Núǹtiyɛ̀ɛ̀ma 12

Núǹtiyɛ̀ɛ̀ma kúúdi hḭ́nápu

¹ Kà Kɔ́yɔ̀ɔ é caka Mɔ̀yísì nà Ànɔ́ɔ̀ Èsípútì teǹka mɛhɛká è yɔ̀: ² Weedì mɛnì kó n'yòǹ nɛ pesá weèka, nà benní weèdi cecedí-dà. ³ Taá é caka-nà Ìsìdàyɛ́dì nìku è yɔ̀: Weedì mɛnì, ni dapítadí daadí, hɔ̰́ɔ̰́tà-dakpɛ̰́ǹn wɛǹni é pɛha hɔ̰ɔ̰̀bíidí yoo bɔbíidí. ⁴ Kà hɔ̰́ɔ̰̀ta nìpa pú wɛhi è kó nɛɛ́ dii nɔtá é tà yɔ̀a, kà pá cɔ́ɔ́ pa dentɔɔ̀pa pà yɛń-nà-pa dɔ́ɔ́di sá̰á̰pu é taá pà pɛ́ɛ́-nà, kà pá pɛha nɔtá pà kó nɛɛ́ dii-tá é tà yɔ̀a. ⁵ Ye hɔ̰ɔ̰̀bíidí kó n'yòǹ dadí-dà, é n'káá benní nìcɔ̰́, é n'kɔ́ɔ́ sá̰ǹni nìcɔ̰́nì. Nɛ kó nɛɛ́ pɛha-á-ma hɔ̰ɔ̰̀bíidí yoo bɔbíidí. ⁶ Nɛ́ nì hḭ́ná háá ye weedì ni dapíì-nàhidí daadí. Ye kú daadí yohokú k'yè kà̰à̰ku-ní, Ìsìdàyɛ́dì nìku wɛǹni é hɛ̰dá kù bàtà-di. ⁷ Nɛ́ tódá ni hḭ̀ma é mà kɔdá hɔ̰́ɔ̰́hí há̰nùka cɔ̀ka dɛcí pà tṵnà-ci bɛ́ɛ́cí, nà hḭ́ńkà kpɛ́kú mɛ̀ǹkù ci cɛ̰ɛ̰́-ku. Nɛ́ mà hḭn hɔ̰́ɔ̰́hí pà kó nì dii-hí wɛǹni mɛhɛká. ⁸ Nɛ́ pṵ́ná ye màǹci kà cí bii, kà nɛ́ cì cécí ye yèǹka kà cɔ̰́ɔ̰̀di mɛhɛká nà pɛ̰́ɛ̰̀pa mɛ̀m̀pà kɔ́ɔ́-pa yòmu yíkànasá, é pɛ́ɛ́-nà míitohití. ⁹ Nɛ pú yònà é cì cecí ci bɛ́ńcí yoo é cì sɛ̀ha. Àmá nɛ́ yònà é cécí nɔtá pà pṵ́nà-ta-dà nà ta yuudí, nà ta tààka, é pɛ́ɛ́-nà ta mɛka-kpɛ́ɛsá wɛǹni. ¹⁰ Nɛ pú yònà é sɔ̰́ńtá yècɛ̰́ɛ̰̀ háá kṵ́ńweǹni. Kà mìì sɔ̰́ńtà-sa, k'yè wekáà ká̰ńyɛ̰̀ǹfa kà n'ɛ́ɛ̀ tɔ̀n. ¹¹ Ǹtɛ nɛ kó cì dikamá kú bookú: Nɛ́ n'cɛ̰́ṵ́ nɛ báatí nawɔ̰̀ǹfa nɛ kɔɔ̀ka, é n'fḭ́ḭ́ nɛ nɛ̀ùti, é m'púsí nɛ ya̰kú nɛ nɔ̀ku mɛhɛká, ye wɔ̀ni é cì dii feǹ-fem̀ma. Ye kó n'yòǹ núǹti yɛ̀ɛ̀ma kúúdi-dà nɛ kó ya̰nkà-di mmí Kɔ́yɔ̀ɔ n kpɛ́mú.

¹² Ye kú yèǹkà-dà n kó cèn-má Èsípútì teǹka wɛǹni mɛhɛká, é kɔ̀ù Èsípútì yam̀ma bíidacecehí nà pa nɔtí bíidaceceká. Ma kú bookú-dà mmí Kɔ́yɔ̀ɔ, n kó bɛka-má n nɔɔ̀ti Èsípútì wàci é cì kɔ̰́ɔ̰́ yetádi. ¹³ Hḭ̀ma-dà kó n'yòǹ yḭdó hɔ̰́ɔ̰́hí nɛ kó m'péé-hi kú mɛhɛká. Kà n kɛ̰hɛdi è mà dɛ́hà, n pú kó nɛɛ̀hi, n kó ha̰tá-ma, k'yé teha kà nɛ́ fḭ́tá kṵ́mú fá̰kápàma n kó wɛ́í-ma-ní Èsípútì hḭ́ǹka.

¹⁴ Nɛ té kó deǹta-á-ma ye daadì kpɛ́mú beeká wɛǹni é ya̰nkà kúusàdi n kpɛ́mú. Yè kó n'yòǹ n kpɛ̰́ǹti nùùka n nɛ kɔ̰́ɔ̰̀-ka-dà kà kà kɔ́ɔ́ é yɔ̀ɔ, kà nɛ kó kà n'tṵ̀n wɔ̀ǹci wɛǹni mɛhɛká.

Pɛ̰́ɛ̰̀pa mɛ̀m̀pà kɔ́ɔ́-pa yòmu yíkànasá kúúdi

¹⁵ Kà Kɔ́yɔ̀ɔ é sɔ̰kadá è yɔ̀: Nɛ kó n'káá daàa kàyehì-dà è cákámú pɛ̰́ɛ̰̀pa mɛ̀m̀pà kɔ́ɔ́-pa pɛ̰́ɛ̰̀ yòmu yíkànasá. É cetá-nà dacecedí, pɛ̰́ɛ̰̀ yòmu yíkànasá koò pú yònà é m'péé nɛ hɔ̰́ɔ̰́hí mɛhɛká. Ye kú daakà mɛhɛkà, é tódá dacecedí háá dayehìdí, kà nìi cécí pɛ̰́ɛ̰̀ mɛ̀ǹǹ káá-ko yòmu yíkànasá, pà k'óò dèna-á-ma Ìsìdàyɛ́dì cɔhɔ̀ka. ¹⁶ Dacecedí nà dayehìdí, nɛ́ pa̰á̰ tíkásàma é n duntà. Ka kú mɛhɛkà, nɛ pú yònà é pa̰á̰ tɔmú mùcɔ̰́mù, kà dipú nɛ kó dii-pú cɔ̰́ɔ̰̀di kú bénáma-dà pú dɛɛ̀. ¹⁷ Nɛ té ya̰nkà ye pɛ̰́ɛ̰̀pa mɛ̀m̀pà kɔ́ɔ́-pa yòmu yíkànasá kúúdi é deǹta daadí n denà-di nɛ nìku Èsípútì mɛhɛká. Nɛ té dii kúúdi ye daadì wɔ̀ǹci wɛǹni mɛhɛká, k'yé n'kɔ́ɔ́ yɔ̀amá. Kpɛ̰́ǹti nùdi n nɛ hḭ́nà-di-dà ye pesà-ní. ¹⁸ Cḭ̀ma cecemá, ma dapíìnàhidí yohokú, nɛ kó n'cákámú pɛ̰́ɛ̰̀pa mɛ̀m̀pà kɔ́ɔ́-pa-dà pɛ̰́ɛ̰̀ yòmu yíkànasá háá nà ma daàka púdɛ́ɛ́ nà nìcɔ̰́ daadí yohokú. ¹⁹ Daàa kàyehì mɛhɛká, pɛ̰́ɛ̰̀ yòmu yíkànasá pú yònà é m'péé nɛ hɔ̰́ɔ̰́hí mɛhɛká. K'òòcɔ̰́ǹ dii dimá kà mà káá pɛ̰́ɛ̰̀ yòmu yíkànasá è yòǹ Ìsìdàyɛ́dì yaǹn yoo cà̰ǹn, kà n'ɔ́ɔ̀ dèna Ìsìdàyɛ́dì cɔhɔ̀ka. ²⁰ Nɛ pú yònà é dii yècɛ̰́ɛ̰̀ k'yè káá pɛ̰́ɛ̰̀ yòmu yíkànasá. Nɛ kó kaàdi-sá wɛǹni, nɛ yònà é n'cákámú pɛ̰́ɛ̰̀pa mɛ̀m̀pà kɔ́ɔ́-pa-dà pɛ̰́ɛ̰̀ yòmu yíkànasá.

Núǹtiyɛ̀ɛ̀ma kúúdi sɔ̀do

²¹ Kà Mɔ̀yísì é yíí Ìsìdàyɛ́dì kpɛ̰́m̀ma é pà caka è yɔ̀: Taá é pɛha-na hɔ̰ɔ̰̀dabíiká yoo bɔdabíiká mɛ̀ǹkà kó n'sà-nà-ka nɛ hɔ̰́ɔ̰́hí nìpa dɔ́ɔ́di, é kà hɛ̰dá é ya̰nkà núǹti yɛ̀ɛ̀ma kúúdi. ²² Nɛ́ pɛha teecí pà toò-ci Ìsɔ́pù^a, è té cì fɛ̰̀ǹta ye nɔtá hḭ̀ma nɛ cekadà-ma caadí mɛhɛká, é mà kɔdá hɔ̰́ɔ̰́hí há̰nùka dɛcí bɛ́ɛ́cí kpɛ́cí nà hḭ́ńkà kpɛ́kú. Ye kú dàhàka, òcɔ̰́ǹ koò dá yɛ̀dì tapaàdi háá nà kṵ́ńweǹni káńyɛ̰̀ǹfa. ²³ Kɔ́yɔ̀ɔ kó n'centì tḭ́ń wɔ̀ni Èsípútì mɛhɛká è pà kɔ̀ùdì, k'ò dɛ́há hḭ̀ma nɛ hɔ̰́ɔ̰́hí há̰nùka dɛcí hḭ́ǹka ò té kó hì yentá́-ma, ò pú kó hédá kà mɛ̀ǹǹ kɔ̀ùdì-ko é dúú nɛ hɔ̰́ɔ̰́hí mɛhɛká é nɛ kɔ̀ù. ²⁴ Ye Weèdi kpɛ̰́ńtìnùkà-dà nɛ kó n'tṵ̀n-má, nɛ́na nà nɛ yaàbíiká k'yé n'kɔ́ɔ́ yɔ̀ɔmá. ²⁵ Nɛ kó dúú tḭ́ń wɔ̀ni teǹka Kɔ́yɔ̀ɔ hḭ́nà nùdi è yɔ̀ ò kó nɛ pa̰a̰-ká kú mɛhɛká, ye kú dɔ̀hàdì-dà nɛ kó m'pa̰kú-ma. ²⁶ K'yè yònà nɛ bííhí nɛ békáà é hḭ́n: Badà tee kà nɛ pa̰kú ye dɔ̀hɔ̀dì? ²⁷ Kà nɛ́ hì tɛ̰́ná è yɔ̀: Núǹtiyɛ̀ɛ̀ma kúúdi dɔ̀hàdi-dà ti pa̰kú-ma Kɔ́yɔ̀ɔ kpɛ́mú. Ìsìdàyɛ́dì bííhí de péé tḭ́ń daadí Èsípútì mɛhɛká, kà Kɔ́yɔ̀ɔ kɔudì Èsípútì yam̀ma é yentá ti kú hɔ̰́ɔ̰́hí, ò pú ti kɔù.

Ye wɔ̀ni, kà Ìsìdàyɛ́dìpa é hìu dúùka é dɔɔ́ háá-nà teǹka é duntà Kɔ́yɔ̀ɔ. ²⁸ Mɛmá-dà, kà Ìsìdàyɛ́dì bííhí é ka̰há é tɛ̀i é pa̰á̰ pápáí Kɔ́yɔ̀ɔ de cakáà-sa wɛǹni Mɔ̀yísì nà Ànɔ́ɔ̀.

Fá̰kápàma pítamá: Pɔ̀ɔpá kṵ́mú

²⁹ Yèǹkà cɔ̀hàka, kà Kɔ́yɔ̀ɔ é kɔ̀ù Èsípútì Pɔ̀ɔpá wɛǹni, é cetá nà Fàdàɔ̰́ɔ̰̀ Pɔ̀ɔ mɛ̀ǹǹ de kó wáńtá kaàdi-kó o wóo-kàtàda, nà kódekpenáku kóoó, é pɛ́ɛ́-nà pa nɔtí bíídaceceká. ³⁰ Ye yèǹka, Fàdàɔ̰́ɔ̰̀ n'ɔ̀ɔ sɔ̰̀ǹkànɔ̀ti nà Èsípútì yam̀ma wɛǹni, kà pá yídá kà kpíi-dawòka é tódá mìì tee-sá, hɔ̰́ɔ̰̀ta tàcɔ̰́tà de pú péé è kɔ́ɔ́ kpíìo. ³¹ Ye yèǹka ka cɔ̰́ɔ̰̀di mɛhɛká, kà Fàdàɔ̰́ɔ̰̀ é yíí Mɔ̀yísì nà Ànɔ́ɔ̀ é pà caka è yɔ̀: Yíí-nà é yɛ̀ɛ̀ n nìkù cɔhàkà, nɛ́na nà Ìsìdàyɛ́dìpa wɛǹni, é taá duntà Kɔ́yɔ̀ɔ k'yé n'yònà nɛ mà hḭ́mpú. ³² Tóó-nà nɛ nɔtí wɛǹni sàti nà sàm̀mɔ́ǹti k'yé n'yònà nɛ mà hḭ́mpú é ka̰há. Nɛ há̰ cɔhà nɛ Weèdi kà ní n kóná.

³³ Kà Èsípútì yam̀ma é pɛ̰́kapa Ìsìdàyɛ́dìpa è yɔ̀ pá yɛ̀dì fem̀ma pa teǹka mɛhɛká mìì tee-sá, pà de maàhu è tonà pà kó kpíí-ma pa wɛǹni. ³⁴ Ye kpɛ́mú-dà tee kà Ìsìdàyɛ́dìpa de é tódá pa pɛ̰́ɛ̰̀ yòmu kà mù butà è pú pa̰à̰ pɛ̰́ɛ̰̀ yòmu yíkànasá. Pa de mù pɔ̰à̰ nà̀ mu caàka pa nɛǹti mɛhɛká-dà é bukadá é ka̰há-nà.

³⁵ Ye de hɔ̰́tà Ìsìdàyɛ́dìpa pa̰à̰-á̰-ma Mɔ̀yísì de pà hḭ́mpú. Pà de cɔɔ̀haà-á-ma Èsípútì yam̀ma wúdó nɛǹti, nà díi-máàti kpɛ́ɛtí, nà báatí. ³⁶ Kà Kɔ́yɔ̀ɔ é hédá kà Ìsìdàyɛ́dìpa é dɛ́tá yuudí Èsípútì yam̀ma pesá, kà pá pà pa̰a̰ pà de pà cɔ̀haà-sa wɛǹni. Ma kú bookú-dà Ìsìdàyɛ́dìpa de kodà-ma Èsípútì yam̀ma kpààti wɛǹni.

Èsípútì teǹka yɛ̀ɛ̀ma

³⁷ Ye kú dàhàka, kà Ìsìdàyɛ́dìpa é yídá Hàdàmùsɛ́sì yɔtí, é ka̰há yɔbíisá pà toò-sa Sùkɔ́tì. Pa dɔ́ɔ́di de yɔ̀ɔ-ɔ́-ma niìdaapá tohìka kɔ̀ɔnà kɔ̀ɔ̀ mɛ̀m̀pà kó nɛɛ́ é cèn-pá, é m'bàsí poòpa nà bííhí. ³⁸ Kà pá tódá pa nɔtí kà tì wɛhi sàma: Pa hɔ̀ci, pa bɔhí nà pa nɛ̀ci, é n'kɛ̰hɛdi, kà boocí dɔ́ɔ́di nìpa é pà nɛ̀ǹta. ³⁹ Kà pá tódá pɛ̰́ɛ̰̀ yòmu pà de butà-pu-ní Èsípútì mɛhɛká kà mù kɔ́ɔ́ yòmu yíkànasá é pɛ̰́ńtá pɛ̰́ḿpɛ̰́ǹti, mìì tee-sá, pà de pà bɔ̀haà Èsípútì mɛhɛká k'yèe yòmu mum pú yídà, pà mɛ̀ɛ de pú nɛɛ̀ é pɛha pa cà̰ǹku dipú.

⁴⁰ Ìsìdàyɛ́dì nìku de pa̰à̰ beeká kɔ̀ɔnà nàhì nà púta̰a̰-dà Èsípútì mɛhɛká. ⁴¹ Ye beeká kɔ̀ɔnà nàhì nà púta̰a̰ cɛ̰nà tḭ́ń daadí mɔ́ń-mɔ́nní, kà Kɔ́yɔ̀ɔ nìku é yɛ̀dì cóńcódi Èsípútì mɛhɛká. ⁴² Kɔ́yɔ̀ɔ de péé-nà o nìku-dà ye yèǹka ka wɛǹni, è kpɛ̀i é kù dèna Èsípútì mɛhɛká. Ye kú kpɛ́mú-dà tee, wɔ̀ǹci wɛǹni mɛhɛká, Ìsìdàyɛ́dì nìku pú yònà̀ é dɔɔ́-ma ye kú yèǹkà, mìì tee-sá mɛnń-dà kà tee kà pà k'óò n'dùǹti.

Weèdi kpɛ̰́ǹti nùùka núǹti yɛ̀ɛ̀ma kúúdi dipú hḭ́ǹka

⁴³ Kà Kɔ́yɔ̀ɔ é tṵ́má é caka Mɔ̀yísì nà Ànɔ́ɔ̀ è yɔ̀: Ǹtɛ Weèdi kpɛ̰́ǹti nùùka núǹti yɛ̀ɛ̀ma kúúdi hḭ́ǹka: Cà̰ǹn òcɔ̰́ǹ pú yònà é dii ni dipú. ⁴⁴ Núndeho pà dontà-ko nà dící, nɛ k'óò ca̰ntá-ma k'ó nɛɛ́ é mù dii. ⁴⁵ Cà̰ǹn mɛ̀ǹǹ pɛ́ɛ̀ nɛ péé-nà-ko yoo mɛ̀ǹǹ dehu-ko è kó tà̰ǹta dící, pa dɛ́ɛ́dì pú yònà é mù dii. ⁴⁶ Nɛ kó cécí ye kúúdi màǹci hɔ̰́ɔ̰̀ta mɛhɛká-dà, nɛ dá cì deèna-ní tapaàdi. Nɛ mɛ̀ɛ dá pɔ́dá ci kɔ̰́ɔ̰́di nìcɔ̰́nì. ⁴⁷ Ìsìdàyɛ́dì nìku wɛǹni yònà é ya̰nkà-á-ma ye núǹtì yɛ̀ɛ̀mà kúúdì. ⁴⁸ Kà cà̰ǹǹ mɛ̀ǹǹ pɛ́ɛ̀ nɛ péé-nà-ko kpɛ̀i é ya̰nkà ye kúúdì Kɔ́yɔ̀ɔ kpɛ́mú, o hɔ̰́ɔ̰́tà daapá wɛǹni yònà é ca̰ntá-ma. Ye kú dàhàka, ò kó nɛɛ́ é nì yà̰ǹkà-á-ma é n'yònà Ìsìdàyɛ́dì yaǹn. Tayóòku yaǹn pú yònà é dii ni dipú. ⁴⁹ Ìsìdàyɛ́dì yaǹn nà cà̰ǹn mɛ̀ǹǹ pɛ́ɛ̀ nɛ péé-nà-ko kó n'fòù Weèdi kpɛ̰́ǹti nùùka kàcɔ̰́ kú hḭ́ǹka-dà.

⁵⁰ Kà Ìsìdàyɛ́dìpa wɛǹni é pa̰ná sɛ̰́ɛ̰́ɛ̰́ Kɔ́yɔ̀ɔ de cakáà-sa Mɔ̀yísì nà Ànɔ́ɔ̀. ⁵¹ Ye daadí mɔ́ń-mɔ́nní-dà, Kɔ́yɔ̀ɔ de denà-ma-ní Ìsìdàyɛ́dìpa Èsípútì mɛhɛká kà pà nɔ́ńcí cóńcodí.