Màtíyéè 10

Sèsíì tɔntɔndipá píì-pàdɛ́ɛ́

¹ Kà Sèsíì é yíí o tɔntɔndipá píì-pàdɛ́ɛ́ é pà kɔ̰́ɔ̰́ nɔɔ̀ti, è yɔ̀ pá m'bɔɔ̀hu wɛɛ̀kupá, é n'kpekànì dɔncí wɛǹni, nà wenkɔ̀ùmu wɛǹni. ² Ǹtɛ ye tɔntɔndipá píì-pàdɛ́ɛ́ yèka: Cecedó Sìmɔ́ɔ̀, ò de tṵ́mà cetà-ko Píyɛ́ɛ̀ n'ɔ̀ɔ kúcàa À̰ǹtìdéè, é yídá Sàákì n'ɔ̀ɔ kúcàa Ìsá̰à̰, pa dɛ́ɛ̀di kà pà yòǹ Sèbèdéè bííhí, ³ nà Fìdípù, nà Bàtèdèmíì, nà Tòmáà, nà Màtíyéè k'ò yòǹ kaàcáho, nà Sàákì Àdìféè bíitá, nà Tàdéè, ⁴ nà Sìmɔ́ɔ̀ takànáńyedo, nà Sùdásì Ìsìkàdìyɔ́tì mɛ̀ǹǹ kó yɔ̀ɔ yɛɛ-kó Sèsíì.

Sèsíì tɔn o tɔntɔndipá píì-pàdɛ́ɛ̀ o wɛnaamá cakàpu

⁵ Kà Sèsíì é tɔn ye o tɔntɔndipá píì-pàdɛ́ɛ́, é pà caka è yɔ̀: Nɛ dá taá mɛ̀m̀pà pú yòǹ-pa Sùwífùpa péé-ka bɛ́ka, nɛ mɛ̀ɛ dá dúú Sàmàdíìpa yɔtí mɛhɛká, ⁶ àmá nɛ́ taá Ìsìdàyɛ́dìpa bɛ́ka. Pà yònà hɔ̰̀ci mɛ̀ǹcì fée-cí-dà. ⁷ Nɛ kó yɛ̀ɛ̀-sa wɛǹni, nɛ́ n'cakú Weèdi wɛmá è tonà: Hḭ́ǹka wóòti-dà hɛ́tà-ní. ⁸ Nɛ́ kpekàna mɔkàpa, é yá̰ńkàna kpíípa, é wekàna kɔ̰̀ma, é bɔhà wɛɛ̀kupá nìpa mɛhɛká. N nɛ pɛ̰ḭ fàdà-dà, nɛ mɛ̀ɛ té pa̰a̰ fàdà. ⁹ Nɛ dá tódá nɛ pɛ̀heká mɛhɛká wúdó, nà máamɔ́ntí, nà máafɔ̀ùti. ¹⁰ Nɛ dá tódá cà̰ǹku pɛ̀kedí, nɛ dá tódá tóhòka kàdɛ́ɛ́, nɛ dá tódá nɛ̀ùti yoo ya̰kú, è yá̰á̰ deho sànà o dikèyoncí-dà. ¹¹ Kà nɛ té ta̰ntà yɔsàti yoo yɔbíisá mɛhɛká, kà nɛ́ pɛha mɛ̀ǹǹ kó teha-kó é nɛ codá, é bátá o hɔ̰́ɔ̰̀ta háá é n'sànà nɛ kó yídá-ma ye pesá. ¹² Kà nɛ dúti hɔ̰́ɔ̰̀ta mɛhɛká, kà nɛ té dɔwa ta yam̀ma è yɔ̀: Wɛ̀ɛ̀di é nɛ m'péé-nà. ¹³ K'yèe hɔ̰́ɔ̰̀ta yam̀ma nɛ codà, kà nɛ wɛ̀ɛ̀di é pà m'péé-nà. Kà pà mɛ̀ɛ pú nɛ codà, kà nɛ wɛ̀ɛ̀di é nɛ tón. ¹⁴ Kà nɛ tɛ̀i-tí yɔtí yoo hɔ̰́ɔ̰̀ta mɛhɛká kà pà pú nɛ codà, yoo pà pú nɛ besí, kà nɛ yɛtì kà nɛ́ kpá̰-kpá̰dá nɛ tàka tá̰pùdùmu^a. ¹⁵ N nɛ cakú bemú-dà, sídàma daadí, Sòdɔ́mù nà Kòmɔ́ɔ̀ yɔtí nìpa kú toòka yɔ̰́ḿma pú kó n'kpenì é ta̰ntá ye kú yɔtì nìpa kpɛ́ɛmá.

Fá̰kápàma mɛ̀mà pení-ma-ní

¹⁶ Besí-nà é yekà! N nɛ tɔnti kà nɛ yònà hɔ̰̀ci-dà càkomɔɔ̀ka cɔhɔ̀ka. Nɛ́ n'káá yàma è yònà wàci, é n'kɔ́ɔ́ màcɔ̰́mà è yònà pàǹdɔ̀ka. ¹⁷ Nɛ́ pa̰á̰ yɔkàma nà nìpa, mìì tee-sá pà kó nɛ yɔ̰́ɔ̰pa-á-ma sídàma nàmɔ̀ka mɛhɛká, é nɛ podí dáùka pa Weèdi wɛmá biɔhà-nàmɔ̀ka mɛhɛká. ¹⁸ Pà kó nɛ tanà-á-ma tempáàti yìkàǹyìkàpa yìhìka, nà wóópa yìhìka nà mmí kú kpɛ́mú, k'yé teha kà nɛ́ pà caka n wɛmá, é mà caka nà mɛ̀m̀pà pú yòǹ-pa Sùwífùpa. ¹⁹ Pà kó nɛ n'kɔ́dí-nà tḭ́ń wɔ̀ni sídàma nàmɔ̀ka mɛhɛká, nɛ yàma dá n'cɛ̰ḭ́ nà nɛ kó taá wɛɛ́-sa yoo nà nɛ kó wɛkamá. Wɛmá nɛ kó taá wɛɛ́-ma, Weèdi kó mà nɛ kɔ̰́ɔ̰́-ma ye wɔ̀ni. ²⁰ Mà pú kó m'péé-nà-ní nɛ pesá, àmá nɛ Báàa Sèdi-dà kó mà nɛ n'cakú nɛ yàma mɛhɛká, kà nɛ mà tɛ̰́nì.

²¹ Nìpa kó yɛɛ-ɛ́-ma pa kúcàpa kà pá pà kɔ̀ù, kà báàpa mɛ̀ɛ té mà hḭn pa bííhí. Bííhí kó kpeka-nà-á-ma hi báàpa toòka, é héé kà pá pà kɔ̀ù. ²² Nìpa wɛǹni kó nɛ n'sɛ̰ɛ̰́-ma nà mmí kú kpɛ́mú. Àmá mɛ̀ǹǹ kó wɛ̰́ɛ̰́-ko háá é deèta, kó dɛ́tá-ma fḭ́táma. ²³ Kà pà nɛ núńtí yɔtí tìcɔ̰́tì kú mɛhɛká, kà nɛ́ cocí é ka̰há tɔɔ̀ti mɛhɛká. N nɛ cakú bemú-dà, nɛ pú kó cɛ̰ɛ̰̀na Ìsìdàyɛ́dì yɔtí wɛǹni taápu, kà Niìfòùo bíitá é tóní.

²⁴ Mɛ̀ǹǹ biɔhú-ko pú hɔ̰́ n'wɛhi-nà mɛ̀ǹǹ ò biɔhanì-ko. Dapàǹn mɛ̀ɛ pú hɔ̰́ n'wɛhi-nà o dakpɛ̰́ǹn. ²⁵ Yè békú mɛ̀ǹǹ biɔhú-ko é n'yònà mɛ̀ǹǹ ò biɔhanì-ko-dà, kà dapàǹn é n'yònà o dakpɛ̰́ǹn. Kà pà yíí hɔ̰́ɔ̰́tà báàa è hḭ́n Bɛ̀tìsèbúdì^b, yeèsḭ̀ǹka pà kó pa̰a̰-ká o hɔ̰́ɔ̰́tà kpɛ́ɛpá kó ha̰tá mɛni.

Nɛ yònà é n'wani-kó

²⁶ Nɛ dá n'wani nìpa. Mìì pa̰kú-sa è sɔ̀di kó wáńtá fodá-ma, mìì mɛ̀ɛ sɔ̀di-sá kà nìpa p'éè yá̰á̰, pà kó wáńtá éè yá̰dá-ma. ²⁷ N nɛ cakú-mà wɛmà ti cɔ̰́ɔ̰̀di pesá, nɛ́ wáńtá mà caka nìku wɛǹni yìhìka. Nɛ mɛ̀ɛ you kà pà wɛ́-wɛ́hàta-má wɛmá, nɛ́ wáńtá mà bekaná kpeéma kà nìpa é mà yèkà. ²⁸ Nɛ dá n'wani mɛ̀m̀pà kó nɛɛ́ kɔ̀ù-pa wɔ̰̀ǹku, è há̰ pú kó nɛɛ́ é kɔ̀ù sèdi. Nɛ́ n'wani mɛ̀ǹǹ kó nɛɛ́ kɔ̀ù-di wɔ̰̀ǹku nà sèdi ha̰bíiní mɛhɛká. ²⁹ Pà pú hɔ̰́ yɛda nɛ̀càbímú mùdɛ́ɛ́ k'yè pú ta̰ntà dífa fàcɔ̰́fà dò? Nà mɛma, mu yècɔ̰́ pú hɔ̰́ nɔ́dá teǹka kà nɛ Báàa Weèdi pú yá̰á̰. ³⁰ Nɛ́na há̰kà, Weèdi yá̰á̰-ma nɛ yudí yùti dɔ́ɔ́di sá̰á̰pu. ³¹ Ye kú kpɛ́mú, nɛ dá n'wani. Múńdìkaà, Weèdi pesá nɛ ha̰tà-á-ma nɛ̀càbímú dɔ́ɔ́di.

³² Mɛ̀ǹǹ kú wɛnnì kó wɛdá-ko nìpa wɛǹni yìhìka è yɔ̀ ò yòǹ n kóoó-dà, n mɛ̀ɛ té kó wáńtá wɛdá-ma n Báàa mɛ̀ǹǹ péé-ko hḭ́ǹka yìhìka, è yɔ̀ ò yòǹ n kóoó-dà. ³³ Àmá, mɛ̀ǹǹ kó wɛdá-ko nìpa yìhìka è yɔ̀ ò pú n yá̰á̰, n mɛ̀ɛ té kó wáńtá wɛdá-ma n Báàa mɛ̀ǹǹ péé-ko hḭ́ǹka yìhìka è yɔ̀ n p'óò yá̰á̰.

N pú tɛɛ̀ní wɛ̀ɛ̀di, àmá ta̰à̰pu

³⁴ Nɛ dá m'maàhu è tonà n tɛɛ̀ní wɛ̀ɛ̀di-dà teǹka hḭ́ǹka! N pú tɛɛ̀ní wɛ̀ɛ̀di, àmá n tɛɛ̀ní ta̰à̰pu-dà. ³⁵ N tɛ̀ni è kó totá báàa-dà n'ɔ̀ɔ bíitá, màa n'ɔ̀ɔ bíipoòta, é yídá hɔ̰́ɔ̰́tàmàa n'ɔ̀ɔ bíitá poòo. ³⁶ Nìdo kà̰à̰tɔɔ̀pa kó n'héé o mɔ́ń-mɔ́nń hɔ̰́ɔ̰́tà kpɛ́ɛpá-dà.

³⁷ Kà mɛ̀ǹǹ dɔ́sí-ko o báàa yoo o màa é ha̰tá-nà mmí, ye yaǹn pú kó nɛɛ́ é n'yòǹ n kóoó. Mɛ̀ǹǹ dɔ́sí-ko o bíidatá yoo o bíipoòta é n ha̰tá-nà, ye yaǹn pú kó nɛɛ́ é n'yòǹ n kóoó. ³⁸ Kà mɛ̀ǹǹ pú toó-ko o kpíidɔkú é n tṵṵ̀na, ò pú kó nɛɛ́ é n'yòǹ n kóoó. ³⁹ Mɛ̀ǹǹ kó n'kpɛ̀i-kó é fḭ́hìna o fòùmu, ò kó mù féná-ma. Kà mɛ̀ǹǹ mɛ̀ɛ fénà-ko o fòùmu nà mmí kú kpɛ́mú, ò kó wáńtá mù dɛ́tá-ma.

Bootí

⁴⁰ Kà nìi nɛ codà, ò codà mmí-dà. Mɛ̀ǹǹ mɛ̀ɛ n codà-ko, ò codà mɛ̀ǹǹ n tɔn-kó-dà-ní. ⁴¹ Kà mɛ̀ǹǹ codà-ko Weèdi wɛtɛ̰́náko è yɔ̀pu kpɛ́mú ò yòǹ Weèdi wɛtɛ̰́náko-dà, ye yaǹn kó wáńtá dɛ́tá-ma bootí pà kó kɔ̰́ɔ̰́-ti Weèdi wɛtɛ̰́náko. Kà mɛ̀ǹǹ mɛ̀ɛ codà-ko niìcoóko è yɔ̀pu kpɛ́mú ò yòǹ niìcoóko, ye yaǹn kó wáńtá dɛ́tá-ma bootí pà kó kɔ̰́ɔ̰́-ti niìcoóko. ⁴² N nɛ cakú bemú-dà, kà mɛ̀ǹǹ pɛ̰ḭ-kó báà nɛ́ɛbóhimá niìsìm̀mɔ́ḿpà mɛmpà p'oòcɔ̰́, mìì tee-sá ò yòǹ n dapàǹn-dà, ye yaǹn kó wáńtá dɛ́tá-ma o bootí.