Màtíyéè 1

Sèsíì wɛnaamá Màtíyéè wà̰haà-ma

Sèsíì yààpa

¹ Ǹtɛ Sèsí-Kídísì yààpa fùdi. O yàdo-dà de héé Dàfítì kà Dàfítì kú yàdo de héé Àbààhám̀.

² Àbààhám̀-dà de pɛdà Ìsàákì, kà Ìsàákì é pɛdá Sàkɔ́pù, kà Sàkɔ́pù é pɛdá Sùdáà n'ɔ̀ɔ kúcàpa. ³ Kà Sùdáà é pɛdá Pèdɛ́sì nà Sèdáà. Pa màa yèdi-dà de dɛɛ̀ Tàmáà. Kà Pɛ̀dɛ́sì é pɛdá Hɛ̀sìdóm̀, kà Hɛ̀sìdóm̀ é pɛdá Hàdám̀. ⁴ Kà Hàdám̀ é pɛdá Àmìnàdápù, kà Àmìnàdápù é pɛdá Nààsónì, kà Nààsónì é pɛdá Sàdìmɔ́ɔ̀. ⁵ Kà Sàdìmɔ́ɔ̀ é pɛdá Bòósì^a, k'òo màa héé Hàdàhábù. Kà Bòósì é pɛdá Òbɛ́dì, k'òo kú màa héé Hùdútì. Kà Òbɛ́dì é pɛdá Sɛ̀séè. ⁶ Kà Sɛ̀séè é pɛdá wódo Dàfítì.

Kà Dàfítì é pɛdá Sàdòmɔ́ɔ̀, k'òo màa de yòǹ Ùdíì poòo. ⁷ Kà Sàdòmɔ́ɔ̀ é pɛdá Hòdòbòám̀, kà Hòdòbòám̀ é pɛdá Àbìyáà, kà Àbìyáà é pɛdá Àsáfù. ⁸ Kà Àsáfù é pɛdá Sòsàfátì, kà Sòsàfátì é pɛdá Yòdám̀, kà Yòdám̀ é pɛdá Òsìyásì. ⁹ Kà Òsìyásì é pɛdá Yòtám̀, kà Yòtám̀ é pɛdá Àkásì, kà Àkásì é pɛdá Èsèkíyásì. ¹⁰ Kà Èsèkíyásì é pɛdá Mànàséè, kà Mànàséè é pɛdá Àmɔ́ɔ̀, kà Àmɔ́ɔ̀ é pɛdá Sòsìyásì. ¹¹ Kà Sòsìyásì é pɛdá Yèkònìyáà n'ɔ̀ɔ kúcàpa. Ye kú wɔ̀ni-dà pà de cɛ̰háà-ma Ìsìdàyɛ́dìpa é pà ka̰hánà Bàbìdɔ́nì teǹka núǹti.

¹² Ye kú dàhàka, kà Yèkònìyáà é pɛdá Sàdàtìyɛ́dì, kà Sàdàtìyɛ́dì é pɛdá Sòdòbàbɛ́dì. ¹³ Kà Sòdòbàbɛ́dì é pɛdá Àbìhúù, kà Àbìhúù é pɛdá Èdìyàkím̀, kà Èdìyàkím̀ é pɛdá Àsɔ́ɔ̀. ¹⁴ Kà Àsɔ́ɔ̀ é pɛdá Sàdɔ́kì, kà Sàdɔ́kì é pɛdá Àkím̀, kà Àkím̀ é pɛdá Èdìhúù. ¹⁵ Kà Èdìhúù é pɛdá Èdìyèsɛ́ɛ̀, kà Èdìyàsáà é pɛdá Màtánì, kà Màtánì é pɛdá Sàkɔ́pù. ¹⁶ Kà Sàkɔ́pù é pɛdá Sòsɛ́fù, Màdíì dɔɔ̀o. Ye kú Màdíì-dà de pɛdà Sèsíì pà tṵ́mà toò-ko Kídísì.

¹⁷ Wɔ̀ǹti píta nà tìnàhì-dà ka̰hà, é cɛ̰ɛ̰́-nà Àbààhám̀ kú wɔ̀ǹku háá-nà Dàfítì kpɛ́kú. Ye kú dàhàka, kà wɔ̀ǹti píta nà tìnàhì é ka̰há, é cɛ̰ɛ̰́-nà Dàfítì kú wɔ̀ǹku, háá-nà pà cɛ̰háà-ma Ìsìdàyɛ́dìpa é pà ka̰hàna Bàbìdɔ́nì núǹti. É yídá, kà wɔ̀ǹti píta nà tìnàhì é ka̰há, é cɛ̰ɛ̰́ n'ɛ̀ɛ kú wɔ̀ni háá-nà Kídísì pɛdáma.

Sèsíì pɛdáma

¹⁸ Ǹtɛ pà pɛkáàma Sèsí-Kídísì. O màa Màdíì de yòǹ Sòsɛ́fù pocɛ̰ǹni-dà. K'ò há̰ póń nà Weèdi Sèdi kú nɔɔ̀ti kà pà mun pú pɛ́ɛ̀ hɔ̰́ɔ̰̀ta. ¹⁹ O dacɛ̰ǹni Sòsɛ́fù há̰ de yòǹ niìcoóko-dà, ò de pú kpɛ̀i é dátá o fɛ̀ci nìku yìhìka. K'ó tódá ta̰kadáma o yàma mɛhɛká è yɔ̀ ò k'óò wɛ́í. ²⁰ Ò de maàhu mɛmá-dà, kà Weèdi tɔntɔndikó óò fodá dɔhàti mɛhɛká, óò caka è yɔ̀: Sòsɛ́fù, Dàfítì bidà, a dá n'wani a kó tóó-ma Màdíì a poòo mìì tee-sá, ò póń ye bíítà nà Weèdi Sèdi kú nɔɔ̀ti-dà. ²¹ Ò kó pɛdá bíidatá-dà, k'á tà pa̰a̰ yèdi è yɔ̀ Sèsíì. Mɛntá-dà kó fḭ́hìna ta nìku ku sḭ̀ḭ̀ma mɛhɛká.

²² Mii kú wɛnnì tɛ̀ni è kpɛ̀i Bateó de wɛɛ̀-sa o wɛtɛ̰́náko nùdi mɛhɛká-dà é pa̰ná. Ò de yɔ̀:

²³ Sepàǹn mɛ̀ǹǹ pú yá̰á̰-ko dɔɔ̀o-dà kó póń

é pɛdá bíidatá,

kà pá tà yíí è yɔ̀ Èmànìyɛ́dì.

Ye yèdì kpɛ̀i é n'yɔ̀ Weèdi ti péé-nà-dà.

²⁴ Sòsɛ́fù hèǹtà tḭ́ń wɔ̀ni, é pa̰á̰ Bateó tɔntɔndikó de hḭ́n ó pa̰á̰-sa. K'ó tódá o poòo óò kònà o hɔ̰́ɔ̰̀ta. ²⁵ Àmá, ò de p'óò pɛ́ɛ̀-nà dɔɔdí háá kó yó pɛdá o bíitá, k'ó tà pa̰a̰ yèdi é yɔ̀ Sèsíì.