Cetáma 33

Sàkɔ́pù nà Èsàyúù peètamá.

¹ Kà Sàkɔ́pù é wáńtá, é dɛ́há Èsàyúù k'ò pení o peètanàpu, è nɔɔ̀-nà-ní nììpa kɔ̀ɔnà nàhì. Ye wɔ̀ni, k'ó totá o poòpa, é tódá bá mɛ̀ǹǹ dɛ̀ɛ̀ kú bííhí óò kɔ̰́ɔ̰́. Dèyáà n'ɔ̀ɔ kú bííhí, Hàdàsɛ́dì n'ɔ̀ɔ kpɛ́hí, é yídá pa yoǹyṵpá pa dɛ́ɛ̀ka nà pa kú bííhí. ² K'ó hɛɛ̀da yoǹyṵpá pa dɛ́ɛ̀ka, é pà nihìna yìhìka nà pa bííhí, é tṵṵ̀na Dèyáà n'ɔ̀ɔ kú kpɛ́hí, è há̰ deǹta-nà Hàdàsɛ́dì n'ɔ̀ɔ bíitá Sòsɛ́fù. ³ K'òo mɔ́nń nihí pa yìhìka, é hìu dúùka é dɔɔ́ háá nà teǹka, é n'yòǹ cɔ̀ku màyehì é nɛɛ́ ta̰ntá o kúpùèyo Èsàyúù. ⁴ Kà Èsàyúù é cocí-ní o peètanàpu, é cemá tɛ̀ni pùu é dɔdi o fɔ̰̀ɔ̰kú hḭ́ǹka, óò yintá. Ye wɔ̀ni kà pá pɛ́ɛ́ hódí pa dɛ́ɛ̀ka. ⁵ Kà Èsàyúù é wɛ̰ǹta é dɛ́há poòpa nà bííhí, óò béka è yɔ̀: M̀mɔ́ḿpa-dà a nɔɔ̀-nà-ma mɛmà? K'ò yɔ̀: Bííhí Weèdi n pɛ̰ḭ-hí-dà ni pa̰á̰suumá mɛhɛká, n dakpɛ̰́ǹn.

⁶ Kà yoǹyṵpá é ta̰ntá-ní pa pesá nà pa bííhí, é tɛ̀ni hìu pa dúùka é dɔɔ́ háá nà teǹka. ⁷ Pa kú dàhàka, kà Dèyáà n'ɔ̀ɔ kú bííhí mɛ̀ɛ té ta̰ntá-ní, é tɛ̀ni hìu dúùka é dɔɔ́ háá nà teǹka. É yídá, kà Hàdàsɛ́dì n'ɔ̀ɔ kú bíitá Sòdɛ́fù mɛ̀ɛ té tɛ̀ni, é hḭn mɛma. ⁸ Kà Èsàyúù óò béka è yɔ̀: A kpɛ̀i pa̰á̰-nà badà nɔtì n petà-nà-tì kú wɛǹni-ní? K'óò tɛ̰́ná è yɔ̀: N de kpɛ̀i áa sɛùda-nà-á-ma. ⁹ K'ò yɔ̀: N káá-ma-ní kpàtìdi sàma, n kúcàà. Hḭ́ná a káá-sa wɛǹni a cɔ̰́ɔ̰̀di kpɛ́mú. ¹⁰ Kà Sàkɔ́pù é yeda è yɔ̀: M'a sɛ́úkú-ma, wɛ̰́dí é ta̰ǹta pa̰dì m'a pɔ̰n-dì mɛnì-ní n nɔ̀ku mɛhɛká. M'a dɛ́hà k'yè yònà n dɛ́hà-ma-dà Weèdi yìhìka, há̰kà k'á n codá sukú. ¹¹ Wɛ̰́ɛ̰́ é ta̰ǹta ye pa̰dì m'a toó-dì-ní, mìì tee-sá Weèdi n pa̰à̰ suumá sàma kà n káá niìya̰ wɛǹni. K'óò pɛ̰́kapa sàma háá k'ó yó ta̰ǹta ye pa̰dí. ¹² Ye wɔ̀ni, kà Èsàyúù yɔ̀: Tɔɔ̀ta kà tí ka̰há̰, ti kó n'nɔɔ́-ma. ¹³ K'óò tɛ̰́ná è yɔ̀: N dakpɛ̰́ǹn, a mɔ́nń yá̰á̰-dà-ma è yɔ̀ bííhí wɛmá dɔǹ, è tṵ́mà dìi kà n túdí nɔɔnití kà tì toó bíiká kà kà káà mɛhipú. Kà ti pa̰à̰ nà nɔɔ̀ti è tòkànà ye nɔtì cèmu báà daadí nìcɔ̰́, tì kó kpíí-dà ti wɛǹni. ¹⁴ Fɔ̰́ń ní n'nihí yìhìka, kà mmí ní n'tṵ̀n-ní dàhàka è cèǹtì yɔkàma yɔkàma nɔtí cèmu, nà bííhí kú cèmu, háá é yó ta̰ntá a pesá Sèyíì teǹka mɛhɛká. ¹⁵ Kà Èsàyúù yɔ̀: Toò! Àmá, á yàkà n hḭ́ná n nììpa pàcɔ̰́ mɛ̀m̀pà n bɛ́hìna-pa-ní, kà pá nà n'nɔɔ̀-nà-ní. Kà Sàkɔ́pù é yeda è yɔ̀: A kó pà hḭ́ná baà kú kpɛ́mú-dà? Mmí dɛ́tà-mà a tehàma, yè sà-á-dà-ma. ¹⁶ Ye wɔ̀ni, kà Èsàyúù é tón é cɛ̰ɛ̰́ Sèyíì cɔ̀ku ye daadí ni cɔ̰́ɔ̰̀di, é kòǹ. ¹⁷ Kà Sàkɔ́pù mɛnn é taá yɔtí pà toò-ti Sùkɔ́tì, é tɛ̀i maá o cɔ̰́ɔ̰̀di kú hɔ̰́ɔ̰̀ta, é yídá kpɛ̰́ḭ́ fḭ́ḭná o nɔtí. Mɛmá-dà tee kà pá yíí ye bɛ̀m̀bɛ̀ni è yɔ̀: Sùkɔ́tì, mìì kpɛ̀i n'yɔ̀-sa fḭ́ḭná.

Sàkɔ́pù tààdi nàamá Kànàáà teǹka mɛhɛká

¹⁸ Ye kú dàhàka, k'ó ta̰ntá-ní nà naakú yɔtí pà toò-ti Sìsɛ́m̀, kà tì péé Kànàáà teǹka mɛhɛká, è yɛ̀ni nà Pàdáḿ-Àdám̀ teǹka. K'ó tɛ̀ni é tì dóńtá cɛ̰́ma, é bátá. ¹⁹ K'ó dontá Hàmɔ́ɔ̀ bííhí pesá, teǹka ò de tɛ̀ni é kpɛ̰́ḭ́-ka kú hḭ́ǹka o fḭ́ḭná, kà ka díící yòǹ díi-máàka kɔ̀ta. Ye Hàmɔ́ɔ̀ bíitá tàcɔ̰́ kú yèdi-dà de dɛɛ̀ Sìsɛ́m̀. ²⁰ K'ó maá ye pesá dɔ̀hɔ̀di cɔ̰̀ǹcɔ̰̀ni, é nì yíí è yɔ̀: Sawèǹku-dà yòǹ Ìsìdàyɛ́dì Weèdi.