Cetáma 22

Weèdi bɛń Àbààhám̀ è yɔ̀ ó tódá o bíitá Ìsáákì óò pa̰á̰-nà dɔ̀hɔ̀di

¹ Mii kú dàhàka, kà Weèdi é bɛń Àbààhám̀ óò yíí è yɔ̀: Àbààhám̀! K'ò yɔ̀: Ǹtɛ mmí. ² Kà nì yɔ̀: Tódá a bíitá Ìsáákì, a bínàǹcɔ̰́ a dɔ́sí-di dɛ́dɛ́í, é nì tanà Mɔ̀dèyáà teǹka, háá ta̰à̰di n k'áa bɛka-dí kú hḭ́ǹka. K'à tɛ̀i ye pesá, k'á nì pa̰á̰-nà dɔ̀hɔ̀di22:2 Dɔ̀hɔ̀di Weèdi de békú Àbààhám̀ é pa̰á̰-di Ìsáákì: Ò de yònà ó taá ò hɛ̰dá-dà, óò tɔ̀n ha̰mú o wɛǹni k'òo yúkú dìsi hḭ́ǹka nà n yèdi.

³ K'yé n'wekàta, kà Àbààhám̀ é pìi ká̰ńyɛ̰̀ǹfa é yɔtá dɛcí ò kó taá pa̰á̰-nà-ci dɔ̀hɔ̀di. K'ó yídá é dɔ̀hà o sa̰mmùǹta, ye wɔ̀ni é tódá o dapàm̀ma pàdɛ́ɛ́, n'ɔ̀ɔ bíitá Ìsáákì, kà pá ka̰há bɛ̀m̀bɛ̀ni Weèdi de pà benà-di bɛ́ka. ⁴ Kà pá cèn daàa kàdɛ́ɛ́, ta̰á̰di daadí k'ó diìda o nɔ̀ǹci é dɛ́há ye bɛ̀m̀bɛ̀ni nà dɛùma. ⁵ Ye wɔ̀ni k'ó caka ye dapàm̀ma pa dɛ́ɛ̀ka è yɔ̀: Nɛ́na, nɛ́ nɛɛ̀hi miì nà sa̰mmùǹta. Mmí n'ɛ̀ɛ bíítà, ti kó dìsi ta̰à̰di hḭ́ǹka-dà é taá dɔa Weèdi, kà ti yɔ̀ɔ kà tí tóní miì nɛ pesá. ⁶ K'ó tódá ye dɔ̀hɔ̀di dɛcí é cì towá o bíitá Ìsáákì, é tódá o mɔ́nń o nɔ̀ku mɛhɛká, ha̰mú nà seedí, kà pá nɔdá é ka̰há pa dɛ́ɛ̀di. ⁷ Kà pá n'sá̰á̰ cɔ̀ku kà Ìsáákì é béka o báàa è yɔ̀: N báà! K'ò yɔ̀: Ǹtɛ mmí n biidà. K'ò yɔ̀: Ǹtɛ ha̰mú nà dɛcí-ì, há̰ ntɛ́ hɔ̰̀fa ti kó taá pa̰á̰-nà-fa dɔ̀hɔ̀di? ⁸ Kà Àbààhám̀ óò tɛ̰́ná è yɔ̀: N biidà, Weèdi mɔ́nní-dà kó dɛ́tá ni dɔ̀hɔ̀di hɔ̰̀fa. Pa dɛ́ɛ̀ka, kà pá tṵ́má sɔ̰kadá pa cɔ̀ku.

⁹ Pà tɛ̀i-má ye bɛ̀m̀bɛ̀ni Weèdi d'oò benà-di, k'ó maá ye pesá dɔ̀hɔ̀di cɔ̰̀ǹcɔ̰̀ni, é tódá dɛcí é cɔ̰ná ni hḭ́ǹka. K'ó yɔ̀ɔ miya̰, é cɛ̰dí o bíitá é tà bowá wɛ̰̀ci é tà cɔ̰ná ye dɛcí hḭ́ǹka. ¹⁰ Ye wɔ̀ni é ca̰à̰na o nɔ̀ku é tódá seedí è kó tà hɛ̰dá. ¹¹ Ye mɛmá-dà kà Weèdi tɔntɔndikó22:11 Tṵ́má dentá Cetáma 16:7 n'ɛ̀ɛ kú wekànamá óò yíí-ní nà hḭ́ǹka è yɔ̀: Àbààhám̀! Àbààhám̀! K'ò yɔ̀, ǹtɛ mmí. ¹² K'yèe Weèdi tɔntɔndikó yɔ̀: A nɔ̀ta dá yetá cɔ̰ná ye bíítà ta hḭ́ǹka, a mɛ̀ɛ dá yetá é tà pa̰á̰ kpákpààma màcɔ̰́mà. N bantà sá̰mà è yɔ̀ a wani Weèdi. A pú yedáà a kó nì kɔ̰́ɔ̰́-ma a bínàǹcɔ̰́. ¹³ Ye wɔ̀ni, kà Àbààhám̀ é yoòda o nɔ̀ǹci, é wɛ̰ǹta é dɛ́há hɔ̰ɔ̰̀daadí túúku kùcɔ̰́kù kú mɛhɛká, kà ku nànàkàti fḭń fḭń ni yèèka. K'ó taá nì cɛ̰ɛ̰́-ní é tɛ̀ni é nì fìɔ̀wa o bíitá fìɔ̀di, é pa̰á̰ ye dɔ̀hɔ̀di. ¹⁴ Kà Àbààhám̀ é pa̰a̰ ye bɛ̀m̀bɛ̀ni yèdi è yɔ̀: Kɔ́yɔ̀ɔ Weèdi kó dɛ́tá-ma mìì dóńtà-sa. Mɛmá-dà tee háá nà yenì, kà pà yúu ye bɛ̀m̀bɛ̀ni è tonà: Kɔ́yɔ̀ɔ Weèdi ta̰à̰di hḭ́ǹka, mìì dóńtà-sa kó dɛ́tá-ma. ¹⁵ Kà Weèdi tɔntɔndikó é tṵ́má óò yíí-ní háá nà hḭ́ǹka, ¹⁶ è yɔ̀: Ǹtɛ Kɔ́yɔ̀ɔ Weèdi hḭ́mpú: Mìì tee-sá k'á hḭn mɛma, è pú n yeéè-nà a bíitá, a bínàǹcɔ̰́, n wɛ̰́hú nà n mɔ́nń kú yèdi, ¹⁷ è yɔ̀ n kó wɛ́kàna a yaàbíiká kà ká n'wɔ̰ǹti è yònà hḭ́ǹka hà̰à̰hi yoo dàmɛ́dì bíìdi tá̰a̰bíimá. A yaàbíiká-dà kó n'nɔn ka kà̰à̰tɔɔ̀pa. ¹⁸ Teǹka heèka wɛǹni kó ya̰dá dɛ́tá n kónáma nà mɛnka kú nɔɔ̀ti-dà, mìì tee-sá a besí n wɛmá é tṵṵ̀na mà hḭ́mpú. ¹⁹ Miya̰ yɔ̀ɔ-má, kà Àbààhám̀ é tón é sḭ́ńtá-ní o dapàm̀ma pesá, é tɛ̀ni kà pá nɔdá, é kòǹ Bɛ̀ɛ́sèbáà ò de kaàdi-sá.

Àbààhám̀ ya̰ǹn Nàhɔ́ɔ̀ bííhí

²⁰ Mii kú dàhàka, k'ó yekà è yɔ̀ Mììkáà, o ya̰ǹn Nàhɔ́ɔ̀ poòo mɛ̀ɛ té ò pɛdà bííhí. ²¹ O pɔ̀ɔ yèdi-dà de dɛɛ̀ Úsì, k'òo ya̰ǹn kpɛ́ɛdí tonà Bùúsì, kà Bùúsì é yídá ya̰ntá Kèmúɛ́dì k'ò yòǹ Hàdám̀ báàa, ²² kà Kèmúɛ́dì é yídá é ya̰ntá Kèsɛ́tì, kà Kèsɛ́tì é yídá ya̰ntá Hàsóò, kà Hàsóò é yídá ya̰ntá Pìdìdásì, kà Pìdìdásì é yídá ya̰ntá Yìdìdáfù, Kà Yìdìdáfù é yídá ya̰ntá Bètúɛ́dì. ²³ Bètúɛ́dì-dà de pɛdà Hèdèbèkáà. Bíídahí hìnìì, Mììkáà de pɛɛ̀-nà-hi-dà Nàhɔ́ɔ̀, Àbààhám̀ ya̰ǹn. ²⁴ Ò de tṵ́mà káá-ma bííhí tɔɔhí, kà poòo tɔɔ̀o hì n'ɔ̀ɔ pɛɛ̀-nà. Ye bííhí yèèka-dà de dɛɛ̀: Tèbáà, Kàhám̀, Tèhásì nà Mààkáà.