Màtíyéè 4

Sèsíì bɛḿma

¹ Ye kú dàhàka, kà Weèdi Sèdi óò túdí càwenkú mɛhɛká, è kpɛ̀i kà wɛɛ̀kupá wódo óò bɛń. ² K'ó tɛ̀i é boó nùdi é n'yòǹ wèǹci púnàhì, yèǹka púnàhì, ye kú dàhaka kà kòni óò cɛ̰dí. ³ Kà Wɛɛ̀kupá wódo óò hɛ́tá-ní, óò caka è yɔ̀: K'à yòǹ Weèdi bíitá-dà, k'á caka tá̰á̰kà mɛnkà kà ká hḭn diimá k'á dii.

⁴ Kà Sèsíì óò tɛ̰́ná è yɔ̀: Pà wà̰tà Weèdi wɛmá mɛhɛká è yɔ̀:

Nìdo pú yònà é n'fòù nà dimá cɔ̰́ɔ̰̀di,

àmá ò mɛ̀ɛ té yònà é n'fòù

nà wɛmá mɛ̀mà kú wɛǹni yɛɛ̀hu-má-dà-ní Weèdi nùdi mɛhɛká^a.

⁵ Ye wɔ̀ni, kà Wɛɛ̀kupá wódo óò tanà Sèdìsàdɛ́m̀, Weèdi yɔtí, é tɛ̀i óò dìkàna Weèdi hɔ̰́ɔ̰̀ta yóòfa, ⁶ óò caka è yɔ̀: K'à yòǹ Weèdi bíitá-dà, k'á wɛ́í-ho a cɔ̰́ɔ̰̀di teǹka, è yá̰á̰ pà wà̰tà Weèdi wɛmá mɛhɛká è yɔ̀:

Weèdi kó kɔ̰́ɔ̰́-ma-ní nùdi ni tɔntɔndipá a kpɛ́mú,

kà pá tɛ̀ni áa toó pa nɔ̀hi mɛhɛká,

k'yé teha k'àa tàdi dá boòda tá̰à̰di^b.

⁷ Kà Sèsíì óò tɛ̰́ná è yɔ̀: Weèdi wɛmá mɛ̀ɛ té yɔ̀:

A dá yetá bɛń Bateó, a Weèdi^c.

⁸ Kà Wɛɛ̀kupá wódo tṵ́má óò tódá óò tanà ta̰dɛudí nìcɔ̰́nì kú hḭ́ǹka, é tɛ̀i óò bɛka fòùku wóoteǹka wɛǹni nà ka kpààti, ⁹ óò caka è yɔ̀: K'à hìu n yìhìka è n fa̰ntáà, a dìi-sà wɛnnì, n k'éè n'àà pa̰a̰-á̰-ma.

¹⁰ Ye wɔ̀ni, kà Sèsíì óò caka è yɔ̀: Dɛuka ye pesà, Wɛɛ̀kupá wódì fɔ̰́ń! Pà wà̰tà Weèdi wɛmá mɛhɛká è yɔ̀:

Á n'dɔń Bateó a Weèdi,

é n'dehú o kú cɔ̰́ɔ̰̀di tɔmú^d.

¹¹ Ye wɔ̀ni, kà Wɛɛ̀kupá wódo óò hédá, kà Weèdi tɔntɔndipá é tɛ̀ni deha o kpɛ́mú.

Sèsíì cetà o tɔmú Kàdìdéè tempáàku mɛhɛká

¹² Sèsíì yèkaà-ma è yɔ̀ pà cɛ̰ɛ̰́ Ìsá̰à̰ óò yɛ̀ḭ kódedí, k'ó yíí é taá Kàdìdée tempáàku mɛhɛká. ¹³ K'ó tɛ̀i ò pú kaàdi Nàsàdɛ́tì. K'ó ka̰há é taá kaàdi Kapɛ̀ɛ̀nàúm̀ yɔtí, kà tì péé Kàdìdéè baàdi nùdi, Sàbùnɔ́ɔ̀ nà Nɛ̀fùtàdíì teǹka tookú-sa. ¹⁴ Ma kú bookú-dà Weèdi wɛtɛ̰́náko Èsàyíì wɛmà mɛmà de pa̰à̰-ma. Ò de yɔ̀:

¹⁵ Nɛ́na mɛ̀m̀pà péé-pa Sàbùnɔ́ɔ̀ nà Nɛ̀fùtàdíì teǹka,

kà kà hɛ́dí-nà dàmɛ́dì è péé Sùùtɛ̰́ɛ̰̀ kóńsóìdi tɔɔ̀di,

nà nɛ́na mɛ̀m̀pà pú yòǹ-pa Sùwífùpa è péé Kàdìdéè tempáàku,

¹⁶ nɛ́na mɛ̀m̀pà fòù-pa yḭ́ḭ̀pu mɛhɛká,

nɛ kó dɛ́há-ma wenkú sàku.

Mɛ̀m̀pà mɛ̀ɛ de kaàdi-pá heedí kà kṵ́mú pà yéńti,

wenkú fodà pa kpɛ́mú.

¹⁷ É tódá ye kú wɔ̀ni-dà, Sèsíì cetà-ma è cakú Weèdi wɛmá è toò: Peǹta-nà fòùmu è yá̰á̰ hḭ́ǹka wóòti-dà hɛ́tà-ní.

Sèsíì dapàm̀ma cecepá yííma

¹⁸ Daadí yènì, kà Sèsíì é n'tṵ̀n Kàdìdéè baàdi nùdi, é dɛ́há Sìmɔ́ɔ̀ pà tṵ́mà toò-ko Píyɛ́ɛ̀ n'ɔ̀ɔ kúcàa À̰ǹtìdéè kà pà ká̰mù ká̰ńcḭ̀mu ye baàdi mɛhɛká, è yá̰á̰ pà de yòǹ num̀bíimɛ́nápa-dà. ¹⁹ K'ó pà caka è yɔ̀: N tṵṵ̀na-nà-ní, ká n nɛ kpáhìna niìpɛhàpa.

²⁰ Ye pesá n'ɛ̀ɛ pesá, kà pá héé-ho pa ká̰ńcḭ̀na, óò tṵ̀na.

²¹ K'ó tuùta-ho yìhìka, é dɛ́há tɔɔ̀pa pàdɛ́ɛ́, Sàákì n'ɔ̀ɔ kúcàa Ìsá̰à̰, Sèbèdéè bííhí, kà pà péé pa hà̰à̰pu mɛhɛká nà pa báàa è dɔ̀hu pa ká̰ńcḭ̀na. K'ó pà yíí. ²² Ye pesá n'ɛ̀ɛ pesá, kà pá héé-ho ye hà̰à̰pu nà pa báàa, óò tṵ̀na.

²³ K'ó cèn Kàdìdéè tempáàku wɛǹni, è biɔhɔ̀nì Weèdi wɛmá biɔhà-nàmɔ̀ka mɛhɛká, è cakú Weèdi wóòti wɛnaamá, è kpekànì nìpa dɔncí wɛǹni, nà pa weǹkɔ̀ùmu wɛǹni. ²⁴ K'òo yèdi é pidá Sìdíì teǹka wɛǹni mɛhɛká. Kà nìpa é toha-ní o pesá, mɛ̀m̀pà kú wɛnnì de mɔn-pá dɔncí ci bodú bodú, nà mɛ̀m̀pà de kɔǹ-nà-pa wɔ̰ǹdɔncí dɔ́ɔ́dí, nà wɛɛ̀kupá de péé-pa kú mɛhɛká, nà mɛ̀m̀pà mɔn-pá kpítìǹkpíìka, nà hɔ̀ùhi, k'ó pà kpekàna pa wɛǹni. ²⁵ Kà nìku dɔ́ɔ́di óò tṵ̀na è yɛ̀ni nà Kàdìdéè, nà yɔtí píta tempáàku mɛhɛká, nà Sèdìsàdɛ́m̀, nà Sùdéè, nà yɔtí mɛ̀ǹtì péé-ti Sùùtɛ̰́ɛ̰̀ kóńsóìdi tɔɔ̀di.