Núǹtiyɛ̀ɛ̀ma 9

Fá̰kápàma nùmmá: Hɔ̰́ɔ̰́tà-nɔtí kṵ́mú

¹ Kà Kɔ́yɔ̀ɔ é caka Mɔ̀yísì è yɔ̀: Taá é dɛ́há Fàdàɔ̰́ɔ̰̀ óò caka è yɔ̀: Kɔ́yɔ̀ɔ, Hèbùdéèpa Weèdi yɔ̀ ó héé n nìku kà kú ka̰há é taá é n duntà. ² K'ò sɔ̰ncí è yení ò kó kù héé-ma kà kú ka̰há, ³ n kó potá-ma o sa̰nhí, n'ɔ̀ɔ sa̰mmùǹhi, n'ɔ̀ɔ bɔnamáti, n'ɔ̀ɔ nɛ̀ci, n'ɔ̀ɔ hɔ̰̀̀ci, n'ɔ̀ɔ bɔhí, mìì baà yòǹ-sa kú wɛǹni nɔtí kà pà tì cɛ̰nti yɛ̀ɛ̀ka mɛhɛká. Nɔ-kṵ́mú-dà kó tì hàdi dɛ́dɛ́í. ⁴ Kɔ́yɔ̀ɔ kó pa̰á̰-ma baàtamá Èsípútì yam̀ma nɔtí nà Ìsìdàyɛ́dìpa kpɛ́ɛtí cɔhàka. Ìsìdàyɛ́dìpa kú nɔtí bɛ́ka, nɔtá tàcɔ̰́tà pú kó kpíí. ⁵ Mɛ̀ɛkà, Kɔ́yɔ̀ɔ hḭ́nà-á-ma daadí è yɔ̀ ká̰ńweǹni, ò k'éè pa̰á̰-dà Èsípútì teǹka mɛhɛká.

⁶ K'yé weka, kà Kɔ́yɔ̀ɔ é pa̰á̰ ò de hḭ́mpú, kà Èsípútì yam̀ma nɔtí wɛǹni é kpíí fɛ́. Há̰kà, Ìsìdàyɛ́dìpa kú nɔtí bɛ́ka bá tàcɔ̰́ pú kpíi. ⁷ Kà Fàdàɔ̰́ɔ̰̀ é tɔn kà pá béka mìì de pa̰à̰-sa hḭ́ǹka, kà pá tóní óò caka è yɔ̀ Ìsìdàyɛ́dìpa kú nɔtí mɛhɛká, bá tàcɔ̰́ pú kpíi. Nà mɛma baàkaà, k'ò baà é kpekàna toòka é yeda ò kó héé-ma Ìsìdàyɛ́dì nìku kà kú ka̰há.

Fá̰kápàma kɔɔ̀má: Hḭḭ̀-núùka

⁸ Kà Kɔ́yɔ̀ɔ é caka Mɔ̀yísì nà Ànɔ́ɔ̀ è yɔ̀: Ya̰tá-nà máa-hṵ̀di tápémú é sṵ́ná nɛ nàwɛ̰ɛ̰̀ka, kà Mɔ̀yísì é mù pùhìna hḭ́ǹka Fàdàɔ̰́ɔ̰̀ yìhìka. ⁹ Ye tápémù kó kpáńtá tá̰pùdùmu-dà é dáná Èsípútì teǹka wɛǹni. Kà hḭḭ̀-núùka é yɛ̀ɛ̀ nìpa nà nɔtí hḭ́ǹka, é n'hɔ̰n mɔndidí.

¹⁰ Mɛmá-dà, kà pá ya̰tá ye tápémú é taá hɔ̰́tá Fàdàɔ̰́ɔ̰̀, kà Mɔ̀yísì é mù pùhìna hḭ́ǹka kà mú hḭn hḭḭ̀-núùka nìpa nà nɔtí wɔ̰̀ǹti hḭ́ǹka. ¹¹ Kà Èsípútì dópòdópò yam̀ma é hɛ̰ka pà kó tɛ̀ni-má-ní Mɔ̀yísì pesá nà hḭḭ̀-núùka kpɛ́mú, mìì tee-sá, kà mɛ̀ɛ té de pà yɛ̀ɛ̀-ɛ́-ma è yònà pa kpɛ́ɛpá wɛǹni. ¹² Kà Kɔ́yɔ̀ɔ é kpekàna Fàdàɔ̰́ɔ̰̀ toòka bá ò pú besí Mɔ̀yísì nà Ànɔ́ɔ̀ pa wɛmá, k'yé n'yònà Kɔ́yɔ̀ɔ de mà hḭ́mpú Mɔ̀yísì.

Fá̰kápàma yehìmá: Tasíńtá̰à̰ka

¹³ Kà Kɔ́yɔ̀ɔ é caka Mɔ̀yísì è yɔ̀: Á wáńtá é pìi ká̰ńyɛ̰̀ǹfa Fàdàɔ̰́ɔ̰̀ pesá é tɛ̀i óò caka è yɔ̀: Kɔ́yɔ̀ɔ, Hèbùdéèpa Weèdi-dà wɛdà è yɔ̀, ó héé n nìku kà kú ka̰há é taá é n duntà. ¹⁴ Wɔ̀nì mɛnì, n kó wɛ́í-ní fá̰kápàma dɔ́ɔ́di-dà o mɔ́nń, n'ɔ̀ɔ sɔ̰̀ǹkànɔ̀ti n'ɔ̀ɔ nìku hḭ́ǹka, k'yé teha k'ó bantá è yɔ̀ òcɔ̰́ǹ pú péé fòùkù mɛhɛkà è n sá̰á̰-nà. ¹⁵ Kà n de ca̰nà n nɔ̀ku òò potà nà dɔnhaàdikú, mɛnń n'ɔ̀ɔ nìku, è yenì ò koò pú kadí fòùku mɛhɛká. ¹⁶ Há̰kà, n ò héè k'ò fòù, è kpɛ̀i óò bɛka n nɔɔ̀ti sá̰á̰pu-dà, k'yé teha kà n yèdi é yíí teǹka nà kà nùdi. ¹⁷ K'ò tṵ́mà sɔ̰ncí è kpanì n nìku, è yení kù kó ka̰há-ma, ¹⁸ ká̰ńweǹni, sá̰mà kú wɔ̀ni, n kó hɛ́í-ní tasíńtá̰a̰-tadidí-dà Èsípútì teǹka mɛhɛká, mɛ̀nì kú tɔɔ̀di mum pú dɔɔ-dí o mɛhɛká n'ɔ̀ɔ cetáma, háá é tóó nà yenì. ¹⁹ Ye kú kpɛ́mú, kpená a nɔtí, é sɔɔ̀na n'àa kpɛ́ɛsá wɛǹni mìì péé-sa yɛ̀ɛ̀ka mɛhɛká. Kà nìpa yoo nɔtí pú koní é pɛha sɔ̀ɔ̀ka, è péé-ho yɛ̀ɛ̀ka, tasíńtá̰a̰-tadidí-dà kó dɔdi é kɔ̀ù mìì pú sɔ̀ɔ̀-sá wɛǹni.

²⁰ Kà Fàdàɔ̰́ɔ̰̀ sɔ̰̀ǹkànɔ̀ti tìcɔ̰́, mɛ̀ǹtì de kɛdà-ti Kɔ́yɔ̀ɔ wɛmá yècɛ̰́ɛ̰̀, é caka ti dehèpa è yɔ̀ pá koní fem̀ma nà pa nɔtí é tɛ̀ni sɔ̀di hɔ̰́ɔ̰́hí mɛhɛká. ²¹ Àmá, kà mɛ̀m̀pà de pú kɛdà-pa Kɔ́yɔ̀ɔ wɛmá, kà pá héé pa dehèpa nà pa nɔtí yɛ̀ɛ̀ka mɛhɛká.

²² Kà Kɔ́yɔ̀ɔ é caka Mɔ̀yísì è yɔ̀: Yoòda a nɔ̀ku hḭ́ǹka, kà tasíńtá̰a̰-tadidí é dɔdi-ní Èsípútì teǹka wɛǹni, nìpa nà nɔtí hḭ́ǹka, é pɛ́dá-nà mìì yɛ̀ɛ̀-sa wɛǹni yɛ̀ɛ̀ka mɛhɛká.

²³ Kà Mɔ̀yísì é yoòda o ya̰kú hḭ́ǹka, kà Kɔ́yɔ̀ɔ é tɔn-ní tafá kà fà kɔ̰̀ǹti nà tasíńtá̰à̰ka. Fà de dɛnà é potá È̀sípútì teǹka-dà, kà tasíńtá̰à̰ka é nɛɛ́ é tṵṵ̀na-ní. ²⁴ Nà Èsípútì yɔtí cetàma è yòǹ heedí, ni nìpa mum pú dɛ́hà tasíńtá̰a̰-tadìdì mɛnì kú bookù nà ye kú tapoókù. ²⁵ K'yèe tasíńtá̰à̰ka é kɔ̀ù mìì de péé-sa wɛǹni Èsípútì yɛ̀ɛ̀ka mɛhɛká: Nìpa nà nɔtí, nà mìì yɛ̀ɛ̀-sa wɛǹni teǹka hḭ́ǹka, é nuncí nuncí-nà teená. ²⁶ Kòsɛ́ǹ tempáàku, Ìsìdàyɛ́dì bííhí de péé-ku mɛhɛká cɔ̰́ɔ̰̀di-dà ye tasíńtá̰à̰ka de pú dɔɔ-má.

²⁷ Kà Fàdàɔ̰́ɔ̰̀ é yíí-ní Mɔ̀yísì nà Ànɔ́ɔ̀ é pà caka è yɔ̀: Sá̰mà, n cɔ́dí é n'hɔ̰́tà n pa̰à̰ sḭ̀ḭ̀ma-dà. Kɔ́yɔ̀ɔ-dà coó, mmí nà n nìku ti yetà-á-ma. ²⁸ Ye tafà kɔ̰ɔ̰̀kà nà ye tasḭ́ńtá̰à̰kà pɛtà-á-ma-ní, cɔhà-nà Kɔ́yɔ̀ɔ k'ó yè nɛ̀hìna mɛma. N kó nɛ héé-ma kà nɛ́ ka̰há, n koò pú kó nɛ cá̰hìna.

²⁹ Kà Mɔ̀yísì óò tɛ̰́ná è yɔ̀: Kà n yɛ̀ɛ̀ yɔɔtì, n kó yoòda n nɔ̀hi hḭ́ǹka é cɔhà Kɔ́yɔ̀ɔ k'yèe tafà kɔ̰ɔ̰̀kà n'ɛ̀ɛ tasíńtá̰à̰kà é nɛɛ̀hi, k'yé teha k'á bantá è yɔ̀ mɛnń-dà tee tenkà. ³⁰ Há̰kà, n yá̰á̰-ma è yɔ̀ fɔ̰́ń n'àa sɔ̰̀ǹkànɔ̀ti nɛ mum pú kó wampa Kɔ́yɔ̀ɔ Weèdi.

³¹ Ye tafá de fɛ́úwà-á-ma kóǹti pà toò-ti Nɛ̀ɛ́ nà yɔ̀ka pà toò-ka Ɔ́sì, mìì tee-sa Ɔ́sì de káà toó yoòfá̰à̰ti-dà, kà Nɛ̀ɛ́ toó pémú. ³² Mɛ̀ɛkà, Pɛ̰́ɛ̰̀-yɔ̀ka nà ka bookú tɔkú pà toò-ku Èpótì, mɛnka de pú seǹ, mìì tee-sá kà de hɔ̰́ deǹta-á-ma.

³³ Kà Mɔ̀yísì é yídá Fàdàɔ̰́ɔ̰̀ pesá é yɛ̀dì ye yɔtí, ye wɔ̀ni, é yoòda o nɔ̀hi Kɔ́yɔ̀ɔ bɛ́ka óò cɔ̀hà, k'ó nɛhìna ye tafà-kɔ̰ɔ̰̀ka é pɛ́ɛ́-nà ye tasíńtá̰à̰ka n'ɛ̀ɛ tafá.

³⁴ Fàdàɔ̰́ɔ̰̀ dɛ́hà-ma è hɔ̰́tà ye tafá-kɔ̰ɔ̰̀ka, n'ɛ̀ɛ tasíńtá̰à̰ka n'ɛ̀ɛ tafá mɔ́nfá nɛɛ̀hi, k'ó tṵ́má é pa̰á̰ sḭ̀ḭ̀ma é kpekàna toùka, mɛnń n'ɔ̀ɔ sɔ̰̀ǹkànɔ̀ti. ³⁵ Kà Fàdàɔ̰́ɔ̰̀ é kpekàna toùka, é yeda ò kó héé-ma Ìsìdàyɛ́dì bííhí kà hí ka̰há é n'yònà Kɔ́yɔ̀ɔ de mà hḭ́mpú Mɔ̀yísì nùdi mɛhɛká.