Núǹtiyɛ̀ɛ̀ma 8

¹ Kà Kɔ́yɔ̀ɔ é caka Mɔ̀yísì è yɔ̀: Caka Ànɔ́ɔ̀ k'ó yoòda o ya̰kú kóńsàci, kóńdɛcí, nà baàsàka hḭ́ǹka k'yé teha kà cɛ̀bùdaàka é yɛɛ̀ni é sṵ́ná Èsípútì teǹka mɛhɛká. ² Kà Ànɔ́ɔ̀ é yoòda o ya̰kú Èsípútì kóńcí bɛ́kàma, kà cɛ̀bùdaàka é yɛɛ̀ni é dáná Èsípútì teǹka wɛǹni. ³ Kà Èsípútì dópòdópò yam̀ma mɛ̀ɛ té pa̰á̰ ye niìya̰ ye cɔ̰́ɔ̰̀di nà pa dópòdópò-pa̰á̰ma, kà cɛ̀bùdaàka é yɛɛ̀ni é sṵ́ná ye teǹka wɛǹni.

⁴ Kà Fàdàɔ̰́ɔ̰̀ é yíí Mɔ̀yísì nà Ànɔ́ɔ̀ é pà caka è yɔ̀: Cɔhà-nà Kɔ́yɔ̀ɔ k'ó ti náhìna mmí nà n nìku ye cɛ̀bùdaàkà. Ye wɔ̀ni ká n hédá Ìsìdàyɛ́dìpa kà pá ka̰há é taá ò pa̰á̰ dɔ̀hàka.

⁵ Kà Mɔ̀yísì óò tɛ̰́ná è yɔ̀: Fɔ̰́ń-dà kó hḭ́ná daadí n kó cɔhà-di Weèdi nɛ kpɛ́mú, fɔ̰́ń n'àa sɔ̰̀ǹkànɔ̀ti n'àa nìku wɛǹni. Ye kú daadí, n kó nì cɔ̀hà-á-ma kà n'áa náhìna-nà cɛ̀bùdaàka, é pɛ́ɛ́ n'àa hɔ̰́ɔ̰́hí mɛhɛká, Nìídì kóńkú mɛhɛká bààsí.

⁶ Kà Fàdàɔ̰́ɔ̰̀ óò tɛ̰́ná è yɔ̀: Ká̰ńweǹni. K'ò yɔ̀: A hḭ́mpù-dà kó pa̰ná, k'yé teha k'á bantá è yɔ̀ òcɔ̰́ǹ pú péé è sá̰à̰-nà Kɔ́yɔ̀ɔ ti Weèdi. ⁷ Ye cɛ̀bùdaàka k'áa nátá-nà-á-ma, é nátá-n'àa hɔ̰́ɔ̰́hí, n'àa sɔ̰̀ǹkànɔ̀ti, é pɛ́ɛ́-n'àa nìku. Nìídì mɛhɛká cɔ̰́ɔ̰̀di-dà kà kó sɔ̰́ńtá-ma.

⁸ Kà Mɔ̀yísì nà Ànɔ́ɔ̀ é yɛ̀dì Fàdàɔ̰́ɔ̰̀ hɔ̰́ɔ̰̀ta mɛhɛká. Kà Mɔ̀yísì é kɔń-nà Kɔ́yɔ̀ɔ è yɔ̀ ó bɔhà cɛ̀bùdaàka ò de héè kà mɛ̀ǹkà é sṵ́ná-ka Èsípútì teǹka nà Fàdàɔ̰́ɔ̰̀ kpɛ́mú. ⁹ Kà Kɔ́yɔ̀ɔ é pa̰á̰ Mɔ̀yísì d'oò cɔ̀haà-sa, k'yèe cɛ̀bùdaàka é kpíí hɔ̰́ɔ̰́hí mɛhɛká nà tapaàka, é pɛ́ɛ́-nà yɛ̀ɛ̀ka mɛhɛká-ho. ¹⁰ Kà pá kà tíká cócóoká kà pú cédí é kaàn, kà yɔtí wɛǹni é hḭn pà̰pà̰hì.

¹¹ Fàdàɔ̰́ɔ̰̀ há̰ dɛ́hà-ma è hɔ̰́tà pa náńkú yɔ́ɔ́káà-ní, k'ó kpekàna toùka. Ò pú besí Mɔ̀yísì nà Ànɔ́ɔ̀ k'yé n'yònà Kɔ́yɔ̀ɔ baà de mà hḭ́mpú.

Fá̰kápàma ta̰á̰ma: Nàmɛ́ɛ́cí.

¹² Kà Kɔ́yɔ̀ɔ é caka Mɔ̀yísì è yɔ̀: Caka Ànɔ́ɔ̀ k'ó yoòda o ya̰kú é kù potá teǹka tá̰pùdùmu, mù kó kpáńtá dɔkàdɔǹti-dà é sṵ́ná-hɔ̰ Èsípútì teǹka wɛǹni.

¹³ Kà pá mà hḭn, kà Ànɔ́ɔ̀ é yoòda o ya̰kú é potá ye teǹka tá̰pùdùmu, kà mú kpáńtá dɔkàdɔǹti é dáná nìpa nà nɔtí hḭ́ǹka. K'yèe tá̰pùdùmu wɛǹni é kpáńtá dɔkàdɔǹti páàti wɛǹni Èsípútì teǹka mɛhɛká. ¹⁴ Kà Èsípútì mɛhɛká dópòdópò yam̀ma mɛ̀ɛ té bɛń, è kó kpáhìna tá̰pùdùmu dɔkàdɔǹti nà dópòdópò pa̰á̰ma, pà pú nɛdà. K'yèe dɔkàdɔǹti baà è sɔ̰ncí è púsí nìpa nà nɔtí. ¹⁵ Ye wɔ̀ni, k'yèe dópòdópò yam̀ma é caka Fàdàɔ̰́ɔ̰̀ è yɔ̀: Weèdi nɔɔ̀ti pa̰á̰ma-dà ye pesà-ní. Nà mɛma baàkaà, k'ó kpekàna toùka, ò pú besí Mɔ̀yísì nà Ànɔ́ɔ̀ pa wɛmá, k'yé n'yònà Kɔ́yɔ̀ɔ de mà hḭ́mpú.

Fá̰kápàma nàhimá: Sɔ̰hí kà hì tohi dɛ́dɛ́í

¹⁶ Kà Kɔ́yɔ̀ɔ é caka Mɔ̀yísì è yɔ̀: Fàdàɔ̰́ɔ̰̀ ya̰dà kɔ́ɔ́-ma kóńkú nùdi. Á yɔ́dá é taá ò n'ceí ye pesá, k'ò tɛ̀ni, k'á ò caka è yɔ̀: Mmí Kɔ́yɔ̀ɔ-dà yɔ̀ ó hédá n nìku kà kú ka̰há é taá é n duntà. ¹⁷ K'ò pú kù hédà kà kú ka̰há, n kó wɛ́í-ní sɔ̰hí-dà kà hí n'tohí dɛ́dɛ́í pa hḭ́ǹka, mɛnń n'ɔ̀ɔ sɔ̰̀ǹkànɔ̀ti, n'ɔ̀ɔ nìku wɛǹni, é pɛ́ɛ́-nà pa hɔ̰́ɔ̰́hí mɛhɛká. Hì kó sṵ́ná-ma Èsípútì hɔ̰́ɔ̰́hí wɛǹni mɛhɛká, é dáná n'ɔ̀ɔ teǹka wɛǹni. ¹⁸ Há̰kà, ye kú daadí, n kó yentá-ma n nìku péé-sa, Kòsɛ́ǹ teǹka. Ye pesá, pà pú kó dɛ́há sɔ̰ɔ̰̀ta bá tàcɔ̰́. K'yè hḭn mɛma, ò kó bantá-ma è yɔ̀ mmí Kɔ́yɔ̀ɔ, n péé-ma o tenkà mɛhɛkà-ní. ¹⁹ N kó baàta-á-ma n nìku, kù pú kó dii náńkú o kpɛ́kú kó dii-kú. Ye kú yḭdó-ò kó ya̰dá é pa̰á̰-ma.

²⁰ Kà Kɔ́yɔ̀ɔ é pa̰á̰ ò wɛdà-sa. K'yèe sɔ̰hí é pɔ̰tá-ní é sṵ́ná Fàdàɔ̰́ɔ̰̀ wóo-nahàku mɛhɛká, n'ɔ̀ɔ sɔ̰̀ǹkànɔ̀ti hɔ̰́ɔ̰́hí mɛhɛká, é pɛ́ɛ́-nà Èsípútì teǹka wɛǹni. Kà hí cɔ̰ha ye yɔtí pemá dɛ́dɛ́í.

²¹ Kà Fàdàɔ̰́ɔ̰̀ é yíí Mɔ̀yísì nà Ànɔ́ɔ̀ é pà caka è yɔ̀: Taá é pa̰á̰-nà dɔ̀hàka nɛ Weèdi. Há̰kà, nɛ́ kà pa̰á̰ Èsípútì mɛhɛkà-ní.

²² Kà Mɔ̀yísì óò tɛ̰́ná è yɔ̀: Yè pú cédí tí hḭn mɛma mìì tee-sá, dɔ̀hàka ti kó pa̰á̰-ka Kɔ́yɔ̀ɔ, ti Weèdi kó n'yòǹ sɔ̀kací-dà Èsípútì yam̀ma pesá. Kà pà ti dìi kà ti pa̰kú ye kú dɔ̀hàkà bookù-ní pa yìhìka, pà pú kó ti kɔ̀ù nà tá̰à̰ka? ²³ Ti yònà é cèn daàa kàta̰a̰-dà càwenkú mɛhɛká é tɛ̀i é pa̰á̰ dɔ̀hàka Kɔ́yɔ̀ɔ, ti Weèdi ò kó n'hḭ́n tí kà pa̰kamá.

²⁴ Kà Fàdàɔ̰́ɔ̰̀ yɔ̀: N kó nɛ héé-ma kà nɛ́ taá é pa̰á̰ dɔ̀hàka Kɔ́yɔ̀ɔ nɛ Weèdi càwenkú mɛhɛká. Há̰kà, nɛ dá nátá sàma, nɛ́ cɔhà Weèdi n kpɛ́mú.

²⁵ Kà Mɔ̀yísì óò tɛ̰́ná è yɔ̀: Kà n yídà a pesà, n kó cɔhà-á-ma Kɔ́yɔ̀ɔ. Ká̰ńweǹni, ò kó nɛ náhìna-á-ma ye sɔ̰hì, fɔ̰́ń n'àa sɔ̰̀ǹkànɔ̀ti, n'àa nìku. A há̰ dá n'sɔ̰ncí è ti báńtí, è yení a kó héé-ma Ìsìdàyɛ́dìpa kà pá taá é pa̰á̰ dɔ̀hɔ̀ka Kɔ́yɔ̀ɔ.

²⁶ K'ó yɛɛ̀ni Fàdàɔ̰́ɔ̰̀ pesá, é cɔhà Kɔ́yɔ̀ɔ ye kpɛ́mú. ²⁷ Kà Kɔ́yɔ̀ɔ é pa̰á̰ Mɔ̀yísì d'oò cɔ̀haà-sa wɛǹni. K'yèe sɔ̰hí é nátá-nà Fàdàɔ̰́ɔ̰̀, n'ɔ̀ɔ sɔ̰̀ǹkànɔ̀ti, é pɛ́ɛ́-n'ɔ̀ɔ nìku. Bá tàcɔ̰́ pú sɔ̰́ńtà. ²⁸ Nà mɛma, kà Fàdàɔ̰́ɔ̰̀ baà é tṵ́má kpekàna toòka, é yeda è yɔ̀ Ìsìdàyɛ́dìpa dá ka̰há.