Núǹtiyɛ̀ɛ̀ma 23

Révision en équipe 15-12-04. Corrections après le conseiller

Kpɛ̰́ǹti nùka sídàma hḭ́ǹka.

¹ Òcɔ̰́ǹ dá yekà nuǹhetí é tì n'dɛ̀i-nà. Òcɔ̰́ǹ mɛ̀ɛ dá tón niìsḭ̀ǹn bɛ́ka sídàma mɛhɛká é caka mɛ̀ǹtì kɔ́ɔ́-ti. ² Òcɔ̰́ǹ dá tṵṵ̀na nìku dɔ́ɔ́di wɛmá é pa̰á̰ kpákpààma. Òcɔ̰́ǹ mɛ̀ɛ dá wampa nìku dɔ́ɔ́di síipú mɛhɛká é tṵṵ̀na ku dàhàka é yentá wɛbemú. ³ N'ɔɔ̀cɔ̰́ǹ dá tempa-nà nìdo k'ò pú coó sídàpu mɛhɛká, bá k'ò yòǹ pɛ́íta.

⁴ Kà nɛ kà̰à̰tɔɔ̀o nàfa yoo o sa̰mmùǹta fédi, kà n'ɛɛ̀ pètà-nà, kà n'ɛ́ɛ̀ n'ɔ̀ɔ̀ konà-ní. ⁵ Kà nɛ mɛ̀ɛ dɛ́hà o sa̰mmùǹta kà tà dɔdi nà totodí, k'ò hɛ̰káà ta yíkànapú, nɛ dá pɛ̰ɛ̰̀a̰ bɛ́ɛ́kú é ka̰há, àmá n'ɔ́ɔ̀ tempanà kà nɛ́ tà yíkàna.

⁶ Sídàpu mɛhɛká, kà séńtɔ̀ǹn nadi, kà n'ɔ́ɔ̀ kɔ̰́ɔ̰́ o naadí. ⁷ Nɛ́ nátá-nà nuǹhetí. Nɛ dá yetá kɔ̀ù nìi mɛ̀ǹǹ kɔ́ɔ́-ko yetádi yoo niìcoóko. Kà mɛ̀ǹǹ hḭn-kó mɛma, mmí Kɔ́yɔ̀ɔ n pú k'óò pṵ́tá. ⁸ Nɛ dá n'ta̰à̰ni pa̰ká, mìì tee-sá kà hɔ̰́ yɔɔ̀na dìdìpa-dà, è té cɛ̰á̰ niìcoópa wɛbeèdi.

⁹ Nɛ dá diá náńkú cà̰ǹn mɛ̀ǹǹ péé-ko nɛ cɔhɔ̀ka. Nɛ yá̰á̰-ma sukú ò kó nɛɛ́ mahà-sa, mìì tee-sá nɛ mɔ́mpá de yòǹ cà̰ma-dà Èsípútì teǹka mɛhɛká.

Kpɛ̰́ǹti nùka bemmuhipàdi nà damuhipàdi hḭ́ǹka

¹⁰ Beeká kɔ̀kɔ̀dì mɛhɛká, nɛ té bɔdí nɛ dití nɛ yɛ̀ka mɛhɛká, é tì kɔ̰ɔ̰. ¹¹ Há̰kà, benyehìdí mɛhɛká, nɛ yònà é kà héé-ma kà ká muhipa, ye wɔ̀ni, kà mɛ̀m̀pà yòǹ-pa pɛ́íhí nɛ cɔhɔ̀ka, nà yɛ̀di nɔtí é dɛ́tá é dii mìì sɔ̰́ńtà-sa. Ma cɔ̰́ɔ̰̀di-dà nɛ yònà é hḭn-má nɛ tená yɛ̀ka.

¹² Nɛ té kó pa̰á̰ nɛ tɔná wɛǹni daà-kàkɔ̀dì mɛhɛká-dà. Àmá dayehìdí daadí, nɛ pú yònà é deha, k'yé teha kà nɛ dehèpa nà nɛ cà̰ma é fa̰à̰da, é yídá kà nɛ nɛ̀ci nà nɛ sa̰mmùǹhi é muhipa.

¹³ Nɛ́ púsí sukú n nɛ cakáà-sa wɛǹni. Nɛ dá yetá é dɔa tɔheèka wàci, pà mɛ̀ɛ dá yekà ci yèka n'ɔɔ̀cɔ̰́ǹ kú nùdi mɛhɛká.

Ìsìdàyɛ́dì kúusàka kàta̰a̰.

¹⁴ Benní wɛǹni, nɛ yònà è té taá^a n ya̰nkà kúùka kàta̰a̰-dà. ¹⁵ Kúúdi nɛ kó cedí ya̰nkà-dí-dà héé pɛ̰́ɛ̰̀pa mɛ̀m̀pà kɔ́ɔ́-pa yòmu yíkànasá kpɛ́ɛdí. Nɛ té kó n'cákámú ye pɛ̰́ɛ̰̀pà é n'yòǹ daàa kàyehì-dà, Àbíbù cḭ̀ma mɛhɛká é n'yònà n de mà nɛ hḭ́mpú, mìì tee-sá, ye kú weedì mɛhɛká-dà nɛ yɛɛ̀ni-má-ní Èsípútì teǹka. Òcɔ̰́ǹ dá tɛ̀ni n yìhìka n'ɔ̀ɔ nɔɔ̀kpehí. ¹⁶ Ni kú dàhàka, nɛ té ya̰nkà nɛ yɛ̀ka dicecetí kúúdi kà nɛ tì cetà kɔ̰ṵpú. É yídá, kà nɛ tì tíkà è yɔ̀ɔ, benní yɔ̀ɔmá, kà nɛ́ ya̰nkà dití wɛǹni kúúdi. ¹⁷ Benní mɛhɛká, daapá wɛǹni yònà é tɛ̀ni cɔ̀ku màta̰a̰-dà, mmí Kɔ́yɔ̀ɔ nɛ Bateó yìhìka.

¹⁸ Nɛ pú yònà é múná é n tɛɛ̀-ní pɛ̰́ɛ̰̀ mɛ̀ǹǹ káá-ko yòmu yíkànasá nà nɔtá nɛ n pa̰à̰-nà-ta dɔ̀hàdi hḭ̀ma. Nɛ mɛ̀ɛ pú yònà é wená nɛ kɔù-ta nɔtá kɔ̀ma. ¹⁹ Nɛ yònà é tɛɛ̀-ɛ́-ma-ní n hɔ̰́ɔ̰̀ta mɛhɛká nɛ yɛ̀ka dicecetí, mìì tee-sá n yòǹ Kɔ́yɔ̀ɔ-dà nɛ Weèdi. Nɛ pú yònà é sɛhìna bɔbíidí ni yṵṵ̀ mɛhimá mɛhɛká.

Weèdi hḭ́nà-ka nùka nà ni tencí kà Ìsìdàyɛ́dìpa é nɛɛ́ é dúú Kànàáà

²⁰ Kà Weèdi é tṵ́má caka Mɔ̀yísì è yɔ̀: N kó tɔn-ń-ma-ní n tɔntɔndikó k'ó nɛ n'nihí cɔ̀ku, é nɛ m'púsí háá é yɔ̀ɔ nɛ ta̰hìna bɛ̀m̀bɛ̀ni n dɔɔ̀haà-di nɛ kpɛ́mú. ²¹ Ye kú kpɛ́mú, nɛ́ cɛ̰ɛ̰́ nɛ cɔ̰́ɔ̰̀di o yìhìka óò n'you-nà toòka, kà nɛ dá ò mɔkàna fɔ̰́di. Kà mɛma dɔ, ò pú kó kpená o nɔ̀ǹci nɛ sḭ̀ḭ̀ma hḭ́ǹka, mìì tee-sá ò dehú nà n yèdi-dà. ²² Kà nɛ há̰ ò cùnì dɛ́dɛ́í, è besí n nɛ cakú-sà wɛnnì, nɛ kà̰à̰tɔɔ̀pa kó n'yòǹ n kà̰à̰tɔɔ̀pa-dà, kà mɛ̀m̀pà nɛ tɔ̰ṵ-nà-pa k'á n pà ta̰á̰-nà.

²³ N tɔntɔndikó kó nɛ nihí-ma cɔ̀ku. Ò kó nɛ túdí é nɛ ta̰hìna-má Àmɔ́dìpa, nà Hítìpa, nà Fèdísìpa, nà Kànánìpa, nà Hìfíìpa, nà Yèbúsìpa teǹka mɛhɛká, é tɛ̀i ká n fíɔwá ye kú boocì wɛnnì-dà. ²⁴ Nɛ dá hìu pa wàci yìhìka, nɛ mɛ̀ɛ dá cì pa̰á̰ dɔ̀hàka. Nɛ pú yònà é pa̰á̰ pà pa̰kú-sa, nɛ yònà é cì pɔ́dá-ma dɛ́dɛ́í é pɛ́ɛ́-nà ci tá̰à̰ka pà cɔ́à-ka. ²⁵ Mmí Kɔ́yɔ̀ɔ nɛ Weèdi cɔ̰́ɔ̰̀di-dà nɛ kó n'duǹti-má. Ye wɔ̀ni, n kó kóná-ma nɛ dipú nà nɛ nɛ́ɛmá, é yíí nɛ yenkàna dɔncí. ²⁶ Nɛ teǹka mɛhɛká, poòo òcɔ̰́ǹ kú pɛutí koò pú kó yɛ̀dì, poyɛ̰tadá mɛ̀ɛ koò pú kó m'péé. N kó nɛ pa̰a̰-á̰-ma wɔ̰ndandɛudí.

²⁷ N kó héé-ma kà n bɔɔ̀pùukú é n'nihí nɛ yìhìka è cɛ̰hú heèka nɛ kó m'patì-ka wɛǹni nìku. Teǹka nɛ kó nàa-ká wɛǹni nìku pú kó n'nɛhù nɛ yìhìka. Nɛ wɛ̀ɛ̀tɔ̀pa té kó cocí-ma. ²⁸ N kó nihìna nɛ yìhìka cekèǹdènàcíìka-dà, kà ká bɔhà Hìfíìpa, nà Kànánìpa, nà Hítìpa. ²⁹ N pú kó pà bɔ̀hà pa wɛǹni benní nìcɔ̰́ mɛhɛká, k'yèe teǹka dá hḭn foǹni, kà yɛ̀di nɔtí é wɛ́dá é sṵ́ná, é nɛ n'kɔkapú. ³⁰ Cɛ̰́ma cɛ̰́ma-dà n kó pà m'bɔ̀hu-má nɛ yìhìka, háá kà nɛ́ yɔ̀ɔ é pɛkà é kaàdi ye teǹka wɛǹni. ³¹ Teǹka n kó nɛ pa̰a̰-ká, kà nùka-dà kó n'dɛɛ̀ é tódá kpà̰à̰ti dàmɛ́dì háá é taá é sá̰á̰ Fìdìsìtíìpa kóoó, é yídá é tóó Sìnàyíì càwenkú háá nà kóńkú pà toò-ku Èfáátì. Nìpa mɛ̀m̀pà péé-pa wɛǹni ye tenkà, n kó pà tàa nɛ nɔ̀hi mɛhɛká-dà kà nɛ́ pà bɔ̀hà. ³² Nɛ dá pà pa̰á̰-nà múnáma, nɛ mɛ̀ɛ dá mà pa̰á̰-nà pa wàci. ³³ Nɛ dá teha kà p'oòcɔ̰́ǹ ní m'péé nɛ yɔtí mɛhɛká, k'yé teha kà nɛ dá dɔdi pa máàdi mɛhɛká, é n'dɔń pa wàci ye wɔ̀ni é n yetá-nà. Kà nɛ tṵnà pa wàci cɔ̀ku, nɛ kó cì n'dɔ̀hu-ú-ma.