Núǹtiyɛ̀ɛ̀ma 24

Weèdi pa̰à̰ múnáma nà Ìsìdàyɛ́dìpa.

¹ Kà Weèdi é caka Mɔ̀yísì è yɔ̀: Dìsi-nà-ní n pesà, Sìnàyíì ta̰à̰di hḭ́ǹka fɔ̰́ń nà Ànɔ́ɔ̀ nà Nàdápù nà Àbìhúù nà Ìsìdàyɛ́dì kpɛ̰́m̀ma púyehì. Kà nɛ tɛ̀ni è káà sá̰á̰-ní nà dɛùma, kà nɛ́ wɛ̰̀ḭ háá nà teǹka n yìhìka. ² Kà fɔ̰́ń cɔ̰́ɔ̰̀di é n tɔ́ká-ní, tɔɔ̀pa dá tɔ́ká-ní n pesà. Nìku mɛ̀ɛ dá pɛ́ɛ́ nɛ dìsi-nà-ní miì.

³ Kà Mɔ̀yísì é táá caka ye nìku, Kɔ́yɔ̀ɔ hɔ̰́ɔ̰wencí nùka wɛǹni n'ɔ̀ɔ kpɛ̰́ńtìnùka wɛǹni. K'yèe nìku óò tɛ̰́ná nùdi nìcɔ̰́ è yɔ̀: Ti kó pa̰á̰-ma Kɔ́yɔ̀ɔ wɛɛ̀-sa wɛǹni.

⁴ K'ó wa̰hà Kɔ́yɔ̀ɔ d'oò cakáà-sa wɛǹni. K'ó yídá ká̰ńyɛ̰̀ǹfa pìdìpìdì, é madí dɔ̀hàdi cɔ̰̀ǹcɔ̰̀ni ye ta̰à̰di fɔ̰̀di, é tṵná kákamú tá̰à̰ka píì-kàdɛ́ɛ́ Ìsìdàyɛ́dì nahà̰ti de sá̰á̰pu. ⁵ K'ó tɔn Ìsìdàyɛ́dìpa dapàm̀ma è yɔ̀ pá taá pa̰á̰ nɔtí púnáma dɔ̀hàdi, é yíí kɔ̀ù naàdapààka é pa̰á̰ Kɔ́yɔ̀ɔ kpɛ́mú múnáma dɔ̀hàdi. ⁶ Kà Mɔ̀yísì é totá ye nɔtí hḭ̀ma cɔ̀ku màdɛ́ɛ́, é tóó ma yàakú é pa̰á̰ caàka mɛhɛká, é tóó tɔkú é có-cóá dɔ̀hàdi cɔ̰̀ǹcɔ̰̀ni hḭ́ǹka. ⁷ K'ó tódá múnáma pɔ̀kàta é tà kàn Ìsìdàyɛ́dì nìku yìhìka. Kà kú tɛ̰́ná nùdi nìcɔ̰́ è yɔ̀: Ti teháà-á-ma Kɔ́yɔ̀ɔ wɛɛ̀-sa wɛǹni è kó yè púsí-nà tɔmú.

⁸ Kà Mɔ̀yísì é tóó ye hḭ̀ma é mà sìdi ye nìku hḭ́ǹka é kù caka è yɔ̀: Ǹtɛ, hḭ̀mà mɛmà-dà bɛkú múnáma Kɔ́yɔ̀ɔ nɛ pa̰à̰-nà-ma kà mà nɔɔ̀-nà o kpɛ̰́ńtìnùka.

⁹ Ye kú dàhàka, k'ó dìsi ye ta̰à̰di hḭ́ǹka, è nɔɔ̀-nà Ànɔ́ɔ̀ nà Nàdápù nà Àbìhúù nà ye Ìsìdàyɛ́dì kpɛ̰́m̀ma púyehì. ¹⁰ Kà pá tɛ̀i é dɛ́há Ìsìdàyɛ́dìpa Weèdi, kà nì nɛ̀hi-sá yònà pà yè dɔ̀haà-ma nà díkpecí tá̰à̰ka pà toò-ka sàfíì é yíí è weni è yònà hḭ́ǹka. ¹¹ Weèdi pú pa̰à̰ kpákpààma màcɔ̰́mà Ìsìdàyɛ́dìpa kpɛ̰́m̀ma, kà pá nì dɛ́há, é dii, é yà̰à̰.

Mɔ̀yísì tṵ́mà pètà-nà Kɔ́yɔ̀ɔ ta̰à̰di hḭ́ǹka

¹² Kà Kɔ́yɔ̀ɔ é caka Mɔ̀yísì è yɔ̀: Dìsi-ní n pesà ta̰à̰di hḭ́ǹka é nɛɛ̀hi miì, kà m'áa kɔ̰́ɔ̰́ tá̰à̰ka dawɛhí n wa̰haà-hi kú hḭ́ǹka hɔ̰́ɔ̰wencí nùka nà kpɛ̰́ńtìnùka k'á kà biɔhàna Ìsìdàyɛ́dìpa.

¹³ K'ó yídá é dìsi Weèdi ta̰à̰di hḭ́ǹka, k'òo dapàǹn Sòsùwéè òò nɔɔ̀-nà. ¹⁴ K'ó nɛɛ́ dìsi, ò de cakáà Ìsìdàyɛ́dì kpɛ̰́m̀ma è yɔ̀: Ní ti n'ceí-nà miì háá kà tí tóní é nɛ hɔ̰́tá-ní. Ànɔ́ɔ̀ nà Húdì nɛ péé-nà-á-ma, kà mɛ̀ǹǹ káá-ko kú wɛǹni wɛkú, k'ó taá é pà dɛ́há. ¹⁵ K'ó dìsi ye ta̰à̰di hḭ́ǹka, kà wɔ́ɔ̀di é nì dáná. ¹⁶ Kà Kɔ́yɔ̀ɔ wɛhimú é cútá-ní Sìnàyíì ta̰à̰di hḭ́ǹka, kà wɔ́ɔ̀di é nì dáná é n'káá daàa kàkɔ̀dì. Dayehìdí daadí, kà Kɔ́yɔ̀ɔ é yíí Mɔ̀yísì n'ɛ̀ɛ wɔ́ɔ̀di mɛhɛká. ¹⁷ Ìsìdàyɛ́dìpa de wáń ye Kɔ́yɔ̀ɔ wɛhimú kà mù yònà ha̰sàmu-dà ye ta̰à̰di yóòfa. ¹⁸ Kà Mɔ̀yísì é dúú ye wɔ́ɔ̀di mɛhɛká, é dìsi ye ta̰à̰di hḭ́ǹka é taá pa̰á̰ weǹtṵ́ṵká púnàhì, yèǹka púnàhì.