Núǹtiyɛ̀ɛ̀ma 3

Weèdi ta̰kadà Mɔ̀yísì

¹ Mɔ̀yísì há̰ de cɛ̰nti o cɛ̀ko Sètódóò nɔtí-dà, k'ò yòǹ Màǹdìyá̰à̰ dɔ̀hɔ̀di yaǹn. K'ó tì n'cɛ̰ǹ é deèta càwenkú, é ta̰ntá Weèdi ta̰à̰di pà toò-di Hɔ̀dɛ́pù^a. ² Kà Kɔ́yɔ̀ɔ tɔntɔndikó óò fodá-ní ha̰mú mɛhɛká, túku cɔhɔ̀ka. K'ó dɛ́há kà ha̰mú cɔ́hú ye túku mɛhɛká è há̰ pú kù yon. ³ K'yóò dii, k'ó caka o cɔ̰́ɔ̰̀di è yɔ̀: N kó wɔ̰́ńtá-ma ka bɛ́ka é taá dentá ye kú pa̰á̰sàmà, é dɛ́há mìì tee-sá kà ha̰mú yon ye túkù k'ùá pú cɔ́hú. ⁴ Kà Kɔ́yɔ̀ɔ é n'hɔ̰́tà Mɔ̀yísì wɔ̰́ńti-ní è kó dentá, K'óò yíí-nà-ní ye túku cɔhɔ̀ka è yɔ̀:

Mɔ̀yísì, Mɔ̀yísì.

K'ò yɔ̀: ǹtɛ mmí. ⁵ Kà Weèdi yɔ̀: Dá hɛ́tá-ní miì, fḭ́dá a nɛ̀ùti, mìì tee-sá, bɛ̀m̀bɛ̀nì a péé-dì yòǹ bɛ̀m̀bɛ̀ǹwentí-dà. ⁶ Kà ní tuɛ̀ha è yɔ̀: N yòǹ a báàa Weèdi-dà, nà Àbádám̀, nà Ìsáákì, nà Sàkɔ́pù pa Weèdi. Kà Mɔ̀yísì é sɔɔ̀na o yìhìka n'ɔ̀ɔ kùdáa-pɛ́ńkú, mìì tee-sá, ò de wampáà ò kó wáńtá-ma-dà Weèdi.

⁷ Kà Kɔ́yɔ̀ɔ yɔ̀: N dɛ́hà-á-ma náńkú pà dinì-ku n nìku Èsípútì mɛhɛká, é tṵ́má yekà pa dawòni pà de kɔǹ-nà-di mɛ̀m̀pà de pà núnì-pa. N yá̰á̰-ma pa náńkú. ⁸ N cútà-ní è kó pà fḭ́hìna Èsípútì yam̀ma nɔ̀hi mɛhɛká-dà, é pà dèna pa yɔtí mɛhɛká, é pà tanà teǹka mɛ̀ǹkà suu-ká mɛhɛká è pɛ̀sì. Teǹka naà-mɛhimá nà ceèti wudì-ka kú mɛhɛká^b. Ka kú mɛhɛká-dà boocì mɛncì péé-ma: Kànánìpa, nà Hítìpa, nà Àmɔ́dìpa, nà Pàdísìpa, nà Hìfíìpa, nà Yèbúsìpa. ⁹ Ǹtɛ wɔ̀nì mɛnì kà Ìsìdàyɛ́dìpa dawòni dìsi-ní háá-nà n pesá, ká n tṵ́má dɛ́há Èsípútì yam̀ma pà núnì-ti núǹti. ¹⁰ Sá̰mà-ní m'a tɔnti-í-má. Taá Fàdàɔ̰́ɔ̰̀ pesá é tɛ̀i é deèna-ní n nìku, Ìsìdàyɛ́dì bííhí Èsípútì teǹka mɛhɛká.

Weèdi cakáà ni yèdi Mɔ̀yísì

¹¹ Kà Mɔ̀yísì é tɛ̰́ná Weèdi è yɔ̀: Mmí héé wodà è kó taá Fàdàɔ̰́ɔ̰̀ pesá é tɛ̀i é deèna-ní Ìsìdàyɛ́dì bííhí Èsípútì teǹka mɛhɛká?

¹² Kà Weèdi yɔ̀: N kó n'àà m'péé-nà-á-ma. Múńtá ǹtɛ yḭdó mɛ̀ǹǹ kó n'àà m'bɛkú-ko è yɔ̀ mmí mɔ́nń-d'àà tɔn: A kó deèna tḭ́ń daadí Ìsìdàyɛ́dìpa Èsípútì teǹka mɛhɛká, nɛ wɛǹni-dà kó tɛ̀ni é n duntà ta̰à̰dì mɛnì kú hḭ́ńka.

¹³ Kà Mɔ̀yísì é nì tɛ̰́ná è yɔ̀: N kó taá-ma Ìsìdàyɛ́dìpa pesá é tɛ̀i é pà caka è yɔ̀: Nɛ báàpa Weèdi-dà n tɔn-ní nɛ pesá. Kà pà há̰ n békáà ni yèdi n kó pà tɛ̰́ná è yɔ̀ ba?

¹⁴ Kà n'ɔ́ɔ̀ tɛ̰́ná è yɔ̀: N yòǹ mɛ̀ǹǹ péé-ko-dà. Kà ní tuɛ̀ha è yɔ̀: Ǹtɛ a kó tɛ̰́ńkamá Ìsìdàyɛ́dì bííhí: Pà toò-ko N yè péé, mɛnń-d'àà tɔn-ní pa pesá. ¹⁵ Kà ní tṵ́m'ɔ́ɔ̀ caka è yɔ̀: Taá é caka Ìsìdàyɛ́dì bííhí è yɔ̀: Kɔ́yɔ̀ɔ, pa báàpa Àbádám̀, nà Ìsáákì, nà Sàkɔ́pù pa Weèdi-d'àà tɔn-ní pa pesá. N yèdi-dà ye pesà-ní, k'yé n'kɔ́ɔ́ yɔ̀ɔmá. N kpɛ̀i kà pá nà n yún-dí-dà wɔ̀ǹti wɛǹni mɛhɛká. ¹⁶ Tɔɔ̀ta é taá é tíká Ìsìdàyɛ́dì kpɛ̰́m̀ma é pà caka è yɔ̀: Kɔ́yɔ̀ɔ, pa báàpa Àbààhám̀, nà Ìsáákì, nà Sàkɔ́pù pa Weèdi-d'àà fodà áa caka è yɔ̀: Nì ta̰kadà-á-ma è kó nɛ tempanà, mìì tee-sá, nì dɛ́hà-á-ma náńkú Èsípútì yam̀ma nɛ dinì-ku Èsípútì teǹka mɛhɛká. ¹⁷ Nì yɔ̀: Nì kó pà deèna Èsípútì teǹka pà pà núnì-ka mɛhɛká, é pà tanà Kànánìpa, nà Hítìpa, nà Àmɔ́dìpa, nà Pèdísìpa, nà Hìfíìpa, nà Yèbúsìpa teǹka, mɛ̀ǹkà wúdì-ka naà-mɛhimá nà ceèti.

¹⁸ Pà kó teha-á-ma a wɛmá, ye wɔ̀ni, fɔ̰́ń nɛ mɛmpá kà nɛ́ taá é caka Èsípútì wódo è yɔ̀: Kɔ́yɔ̀ɔ, Hèbùdéèpa weèdi-dà ti fodà. Á héé kà tí cèn daàa kàta̰di càwenkú mɛhɛká, é taá pa̰ná dɔ̀hɔ̀di Kɔ́yɔ̀ɔ, ti Weèdi. ¹⁹ N há̰ yá̰á̰-ma è yɔ̀ ò pú cédí nɛ héé kà nɛ́ taá, m'a ò bɛká-ma n nɔɔ̀ti bààsí. ²⁰ Ye kú kpɛ́mú, n kó yoòda n nɔ̀ku é potá Èsípútì teǹka nà pɔ́ńtá pa̰á̰ma dɔ́ɔ́di, ye kú dàhàka, k'ó nɛɛ́ nɛ hédá kà nɛ́ ka̰há. ²¹ N kó héé-ma, kà nɛ́ dɛ́tá yuudí Èsípútì yam̀ma pesá, k'yé teha kà nɛ yɛtì tḭ́ń daadí, nɛ dá yɛ̀dì nà nɛ nɔɔ̀kpehí. ²² Ìsìdàyɛ́dì poòo bá mɛ̀ǹǹ dɛ̀ɛ̀-ko é cɔhà Èsípútì poòo nà mɛ̀ǹǹ pà pɛ́ɛ̀ péé-ko hɔ̰́ɔ̰̀ta, yoo o dentɔɔ̀o, báatí, nà wúdó nɛǹti, nà díimáàti kpɛ́ɛtí, é báná nɛ bííhí. Ma kú bookú-dà nɛ kó kodá-ma Èsípútì yam̀ma káma.