Màtíyéè 5

Sèsíì cakú mìì héé-sa wɛ̀ɛ̀di mɔ́nní

¹ Sèsíì dɛ́hà-ma nìku dɔ́ɔ́di, k'ó dìsi ta̰à̰di hḭ́ǹka é kaàdi. K'òo dapàm̀ma óò hɔ̰́tá-ho. ² K'ó cetá è pà biɔhànì. K'ò yɔ̀:

³ Wɛ̀ɛ̀di-dà nɛ péé-nà nɛ́na mɛ̀m̀pà yá̰á̰-pa è yɔ̀ nɛ pú kpenì Weèdi cɔ̀ku mɛhɛká,

mìì tee-sá hḭ́ǹka wóòti yòǹ nɛ kpɛ́ɛtí-dà.

⁴ Wɛ̀ɛ̀di-dà nɛ péé-nà nɛ́na mɛ̀m̀pà kɔǹ-pa,

mìì tee-sá Weèdi kó wáńtá nɛ yɔ́da-á-ma.

⁵ Wɛ̀ɛ̀di-dà nɛ péé-nà nɛ́na mɛ̀m̀pà kú yàma yɔkànì-pa,

mìì tee-sá nɛ́ kó wáńtá kpàdi-í-ma teǹka Weèdi hḭ́n nì kó ti pa̰a̰-ká.

⁶ Wɛ̀ɛ̀di-dà nɛ péé-nà nɛ́na mɛ̀m̀pà bɔ̀hɔ̀ta-pá é m'pa̰kú Weèdi kpɛ̀i-sá,

mìì tee-sá Weèdi kó nɛ tempanà-á-ma kà n'ɛ́ɛ̀ pa̰á̰ é dɛn.

⁷ Wɛ̀ɛ̀di-dà nɛ péé-nà nɛ́na mɛ̀m̀pà kɔǹ-pa tɔɔ̀pa séèma,

mìì tee-sá Weèdi kó wáńtá nɛ kɔń-ma séèma.

⁸ Wɛ̀ɛ̀di-dà nɛ péé-nà nɛ́na mɛ̀m̀pà kú yàma weni-pá,

mìì tee-sá nɛ kó wáńtá dɛ́há-ma Weèdi.

⁹ Wɛ̀ɛ̀di-dà nɛ péé-nà nɛ́na mɛ̀m̀pà tɛ̀hu-nà-pa-ní wɛ̀ɛ̀di nìpa cɔhɔ̀ka,

mìì tee-sá pà kó wáńtá nɛ yíí Weèdi bííhí-dà.

¹⁰ Wɛ̀ɛ̀di-dà nɛ péé-nà nɛ́na pà dinì-pa náńkú, è yɔ̀pu kpɛ́mú nɛ pa̰kú Weèdi kpɛ̀i-sá,

mìì tee-sá hḭ́ǹka wóòti yòǹ nɛ kpɛ́ɛtí-dà.

¹¹ Wɛ̀ɛ̀di-dà nɛ péé-nà nɛ́na pà teù-pa, è nɛ dinì náńkú, è cakú wɛkpákpààma wɛǹni nɛ hḭ́ǹka, nà mmí kú kpɛ́mú. ¹² Nɛ yàma n'nadi, kà nɛ́ m'péé wɛ̀ɛ̀di mɛhɛká, mìì tee-sá pa̰sàdi-dà nɛ ceí hḭ́ǹka. Ma kú bookú-dà pà de dià-ma náńkú Weèdi wɛtɛ̰́nápa mɛ̀m̀pà nɛ dɛnà-pa Weèdi cɔ̀ku mɛhɛká.

Nɛ yòǹ kɔ́kɔ́mú-dà nà wenkú fòùku mɛhɛká

¹³ Nɛ́na-dà yòǹ fòùku kɔ́kɔ́mú. Kà kɔ́kɔ́mú há̰ fénà mu naakú, pà kó tṵ́má mù nakàna nà ba? Pà koò pú hɔ̰́ mù pa̰á̰-nà yècɛ̰́ɛ̰̀, pà hɔ̰́ mù hútá tapaàdi-dà, kà nìpa é cèn mu hḭ́ǹka.

¹⁴ Nɛ́na-dà yòǹ fòùku wenkú. Yɔtí pà maá-ti ta̰à̰ta hḭ́ǹka pú kó nɛɛ́ é sɔ̀di. ¹⁵ Pà pú hɔ̰́ cɔ́hìna ha̰wèta é tà cḭ̀na cenankú, pà hɔ̰́ tà cɔ̰ná cɔ̰̀ǹcɔ̰̀ni hḭ́ǹka-dà, kà tá n'tìi mɛ̀m̀pà kú wɛnnì péé-pa hɔ̰́ɔ̰̀ta mɛhɛká. ¹⁶ Ma kú bookú-dà nɛ wenkú yònà é n'tìi-má nìpa yìhìka, k'yé teha kà pá dɛ́há suumá nɛ pa̰kú-ma é duntà nɛ Báàa mɛ̀ǹǹ péé-ko hḭ́ǹka.

Biɔhànamá kpɛ̰́ńtìnùka hḭ́ǹka

¹⁷ Nɛ dá m'maàhu è toò n tɛ̀ni è kó nɛhìna-á-ma Mɔ̀yísì kpɛ̰́ǹtinùka nà Weèdi wɛtɛ̰́nápa biɔhànamá. N pú tɛ̀ni è k'éè nɛ̀hìna, àmá, n tɛ̀ni è kó pa̰á̰ yè cakú-sa-dà. ¹⁸ Mɔ́ma-dà n nɛ cakú-ma, kà teǹka nà hḭ́ǹka baà péé, Weèdi kpɛ̰́ńtìnùka wa̰à̰bíisá bá sḭ̀m̀mɔ́ǹya̰ yècḭ́ḭ̀ pú kó deèda háá niìi wɛǹni é cɛ̰ɛ̰̀na. ¹⁹ Mɛmá-dà tee, mɛ̀ǹǹ kó yee-kó Weèdi kpɛ̰́ńtìnùka tṵṵ̀napú bá ka sìm̀mɔ́ǹni, é tṵ́má biɔhàna tɔɔ̀pa è yɔ̀ pá mà hḭn, ye yaǹn kó wáńtá n'yòǹ sìm̀mɔ́ǹn-dà hḭ́ǹka wóòti mɛhɛká. Àmá kà mɛ̀ǹǹ tṵ̀nà-ko Weèdi kpɛ̰́ńtìnùka, è biɔhànà tɔɔ̀pa è yɔ̀ pá mà hḭn, ye yaǹn kó wáńtá n'yòǹ sào-dà hḭ́ǹka wóòti mɛhɛká. ²⁰ N nɛ cakú-ma, kà nɛ coóma pú ha̰tá-nà kpɛ̰́ńtìnùka biɔhànapá nà Fàdísìpa kpɛ́ɛmá, nɛ pú kó wáńtá dúú hḭ́ǹka wóòti mɛhɛ́ká.

Biɔhànamá fɔ̰́di hḭ́ǹka

²¹ Nɛ yeèkaà-á-ma pà cakáà-ma nɛ yààpa è yɔ̀: A dá yetá kɔ̀ù nìdo. Mɛ̀ǹǹ kú wɛnnì kó kɔ̀ù-ko tɔɔ̀o, pà yònà óò tanà sídàko pesá-dà. ²² Àmá, mmí nɛ cakú è yɔ̀: Kà nìi mɔkáà n'ɔ̀ɔ tɔɔ̀o fɔ̰́di, pà yònà óò tanà sídàko pesá-dà. Mɛ̀ǹǹ kó tèe-kó o tɔɔ̀o è yɔ̀ ò yòǹ hécí, pà yònà óò tanà sídàpa kpɛ̰́m̀ma pesá-dà. Mɛ̀ǹǹ kó tèe-kó o tɔɔ̀o è yɔ̀ yíńtásà fɔ̰́ń, pà yònà óò káńtá ha̰bíiní mɛhɛká-dà. ²³ K'yè yònà a taá è kó kɔ̰́ɔ̰́ Weèdi a pa̰dí dɔ̀hàdi cɔ̰̀ǹcɔ̰̀ni hḭ́ǹka, è dèǹtà-ní ye pesá è yɔ̀ a tɔɔ̀o aa kɔ̰ǹti-nà yècḭ́ḭ̀ kú hḭ́ǹka, ²⁴ k'á hḭ́ná-hɔ̰ a pa̰dí ye pesá dɔ̀hàdi cɔ̰̀ǹcɔ̰̀ni yìhìka, é taá kà nɛ́ yekà nɛ tɔɔ̀pa, k'á nɛɛ́ tóní é kɔ̰́ɔ̰́ a pa̰dí Weèdi. ²⁵ K'à kɔ́dí sídàpu n'àa kà̰à̰tɔɔ̀o, k'á pɛha a kó hḭmpú kà nɛ́ yekà nɛ tɔɔ̀pa è káà sá̰á̰ cɔ̀ku. Kà mɛma dɔ, k'òà ta̰hìnà sídàko yìhìka, ye sídàko k'áa tanà pòdísìku-dà, kà pòdísìpa áa yɛ̰̀ḭ kódedí. ²⁶ Mɔ́ma-dà m'a cakú-ma, k'à pú bodà dífa p'àà fìtà-fa wɛǹni, bá kà píta sɔ̰́ńtà, a pú yɛtì ye kódedì mɛhɛkà.

Biɔhànamá dɔɔdí cɔ̰hàma hḭ́ǹka

²⁷ Nɛ yeèkaà-á-ma kà pà yɔ̀: A dá yetá cɔ̰ha dɔɔdí. ²⁸ Àmá, mmí nɛ cakú è yɔ̀: Kà nìi wáńtà tɔɔ̀o poòo k'òo bìnɔ cɔ̰nà o hḭ́ǹka, ye yaǹn cem̀ cɔ̰háà dɔɔdí-dà n'ɛ̀ɛ poòo o yàma mɛhɛká. ²⁹ K'àa nɔǹheufá-dà hédà k'à pa̰kú sḭ̀ḭ̀ma, k'á fà kokadá è fà wɛ́í dɛùma. Yè tɔ̰ṵ-ṵ́-ma á féná a wɔ̰̀ǹku yècḭ́ḭ̀ é dúú Weèdi wóòti mɛhɛká, n'àa kó n'yòǹ-ma a wɛǹni è há̰ dúú ha̰bíiní mɛhɛká. ³⁰ K'àa nɔǹheukú-dà hédà k'à pa̰kú sḭ̀ḭ̀ma, k'á kù fìta è kù wɛ́í dɛùma. Yè tɔ̰ṵ-ṵ́-ma á féná a wɔ̰̀ǹku yècḭ́ḭ̀ é dúú Weèdi wóòti mɛhɛká, n'àa kó n'yòǹ-ma a wɛǹni è há̰ dúú ha̰bíiní mɛhɛká.

Biɔhànamá poyedàma hḭ́ǹka

³¹ Pà tṵ́mà wɛdà-á-ma è yɔ̀: Kà nìi kpɛ̀i é bɔhà o poòo, ò yònà óò wà̰ta pɔ̀kàta-dà mɛ̀ǹtà bɛkú-ta è yɔ̀ òò yedáà, óò kɔ̰́ɔ̰́, ye wɔ̀ni óò bɔ̀hà. ³² Àmá, mmí nɛ cakú è yɔ̀: Kà nìi bɔɔ̀haà o poòo, è p'óò cɛ̰ɛ̰́ nà dɔɔ̀o tɔɔ̀o, òò túdì dɔɔdí cɔ̰hàma mɛhɛká-dà. Kà nìi mɛ̀ɛ tódà poòo pà bɔ̀haà-ko, ye yaǹn mɛ̀ɛ té cɔ̰hú dɔɔdí-dà.

Biɔhànamá wɛ̰́hàma hḭ́ǹka

³³ Nɛ mɛ̀ɛ tṵ́mà yèkaà-á-ma pà cakáà-ma ti yààpa è yɔ̀: A dá yetá hédá è pú n'dedà nùdi a hḭ́nà-di Bateó, àmá á pa̰á̰ a hḭ́n a kó pa̰á̰-sa o kpɛ́mú. ³⁴ Mmí há̰ nɛ cakú è yɔ̀: Nɛ dá n'wɛ̰́hú. Nɛ té dá wɛ̰́ha nà hḭ́ǹka yèdi, mìì tee-sá kà yòǹ Weèdi wóokàtàda-dà. ³⁵ Nɛ mɛ̀ɛ dá wɛ̰́ha nà teǹka yèdi, mìì tee-sá kà yòǹ o taànàadí-dà. Nɛ dá wɛ̰́ha nà Sèdìsàdɛ́m̀ yɔtí yèdi, mìì tee-sá tì yòǹ Wóosào yɔtí-dà. ³⁶ A dá wɛ̰́ha n'àa yudí, mìì tee-sá a pú kó nɛɛ́ pɛ́íkàna yoo é fɔukàna a yùku kùcɔ̰́kù. ³⁷ Nɛ tɛ̰́náma té n'yòǹ à̰à̰ k'yè yòǹ à̰à̰-dà yoo á̰à̰ k'yè yòǹ á̰à̰-dà. Pà hɔ̰́ tɔhìna-sà wɛnnì péé-nà-ní Sḭ̀ḭ̀ma yaǹn^a pesá-dà.

Biɔhànamá bàni bodáma hḭ́ǹka

³⁸ Nɛ yeèkaà-á-ma kà pà yɔ̀: Kà nìi pɔ́dà a nɔ̀ǹfa, k'á pɔ́dá o kpɛ́ɛfá. K'ò mɛ̀ɛ tɔ̰tà a nìǹni, k'á tɔ̰ɔ̰̀ta o kpɛ́ɛdí. ³⁹ Àmá, mmí nɛ cakú è yɔ̀: Kà nìd'aa pa̰nà sḭ̀ḭ̀ma, a dá mà n'ɔ̀ɔ̀ tɛ̰́ná. Kà nìd'aa potà weǹfa a bɛ̀ku heukú, k'á ò kɔ̰́ɔ̰́ cà̰nkú kó tṵ́má potá. ⁴⁰ Kà nìi kpɛ̀i áa yíí sídàpu é ta̰ǹta a tókédi, k'á héé k'ó tóó n'àa tókesàdi. ⁴¹ Kà nìd'aa pa̰à̰-nà nɔɔ̀ti è hḭ́n á toó totodí nìcɔ̰́nì é pa̰á̰ kìdòmɛ́tídì òcɔ̰́, k'á pa̰á̰ pàdɛ́ɛ́. ⁴² Kà nìd'aa cɔɔ̀haà yècḭ́ḭ̀, k'á yè n'ɔ̀ɔ̀ pa̰a̰. Kà nìi mɛ̀ɛ kpɛ̀i á ò bàna yècḭ́ḭ̀, a dá yeda.

Dɔ́kàma kà̰à̰tɔɔ̀pa hḭ́ǹka

⁴³ Nɛ yeèkaà-á-ma kà pà yɔ̀: A yònà é n'dɔ́sí-ma a tɔɔ̀o, é n'sɛ̰ɛ̰́ a kà̰à̰tɔɔ̀o. ⁴⁴ Àmá, mmí nɛ cakú è yɔ̀: Nɛ́ n'dɔ́sí nɛ kà̰à̰tɔɔ̀pa, é n'cɔɔ̀hu Weèdi mɛ̀m̀pà nɛ fá̰kápú-pa kpɛ́mú. ⁴⁵ Ma kú bookú-dà nɛ kó bɛka-má è yɔ̀ nɛ yòǹ nɛ Báàa mɛ̀ǹǹ péé-ko hḭ́ǹka bííhí, è yá̰á̰ mɛnń-dà hɔ̰́ deèna-ní wèǹku kà kú n'tìi niìsuupá nà niìsḭ̀m̀ma hḭ́ǹka. Mɛnń-dà mɛ̀ɛ hɔ̰́ hédá kà tafá dɔdi mɛ̀m̀pà coó-pa nà mɛ̀m̀pà pú coó-pa kpɛ́mú. ⁴⁶ Kà nɛ dɔ́sí mɛ̀m̀pà nɛ dɔ́sí-pa cɔ̰́ɔ̰̀di, bootí m'mɔ́ńti-dà nɛ kó tṵ́má é n'ceí-ma Weèdi pesá? Bá Kaàcáhàpa mɛ̀ɛ té hɔ̰mpú-dà. ⁴⁷ Kà nɛ dɔń nɛ kúcàpa cɔ̰́ɔ̰̀di, m̀mɔ́ńya̰-dà nɛ pa̰kú-ma k'yè ha̰tà tɔɔ̀sa? Bá mɛ̀m̀pà pú yá̰á̰-pa Weèdi hɔ̰mpú-dà. ⁴⁸ Nɛ́ n'weni páàti wɛǹni é n'yònà nɛ Báàa mɛ̀ǹǹ péé-ko hḭ́ǹka weni-má páàti wɛǹni.