Cetáma 43

Sòsɛ́fù kúpùèpa cà̰ǹku dɛ́ɛ̀ku taáma è nɔɔ̀-nà Bɛ̀ǹsàmɛ́ɛ̀ o ya̰ǹn

¹ Kà kòni dɔ̀hà è wɛhikú Kànàáà teǹka mɛhɛká. ² Kà Sàkɔ́pù hɔ̰́ɔ̰́tà-kpɛ́ɛpá dii ye pɛ̰́ɛ̰̀ yɔ̀ka pà de dontà-ka-ní Èsípútì teǹka mɛhɛká, kà ká yɔ̀a. Kà yɔ̀a tḭ́ń daadí, k'ó caka o bííhí è yɔ̀: Tón-nà Èsípútì teǹka, é táá ti dontá-ní dimá cɛ̰́ma. ³ Kà Sùdáà óò tɛ̰́ná è yɔ̀: Mɛ̀ǹǹ yòǹ-ko Èsípútì kpɛ̰́ǹn de ti cakáà-dà-ní dɛ́dɛ́í, è yɔ̀ ò koò pú kpɛ̀i é ti dɛ́há o yìhìka kà ti pú nɔɔ̀-nà-ní ti ya̰ǹn. ⁴ K'à hédà kà Bɛ̀ǹsàmɛ́ɛ̀ ti nɔɔ̀-nà, ti kó taá-ma áa dontá-ní dimá. ⁵ K'à há̰ púdí ó ti tṵṵ̀na, ti pú kɔ́dí è k'áa dontá-ní dimá, mìì tee-sá ye yaǹn de ti cakáà-dà sukú è yɔ̀: Ò pú kpɛ̀i tṵ́má ti dɛ́há o yìhìka kà ti pú nɔɔ̀-nà-ní ti ya̰ǹn. ⁶ K'ò yɔ̀: Yè cèǹkaà kà nɛ́na caka ye nìdo è yɔ̀ nɛ tṵ́mà káá-ní ya̰ǹta hɔ̰́ɔ̰̀ta? Nɛ pa̰à̰ yetádi-dà ye pesà-ní n hḭ́ǹke-è. ⁷ Kà p'óò tɛ̰́ná è yɔ̀: Mɛnń-dà de ti bé-békàta ti mɔ́mpá hḭ́ǹka, nà ti hɔ̰́ɔ̰́tà-kpɛ́ɛpá hḭ́ǹka è yɔ̀: Ti báàa káà fòù? Ti káá-ní ya̰ǹn? Ye mɛmá-dà, kà tí tɛ̰́ná-nà o békàma wɛǹni. Wodà de kó nɛɛ́ n'yá̰á̰ è yɔ̀ ò kó yó n'yɔ̀, tí taá tóó-ní ti ya̰ǹn? ⁸ Kà Sùdáà tṵ́má óò caka è yɔ̀: Hédá n báà, kà bíitá nɛǹta mmí kà tí taá dontá-ní dimá k'à pú kpɛ̀i kòni áa kɔ̀ù, é ti kɔ̀ù é pɛ́ɛ́ kɔ̀ù-nà ti bííhí. T'oòcɔ̰́ǹ mɛ̀ɛ pú kpɛ̀i mɛma. ⁹ Mmí-dà kó n'yá̰á̰ o kpɛ́mú. Kà ti koní, k'á ò béka n nɔ̀ku mɛhɛká. Ye wɔ̀ni, k'à ò mɔ́ńkáà, mmí-dà baà kó n'tee yetádi a hḭ́ǹka é n'kɔ́ɔ́ yɔ̀amá. ¹⁰ Bá k'yè pú yònà ti yókáà-ma sàma tómpú, è yenì ti yɔ̀a taápu-dà cɔ̀ku màdɛ́ɛ́ è koní. ¹¹ Kà pa báàa Sàkɔ́pù yɔ̀: Toò! Yè yòǹ-mà mɛmá, ǹtɛ há̰kà nɛ yònà é hḭmpú: Nɛ́ pɛha ti yɔtí kpɛ́ɛsá mìì suusá wɛǹni, é n'toó nɛ pɛ̀hɛká mɛhɛká, é táá pa̰a̰ ye nìdo. Nɛ́ tódá tùdàdé kpeèpa boocí dɔ́ɔ́di, nà ceèti, nà tee-bíiká pà toò-ka pìsìtásìka, nà àmáńdìka bíimá é táá ò pa̰a̰. ¹² Nɛ́ tódá díící nɛ kó taá dontá-nà-ci-ní dimá, é n'toó-nà nɛ de tɛ̀ni kpetá nɛ píìka é dɛ́há-ci, é táá cì tɛ̰́ná. K'yè púdí òcɔ̰́ǹ-dà de kó n'yetà é cì tàa nɛ píìka mɛhɛká. ¹³ Kà nɛ yɔ̀a miya̰, kà nɛ́ tódá nɛ ya̰ǹn é tón ye nìdò pesá. ¹⁴ Weèdi nɔɔ̀ti wɛǹni kpɛ́ɛdí, é kɔ̰́ɔ̰́ ye nìdò séèma nɛ hḭ́ǹka, k'yé teha k'ó hédá kà nɛ́ pɛ́ɛ́ konà-ní, Sìmɛ̀ɔ́ɔ̀ nà Bɛ̀ǹsàmɛ́ɛ̀. Mmí mɛ̀ɛkà, k'yè kó béka n mɔ́ńka n bííhí-dà, ká n hì mɔ́ńka.

Sòsɛ́fù n'ɔ̀ɔ kúcààpa peètamá dɛ́ɛ̀ma

¹⁵ Kà pá dɔ̀hà pa pa̰ká, é tóó díící pà kó taá dontá-nà-ci-ní dimá nà pà de yònà é táá tɛ̰́ná-ci, ye wɔ̀ni é tóó Bɛ̀ǹsàmɛ́ɛ̀, kà pá ka̰há̰ cà̰ǹku Èsípútì teǹka mɛhɛká. Kà pá ta̰ntá-ní, é tɛ̀ni nɛ-nɛɛ̀hi-hɔ̰ Sòsɛ́fù yìhìka. ¹⁶ Sòsɛ́fù dɛ́hà-ma kà Bɛ̀ǹsàmɛ́ɛ̀ péé pa cɔhɔ̀ka, k'ó cemá caka o dapàǹn mɛ̀ǹǹ de yòǹ-ko kpɛ̰́ǹn o hɔ̰́ɔ̰́tà tɔná hḭ́ǹka, è yɔ̀: Kònà ye nììpà mɛmpà-ní n hɔ̰́ɔ̰̀ta. K'à tɛ̀i, k'á cɛ̰ɛ̰́ nɔtá é kɔ̀ù kà pá pa̰á̰ dimá. Pà kó n dii-nà-á-ma wèǹku wɔ̀ni. ¹⁷ K'yèe nìdo mɛ̀ɛ pa̰ná Sòsɛ́fù de ò hḭ́mpú, é kònà ye nììpa o hɔ̰́ɔ̰̀ta. ¹⁸ Pà pà kṵnti-nà tḭ́ń wɔ̀ni Sòsɛ́fù hɔ̰́ɔ̰̀ta, kà wantafɔ̰̀di-dà pà káá, kà pà cakú pa tɔɔ̀pa è tonà: Díící pà de tɛ̰́nà-ci é cì tàa ti píìka mɛhɛká ti cà̰ǹku cecekú, dà tee-má kà pà ti toó. Pà ti dúǹta miì è kó táá dɔtìna ti hḭ́ǹka-dà, é ti diá náńkú, é tóńka ti sa̰mmùǹhi, é ti kpáhìna pa núm̀ma. ¹⁹ Kà pá n'kó nàa hɔ̰́ɔ̰̀ta há̰ńnùdi, kà pá hɛ́tá-ho ye Sòsɛ́fù dapàǹn pesá óò caka è yɔ̀: ²⁰ Diìda weèdi ti dakpɛ̰́ǹn! Ti yɔ̀a tɛ̀mpú-dà miì màcɔ̰́ é dontá dimá. ²¹ Ti de kṵnti-má, é tɛ̀i ti yèǹkà-dɔɔ́di pesá é pḭntá ti píìka, kà bá ti mɛ̀ǹǹ dɛ̀ɛ̀ é dɛ́há o píídi mɛhɛká, díící kà cì sá̰à̰-nà ti de dontà dimá é bodá-ci. Ti cì toó-ma-ní è kó cì tɛ̰́ná. ²² Ti pú yá̰á̰ mɛ̀ǹǹ de hḭn-kó mɛma, é tɛ̰́ná taàa ti díící ti píìka mɛhɛká. Ti tṵ́mà toó-ma-ní díící tɔɔcí è kó dontá dimá. ²³ K'ó pà tɛ̰́ná è yɔ̀: Nɛ dá n'káá yam̀màhà̰ka dɔ́dí, nɛ mɛ̀ɛ dá n'wani. Weèdi nɛ báà dɔń-di, mɛ̀nì yòǹ-di nɛ Weèdi, dà nɛ pɛ̰ḭ ye díícì-ní é cì tàa nɛ píìka mɛhɛká. Nɛ díící de n ta̰ntà-á-ma-ní. Ye kú dàhàka, k'ó táá kpetá-ní Sìmɛ̀ɔ́ɔ̀, k'ó tɛ̀ni pa pesá.

²⁴ K'ó pà dúùwa Sòsɛ́fù hɔ̰́ɔ̰̀ta mɛhɛká, é táá pɛha nɛ́ɛmá é pà kɔ̰́ɔ̰́ kà pá pɔkàda pa tààka. K'ó pɛha míti é kɔ̰́ɔ̰́ pa sa̰mmùǹhi. ²⁵ Kà pá dɔ̀hà pa pa̰ká, è ceí-nà Sòsɛ́fù kó koní-ma-ní wèǹku, mìì tee-sá pà de yeèkaà kà pà yɔ̀, mií-dà pà kó dii-má pa wèǹku dipú. ²⁶ Sòsɛ́fù koní tḭ́ń wɔ̀ni hɔ̰́ɔ̰̀ta, é tɛ̀ni kà p'óò kɔ̰́ɔ̰́ pa pa̰ká pà de toó-ka-ní, é wɛ̰̀ḭ dúùka é dɔɔ́ háá nà teǹka o yìhìka. ²⁷ K'ó pà béka kà pà kpenì, é yídá pà béka pa báàa è yɔ̀: Nɛ báàa, nɛ de n cakáà-ko kú wɛmá, ò kpenì? Ò baà káà fòù? ²⁸ Kà pà yɔ̀: À̰à̰, a dapàǹn ti báàa káà fòù-ú-ma, è kpenì. Kà pá tṵ́má wɛ̰̀ḭ pa dúùka é dɔɔ́ nà teǹka.

²⁹ K'ó diìda é dɛ́há Bɛ̀ǹsàmɛ́ɛ̀ o ya̰ǹn pa yṵṵ̀-fɔ̰̀di, ye wɔ̀ni k'ò yɔ̀: Ye nɛ ya̰ǹn nɛ de n wɛɛ̀-ko kú wɛmá-dà miì-ní? K'ó tuɛ̀ha è yɔ̀: Weèdi áa pa̰a̰ ni suumá n biidà. ³⁰ Ye wɔ̀ni, kà nuǹ-nɛ́ɛmá cemá cɛ̰n-cɛ̰ɛ̰̀na o nɔ̀ǹci. K'ó fiìta o wɛmá fem̀ma, mìì tee-sá ò de dɛ́hà o ya̰ǹta k'yé ò dúùwa dɔ́kàma-dà ta hḭ́ǹka. K'ó dúú feǹ-fem̀ma o nàmɔ̀ni mɛhɛká é táá hódí. ³¹ Ò yudà tḭ́ń wɔ̀ni o nuǹ-nɛ́ɛmá, k'ó tón é yɛɛ̀ni, è wɛ̰́dì è cɛ̰hú o cɔ̰́ɔ̰̀di è pú kpɛ̀i hódí pa yìhìka. K'ó tɛ̀ni caka o dapàm̀ma è yɔ̀: Pa̰á̰-nà dimá kà ti dii. ³² Kà pá pa̰á̰ dimá óò cená o cɔ̰́ɔ̰̀di, é yíí cená o kúcààpa pa cɔ̰́ɔ̰̀di. Èsìpùsɛ̰́ɛ̰̀pa Sòsɛ́fù mɛ̀ɛ té de yíí-pa-ní è yɔ̀ pá ya̰ní óò dii-nà, kà pá pà cená pa kú cɔ̰́ɔ̰̀di, mìì tee-sá mɛmpa kú cììti-dà de dɛɛ̀, pá pɛ́ɛ́ caadí nà Hèbùdéèpa. ³³ Kà pá kaàna o kúcààpa, é pà nɛ́káná o yìhìka, é cedí-nà pa kpɛ̰́ǹn héé-ko pɛdáma hḭ́ǹka é deǹta-nà pa sàmɔ́ǹn. K'yé pà dii nà pà de hḭmá é yá̰dá pà tṵ̀n-tṵ̀ǹkaàma-ní pa tɔɔ̀pa pa báà-fɔ̰̀di, bá mɛ̀ǹǹ dɛ̀ɛ̀ k'ò békú o tɔɔ̀o ye hḭ́ǹka. ³⁴ Kà Sòsɛ́fù yɔ̀ pá pà hḭ́ná dimá pà de pa̰à̰-ma caàka mɛhɛká kà mà hḭ́ḭ́ hḭ́ḭ́ o yìhìka. K'ó héé kà pá pa̰á̰ dimá Bɛ̀ǹsàmɛ́ɛ̀ kú caadí, ma wɛhimú kó totá tɔɔ̀pa wɛǹni pa nìdo òcɔ̰́ kú dimá cɔ̀ku mànùm̀. Kà pa wɛǹni dii, é pɛ́ɛ́ yà̰à̰ naàma pa yàma kpɛ̀kaàma.