Cetáma 42

Sòsɛ́fù kúpùèpa tɛ̀mmá cecemá Èsípútì teǹka, è kó dontá dimá

¹ Kà Sàkɔ́pù yekà è yɔ̀ pɛ̰́ɛ̰̀ yɔ̀ka péé Èsípútì teǹka mɛhɛká. K'ó caka o bííhí è yɔ̀: Badà kà nɛ kaàdi è wáń wáń nɛ tɔɔ̀pa è pú pa̰kú yècḭ́ḭ̀? ² N yeèkaà kà pà yɔ̀ pɛ̰́ɛ̰̀ yɔ̀ka péé Èsípútì teǹka mɛhɛká. Taá-nà é táá kà ti dontá-ní, k'yé teha kà ti dá yetá kpíí kòni. ³ Kà Sòsɛ́fù kúpùèpa é yídá ka̰há̰ Èsípútì teǹka pɛ̰́ɛ̰̀ yɔ̀ka dontápu. Pà de yòǹ nììpa píta-dà. ⁴ Sàkɔ́pù de pú teháà kà Bɛ̀ǹsàmɛ́ɛ̀, Sòsɛ́fù ya̰ǹn pà tṵ̀na. Ò de maàhu o yàma mɛhɛká è tonà: N dá yetá hédá k'ó pà nɛ̀ǹta k'yècɛ̰́ɛ̰̀ óò tɛ̀ni cɔ̀ku mɛhɛká. ⁵ Kà Sàkɔ́pù bííhí é nɛǹta-ní tɔɔ̀pa, kà pá tɛ̀ni pɛ̰́ɛ̰̀ yɔ̀ka dompú Èsípútì teǹka mɛhɛká, mìì tee-sá kòni-dà de péé Kànàáà teǹka.

Sòsɛ́fù codà-ma kú bookú o kúpùèpa pa tɛ̀mmá cecemá

⁶ Sòsɛ́fù-dà de nihí bá mìì dɛ̀ɛ̀-sa wɛǹni hḭ́ǹka ye yɔtí mɛhɛká. Mɛnń-dà de yɛɛ́-nà pɛ̰́ɛ̰̀ yɔ̀ka yɔtí wɛǹni nìku. K'òo kúpùèpa ta̰ntá-ní o pesá, é tɛ̀ni wɛ̰̀ḭ dúùka o yìhìka é dɔɔ́ háá nà teǹka. ⁷ K'ó pà dɛ́há é pà bantá. K'ó pa̰ná é n'yònà ò pú pà yá̰á̰-ma. K'ó pà wɛɛ́-nà kpeéma è yɔ̀: Nɛ yɛɛ̀ni ya ní? Kà pà yɔ̀: Ti yɛɛ̀ni nà Kànàáà teǹka-dà. Ti tɛ̀ni è kpɛ̀i dontá dimá-dà. ⁸ Sòsɛ́fù mɛnn bantà-dà o kúpùèpà, mɛmpa há̰ p'óò bantà. ⁹ K'ó deǹta-ní ye wɔ̀ni dɔhɔ̀ti ò de dɔháà-ti pa hḭ́ǹka. K'ó pà caka è yɔ̀: Nɛ yòǹ niìsḭ̀m̀ma-dà pà hɔ̰́ n'tɔnti-pá kà pà cèǹtì è cɔ́dì tɔɔ̀pa heèka pemá yòm̀pu kà nììdì pú yá̰á̰. Nɛ tɛ̀ni miì, è kpɛ̀i dɛ́há ti yɔtí bɛ̀m̀bɛ̀ka mɛ̀ǹkà sɔ̰̀ǹ-ka-dà. ¹⁰ Kà p'óò tɛ̰́ná è yɔ̀: Mɛma dɔ ti dakpɛ̰́ǹn. A dapàm̀mà tɛ̀ni, è kpɛ̀i dontá dimá-dà. ¹¹ Ti yòǹ nìdo òcɔ̰́ kú bííhí-dà ti wɛnnì. Mɔ́ma-dà t'aa cakú-ma, ti pú yòǹ niìsḭ̀m̀ma pà tɔn-pá-ní kà pà kó cɔ́dí nɛ heedí pemá. Ti yòǹ niìsuupá-dà. ¹² Kà Sòsɛ́fù yɔ̀: Fɔ́ú! Nɛ báńtí-ma. Nɛ tɛ̀ni miì è kpɛ̀i dɛ́há ti yɔtí bɛ̀m̀bɛ̀ka mɛ̀ǹkà sɔ̰̀ǹ-ka-dà. ¹³ Kà pà yɔ̀: Mɛma dɔ dakpɛ̰́ǹn. Ti de yòǹ niìdaapá píta nà pàdɛ́ɛ́-dà, nìdo òcɔ̰́ kú bííhí k'ò péé Kànàáà teǹka mɛhɛká. Ti ya̰ǹn sàmɔ́ǹn mɔ́nń héé-ko kaá-ma-ní hɔ̰́ɔ̰̀ta ti báàa pesá, tɔɔ̀o mɛnn koò pú kadí. ¹⁴ Kà Sòsɛ́fù tṵ́mà yɔ̀: N baà cetà nɛ cakú-sà-dà héé. Nɛ yòǹ nììpa pà tɔn-pá-dà-ní, kà pà kó cɔ́dí ti yɔtí pemá. ¹⁵ Ǹtɛ-nà múńdìkaà bɛḿma n kó nɛ bɛń-ma, é dɛ́há kà nɛ cakú mɔ́ma-dà. K'ó wɛ̰́ha nà wódo yèdi è yɔ̀: Nà *Fàdàɔ̰́ɔ̰̀ mɛ̀ǹǹ baà kó n'fòù-ko yèdi, nɛ pú yɛtì yɔɔtì mɛntì kú mɛhɛká, kà n pú dɛ́hà nɛ ya̰ǹta miì. ¹⁶ Tɔn-nà nɛ òcɔ̰́ k'ó taá ò tóó-ní, ye wɔ̀ni kà tɔɔ̀pa é m'péé kódeedí mɛhɛká. Mɛmá-dà nɛ kó hḭmá ká n dɛ́há kà nà mɔ́masí, nɛ cakú mɔ́ma-dà. Mɛma bààsí, nà Fàdàɔ̰́ɔ̰̀ mɛ̀ǹǹ baà kó n'fòù-ko yèdi, nɛ yòǹ niìsḭ̀m̀ma-dà pà tɔn-pá-ní è yɔ̀ nɛ́ cɔ́dí ti yɔtí pemá. ¹⁷ K'ó pà cɛ̰ɛ̰́ ye wɔ̀ni pa wɛǹni, é pà yɛ̰̀ḭ kódeedí mɛhɛká daàa kàta̰a̰.

¹⁸ Daa-ta̰a̰ daadí, k'ó tɛ̀ni pà caka è yɔ̀: N wani Weèdi sàma, ǹtɛ-nà nɛ kó hḭmá é dontá nɛ wɔ̰ǹni. ¹⁹ Kà nɛ cakú nà mɔ́ma-dà, kà nɛ́ hédá kà nɛ òcɔ̰́ cá̰ńtá ye kódeedì mɛhɛkà, kà tɔɔ̀pa tóó dimá é kònà nɛ hɔ̰́ɔ̰́tà-kpɛ́ɛpá, mìì tee-sá kòni péé sàma. ²⁰ Ye wɔ̀ni kà nɛ kṵn, kà nɛ́ táá tóó-ní nɛ ya̰ǹn mɛ̀ǹǹ péé-ko-ní hɔ̰́ɔ̰̀ta, óò tɛɛ̀ni miì ká n ò dɛ́há, ye wɔ̀ni é nɛɛ́ n'yá̰á̰ è yɔ̀ nà mɔ́masí, nɛ cakú mɔ́ma-dà. Hḭn-nà mɛma é dontá nɛ wɔ̰ǹni. Kà pá teha ò de hḭ́mpú. ²¹ Ye wɔ̀ni kà pá caka pa tɔɔ̀pa è yɔ̀: Mɛmá-dà-ma! Sḭ̀ḭ̀ma ti de pa̰à̰-ma ti ya̰ǹn, dà ti tee-nà ye kú toòka yɔ̰́ḿmà mɛmà-ní. Ti mɔ́mpá de dɛ́hà-dà-ma náńkú mɛ̀ǹkù de ò yɛ̰̀ḭ-kú, ò de tonà tḭ́ń wɔ̀ni: T'óò kɔń séèma óò hédá, ti p'óò besí. Ye kú náńkú-dà ti mɛ̀ɛ té yon-má yeǹ-ní. ²² Kà Hùdùbɛ́nì yɔ̀: N de pú nɛ cakáà dò, kà n yɔ̀ nɛ dá yetá pa̰ná sḭ̀ḭ̀ma ye bíítà-ní nɛ pú n besí-i? Ti de pa̰à̰-ma sḭ̀ḭ̀ma, dà tóní è dɔdì ti yuùka hḭ́ǹka sá̰mà-ní. ²³ Pà de wɛì mɛma, è pú yá̰á̰ è yɔ̀ ò you pà tonàpu, mìì tee-sá ò de dɛ́hà nìi-dà, kà pà wɛì k'òò cakú. ²⁴ Ò yèkaà-ma mɛma, é cemá tuùta pa pesá é pà nátá-nà, é táá ká̰ń-ká̰ńtá-ní nuǹ-nɛ́ɛmá. Ò tóní tḭ́ń wɔ̀ni, é tɛ̀ni pà caka è yɔ̀: Sìmɛ̀ɔ́ɔ̀-dà ò kó cá̰hḭ̀na-má. Ye wɔ̀ni, k'ó hédá kà p'óò cɛ̰ɛ̰́, óò dáká o tɔɔ̀pa yìhìka.

Sòsɛ́fù kúpùèpa koḿma-ní pa yɔtí Kànàáà mɛhɛká

²⁵ Ye wɔ̀ni, kà Sòsɛ́fù kɔ̰́ɔ̰́ nùdi o dapàm̀ma è yɔ̀ pá sṵ́ná pɛ̰́ɛ̰̀ yɔ̀ka pa píìka, é tɛ̰́ná taàa bá mɛ̀ǹǹ dɛ̀ɛ̀ o díífa o píídi mɛhɛká. K'ó tuɛ̀ha è yɔ̀: Pá pà kɔ̰́ɔ̰́-nà pa cɔ̀ku dipú. Kà p'éè pà pa̰ná ye wɛǹni. ²⁶ Kà pá bowá pa pɛ̰́ɛ̰̀ yɔ̀ka píìka pa sa̰mmùǹhi hḭ́ǹka, é cɛ̰ɛ̰́ pa hɔ̰́ɔ̰́tà cɔ̀ku. ²⁷ Kà pá tɛ̀i cɔ̀ku pà yèǹka dɔɔ́di pesá, kà p'oòcɔ̰́ kpetá o píídi è kó kɔ̰́ɔ̰́ dipú o sa̰mmùǹta. K'ó n'hɔ̰́tà o díífa dòsi o píídi nùdi. ²⁸ K'ó caka o kúcààpa è yɔ̀: Pà n tɛ̰́nà-á-ma n díífa. Ǹtɛ-fà n píídi mɛhɛká. Kà pa bɔ̀ti cemà yɔ̀ fàù, kà wantafɔ̰̀di pà cɛ̰dí. Kà pá caka pa tɔɔ̀pa è yɔ̀: Weèdi ti pa̰à̰ badà mɛmà-ní?

²⁹ Kà pá koní pa hɔ̰́ɔ̰̀ta Kànàáà teǹka mɛhɛká, é tɛ̀ni caka pa báàa Sàkɔ́pù, mìì pà tɛ̀ni-sá-ní wɛǹni pa cà̰ǹku mɛhɛká. ³⁰ Kà pà yɔ̀: Ti tɛ̀i-má, kà nìdo mɛ̀ǹǹ yòǹ-ko kpɛ̰́ǹn Èsípútì teǹka hḭ́ǹka, é ti wɛɛ́-nà kpeéma-dà, é múńtá ti pṵ́á̰ è yɔ̀ ti yòǹ nììpa pà tɔn-pá-dà-ní è yɔ̀ pá cɔ́dí pa yɔtí pemá yòm̀pu. ³¹ Kà t'óò caka è yɔ̀: Ti pú yòǹ mɛma, ti yòǹ niìsuupá-dà mɛ̀m̀pà coó-pa. ³² Kà ti yɔ̀: Ti báà-fɔ̰̀di, ti yòǹ niìdaapá píta-dà nà pàdɛ́ɛ́, kà òcɔ̰́ koò pú kadí. Ya̰tá mɛnta cá̰ńtà-nà-ní ti báàa Kànàáà teǹka mɛhɛká. ³³ K'yèe nìdo mɛ̀ǹǹ yòǹ-ko Èsípútì teǹka kpɛ̰́ǹn é ti tɛ̰́ná è yɔ̀: Nɛ kó hḭmpú ká n bantá è yɔ̀ nɛ yòǹ niìmɔ́mmpá-dà mɛ̀m̀pà coó-pa nà mɔ́masí, mií-dà héé: Nɛ́ n hḭ́ná n'ɔɔ̀cɔ̰́, kà tɔɔ̀pa tódá dimá é kònà é táá kɔ̰́ɔ̰́ nɛ hɔ̰́ɔ̰́tà-kpɛ́ɛpá kòni káá-pa. ³⁴ Ye wɔ̀ni, kà pà kṵn, kà pá táá n tóó-ní ye nɛ ya̰ǹn saàmɔ́ǹn ká n ò dɛ́há. Mɛma, n kó bantá-ma è yɔ̀ nɛ pú yòǹ nììpa pà tɔn-pá-ní è yɔ̀ pá cɔ́dí ti yɔtí pemá, àmá nɛ yòǹ niìsuupá-dà mɛ̀m̀pà coó-pa. N kó nɛ tɛ̰́ná-ma ye wɔ̀ni nɛ kúcàa mɛ̀ǹǹ kó cá̰ńtá-ko, é tṵ́má nɛ pa̰a̰ nùdi kà nɛ́ n'centì è tantí n yɔtí mɛhɛká nà naakú.

³⁵ Pà kódà tḭ́ń wɔ̀ni pa píìka dimá, bá pa mɛ̀ǹǹ dɛ̀ɛ̀ k'ó n'hɔ̰́tà o díi-pítàda tài o píídi mɛhɛká n'ɔ̀ɔ díící ci yòǹti. Kà wantafɔ̰̀di pà cɛ̰dí pa wɛǹni, é pɛ́ɛ́ cɛ̰ɛ̰́-nà pa báàa Sàkɔ́pù. ³⁶ K'ó pà caka è yɔ̀: Nɛ n mɔǹ n bííhí-dà. Sòsɛ́fù koò pú kadí, Sìmɛ̀ɔ́ɔ̀ mɛma, sá̰mà-ní kà nɛ tṵ́mà kpɛ̀i é n tódá Bɛ̀ǹsàmɛ́ɛ̀. Mmí kú yuudí hḭ́ǹka-dà baà dɛ̀ɛ̀, niì miì kú wɛǹni dɔdì-ma. ³⁷ Kà Hùdùbɛ́nì óò caka è yɔ̀: N báà! Ò tàa n nɔ̀ta mɛhɛká ká n ò n'àà tɛ̰́ná-ní. Kà n p'óò n'àà tɛ̰́nà-ní, k'á kɔ̀ù n bíídahí hi dɛ́ɛ̀ka. ³⁸ Kà Sàkɔ́pù yɔ̀: Fɔ́ú! N bíitá pú kó nɛ tṵṵ̀na ka bɛ́ka. O kúpùèyo yɔ̀a kpíípu-dà, mɛnń cɔ̰́ɔ̰̀di-dà n kadí pa màà-fɔ̰̀di. K'yècɛ̰́ɛ̰̀ ò tɛ̀ni cɔ̀ku mɛhɛká, n kpɛ̰́ń k'yè yòm̀pù, nà náńkú-dà nɛ kó cúhìna-má n yuùpɛ́ti kpííku mɛhɛká. *Fàdàɔ̰́ɔ̰̀: Èsípútì wódo wóòti yèdi-dà de dɛɛ̀ ye pesà-ní.