Màtíyéè 9

Sèsíì kpekànà hɔ̀ùta

¹ Kà Sèsíì é dìsi hà̰à̰pu hḭ́ǹka é tón é deèta ye baàdi, é tóní o yɔtí mɛhɛká. ² Kà p'óò tɛɛ̀ní hɔ̀ùta kà tà dɔɔ́ ta dɔɔdí hḭ́ǹka. Sèsíì dɛ́hà-ma è hɔ̰́tà mɛ̀m̀pà de tà toó-pa-ní káá-dà dandaní, k'ó caka ye hɔ̀ùta è yɔ̀: Pa̰a̰ a kpɛ́ɛtí n bidà, m'a dedà-á-dà a sḭ̀ḭ̀ma.

³ Ye hḭ́ǹka, kà Weèdi kpɛ̰́ńtìnùka biɔhànapá pàcɔ̰́ é wɛɛ́ pà yàma mɛhɛká è yɔ̀: Ye dɔɔò mɛnǹ tèù Weèdi-dà.

⁴ K'ó bantá pà de maàhu-sá pà yàma mɛhɛká é pà béka è yɔ̀: Badà tee kà nɛ káá ye kú yam̀màhàsḭ̀kà-ní? ⁵ M'mɔ́ńya̰-dà pú dɔǹ-nà ye tɔɔ̀sa: M'a n'yɔ̀-ma, m'a dedà-á-dà a sḭ̀ḭ̀ma, nà m'a n'hḭ́n-má yídá é cèn? ⁶ N kpɛ̀i nɛ́ n'yá̰á̰-ma è yɔ̀ mmí Niìfòùo bíitá, n káá-ma nɔɔ̀ti è kó nɛɛ́ deèda nìdo sḭ̀ḭ̀ma tenkà hḭ́ńkà. Ye wɔ̀ni, k'ó caka ye hɔ̀ùta è yɔ̀: Yídá é tódá a dɔɔdí é kòǹ.

⁷ K'ó yídá é kòǹ o hɔ̰́ɔ̰̀ta. ⁸ Ye nìku dɛ́hà-ma miya̰, kà wantafɔ̰̀di é kù cɛ̰ɛ̰́, kà kù dùǹti Weèdi nà nì kɔ̰́ɔ̰̀-ma nìpa ye kú nɔɔtì-ní.

Sèsíì yíí Màtíyéè

⁹ Kà Sèsíì é yídá ye pesá é n'kɛ̰hɛdi, é dɛ́há Màtíyéè k'ò kàdi o kaàcáhà tɔmú pesá. K'óò caka è yɔ̀: N tṵṵ̀na-ní! K'ó yídá óò tṵ̀na.

¹⁰ Daadí yènì, kà Sèsíì é m'péé Màtíyéè hɔ̰́ɔ̰̀ta mɛhɛká è yon, kà kaàcáhàpa nà niìsḭ̀m̀ma tɔɔ̀pa dɔ́ɔ́di há̰ tɛ̀ni é pɛ́ɛ́ è yon-nà mɛnń n'ɔ̀ɔ dapàm̀ma. ¹¹ Fàdísìpa dɛ́hà-ma miya̰, é béka Sèsíì dapàm̀ma è yɔ̀: Badà tee kà nɛ dakpɛ̰́ǹn pɛ́ɛ̀ è yon-nà kaàcáhàpa nà niìsḭ̀m̀ma?

¹² Kà Sèsíì é mà yèkà é pà caka è yɔ̀: Nìpa mɛ̀m̀pà kpenì-pa pú pɛnti dòkòtódo, mɛ̀m̀pà mɔn-pá-dà h'ɔ̰́ɔ̰̀ m'pɛnti. ¹³ Tɔɔ̀ta-nà é tɛ̀i é biɔha é yekà Weèdi wɛmà mɛmà hḭ́mpú. Mà yɔ̀: N kpɛ̀i nɛ́ n'káá nɛ́ n'káá séèma-dà nɛ tɔɔ̀pa hḭ́ǹka é ha̰tá-nà nɛ kó nà n pa̰kú-ma nɔtí dɔ̀hàka. N pú tɛ̀ni è kó yíí mɛ̀m̀pà coó-pa, n tɛ̀ni è kó yíí niìsḭ̀m̀ma-dà.

Sèsíì wɛì num̀boóma wɛmá

¹⁴ Kà Ìsá̰-Bàtísì dapàm̀ma é tɛ̀ni Sèsíì pesá óò béka è yɔ̀: Badà tee kà tḭ́ńti nà Fàdísìpa boonì nùdi, k'àa dapàm̀ma há̰ pú boonì?

¹⁵ Kà Sèsíì é pà tɛ̰́ná è yɔ̀: Nɛ maàhu è tonà pà yíí-pa-ní potóóma yàma kó nɛɛ́ cɔ̰ha-á-dà k'yèe podɔɔ̀o káà pà péé-nà? Mà pú kó cɔ̰ha. Wɔ̀ni há̰ pení-ma-ní kà pà kó tódá podɔɔ̀o óò ka̰hánà, ye wɔ̀ni, pà kó bowá-ma nùdi. ¹⁶ Òcɔ̰́ǹ pú hɔ̰́ tódá báapàǹku pɛ̀tàda é taá pɔ̰ná báakpɛ̰́nkú. Kà nìi mà hḭn, ye báapàǹkù pɛ̀tàdà kó dɔ̀hà é cɛ́tá-ma ye báakpɛ̰́ńkù, kà ku bòdi é dɔ̀hà é pɛkà. ¹⁷ Òcɔ̰́ǹ mɛ̀ɛ pú hɔ̰́ cɔ̰dí dìfɛ̰́ɛ̰̀ pàǹn dɔcí yúukpɛ̰́ɛ̰̀ka mɛhɛká. Kà nìi mà hḭn, ye dìfɛ̰́ɛ̰̀ kó kà pɔ́dá-ma é sèǹ n'ɛ̀ɛ yúùka. Àmá, pà hɔ̰́ cɔ̰dí dìfɛ̰́ɛ̰̀ pàǹn yúupàka mɛhɛká-dà. Mɛma, ye wɛǹni pú hɔ̰́ sèǹ.

Poòo òcɔ̰́ǹ kpekànamá nà Sàyìdísì sepàm̀bíitá foukànamá

¹⁸ Sèsíì de káà pà cakú ye kú wɛmà-dà, kà Sùwífùpa kpɛ̰́ǹn òcɔ̰́ǹ é tɛ̀ni é hìu-ho o yìhìka è yɔ̀: N sepàm̀bíitá-dà kpíi-ní. Àmá ya̰ní é cɔ̰ná a nɔ̀hi ta hḭ́ǹka kà tá foùda.

¹⁹ Kà Sèsíì é yídá n'ɔ̀ɔ dapàm̀ma óò tṵ̀na.

²⁰ Yè de hɔ̰́tà poòo òcɔ̰́ǹ-dà mɔn poòma, è yòǹ beeká píì-kàdɛ́ɛ́ mà pú yɔ̀a. Ye wɔ̀ni, k'ó hɛ̰́tá-ní Sèsíì, o dàkàbɛ́ka é pḭ́ń o tókédi yàǹyàǹti, ²¹ è yá̰á̰, ò de maàhu è tonà: Bá kà n nɛɛ̀ è pḭ́ń o tókédi cɔ̰́ɔ̰̀di, n kó kpeka-á-ma. ²² Kà Sèsíì é fitá-ní é dɛ́há ye poòo óò caka è yɔ̀: Pa̰a̰ a kpɛ́ɛtí n sepàǹ, a dandaní-d'àà fḭ́hìnà. Ye pesá n'ɛ̀ɛ pesá, k'yèe poòo é kpeka.

²³ Ò ta̰ntà-ma ye Sùwífùpa kpɛ̰́ǹn hɔ̰́ɔ̰̀ta, é dɛ́há heuhí yam̀ma nà nìku kà kù toó kpíidawòka. ²⁴ K'ó pà caka è yɔ̀: Yɛ̀ɛ̀-nà, ye sepàm̀bíítà pú kpíi, tà dɔɔ́-ma. Kà pá cetá òò dɛhikú. ²⁵ Ò dènà-ma nìpa, ye wɔ̀ni é dúú ye sepàm̀bíitá de dɔɔ́-di nàmɔ̀ni, é tɛ̀i é cɛ̰ɛ̰́ ta nɔ̀ku, kà tá yídá-ní. ²⁶ K'yèe wɛmá é pidá ye tempáàku wɛǹni mɛhɛká.

Sèsíì kpekànà yɔ̀m̀ma pàdɛ́ɛ́

²⁷ Kà Sèsíì é yídá ye pesá é n'kɛ̰hɛdi, kà yɔ̀m̀ma pàdɛ́ɛ́ òò tṵ̀n è kpákádí è toò: Dàfítì bidà, ti kɔń séèma! ²⁸ Ò ta̰ntà-ma hɔ̰́ɔ̰̀ta, k'yèe yɔ̀m̀ma óò pàdi-ho, k'ó pà béka è yɔ̀: Nɛ dań-dà è yɔ̀ n kó nɛɛ́ pa̰á̰ miya̰? Kà p'óò tɛ̰́ná è yɔ̀: Ṵ̀ṵ̀, Teù.

²⁹ Ye wɔ̀ni, k'ó pḭ́ń pa nɔ̀ǹci è yɔ̀: Yé pa̰á̰ nɛ kpɛ́mú é n'yònà nɛ dankáàma. ³⁰ Kà pa nɔ̀ǹci é diìda. K'ó pà fedí há̰ḿbíifá é pà caka è yɔ̀: Besí-nà sukú, nɛ dá teha k'òòcɔ̰́ǹ é mà yèkà. ³¹ Àmá, k'yèe nìpa n'yɛtì-ní, é ceḿ cèn ye tempáàku wɛǹni mɛhɛká, é caka Sèsíì de pa̰à̰-sa.

Sèsíì kpekànà mùko

³² Ye yɔ̀m̀ma yɛtì-ma, kà pá tɛɛ̀ní dɔɔ̀o òcɔ̰́ǹ k'ò yòǹ mùko, mìì tee-sá wɛɛ̀ko-dà de mà n'ɔ̀ɔ̀ hḭn. ³³ Sèsíì bɔ̀haà-ma ye wɛɛ̀ko, k'yèe mùko é cetá è wɛì sukú. K'yé dii nìku dɔ́ɔ́di kà kù wɛì è tonà: Ti mum pú dɛ́hà pa̰á̰mà mɛmà kú tɔɔ̀ma daadí yènì Ìsìdàyɛ́dì mɛhɛká.

³⁴ Àmá, kà Fàdísìpa mɛmpa cakú è toò: Wɛɛ̀kupá wódo-d'òò kɔ̰́nì nɔɔ̀ti k'ò bɔ̀hu ye wɛɛ̀kupà-ní.

Séèma káá Sèsíì nìku hḭ́ǹka

³⁵ Sèsíì de centì yɔsàti nà sàm̀mɔ́ǹti wɛǹni mɛhɛká-dà, è biɔhànì Weèdi wɛmá biɔhà-nàmɔ̀ka mɛhɛká, è cakú Weèdi wóòti wɛnaamá, è kpekànì dɔncí wɛǹni nà weǹkɔ̀mu wɛǹni. ³⁶ K'ó dɛ́há nìku dɔ́ɔ́di, kà séèma óò cɛ̰dí dɛ́dɛ́í ku hḭ́ǹka, mìì tee-sá kù de wéè-nà pemá-dà, kà ku yàma cɔ̰háà. Kù de yònà hɔ̰̀ci mɛ̀ǹcì kɔ́ɔ́-ci-dà cɛ̰nto. ³⁷ Ye wɔ̀ni, k'ó caka o dapàm̀ma è yɔ̀: Dikɔ̰ṵtí wɛhi-í-ma sàma, ti kɔ̰ṵpá há̰ pú wɛhi. ³⁸ Ye kú kpɛ́mú, cɔhà-nà yoǹku yaǹn k'ó dɔ̀hà é tɔn-ní dehèpa kà p'óò kɔ̰ṵ o dití.