Núǹtiyɛ̀ɛ̀ma 7

¹ Mɛmá-dà, kà Kɔ́yɔ̀ɔ óò caka è yɔ̀: Ǹtɛ m'a hḭ́nà n fɛ̀ùdi-dà, k'à kó n'yòǹ Weèdi Fàdàɔ̰́ɔ̰̀ yìhìka, K'àa kúcàa Ànɔ́ɔ̀ ní n'yòǹ a wɛɛcako. ² Fɔ̰́ń-dà té kó caka Ànɔ́ɔ̀ n k'áa caka è yɔ̀ á pa̰á̰-sa wɛǹni, k'ò mɛ̀ɛ t'éè tɛ̰́ná Fàdàɔ̰́ɔ̰̀, k'yé teha, k'ó héé Ìsìdàyɛ́dì bííhí kà hí yɛ̀dì o teǹka. ^3-4 Àmá, mmí kó kpekàna-á-ma Fàdàɔ̰́ɔ̰̀ toùka k'ó nɛ yee besípu, bá n kó pa̰á̰-pa yḭdópa nà pɔ́ńtá pa̰á̰ma dɔ́ɔ́di Èsípútì teǹka mɛhɛká. Ye wɔ̀ni, n kó bɛka-á-ma n nɔɔ̀ti sá̰á̰pu é yɔ̰́ń pa toùka dɛ́dɛ́í, é deèna n nìku Ìsìdàyɛ́dìpa cóńcodí. ⁵ Èsípútì yam̀ma kó bantá-ma è yɔ̀ mmí-dà héé Kɔ́yɔ̀ɔ, n kó pà bɛka tḭ́ń wɔ̀ni nɔ̀ta é yíí deèna-ní Ìsìdàyɛ́dì bííhí pa cɔhàka. ⁶ Mɔ̀yísì nà Ànɔ́ɔ̀ kà pá pa̰á̰ sá̰sá̰ Kɔ́yɔ̀ɔ de pà kɔ̰́ɔ̰́ nùdi è yɔ̀ pá pa̰á̰-sa wɛǹni. ⁷ Pà taá wɛɛ̀-nà tḭ́ń benní Fàdàɔ̰́ɔ̰̀ ye wɛɛmà, kà Mɔ̀yísì káá beeká púniì-dà, Ànɔ́ɔ̀ púniì nà kàta̰a̰.

Fàdàɔ̰́ɔ̰̀ pú besí Mɔ̀yísì nà Ànɔ́ɔ̀.

⁸ Kà Kɔ́yɔ̀ɔ é caka Mɔ̀yísì nà Ànɔ́ɔ̀ è yɔ̀: ⁹ Kà Fàdàɔ̰́ɔ̰̀ nɛ békáà è hḭ́n nɛ́ pa̰á̰ pɔ́ńtá pa̰á̰ma, fɔ̰́ń Mɔ̀yísì, k'á caka Ànɔ́ɔ̀ è yɔ̀: Tódá a ya̰kú é kù wɛ́í-ho Fàdàɔ̰́ɔ̰̀ yìhìka! Kù kó kpáńtá wàfa-dà. ¹⁰ Kà Mɔ̀yísì nà Ànɔ́ɔ̀ é yíí taá Èsípútì wódo pesá é tɛ̀i, é pa̰á̰ Kɔ́yɔ̀ɔ de pà kɔ̰́ɔ̰̀ nùdi è yɔ̀ pá pa̰á̰-sa. Kà Ànɔ́ɔ̀ é wɛ́í-ho o ya̰kú teǹka Fàdàɔ̰́ɔ̰̀ n'ɔ̀ɔ sɔ̰̀ǹkànɔ̀ti yìhìka, kà kú kpáńtá wàfa. ¹¹ Mɛmá-dà, kà Fàdàɔ̰́ɔ̰̀ é tɔn kà p'óò yíí-ní o pa̰hipá, n'ɔ̀ɔ dópòdópò nìpa. Kà pà mɛ̀ɛ té tɛ̀ni é pa̰ná mɛmpà pa̰à̰-sa nà pa dópòdópò nɔɔ̀ti. ¹² Bá pa mɛ̀ǹǹ dɛ̀ɛ̀, k'ó wɛ́í-ho o ya̰kú teǹka k'yèe ya̰tí é kpáńtá wɛ̀ci. Há̰kà, kà Ànɔ́ɔ̀ kú ya̰kú é níha pa kpɛ́ɛtí wɛǹni. ¹³ Nà mɛma, kà Fàdàɔ̰́ɔ̰̀ é kpekàna toùka, ò pú besí Mɔ̀yísì nà Ànɔ́ɔ̀ é n'yònà Kɔ́yɔ̀ɔ de mà hḭ́mpú.

Fá̰kápàma cecemá: Nɛ́ɛmá kpáhìnamá hḭ̀ma.

¹⁴ Kà Kɔ́yɔ̀ɔ é caka Mɔ̀yísì è yɔ̀: Fàdàɔ̰́ɔ̰̀ baà kpekenì-í-dà o toòka è yení ò kó héé-ma Ìsìdàyɛ́dìpa kà pá ka̰há. ¹⁵ Ò wáńtà kɔ́ɔ́-ma Nìídì kóńkú nùdi. Á yɔ́údá é taá ò n'ceí ye pesá, é n'toó-nà ye ya̰kú mɛ̀ǹkù de kpáńtà-ku wàfa. ¹⁶ K'ò tɛ̀ni, k'á ò caka è yɔ̀: Kɔ́yɔ̀ɔ, Hèbùdéèpa Weèdi-d'àà tɔn-ní è yɔ̀ á ò caka k'ó héé n nìku kà kú taá é n duntà càwenkú mɛhɛká. Mɛnn há̰kà háá nà yenì, ò pú kpɛ̀i é yekà màcɔ̰́mà. ¹⁷ Ye kú kpɛ́mú-dà tee mmí Kɔ́yɔ̀ɔ wɛdà-ma è yɔ̀: Sá̰mà-ní, yè k'óò weka-á-ma k'ó bantá n sá̰pu. Ǹtɛ nà ya̰kù mɛnkù-dà n kó potá-ma Nìídì nɛ́ɛmá kà mà kpáńtá hḭ̀ma. ¹⁸ Num̀bííhí mɛ̀ǹhì péé-hi ye kóńkù mɛhɛkà kó kpíí-ma, kà ku nɛ́ɛmá é hḭn pà̰pà̰hì, háá kà Èsípútì yam̀ma é hɛ̰ka ma nìpu.

¹⁹ Mɛmá-dà, kà Kɔ́yɔ̀ɔ é caka Mɔ̀yísì è yɔ̀: Caka Ànɔ́ɔ̀ k'ó yoòda o ya̰kú Èsípútì kóńcí wɛǹni hḭ́ǹka: Kóńsàci, kóńdɛcí, baàsàka, nɛ́ɛmá baà péé-sa mɛhɛká wɛǹni, k'yé teha k'yèe nɛ́ɛmá é kpáńtá é hḭn hḭ̀ma. Hḭ̀ma-dà kó n'dɛɛ̀ Èsípútì teǹka wɛǹni, háá é pɛ́ɛ́-nà tá̰a̰-yúùka yoo dɛcí kpɛ́ɛká mɛhɛká.

²⁰ Mɔ̀yísì nà Ànɔ́ɔ̀ kà pá pa̰á̰ Kɔ́yɔ̀ɔ de hḭ́n pá pa̰á̰-sa wɛǹni. Kà Ànɔ́ɔ̀ é yoòda o ya̰kú é potá ye Nìídì kóńkú nɛ́ɛmá Fàdàɔ̰́ɔ̰̀ n'ɔ̀ɔ sɔ̰̀ǹkànɔ̀ti yìhìka, kà ku nɛ́ɛmá wɛǹni kpáńtá hḭ̀ma. ²¹ K'yèe kóńkú num̀bííhí é kpíí hi wɛǹni, kà ku nɛ́ɛmá é hḭn pà̰pà̰hì, kà Èsípútì yam̀ma é hɛ̰ka ma nìpu. Èsípútì teǹka wɛǹni mɛhɛká, hḭ̀ma-dà de dɛɛ̀. ²² Kà Èsípútì dópòdópò yam̀ma mɛ̀ɛ té paá̰ ye niìya̰ ye cɔ̰́ɔ̰̀di nà pa dópòdópò pa̰á̰ma. Fàdàɔ̰́ɔ̰̀ dɛ́hà-ma mɛma, k'ó kpekàna toùka, ò pú besí Mɔ̀yísì nà Ànɔ́ɔ̀ wɛmá k'yé n'yònà Kɔ́yɔ̀ɔ de mà hḭ́mpú. ²³ K'ó fitá é pà hédá é kòǹ o hɔ̰́ɔ̰̀ta, ò pú mà kɛ̀dà yècɛ̰́ɛ̰̀. ²⁴ Kà Èsípútì yam̀ma wɛǹni é tɔ̰̀ṵ̀ bínhí ye Nìídì bɛ̀ni è kpɛ̀i é dɛ́tá nɛ́ɛsuumá mìì tee-sá, ye kóńkú nɛ́ɛmá de pú céé é yà̰à̰.

²⁵ Kà daàa kàyehì fìpù é ka̰há, é cɛ̰ɛ̰́-nà daadí Kɔ́yɔ̀ɔ de potá-di Nìídì kóńkú.

Fá̰kápàma dɛ́ɛ̀ma: Cɛ̀bùdaàka

²⁶ Ye kú dàhàka, kà Kɔ́yɔ̀ɔ é tṵ́má caka Mɔ̀yísì è yɔ̀: Taá é dɛ́há Fàdàɔ̰́ɔ̰̀ óò caka è yɔ̀: Kɔ́yɔ̀ɔ yɔ̀ ó héé n nìku kà kú ka̰há é taá é n duntà. ²⁷ K'ò baà è yení ò kó kù hédá-ma kà kú ka̰há, n kó sṵ́ná cɛ̀bùdaàka-dà o teǹka wɛǹni hḭ́ǹka, kà ká pà fá̰kápa sàma. ²⁸ Kà kó wɛ́dá-ma é wɔ̰ntà Nìídì kóńkú mɛhɛká, é yɛɛ̀ni é dúú o hɔ̰́ɔ̰̀ta n'ɔ̀ɔ nàmɔ̀ǹdɔɔ́di mɛhɛká, é dìsi bá n'ɔ̀ɔ dɔɔdí hḭ́ǹka, é yíí é sṵ́ná o sɔ̰̀ǹkànɔ̀ti n'ɔ̀ɔ nìku wɛǹni hɔ̰́ɔ̰́hí mɛhɛká, é pɛ́ɛ́-nà pa hṵ̀ka nà pa pɛ̰́ɛ̰̀ yòmu pukadà-caàka mɛhɛká. ²⁹ Kà múńtà kó n'dikù-ú-ma o hḭ́ǹka, n'ɔ̀ɔ sɔ̰̀ǹkànɔ̀ti hḭ́ǹka, é pɛ́ɛ́-n'ɔ̀ɔ nìku wɛǹni hḭ́ǹka.