Cetáma 20

Àbààhám̀ nà wódo Àbìmɛ̀dɛ́kì wɛɛkú

¹ Mii kú dàhàka, kà Àbààhám̀ é yídá Màmùdéè é ka̰há bɛ̀m̀bɛ̀ni pà toò-di *Nɛ̀kɛ́bù teǹka bɛ́ka. K'ó tɛ̀i é kaàdi yɔtí pà toò-ti Kàdɛ́sì nà Súù cɔhɔ̀ka, é yídá ye pesá é pɔɔ̀hi Kèdáà teǹka yam̀ma é tɛ̀i é pa̰á̰ daàka cɛ̰́ma. ² Ò de tɛ̀i ye pesá è cakú nììpa è tonà o poòo Sàdá yòǹ o potɔ̰ɔ̰̀ɔ̰-dà. Mɛmá-dà kà Àbìmɛ̀dɛ́kì, ye yɔtí wódo óò tódá óò kpáhìna o poòo. ³ Kà Weèdi é bɛka ni cɔ̰́ɔ̰̀di Àbìmɛ̀dɛ́kì o yèǹka dɔhɔ̀ti mɛhɛká, óò caka è yɔ̀: A kó kpíí-ma nà pooò a tódà-kò kú kpɛ́mú, mìì tee-sá ò káá dɔɔ̀ɔ-dà. ⁴ Yè há̰ de hɔ̰́tà ò mum p'óò múnà-nà dɔɔdí. K'ó tɛ̰́ná Weèdi è yɔ̀: N Teù, nà n nìku ti pú pa̰à̰-ma yetádi nìcɔ̰́nì! Nà mɛma baàkaà a kó ti kɔ̀ù-ú-dà? ⁵ Àbààhám̀ mɔ́nń-dà n cakáà è yɔ̀ o potɔ̰ɔ̰̀ɔ̰-d'òò héé. N maàhaà-sà nà n pa̰à̰-sà, n kɔ́ɔ́ yetádi nìcɔ̰́nì. ⁶ Ye dɔhɔ̀ti ti cɔ̰́ɔ̰̀di mɛhɛká, kà Weèdi óò caka è yɔ̀: N mɔ́nń yá̰á̰-ma è yɔ̀ a kɔ́ɔ́ yetádi a yàma mɛhɛká a maàhaà é pa̰á̰-sà-ní. Mɛmá-dà tee kà m'áa páńtá è yɔ̀ a dá ò múná-nà dɔɔdí, é pa̰á̰ sḭ̀ḭ̀ma n yìhìka. ⁷ Sá̰mà-ní, tɛ̰́ná ye pooò o dɔɔ̀ɔ, ò yòǹ wɛcako20:7 Weèdi wɛcako kú pa̰hití de pú pɛ́ɛ́-nà tɔɔ̀pa kpɛ́ɛtí. Mɛnn de nɛhù Weèdi yìhìka-dà kà n'ɔ̀ɔ̀ kɔ̰́nì ni wɛmá k'ò mà cakú nììpa. Ò de wɛì nà Weèdi yèdi cɔ̰́ɔ̰̀di-dà. Kpíìo yèdi de kɔ́ɔ́ o wɛmá mɛhɛká, báàa kpɛ̰́ǹn yèdi de kɔ́ɔ́, bá wàfa yèdi de pú yɛɛ̀hu-ní o wɛmá mɛhɛká-dà mɛ̀ǹǹ tɛ̰́nì-ko nìku n wɛmá. Ò kó cɔhà-á-ma a kpɛ́mú, k'yé teha k'à dá kpíí. K'à mɛ̀ɛ yedáà è p'óò tɛ̰́nà o dɔɔ̀ɔ, k'á n'yá̰á̰ è yɔ̀ fɔ̰́ń n'àa nìku wɛǹni, nɛ kó kpíí-dà nà mɔ́ma.

⁸ Kà Àbìmɛ̀dɛ́kì é yɔ́dá ká̰ńyɛ̰̀ǹfa pìpìdì, é yíí-ní o sɔ̰̀kànɔ̀ti wɛǹni, é tì caka Weèdi wontà ò cakáà-sa wɛǹni. Pa wɛǹni, kà wantafɔ̰̀di é pà cɛ̰ɛ̰́ sàma. ⁹ K'ó yídá é tɔn kà pá yíí-ní Àbààhám̀, k'ó tɛ̀ni k'óò béka è yɔ̀: M̀mɔ́ńya̰-dà a ti pa̰à̰-ma ye pesà-ní? Sḭ̀ḭ̀ma m̀mɔ́ma-dà m'a pa̰à̰-ma k'á n sukàda mmí nà n nìku kà tí yetá-nà Weèdi ma kú bookù-ní? A n pa̰nà nìdo pú yònà é pa̰á̰-sa-dà o tɔɔ̀ɔ. ¹⁰ M̀mɔ́ńya̰-dà a de maàhaà-ma é hḭn-nà mɛma. ¹¹ Kà Àbààhám̀ óò tɛ̰́ná è yɔ̀: N de maàhu è tonà tenkà mɛnkà kú nììpa pú wani Weèdi, pà kó n kɔ̀ù-ú-ma nà n poòo kpɛ́mú. ¹² Àmá mɔ́masí-dà ò há̰ yòǹ-ma n potɔ̰ɔ̰̀ɔ̰. Ti yòǹ báàa pɛdáko òcɔ̰́ kú bííhí-dà, mààpa-dà pú pɛ́ɛ́. Ye kú kpɛ́mú-dà tee n nɛɛ̀ óò tódá-ma k'ò yòǹ n poòo. ¹³ Nà Weèdi n denà-ma-dà-ní n báà hɔ̰́ɔ̰̀ta mɛhɛká kà n cèǹtì cèǹtì, n ò cakáà-á-ma è yɔ̀: Kà ti yɛɛ̀-sa wɛǹni, kà p'òò békáà k'ó diìda Weèdi é n'yɔ̀ n yòǹ o datɔ̰ɔ̰̀ɔ̰-dà. ¹⁴ Kà Àbìmɛ̀dɛ́kì óò tɛ̰́ná o poòo Sàdá, óò pa̰a̰-nà núm̀ma, poòpa nà daapá. É yídá tṵ́má ò pa̰a̰ hɔ̰̀ci, nà bɔɔhí nà nɛ̀ci. ¹⁵ K'ó tṵ́má óò caka è yɔ̀: Yɔɔtì mɛ̀ǹtì dɔɔ́-tì mɛntì è yòǹ mɛ̀ù, mmí-dà tì tee. K'à sɛɛ́ɛ̀-di bɛ̀m̀bɛ̀ni k'á taá kaàdi ni hḭ́ǹka. ¹⁶ K'ó caka Sàdá è yɔ̀: Ǹtɛ kà n pɛ̰ḭ a datɔ̰ɔ̰̀ɔ̰ díimáàka tòhìdi. Mií-dà kó n'yòǹ yḭdó mɛ̀ǹǹ bɛkú-ko a kpɛ́ɛpá wɛǹni, è yɔ̀ a kɔ́ɔ́ yetádi ye pa̰á̰ma mɛmà kú mɛhɛká. ^17-18 Yè há̰ de hɔ̰́tà-ho Weèdi-dà kpanà nà Sàdá kú nɔɔ̀ti, poòpa mɛ̀m̀pà de péé-pa wɛǹni Àbìmɛ̀dɛ́kì hɔ̰́ɔ̰̀ta mɛhɛká è yɔ̀ pà dá pɛdá. Kà Àbààhám̀ é cɔhà Weèdi è yɔ̀ ní kpekàna Àbìmɛ̀dɛ́kì n'ɔ̀ɔ hɔ̰́ɔ̰́tà-kpɛ́ɛpá. Kà n'ɔ́ɔ̀ kpekàna, é kpekàna o poòo, é kpekàna nà poòpa mɛ̀m̀pà de yòǹ-pa o núm̀ma, pa wɛǹni kà pá tón é pɛdá.