Cetáma 21

Ìsáákì pɛdáma

¹ Kà Kɔ́yɔ̀ɔ Weèdi é deǹta Sàdá kpɛ́mú, é deèda nùdi nì de ò hḭ́nà-di. ² K'ó póń é pɛdá Àbààhám̀ bíídatá o kpɛ̰́ǹti yèǹka, bɛ̀m̀bɛ̀ni Weèdi baà de ò beé-di. ³ Kà Àbààhám̀ é pa̰a̰ ye bíitá yèdi è yɔ̀ Ìsáákì. ⁴ Ta daa-niì daadí, k'ó tà ca̰ntá é n'yònà Weèdi de ò hḭ́mpú. ⁵ Ò de káá beeká kɔ̀ta-dà Ìsáákì pɛdá benní. ⁶ K'òo poòo Sàdá yɔ̀: Weèdi n pɛ̰ḭ yaǹnaakú è yɔ̀ n dɛhí. Mɛ̀m̀pà kú wɛnnì kó yekà-pa ye bíítà ta wɛmá, kó pɛ́dá é n dɛhí-nà-á-ma. ⁷ K'ó tuɛ̀ha è yɔ̀: Wodà de kó nɛɛ́ caka Àbààhám̀ k'ó teha è yɔ̀ daadí kó pɛdá, mmí Sàdá ká n húídá bíitá? Ǹtɛ há̰kà kà n ò pɛdà bíídatá o kpɛ̰́ǹti yèǹka.

Àbààhám̀ bɔ̀haà Àkáà n'ɔ̀ɔ bíitá Ìsìmàyɛ́dì

⁸ K'yèe bíitá é kpɛ̰́ń, k'ó tà cátá mɛhidí. Ye daadí kà Àbààhám̀ é pa̰ná dikàdikú daasàdi. ⁹ Daadí yènì, k'ó dɛ́há kà Ìsìmàyɛ́dì, ye Èsípútì núm-poòo bíitá dɛhikú Ìsáákì. ¹⁰ K'ó caka Àbààhám̀ è yɔ̀: Bɔhà númpoò mɛnǹ n'ɔ̀ɔ bíitá. O bíitá pú yònà tá ya̰dá totá a kpàtìdi nà n bíitá Ìsáákì. ¹¹ K'yèe wɛmá pú n'naakáà Àbààhám̀, mìì tee-sá Ìsìmàyɛ́dì mɛ̀ɛ té de yòǹ o bíitá-dà. ¹² Ye wɔ̀ni kà Weèdi óò caka è yɔ̀: A dá teha é yeda a núm-poòo n'ɔ̀ɔ bíitá bɔhàma kpɛ́mú. Teha, é pa̰ná a poòo Sàdá a hḭ́mpú wɛǹni. Nà Ìsáákì kú fɔ̰̀di-dà n kó ya̰dá deèna-má-ní yaàbíiká n de a hḭ́nà nùdi è yɔ̀ n k'áa pa̰a̰-ká. ¹³ Mìì héé-sa a núm-poòo kú bíitá, n kó hédá-ma kà bookú é yɛɛ̀ni ta fɔ̰̀di, mìì tee-sá tà mɛ̀ɛ té yòǹ a bíitá-dà.

¹⁴ K'yé weka ká̰ńyɛ̰̀ǹfa pìdìpìdì, k'ó yídá pɛha dipú nà nɛ́ɛmá déǹfa é kɔ̰́ɔ̰́ Àkáà, é tódá o bíitá óò kɔ̰́ɔ̰́ óò bɔ̀hà hɔ̰́ɔ̰̀ta. K'ó ka̰há é tɛ̀i é féé Bɛ̀ɛ́sèbáà càwenkú mɛhɛká. ¹⁵ Nɛ́ɛmá dóńtà-ma déǹfa mɛhɛká, k'ó wɛ́ɛ́-ho o bíitá tetá tàcɔ̰́tà kú fɔ̰̀di. ¹⁶ K'òo mɔ́nń é ka̰há é taá kaàdi bɛ́ɛ́kú, k'yèe ta̰nta̰ǹni behú-nà peǹku ta̰á̰ma màcɔ̰́. Ò de mà hḭn è màhu è tonà: Ò pú kpɛ̀i é dɛ́há o bíitá kṵ́mú. Mɛmá-dà k'ò de taá kaàdi bɛ́ɛ́kú è tà coó-nà è kɔǹ. ¹⁷ Kà Weèdi é yekà ye bíitá dawòni, kà ni tɔntɔndikó21:17 tṵ́má dentá cetáma 16:7 n'ɛ̀ɛ kú wekànamá óò yíí-ní nà hḭ́ǹka óò béka è yɔ̀: Bad'àà káá Àkáà k'à kɔǹ? Dá yetá n'wani. Weèdi yeèkaà-á-ma bíitá dawòni n'àa tà wɛ́i-sá-ní. ¹⁸ Yídá é taá tà tódá é tà báńta, mìì tee-sá n kó ya̰dá hédá kà bookú sàku-dà é yɛǹni ta fɔ̰̀di. ¹⁹ Ye wɔ̀ni kà Weèdi é dihìna o nɔ̀ǹci, k'ó wáńtá é dɛ́há bíńtadá é táá ya̰ntá-ní nɛ́ɛmá é sṵ́ná o deǹfa é tɛ̀ni é niìya̰ o bíitá. ²⁰ Kà Weèdi é m'péé-nà ye bíitá, kà tá kpɛ̰́ń, é hḭn ta̰m̀mu ta̰do mɔ́nń. Tà de péé càwenkú mɛhɛká-dà. ²¹ Ye càwenkú tà de péé-ku kú mɛhɛká-dà pà toò-ma Pàdánì, k'òo màa óò pa̰a̰ poòo k'ò yòǹ Èsípútì yaǹn.

Àbààhám̀ bowà dópàti nà Àbìmɛ̀dɛ́kì

²² Ye kú wɔ̀ni-dà de dɛɛ̀ Àbìmɛ̀dɛ́kì de tɛ̀ni-má-ní Àbààhám̀ pesá, è nɔɔ̀-nà-ní Pìkɔ́dì o sósìpa kpɛ̰́ǹn, é tɛ̀ni óò caka è yɔ̀: Weèdi a péé-nà-á-ma a pa̰kú-sa wɛǹni mɛhɛká. ²³ Ye kú hḭ́ǹka, m'a cɔɔ̀hu sá̰mà-ní è yɔ̀ á wɛ̰́ha nà Weèdi yèdi è yɔ̀, a pú kó ya̰dá n pa̰á̰ sḭ̀ḭ̀ma màcɔ̰́mà, nà n bííhí yoo nà n yaàbíiká. M'a pa̰káàma kú bookú nììma, n hḭ́ná nùdi è yɔ̀ a kó n pa̰ná mɛmá kú bookú-dà, nà yɔɔtì a péé-tì kú mɛhɛká nììpa. ²⁴ Kà Àbààhám̀ óò tɛ̰́ná è yɔ̀: Toò, n teháà, n kó wɛ̰́ha-á-ma. ²⁵ Ye wɔ̀ni k'ó wɛɛ́-nà Àbìmɛ̀dɛ́kì bíńtadá o dapàm̀ma de feè-ta nà nɔɔ̀ti o nììpa pesá kú wɛmá. ²⁶ Kà Àbìmɛ̀dɛ́kì óò tɛ̰́ná è yɔ̀: N pú yá̰á̰ mɛ̀ǹǹ mà hḭn-kó. A mɔ́nń mɛ̀ɛ mum pú n cakáà ye wɛɛmà daadí yènì, n mɛ̀ɛ pú mà yèkaà yècɔ̰́, yenì bààsí. ²⁷ Ye kú dàhàka, kà Àbààhám̀ é tódá hɔ̰̀ci, nà bɔɔhí, nà nɛ̀ci é pa̰a̰ Àbìmɛ̀dɛ́kì. Ye kú daadí, pa dɛ́ɛ̀di, kà pá bowá dópàti. ²⁸ Kó yídá é deèda hɔ̰ɔ̰̀sɛɛ̀ka kàyehì é kà cená. ²⁹ Kà Àbìmɛ̀dɛ́kì óò béka è yɔ̀: Badà tee k'á baàta hɔ̰ɔ̰̀sɛɛ̀kà mɛnkà é kà cená? ³⁰ K'óò tɛ̰́ná è yɔ̀: Teha é ta̰ǹta ye hɔ̰ɔ̰̀sɛɛ̀kà m'a pɔ̰n-kà mɛnkà-ní n nɔ̀hi mɛhɛká. K'à teháà è kà tà̰ǹtà, mií-dà kó m'bɛkú è yɔ̀ a teháà-á-ma, mmí-dà tṵṵ ye bíńtadà. ³¹ Mɛmá-dà tee kà pá yíí ye bɛ̀m̀bɛ̀ni è yɔ̀ *Bɛ̀ɛ́-Sèbáà, mìì tee-sá ye pesá-dà pà de bowà-ma dópàti pa dɛ́ɛ̀di é wɛ̰́ha-nà. ³² Pà yɔ̀ɔ-má ye dópàti boóma Bɛ̀ɛ́sèbáà, kà Àbìmɛ̀dɛ́kì nà Pìkɔ́dì o sósìpa kpɛ̰́ǹn, é tón é cɛ̰ɛ̰́ cɔ̀ku, é kòǹ *Fìdìsíìpa yɔtí. ³³ Kà Àbààhám̀ é híúwá teepú mùcɔ̰́mù ye pesá kà mù káá wɛ̰́ma, é dɔa Teó Weèdi é nì yíí è yɔ̀ *Kɔ́yɔ̀o. ³⁴ K'ó kaàdi Fìdìsíìpa teǹka mɛhɛká é yóka sàma.