Núǹtiyɛ̀ɛ̀ma 2

Pà fḭ́hínà Mɔ̀yísì nɛ́ɛmá mɛhɛká

¹ Dɔɔ̀ɔ òcɔ̰́ǹ k'ò yòǹ Dèfí nahàku kóoó, k'ó kádá poòo ye nahàku ku cɔ̰́ɔ̰̀di mɛhɛká. ² K'yèe poòo é póń é pɛɛ́ bíidatá, é dɛ́há é n'hɔ̰́tà tà suu-ú-ma, k'ó tà sɔ̀na é n'yòǹ cḭ̀ma màta̰di. ³ Ye kú dàhàka, ò de koò pù kó nɛɛ́ tà sɔ̀na. K'ó tódá kpà̰à̰ti pɔ̀pɔ̀ta^aé tà kɔdá kùtìnɔ́ɔ̀ kɔ̀ma nà tee-mɔ̀ti è yɔ̀ nɛ́ɛmá dá tà dúú, è há̰ taàa ye bíitá ta mɛhɛká, é taá tà hḭ́ná Nìídì konsàku bɛ̀ni, míti cɔhɔ̀ka kà tì yònà kóntɔ̀ka. ⁴ K'yèe bíitá potɔ̰ɔ̰̀ɔ̰ é tɛ̀i è nɛ̀hi ye pesá nà dɛùma è kpɛ̀i é dɛ́há mìì kó tà tɛ̀ni-sá-ní.

⁵ K'yé tɔɔ̀hɛ-ní, kà Fàdàɔ̰́ɔ̰̀ sepàǹn é cútá Nìídì kónsàku hɔ̀ɔ̀pu è nɔɔ̀-nà o núm-podehèpa, é tɛ̀i kà mɛmpa centì ye kóńkú nùdi. K'ó dɛ́há ye pɔ̀pɔ̀ta kóntɔ̀ti cɔhɔ̀ka, é tɔn o núm-podeho òcɔ̰́ è yɔ̀ ó tà tóó-ní.

⁶ K'yèe poòo é tà tɛ̀ɛ-ní, k'ó tà cḭ̀ǹta é dɛ́há bíidatá kà tà kɔǹ. Kà séèma óò cɛ̰ɛ̰́ k'ò yɔ̀: Hó! Hèbùdéèpa bíitá-dà fá!

⁷ Ye wɔ̀ni, k'yèe bíitá potɔ̰ɔ̰̀ɔ̰ é pà pàà-ní é tɛ̀ni é béka ye wódo sepàǹn è yɔ̀: Ń taá áa pɛha-ní poyɔ̰ṵ̀do Hèbùdéèpa mɛhɛká k'ó tà n'àà yɔ̰̀ṵ̀dà? ⁸ K'yèe wóo-sepàǹn óò tɛ̰́ná è yɔ̀: Ṵ̀ṵ̀ tɔɔ̀ta. K'yèe bíipoòta é taá é yíí-ní ye bíitá màa mɔ́nń. ⁹ K'ó tɛ̀ni, k'yèe wódo sepàǹn óò caka è yɔ̀: Tódá bíítà mɛntà é tà nà n yɔ̰̀ṵ̀dà kà n ní n'àà m'bopù. K'yèe poòo é tà tódá é taá tà yɔ̰̀ṵ̀dà.

¹⁰ Kà tá wɛ́í mɛhidí, k'ó tà tɛɛ̀-ní ye wódo sepàǹn. K'ó tà kpáhìna o kpɛ́ɛtá, é tà pa̰a̰ yèdi è yɔ̀ Mɔ̀yísì, mìì tee-sá, ò de yɔ̀: N tà wodí-ní nɛ́ɛmá mɛhɛká-dà.

Mɔ̀yísì cocí é taá Màǹdìyá̰à̰pa teǹka

¹¹ Kà Mɔ̀yísì é kpɛ̰́ń, daadí yènì, k'ó yíí é taá o kúcàpa dendápu é tɛ̀i é dɛ́há tɔnkpeèna pà de pa̰kú-na. Ye pesá, k'ó tṵ́má é dɛ́há kà Èsípútì yaǹn podì o kúcàpa Hèbùdéèpa p'oòcɔ̰́. ¹² K'ó wá-wáńtá páàti wɛǹni ò pú dɛ́hà nìdì, ye wɔ̀ni, k'ó podí ye Èsípútì yaǹn é y'óò kɔ̀ù, óò kṵká tá̰mú mɛhɛká. ¹³ K'yé weka, k'ó tóní é tɛ̀ni è hɔ̰́tà Hèbùdéèpa pàdɛ́ɛ́ kɔ̰ǹti. K'ó pà pàta, é béka mɛ̀ǹǹ pú naa-kó è yɔ̀: badà tee k'à podì a kóoó?

¹⁴ K'óò tɛ̰́ná è yɔ̀: Wod'àà kɔ̰́ɔ̰́ kpɛ̰́ǹti è yɔ̀ á ti síi-nà? A kpɛ̀i é n kɔ̀ù a kɔùkaàma-dà Èsípútì yaǹn?

Kà wantafɔ̰̀di é cɛ̰ɛ̰́ Mɔ̀yísì, k'ó caka o cɔ̰́ɔ̰̀di è yɔ̀: Nìpà wɛnnì yekaà-á-dà ye wɛmà fá. ¹⁵ Kà Fàdàɔ̰́ɔ̰̀ é mà yèkà è pɛnti ò kó hḭmá óò kɔ̀ù. K'ó cocí é taá é sɔ̀di Màǹdìyá̰à̰pa teǹka mɛhɛká. K'ó tɛ̀i é dɛ́há bíńdadá é kaàdi ta fɔ̰̀di.

¹⁶ Màǹdìyá̰à̰pa dɔ̀hɔ̀di yaǹn há̰ de káá sepàm̀ma pàyehì-dà. Kà pá tɛ̀ni é yúéí nɛ́ɛmá é sṵ́-sṵ́ná nɔtí canìka mɛhɛká, è kó niìa pa báàa nɔtí. ¹⁷ Kà hɔ̰ɔ̰̀cɛ̰mmá pàcɔ̰́pà há̰ tɛ̀ni é pà bɔ̀hà è kó niìa pa kú nɔtí. Kà Mɔ̀yísì é yeda pa kpɛ́mú, é niìa pa nɔtí. ¹⁸ Kà pá tón hɔ̰́ɔ̰̀ta pa báàa Hèdèwɛ́dì^b pesá é tɛ̀i, k'ó pà béka è yɔ̀:

Baà tee kà nɛ́ koní fem̀ma yenì?

¹⁹ Kà p'óò tɛ̰́ná è yɔ̀: Èsípútì dɔɔ̀ɔ òcɔ̰́ǹ-dà ti fḭ́hìnà hɔ̰ɔ̰̀cɛ̰mmá nɔ̀hi mɛhɛká. Mɛnń-dà pɛ́ɛ̀ yúéí nɛ́ɛmá é niìa ti nɔtí.

²⁰ Kà pa báàa é pà béka è yɔ̀: Ye dɔɔ̀ɔ há̰ péé ya? Badà tee kà nɛ p'óò tɛɛ̀-ní miì? Taá óò yíí-nà-ní, k'ó tɛ̀ni é dii! Kà pá mà hḭn, ye kú dàhàka,

²¹ kà Mɔ̀yísì é cá̰ńtá ye dɔɔ̀ɔ hɔ̰́ɔ̰̀ta, k'óò pa̰a̰ o sepàǹn Sèfòdáà k'óò kádá. ²² K'yèe sepàǹn é póń é pɛɛ́ bíidatá, k'ó tà pa̰a̰ yèdi è yɔ̀: Kɛ̀ɛ̀sóm̀, mìì tee-sá, ò de yɔ̀: N yòǹ cà̰ǹn-dà tenkà mɛnkà kú mɛhɛká.

²³ K'yé m'péé, kà Èsípútì wódo é kpíí. Kà Ìsìdàyɛ́dì bííhí é kɔń-nà Weèdi hi núǹti mɛhɛká, kà hi dawòni é ta̰ntá Weèdi pesá. ²⁴ Kà Weèdi é yekà hi dawòni, é denta ni múnáma nì de pa̰a̰-ma nà Àbààhám̀ nà Ìsáákì nà Sàkɔ́pù. ²⁵ Kà ní cɔ́dí Ìsìdàyɛ́dì bííhí é yá̰dá náńkú hì de péé-ku kú mɛhɛká.