Núǹtiyɛ̀ɛ̀ma 10

Fá̰kápàma Niìmá: Kádáàka

¹ Ye kú dàhàka, kà Kɔ́yɔ̀ɔ é caka Mɔ̀yísì è yɔ̀: Taá é dɛ́há Fàdàɔ̰́ɔ̰̀. Mmí-dà kpekanà o toòka é pɛ́ɛ́ n'ɔ̀ɔ sɔ̰̀ǹkànɔ̀ti kpɛ́ɛká, è kpɛ̀i é pa̰á̰ n pɔ́ńtá pa̰á̰ma wɛǹni pa cɔhɔ̀ka. ² Mɛma, a kó wáńtá é nɛɛ́ caka-á-ma a bííhí n'àa yaàbíika n hḭmpú Èsípútì yam̀ma nà pɔ́ńtá pa̰á̰ma n pa̰à̰-ma wɛǹni pa teǹka mɛhɛká. Ma kú bookú-dà nɛ kó bantá-ma è yɔ̀ n yòǹ Kɔ́yɔ̀ɔ.

³ Mɔ̀yísì nà Ànɔ́ɔ̀ kà pá taá é dɛ́há Fàdàɔ̰́ɔ̰̀ óò caka è yɔ̀: Kɔ́yɔ̀ɔ, Hèbùdéèpa Weèdi a békú è tonà: A baà kó n'sɔ̰ncí è yení a cɔ̰́ɔ̰̀di yakàdapú o yìhìka háá daadí m̀mɔ́ni-dà? Héé o nìku, kà kú taá óò dùǹtà. ⁴ Kà mɛ̀ɛ yedáà a kó pà héé-ma kà pá ka̰há, ò kó ya̰dá tɔn-ní kádáàka-dà a teǹka mɛhɛká. ⁵ Kà kó pitá-ma é dáná teǹka pápáí bá nìì koò pú kó nɛɛ́ kà dɛ́há. Kà kó dehà-á-ma é dii dití mɛ̀ǹtì de dempáà-ti, tasíńtá̰à̰ka de sɔ̰́ńtà-sa wɛǹni, é pɛ́ɛ́-nà teená mɛ̀nà pɔ̰̀n-ná-ní yɛ̀ɛ̀ka mɛhɛká. ⁶ Kà kó sṵ́ná-ma fɔ̰́ń n'àa sɔ̰̀ǹkànɔ̀ti, nà Èsípútì yam̀ma wɛǹni hɔ̰́ɔ̰́hí mɛhɛká. A báàpa n'àa yààpa mum pú dɛ́hà ye pa̰á̰mà kú tɔɔ̀ma nà pà fòù-ma Èsípútì mɛhɛká háá é cɛ̰ɛ̰́-nà yenì.

Ye kú dàhàka, kà Mɔ̀yísì é yɛɛ̀ni Fàdàɔ̰́ɔ̰̀ pesá é ka̰há. ⁷ Kà Fàdàɔ̰́ɔ̰̀ sɔ̰̀ǹkànɔ̀ti óò caka è yɔ̀: Háá daadí m̀mɔ́ni-dà dɔɔ̀ɔ mɛnǹ kó n'sɔ̰ncí-ma è ti dinì náńkú? Héé Ìsìdàyɛ́dìpa kà pá ka̰há é taá é duntà Kɔ́yɔ̀ɔ pa Weèdi. A mum pú bantà è yɔ̀ Èsípútì kɔ́ɔ́ sèm̀pu-dà?

⁸ Kà pá tɛ̰́ná-ní Mɔ̀yísì nà Ànɔ́ɔ̀ Fàdàɔ̰́ɔ̰̀ pesá, k'ó pà caka è yɔ̀: Tɔɔ̀ta-nà é taá é duntà Kɔ́yɔ̀ɔ nɛ Weèdi. Nɛ m̀mɔ́ḿpa-dà há̰ kɔ́dí?

⁹ Kà Mɔ̀yísì óò tɛ̰́ná è yɔ̀: Ti wɛǹni-dà kɔ́dí: Bííhí nà kpɛ̰́m̀ma, poòpa nà daapá, é pɛ́ɛ́-nà ti nɔtí sàti nà sàmɔ́ǹti, mìì tee-sá, ti yònà é pa̰á̰ kúusàdi-dà Kɔ́yɔ̀ɔ kpɛ́mú.

¹⁰ Dɛ́há-nà yammàhàsḭ̀ka nɛ káá-ka. Kɔ́yɔ̀ɔ é nɛ ta̰hìna nà naakú, é n'yònà n kó nɛ hékamá kà nɛ ka̰há nà nɛ hɔ̰́ɔ̰́hí kpɛ́ɛpá. ¹¹ Nɛ békáà-sà pú kó dii. Daapá cɔ̰́ɔ̰̀di-dà kó taá é duntà Kɔ́yɔ̀ɔ, è yá̰á̰ mií-dà nɛ cɔɔ̀hu-má. Mɛmá-dà, kà pá pà bɔ̀hà Fàdàɔ̰́ɔ̰̀ hɔ̰́ɔ̰̀ta mɛhɛká.

¹² Ye wɔ̀ni, kà Kɔ́yɔ̀ɔ é caka Mɔ̀yísì è yɔ̀: Yoòda a nɔ̀ku Èsípútì hḭ́ǹka, é yíí-ní kádáàka kà ká tɛ̀ni é dehà é dii tasíńtá̰à̰ka de sɔ̰́ńtà-sa wɛǹni o mɛhɛká.

¹³ Kà Mɔ̀yísì é yoòda o ya̰kú Èsípútì teǹka hḭ́ǹka, kà Kɔ́yɔ̀ɔ é kpetá-ní yakú weèdi yɛɛ̀kumá-ní, kà kú tɛ̀ni é heé ye weǹtṵ́nní wɛǹni n'ɛ̀ɛ yèǹka wɛǹni. K'yé weka ká̰ńyɛ̰̀ǹfa, kà pá n'hɔ̰́tà ye yakú wontà toó-ní kádáàka-dà. ¹⁴ Kà ká pitá, é sṵ́ná páàti wɛǹni Èsípútì teǹka mɛhɛká. Kà de wɛhi-í-ma sàma mɔ́ma, nà pà péé-ma, pà mum pú dɛ́hà ka kú tɔɔ̀ka daadí yenì, pà mɛ̀ɛ koò pú kaá è kó kà dɛ́há. ¹⁵ Kà ká dáná teǹka wɛǹni kà ká hḭn bìtìtì. Kà ká dehà é dii míti nà tee-bíiká, tasíńtá̰à̰ka de sɔ̰́ńtà-sa wɛǹni. Yècɛ̰́ɛ̰̀ koò pú sɔ̰́ńtà teená hḭ́ǹka nà yɛ̀ɛ̀ka mɛhɛká.

¹⁶ Mɛmá-dà, kà Fàdàɔ̰́ɔ̰̀ é yíí feǹ-fem̀ma Mɔ̀yísì nà Ànɔ́ɔ̀ é pà caka è yɔ̀: N yetà-nà-á-ma Kɔ́yɔ̀ɔ nɛ Weèdi nà nɛ mɔ́mpá. ¹⁷ Wɛ̰́ɛ̰́-nà é bútá sḭ̀ḭ̀mà n pa̰à̰-mà mɛmà tṵ́màkaà, é cɔhà Kɔ́yɔ̀ɔ nɛ weèdi, k'ó n náhìna kṵ́mù mɛmù.

¹⁸ Kà Mɔ̀yísì é yɛɛ̀ni Fàdàɔ̰́ɔ̰̀ pesá, é taá é cɔhà Kɔ́yɔ̀ɔ. ¹⁹ Ye wɔ̀ni, kà Kɔ́yɔ̀ɔ é kpetá-ní yakpeèku fɔ̰̀-bɛ́kàma kà kú tɛ̀ni tódá ye kádáàka é taá kà hutá dàmɛ́dì mɛhɛká pà toò-ko kpà̰à̰ti dàmɛ́dì. Bá nìcɔ̰́ pú sɔ̰́ńtà Èsípútì teǹka wɛǹni mɛhɛká. ²⁰ Nà mɛma, kà Kɔ́yɔ̀ɔ é kpekàna Fàdàɔ̰́ɔ̰̀ toùka, k'ó yeda ò kó héé-ma Ìsìdàyɛ́dì bííhí kà hí ka̰há.

Fá̰kápàma wɔ́ìmá: Yḭ́ḭ̀pu

²¹ Ye kú dàhàka, kà Kɔ́yɔ̀ɔ é caka Mɔ̀yísì è yɔ̀: Yoòda a nɔ̀ku hḭ́ǹka kà yḭ́ḭ̀pu é tɛ̀ni é dáná Èsípútì teǹka wɛǹni, é n'yòǹ hɛ̰́ṵ̀ sàma kà nìi é n'kó nɛɛ́ mù pḭ́ń.

²² Mɛmá-dà, kà Mɔ̀yísì é yoòda o nɔ̀ku hḭ́ǹka, kà yḭ́ḭ̀sàpu é dáná Èsípútì teǹka wɛǹni é n'yòǹ daàa kàta̰a̰. ²³ Ye daàa kàta̰a̰ mɛhɛká, kà Èsípútì yam̀ma é hɛ̰ka pa tɔɔ̀pa dɛ́hápu, p'oòcɔ̰́ǹ mɛ̀ɛ de pú tutà ò péé-sá. Há̰kà, Ìsìdàyɛ́dìpa de péé-sa wɛǹni de káá-ma wenkú.

²⁴ Kà Fàdàɔ̰́ɔ̰̀ é yíí Mɔ̀yísì óò caka è yɔ̀: Tɔɔ̀ta-nà é taá é duntà Kɔ́yɔ̀ɔ nà nɛ poòpa nà nɛ bííhí. Há̰kà, nɛ́ héé nɛ nɔtí kà tí n'kaá miì. ²⁵ Kà Mɔ̀yísì óò tɛ̰́ná è yɔ̀: Fɔ̰́ń-dà kó ti kɔ̰́ɔ̰́ nɔtí ti kó taá pa̰á̰-nà-ti dɔ̀hàka, nà ti kó taá é pṵ́ná-ti kà tí dii pɛ́pɛ́í? ²⁶ Ti kó n'nɔɔ̀-ɔ́-ma ti nɔtí, bá naà-míǹku pú kó sɔ̰́ńtá, mìì tee-sá, ti mɛhɛká-dà ti kó taá é deèda-má é pa̰á̰-nà dɔ̀hàdi Kɔ́yɔ̀ɔ ti Weèdi. Kà ti pú ta̰ntà-á-ma, ti mɔ́ḿpà pú kó nɛɛ́ é n'yá̰á̰ mɛ̀ǹtì dɛ̀ɛ̀-tì.

²⁷ Há̰kà, kà Kɔ́yɔ̀ɔ é kpekàna Fàdàɔ̰́ɔ̰̀ toùka, k'ó yeda ò kó pà héé-ma kà pá ka̰há. ²⁸ Kà Fàdàɔ̰́ɔ̰̀ é caka Mɔ̀yísì è yɔ̀: Yɛ̀dì n hɔ̰́ɔ̰́tà mɛhɛkà! Weèd'áa wɛ́í ká n tṵ́m'áa dɛ́há n yìhìka daadí yènì! Kà n tṵ́m'àà dɛ́hà n yìhìkà, a kpíi-í-dà.

²⁹ Kà Mɔ̀yísì óò tɛ̰́ná è yɔ̀: Toò, k'yé n'yònà a mà hḭ́mpú, a koò bá n dɛ́há daadí yènì a yìhìka.