Núǹtiyɛ̀ɛ̀ma 13

Mɔ̀yísì wɛì-nà Ìsìdàyɛ́dì nìku

¹ Kà Kɔ́yɔ̀ɔ é wɛɛ́-nà Mɔ̀yísì è yɔ̀: ² Á baàta Ìsìdàyɛ́dìpa bíidacecehí wɛǹni é hì cená kà hí n'yòǹ n kpɛ́hí, é pɛ́ɛ́-nà pa nɔtí bíidaceceká. ³ Kà Mɔ̀yísì é caka Ìsìdàyɛ́dì nìku è yɔ̀: Nɛ té deǹta daadì mɛnì kú kpɛ́mú é nì yà̰ǹkà kúúdi, mìì tee-sá ye kú daadì-dà Kɔ́yɔ̀ɔ nɛ denà-ma-ní nà nɔɔ̀ti Èsípútì mɛhɛká nɛ de yon-sá núǹti. Kà nɛ té nì yà̰ǹku, nɛ pú yònà é cécí pɛ̰́ɛ̰̀ mɛ̀ǹǹ káá-ko yòmu yíkànasá. ⁴ Nɛ yɛtì yenì Èsípútì teǹka mɛhɛká, cḭ̀ma pa toò-ma Àbípù^a daadí-dà. ⁵ Kɔ́yɔ̀ɔ kó nɛ ta̰hìna tḭ́ń daadí Kànánìpa, nà Hítìpa, nà Àmɔ́dìpa, nà Hèfíìpa nà Yèbúsìpa teǹka mɛhɛká, nɛ té yònà é deǹta-á-ma ye pa̰á̰mà é ya̰nkà ma kúúdi beeká wɛǹni ye cḭ̀mà mɛhɛkà. Ò de wɛ̰́háà nɛ yààpa è yɔ̀ ò kó nɛ pa̰a̰ ye kú tenkà-dà, ceèti nà naà-mɛhimá wudì-ka kú mɛhɛká. ⁶ Daàa kàyehì mɛhɛká, nɛ kó n'yon pɛ̰́ɛ̰̀pa mɛ̀m̀pà kɔ́ɔ́-pa-dà yòmu yíkànasá. Dayehìdí daadí, kà nɛ́ ya̰nkà kúúdi Kɔ́yɔ̀ɔ kpɛ́mú. ⁷ Ye daàa kàyehì mɛhɛká, nɛ kó n'yon pɛ̰́ɛ̰̀pa mɛ̀m̀pà kɔ́ɔ́-pa-dà yòmu yíkànasá. Pɛ̰́ɛ̰̀ mɛ̀ǹǹ káá-ku yòmu yíkànasá pú yònà é m'péé nɛ hɔ̰́ɔ̰́hí mɛhɛká é pɛ́ɛ́ n'ɔ̀ɔ yòmu yíkànasá nɛ teǹka wɛǹni hḭ́ǹka. ⁸ Kà nɛ té ya̰ǹku tḭ́ń daadí ye kúúdì, kà nɛ́ n'cakú nɛ bííhí è tonà: Ti nì yà̰ǹku è kpɛ̀i é deǹta Kɔ́yɔ̀ɔ de pa̰à̰-sa-dà ti kpɛ́mú ti yɛtì tḭ́ń daadí Èsípútì teǹka mɛhɛká. ⁹ Ye kú pa̰á̰mà kó n'yòǹ dehènamá-dà nɛ pesá é tṵ́má é n'yònà yḭdó nɛ nɔ̀hi yoo nɛ tḭ́ḭ̀ka hḭ́ǹka. Mií-dà kó n'tee kà nɛ́ n'cakú tɔɔ̀pa Kɔ́yɔ̀ɔ Weèdi kpɛ̰́ǹti nùùka, mìì tee-sá nà nɔɔ̀ti-dà ò nɛ denà-ma-ní Èsípútì mɛhɛká. ¹⁰ Benní nà benní, nɛ té yònà é tṵṵ̀na-á-ma ye nùùkà é ya̰nkà ye kúúdì kà ni daadí tɛ̀i.

¹¹ Kà Mɔ̀yísì é sɔ̰kadá è yɔ̀: Kɔ́yɔ̀ɔ kó nɛ ta̰hìna tḭ́ń daadí Kànánìpa teǹka mɛhɛká, é kà nɛ pa̰a̰ é n'yònà ò de hḭ́ńkáàma nùdi nɛ báàpa nà nɛ mɔ́mpá, ¹² nɛ yònà é cená-á-ma nɛ Pɔ̀ɔpá wɛǹni kà pá n'yòǹ Kɔ́yɔ̀ɔ kpɛ́ɛpá, é pɛ́ɛ́-nà nɛ nɔtí bíidaceceká wɛǹni. ¹³ Kà sa̰mmùǹta bíidacecedí-dà mɛ̀ɛ dɛɛ̀, kà nɛ́ nì fɛ̀ùwa nà hɔ̰ɔ̰̀-bíidaadí, kà mɛma dɔ, yè békú nɛ́ pɔ́-pɔ́dá-ma ni fɔ́kàta é nì kɔ̀ù. Nɛ bííhí cɔhɔ̀ka, nɛ yònà è té bodá-ma pɔ̀ɔpá wɛǹni fɛ̀ùka. ¹⁴ Kà nɛ bííhí ya̰dà nɛ békáà è hḭ́n: Baà tee kà nɛ pa̰kú miya̰? Kà nɛ́ hì tɛ̰́ná è yɔ̀: Ti de yon núǹti-dà Èsípútì mɛhɛká, kà Kɔ́yɔ̀ɔ ti deèna-ní n'ɔ̀ɔ nɔɔ̀ti. ¹⁵ Fàdàɔ̰́ɔ̰̀ há̰ de yení-ma dɛ́dɛ́í è pú kpɛ̀i tí yɛ̀ɛ̀ o teǹka mɛhɛká tá, mɛmá-dà, kà Kɔ́yɔ̀ɔ mɛ̀ɛ é kɔ̀ù pà pɛdà-sa wɛǹni Èsípútì mɛhɛká k'yè yòǹ dacecesá, é tódá nìpa Pɔ̀ɔpá é pɛ́ɛ́-nà nɔtí bíidaceceká. Ǹtɛ mìì tee-sá, kà ti tóńkú ti nɔtí bíidaceceká wɛǹni è kà pa̰kú dɔ̀hɔ̀di Kɔ́yɔ̀ɔ, è bopù ti Pɔ̀ɔpá wɛǹni fɛ̀ùka. ¹⁶ Ye dɔ̀hɔ̀kà-dà kó n'yòǹ dehènamá-dà nɛ pesá é tṵ́má é n'yònà yḭdó nɛ nɔ̀hi yoo nɛ tḭ́ḭ̀ka hḭ́ǹka, mìì tee-sá, Kɔ́yɔ̀ɔ ti denà-ní Èsípútì mɛhɛká nà kpeèti-dà.

Weèdi denà Ìsìdàyɛ́ɛ̀pa é pà túdí pa cèmu mɛhɛká

¹⁷ Fàdàɔ̰́ɔ̰̀ héè tḭ́ń daadí Ìsìdàyɛ́dì nìku kà kú ka̰há, Weèdi de pú héè kà kú tṵṵ̀na Fìdìsìtíìpa yɔtí cɔ̀ku bá nà kù de benì-mà dɛ́dɛ́í. Nì de maàhaà è yɔ̀: N pú kpɛ̀i k'yèe nìkù é peǹta yam̀màhàdi é tṵ́má é tón Èsípútì mɛhɛká, fìdìsìtíìpa kó kù dɔdi tḭ́ń wɔ̀ni ta̰à̰pu. ¹⁸ Mií-dà tee, kà ní héé kà kú wɔ̰́ńtá é tṵṵ̀na càwenkú cɔ̀ku, kpà̰à̰ti dàmɛ́dì bɛ́ka. Ìsìdàyɛ́dìpa de yɛɛ̀ Èsípútì mɛhɛká è nɔ́ńcí cóńcodí-dà. ¹⁹ Kà Mɔ̀yísì é tódá Sòsɛ́fù kɔ̰́ɔ̰̀ka kà pá kà ka̰há-nà, mìì tee-sá, Sòsɛ́fu^b mɔ́nń-dà de hḭ́nà o kúcàpa nùdi è yɔ̀: Mɔ́masí Weèdi baà kó yɔ̀ɔ é tɛ̀ni-í-ma-ní é nɛ fḭ́hìna. N'aá wɛ̰́ha è yɔ̀ nɛ kó wáńtá é n'yɛtì é tódá-ma n kɔ̰́ɔ̰̀ka.

²⁰ Kà Ìsìdàyɛ́dìpa é yíí-ní yɔtí pà toò-ti Sùkɔ́tì, é taá é kaàdi Ètám̀ yɔtí kà tì kpɛ̰́dí càwenkú. ²¹ Kɔ́yɔ̀ɔ-dà de péé yìhìka, wèǹku è té pà n'nihí cɔ̀ku wɔ́ɔ̀di mɛhɛká kà nì ca̰ncí, yèǹka kà ha̰mú té ca̰kaná é pà n'tìi wenkú, k'yé teha kà pá nɛɛ́ é n'centì wèǹku nà yèǹka. ²² Ye wɔ́ɔ̀di mɛ̀nì de hɔ̰́ n'ca̰ncí-di wèǹku, nà ye ha̰mú mɛ̀mù de hɔ̰́ n'ca̰ncí-pu yèǹka de pú hɔ̰́ n'kɔ́ɔ́ pa yìhìka.