdi-má ye yɔɔtì. K'ó taá m'péé tá̰a̰beèdi fɔ̰̀ɔ̰kú mɛhɛká. ³¹ Daadí yènì, k'òo bíipoòta kpɛ̰́ǹta é caka sàmɔ́ǹta è yɔ̀: Ti báàa kpɛ̰́ń-dà sàma, dɔɔ̀ɔ òcɔ̰́ǹ mɛ̀ɛ kɔ́ɔ́ bɛ̀m̀bɛ̀nì mɛnì, mɛ̀ǹǹ kó tɛ̀ni-kó-ní ti pesá é ti kádá é n'yònà pà hɔ̰mpú páàti wɛǹni. ³² Ya̰ní, kà tí niìa ti báàa naàma k'ó bɔń, kà t'óò múná-nà dɔɔdí, k'yé teha kà t'óò pɛdá bííhí. ³³ Ye yèǹka, kà pá niìa pa báàa naàma k'ó bɔń, kà kpɛ̰́ǹta é taá ò múná-nà dɔɔdí. Ò de pú yá̰á̰ tà tɛ̀ni tḭ́ń wɔ̀ni é dɔɔ́, nà tà yídà tḭ́ń wɔ̀ni. ³⁴ K'yé weka ká̰ńyɛ̰̀ǹfa, k'yèe bíipoòta kpɛ̰́ǹta é caka sàmɔ́ǹta è yɔ̀: Yè wontà dii! N wontà múnà-nà dɔɔdí ti báàa. Tí tṵ́má óò nìa naàma yenì kú yèǹka k'ó bɔń, k'à mɛ̀ɛ té tadí, k'yé teha kà t'óò pɛdá bííhí. ³⁵ Kà pá tṵ́má óò nìa naàma ye yèǹka, kà sàmɔ́ǹta é taá ò múná-nà dɔɔdí. Ò de pú yá̰á̰ tà tɛ̀ni é dɔɔ́ tḭ́ń wɔ̀ni, nà tà yídà tḭ́ń wɔ̀ni.

³⁶ K'yèe bííhí é póń hi dɛ́ɛ̀di. ³⁷ Kà kpɛ̰́ǹta é pɛdá bíídatá é tà yíí è yɔ̀ Mɔ̀hábù 19:37 Ye yèèdì kpɛ̀i é n'yɔ̀: Nììdo mɛ̀ǹǹ yɛ̀ni-kó-ní o báàkpɛ̰́ǹn fɔ̰̀di-dà. O báàa-dà de dɔɔ́-nà o sepàǹn kpɛ̰́ǹn óò pɛdá. Mɔ̀hábù yaàbíiká wɛǹni toó o kú yèdi-dà. Mɛnń-dà yòǹ yenì kú daadí bookú pà toò-ku Mɔ̀hábùpa yàdo. ³⁸ Kà sàmɔ́ǹta mɛ̀ɛ té pɛdá bíídatá, é tà yíí è yɔ̀ Bɛ̀ń-Àmíì 19:38 Ye yèèdì kpɛ̀i é n'yɔ̀: N nìku bíitá, mìì tee-sá ta báàa dɔɔ́-nà o sepàǹn sàmɔ́ǹn-dà é tà pɛdá. Mɔ̀hápù yaàbíiká toó o kú yèdi-dà. Mɛnń-dà yòǹ yenì kú daadí bookú pà toò-ku Àmɔ́nìpa yàdo.