Cetáma 23

Sàdáà kpíi kà Àbààhám̀ é dontá teǹka óò dáná

¹ Sàdáà fòùmu beeká wɛǹni de yòǹ beeká kɔ̀ta nà púdɛ́ɛ́ nà kàyehì-dà. ² K'ó kpíí Kìdìyáà-Àdìbáà23:2 Nììdo pà toò-ko Àdìbáà-dà cetá kaàdi ye yɔtí, mɛmá-dà tee kà pà tì yúu è tonà Kìdìyáà-Àdìbáà, mií-dà pà tṵ́mà yúu-má Màmùdéè yoo Hèbùnɔ́ɔ̀ pà tṵ́mà toò-sa Hèbùnɔ́ɔ̀, Kànàáà teǹka mɛhɛká. Kà Àbààhám̀ é kɔń o kpɛ́mú é yídá é pa̰ná o dánáma dɔ̀hɔ̀di. ³ K'ó yídá óò hédá ye pesá, é taá dɛ́há Hítìpa é pà caka è yɔ̀: ⁴ N yòǹ cà̰ǹn-dà nɛ cɔhɔ̀ka, n pú káá teǹka è kó dáná n poòo. Wɛ̰́ɛ̰́-nà é n dɛ́tá bɛ̀m̀bɛ̀ni nɛ yɔɔtì-ní kà n ní nì n'tee, k'yé teha ká n dáná n poòo, kà n dá ò n'wáń. ⁵ Kà p'óò tɛ̰́ná è yɔ̀: ⁶ Dakpɛ̰́ǹn, wɛ̰́ɛ̰́ é ti besí. A yòǹ niìkpɛ̰́ǹn sào-dà Weèdi kónà-ko ti cɔhɔ̀ka. Baàta híúdi a sɛɛ́ɛ̀-di ti híùka mɛhɛká é dáná a poòo. T'oòcɔ̰́ǹ pú k'áa yee-nà o híúdi, a kó dáná-ma a poòo. ⁷ Kà Àbààhám̀ é yídá é taá hìu dúùka é dɔɔ́ háá-nà teǹka ye yɔtí yam̀ma, Hítìpa yìhìka, ⁸ é pà caka è yɔ̀: Kà mɔ́masí-dà nɛ teháà-ma è yɔ̀ n dáná n poòo miì, kà nɛ́ táá n wɛɛ́-nà Èfùnɔ́ɔ̀, Sòhádì bíitá, ⁹ è yɔ̀ n yɔ̀ ó n yɛɛ-nà tá̰a̰beèdi fɔ̰̀ɔ̰kú mɛ̀ǹkù péé-ku Màkpèdáà, o yɛ̀ɛ̀di bɛ́ɛ́kú k'ò kù tee. Ó kù nà n yɛɛ-nà ku díící mɔ́ncí nɛ yìhìka, k'yé teha kà kú hḭn n kpɛ́kú, kà n ní kù n'dánì n kpíípa.

¹⁰ Ò wɛì-ma mɛma, è hɔ̰́tà Èfùnɔ́ɔ̀ mɔ́nń yè péé ye pesá, è kàdi o bokàǹtɔ̀pa Hítìpa cɔhɔ̀ka, bɛ̀m̀bɛ̀ni pà de hɔ̰́ peèta-dí, kà nì hɛ́dí-nà ye yɔtí há̰ńnùdi. Kà Èfùnɔ́ɔ̀ é yohòna boòku óò tɛ̰́ná o kpɛɛ́pá wɛǹni yìhìka, nà mɛ̀m̀pà kú wɛnnì de dúù-pa-ní ye yɔtí há̰ńnùdi, è yɔ̀: ¹¹ Á̰à̰, mɛma dɔɔ n dakpɛ̰́ǹn. N pú kó nɛɛ́ áa yɛɛ-nà ye yɛ̀ɛ̀dì n'ɛ̀ɛ tá̰a̰beèdì fɔ̰̀ɔ̰kù mɛ̀ǹkù yè péé-kù. N yè n'àà pɛ̰ḭ-ḭ́-ma n kpɛ́ɛpá wɛǹni yìhìka. Tódá é taá dáná a poòo. ¹² Kà Àbààhám̀ é tṵ́má hìu dúùka háá nà teǹka ye yɔtí yam̀ma wɛǹni yìhìka, ¹³ é yohòna o boòku, óò tɛ̰́ná o kpɛ́ɛpá wɛǹni yìhìka è yɔ̀: Mɛ̀ɛ té besí é yekà n kpɛ́ɛmá! N yɛɛ-nà ye yɛ̀ɛ̀dì é ta̰ǹta ni díífa n nɔ̀ku mɛhɛká k'yé teha ká n taá dáná ye pesá n poòo. ¹⁴ Ye wɔ̀ni kà Èfùnɔ́ɔ̀ óò tɛ̰́ná è yɔ̀: ¹⁵ Besí é yekà n dakpɛ̰́ǹn. Ye yɛ̀ɛ̀dì díífa yòǹ díimáàka kɔ̀ɔnà nàhì-dà. Mɛnfa há̰ yòǹ ba, mmí nà fɔ̰́ń ti cɔhɔ̀ka? Tódá é taá dáná a poòo. ¹⁶ Ye wɔ̀ni, kà Àbààhám̀ é teha ò de hḭ́mpú, é kaàn ye díící ò de kɛdà-ci kú nùdi o kpɛ́ɛpá yìhìka, díimáàka kɔ̀ɔnà nàhì, ye kú wɔ̀ni-hɔ̰ pà de yon-cí, é cì n'ɔ̀ɔ̀ kɔ̰́ɔ̰́ ¹⁷ Ye mɛmá-dà, k'ó dontá ye Èfùnɔ́ɔ̀ yɛ̀ɛ̀di mɛ̀nì péé-di Màkpèdáà, *Màmùdéè hḭ́ńkà bɛ́kàma, n'ɛ̀ɛ tá̰a̰beèdi fɔ̰̀ɔ̰kú mɛ̀ǹkù péé-ku ye pesá, é pɛ́ɛ́-nà teená mɛ̀nà de yè péé-na wɛǹni, ¹⁸ ye wɛǹni k'yé kpáńtá é hḭn Àbààhám̀ kpɛ́ɛsá. Ye kú niì wɛnnì de pa̰à̰, Hítìpa mɛ̀m̀pà de tɛ̀ni-pá-ní wɛǹni ye peètamá pesá pa nɔ̀ǹfa-dà, é pɛ́ɛ́-nà mɛ̀m̀pà de dúù-pa-ní wɛǹni ye yɔtí há̰ńnùdi. ¹⁹ Mii kú dàhàka-dà kà Àbààhám̀ há̰ nɛɛ́ é taá dáná o poòo, ye Màkpèdáà yɛ̀ɛ̀di tá̰a̰beèdi fɔ̰̀ɔ̰kú mɛhɛká. Ye yɛ̀ɛ̀di de hɛ́dí-nà Màmùdéè yɔtí-dà, pà tṵ́mà toò-ti Hèbùnɔ́ɔ̀, kà tì péé Kànàáà teǹka mɛhɛká. ²⁰ Mɛmá kú bookú-dà Àbààhám̀ teekáà-ma ye yɛ̀ɛ̀di n'ɛ̀ɛ tá̰a̰beèdi fɔ̰̀ɔ̰kú, k'yé kpáńtá é hḭn o hɔ̰́ɔ̰̀ta pòdi, kà Hítìpa koò p'éè n'tee.