Màtíyéè 12

Sèsíì-dà yòǹ damuhipàdi kpɛ̰́ǹn

¹ Ye kú dàhàka, Sùwífùpa damuhipàdi nìcɔ̰́nì kú daadí, kà Sèsíì é n'ka̰hù pɛ̰́ɛ̰̀ yɔ̀ka yoǹna nàcɔ̰́nà, è hɔ̰́tà kòni káá o dapàm̀ma. Pà nà dèèku-má, k'òo dapàm̀ma é cetá è ka̰dì pɛ̰́ɛ̰̀ yoòfá̰à̰ti è cákápú ti bíimá. ² Fàdísìpa dɛ́hà-ma miya̰, é caka Sèsíì è yɔ̀: Dɛ́há a dapàm̀ma kà pà pa̰kú ti kpɛ̰́ńtìnùka yeéè-sa damuhipàdi daadí. ³ Kà Sèsíì é pà tɛ̰́ná è yɔ̀: Nɛ pú kaàn Dàfítì de pa̰à̰-sa daadí yènì kà kòni pà káá mɛnń n'ɔ̀ɔ nìpa? ⁴ Ò de tɛ̀i é dúú Weèdi hɔ̰́ɔ̰̀ta mɛhɛká-dà, é tódá pɛ̰́ɛ̰̀pa pà kɔ̰́ɔ̰̀-pa Weèdi, mɛnń n'ɔ̀ɔ nìpa kà pá pà cécí. Weèdi kpɛ̰́ńtìnùka há̰ pú hḭ́n nìdo wɛǹni é pà cécí, dɔ̀hàka yam̀ma cɔ̰́ɔ̰̀di bààsí. ⁵ Yoo, nɛ pú kaàn Mɔ̀yísì kpɛ̰́ńtìnùka mɛhɛká pà hḭ́n-sá è yɔ̀ dɔ̀hɔ̀ka yam̀ma mɛ̀m̀pà dehú-pa Weèdi hɔ̰́ɔ̰̀ta mɛhɛká damuhipàdi daadí, pà yeekú-nà-á-dà ni kpɛ̰́ńtìnùka, è há̰ kɔ́ɔ́ yetádi? ⁶ N há̰ nɛ cakú-ma, òcɔ̰́ǹ péé-ma miì è wɛhi-nà Weèdi hɔ̰́ɔ̰̀ta. ⁷ Pà wà̰tà Weèdi pɔ̀kàta mɛhɛká è yɔ̀ Weèdi yɔ̀: Nì dɔ́sí á kɔń a tɔɔ̀o-dà séèma, nì pú dɔ́sí á nì m'pa̰kú nɔtí dɔ̀hɔ̀ka. Kà nɛ de yeèkaà sukú ye wɛmà hḭ́mpú, è yenì nɛ pú kɔ̰́ɔ̰̀ yetádi mɛ̀m̀pà pú pa̰à̰-pa yècḭ́ḭ̀. ⁸ Niìfòùo bíitá-dà yòǹ damuhipàdi kpɛ̰́ǹn.

Sèsíì kpekànà nɔɔ̀fa̰á̰ku yaǹn

⁹ Kà Sèsíì é yíí ye pesá, é taá pa Weèdi wɛmá biɔhà-nàmɔ̀ni nìcɔ̰́ kú mɛhɛká. ¹⁰ K'ó tɛ̀i é n'hɔ̰́tà dɔɔ̀o òcɔ̰́ǹ yè péé, k'òo nɔ̀ku fa̰á̰. Mɛ̀m̀pà de péé-pa ye pesá, kà pà pɛnti pà kó pṵ́á̰-sa Sèsíì. Ye kú kpɛ́mú, kà p'óò béka è yɔ̀: Ti kpɛ̰́ńtìnùka ti pɛ̰ḭ-ḭ́-dà nùdi è yɔ̀ tí kpekàna nìdo damuhipàdi daadí? ¹¹ K'ó pà tɛ̰́ná è yɔ̀: Nɛ mɛhɛkà, nɛ woò mɔ́ńn-dà, kó n'káá o hɔ̰̀fa fàcɔ̰́ pɔ́pɔ́ú, kà fá dɔdi fɔ̰̀ɔ̰̀ku mɛhɛká damuhipàdi daadí, k'ò pú n'taá é fà dèna-ní ku mɛhɛká? ¹² Nìdo há̰ pú ha̰tà hɔ̰̀fa-a? Ye kú kpɛ́mú, ti kpɛ̰́ńtìnùka ti pɛ̰ḭ-ḭ́-ma nùdi è yɔ̀ tí pa̰á̰ suumá nìdo damuhipàdi daadí.

¹³ Ye wɔ̀ni, k'ó caka ye dɔɔ̀o mɛ̀ǹǹ kú nɔ̀ku de fa̰á̰-ko è yɔ̀: Ca̰à̰na a nɔ̀ku! K'ó kù cà̰na, kà kú ceḿ tón tɔkú yòm̀pu. ¹⁴ Kà Fàdísìpa é ceḿ é yɛ̀dì é taá pa̰á̰ peètamá, è kó dɛ́há pà kó hḭmpú óò kɔ̀ù.

Deho Weèdi ta̰kadàko

¹⁵ Kà Sèsíì é mà yèkà, é yídá ye pesá kà nìpa dɔ́ɔ́di ò tṵ̀n. K'ó kpekàna mɔkàpa wɛǹni, ¹⁶ è há̰ pà caka tenten è yɔ̀ pà dá yetá é ca-caka òcɔ̰́ǹ mɛnn héé-ko. ¹⁷ Yè de hḭn mɛma, è kpɛ̀i Weèdi wɛtɛ̰́náko Èsàyíì de wɛɛ̀-ma wɛmá-dà é pa̰ná. Ò de yɔ̀:

¹⁸ Ǹtɛ n deho n ta̰kadà-ko,

òò dɔ́sí, kà n yaǹnaakú wɛǹni péé o hḭ́ǹka.

N kó héé kà n Sèdi-dà é m'péé o hḭ́ǹka,

k'ó caka coóma wɛmá boocí wɛǹni.

¹⁹ Ò pú kó kɛ̰̀ḭ n'ɔ̀ɔ̀cɔ̰́ǹ,

ò mɛ̀ɛ pú kó n'wɛ́dì.

Òcɔ̰́ǹ pú kó yekà o boòku cɔ̀ci mɛhɛká.

²⁰ Ò pú kó bɔ́kádá hà̰dikú mɛ̀ǹkù wɔ̰dí-ku,

Ò mɛ̀ɛ pú kó kɔ̀ù ha̰wèta mɛ̀ǹtà kú ha̰mú kɔ̰́ńti-tá.

Ò kó n'hɔ̰mpú-dà, háá é héé kà coóma é tódá yudí,

²¹ kà boocí wɛǹni é taàa ci dandaní o hḭ́ǹka.

Sèsíì tɛ̰́nì mɛ̀m̀p'òò pṵ́ṵ́nì-pa

²² Kà p'óò tɛɛ̀ní nìdo òcɔ̰́ǹ k'ò yɔ̀n è tṵ́mà yòǹ mùko, mìì tee-sá wɛɛ̀ko-dà de péé o mɛhɛká é mà n'ɔ̀ɔ̀ hḭn. K'óò kpekàna, k'ó diìda, è nɔn è wɛì. ²³ K'yé dii nìpa wɛǹni kà pà békú pa tɔɔ̀pa è tonà: Mɛnń-dà dá n'héé Dàfítì yaàbíidí?

²⁴ Fàdísìpa mà yèkaà-ma, kà pà yɔ̀: Nìì mɛnǹ bɔ̀hu wɛɛ̀kupá nà Wɛɛ̀kupá wódo Bɛ̀dìsèbúdì nɔɔ̀ti-dà.

²⁵ Sèsíì há̰ yá̰á̰-ma pà màhu-sá tá, k'ó pà caka è yɔ̀: Kà wóoteǹka kàcɔ̰́kà kú nìpa kɔ̰ǹti nà pa tɔɔ̀pa, ye kú wóoteǹka hɔ̰́ pɔ́dá-ma. Kà yɔtí tìcɔ̰́tì yoo hɔ̰́ɔ̰̀ta tàcɔ̰́tà kú nìpa mɛ̀ɛ té kɔ̰ǹti nà pa tɔɔ̀pa, ye kú yɔtí yoo ye kú hɔ̰́ɔ̰̀ta pú kó nɛɛ́ é n'fòù. ²⁶ Kà Wɛɛ̀kupá wódo bɔɔ̀hu mɛ̀m̀pà yòǹ-pa o kpɛ́ɛpá, ò kɔ̰̀ǹti n'ɔ̀ɔ cɔ̰́ɔ̰̀di-dà mɛmɛ-ɛ̀! Ntɛ́ o wóoteǹka kó hḭmà é n'fòù? ²⁷ Nɛ toò Bɛ̀dìsèbúdì-dà n kɔ̰́nì nɔɔ̀ti kà n bɔ̀hu wɛɛ̀kupá, nɛ kpɛ́ɛpá há̰kà tá, mɛmpa pà bɔ̀hu nà woò kú nɔɔ̀ti-dà? Nɛ nìpa mɔ́mpá-dà kó nɛ síi-nà. ²⁸ Àmá, kà n bɔ̀hu wɛɛ̀kupá nà Weèdi Sèdi kú nɔɔ̀ti-dà, miya̰ bɛkú è yɔ̀ Weèdi wóòti-dà tɛ̀ni nɛ cɔhɔ̀ka.

²⁹ Òcɔ̰́ǹ pú kó nɛɛ́ dúú niìkpedo òcɔ̰́ǹ kú hɔ̰́ɔ̰̀ta, é kodá o kááma wɛǹni, è pú n'cedí dɛnà óò cɛ̰ɛ̰́ óò dákáná. Àmá k'òò dákánà è yɔ̀ɔ, ò kó nɛɛ́ é kodá-ma mìì péé-sa wɛǹni o hɔ̰́ɔ̰̀ta mɛhɛká.

³⁰ Mɛ̀ǹǹ pú n péé-nà-ko, ò n kɔ̰̀ǹti-nà-á-ma. Mɛ̀ǹǹ mɛ̀ɛ pú n tempú-nà-ko kà ti tíkánì nìpa, ò pà wìhìnì-í-ma. ³¹ Ye kú kpɛ́mú-dà tee n nɛ cakú-ma è yɔ̀: Nìpa kó pa̰á̰-ma sḭ̀ḭ̀ma wɛǹni, nà cɔ̀ka pà kó teùnà-ka wɛǹni Weèdi, nì kó pà dèda-á-ma ye kú sḭ̀ḭ̀ma. Àmá, mɛ̀ǹǹ kó tèe-kó Weèdi Sèdi, Weèdi pú k'óò dèda ye kú sḭ̀ḭ̀mà-ní daadí yènì. ³² Mɛ̀ǹǹ kú wɛnnì kó tèe-kó Niìfòùo bíitá, Weèdi k'óò dèda-á-ma o sḭ̀ḭ̀ma. Àmá, mɛ̀ǹǹ kó tèe-kó Weèdi Sèdi, Weèdi pú k'óò dèda ye kú sḭ̀ḭ̀mà-ní wɔ̀ǹkù ti péé-kù kú mɛhɛkà sá̰mà, bá nà mɛ̀ǹkù pení-ku-ní kú mɛhɛká.

Tepú nà mu bíiká

³³ Nɛ́ cɔ́dí tená. Kà tepú yòǹ tesuupú, mu bíiká hɔ̰́ n'yòǹ tebíisuuká-dà. Kà tepú mɛ̀ɛ yòǹ tekpákpààpu, mu bíiká hɔ̰́ n'yòǹ kpákpààka-dà. Pà hɔ̰́ bantá tepú mu bíiká pesá-dà. ³⁴ Waàbídɔhì nɛ́na! Ntɛ́ nɛ kó hḭmà é caka mìì suu-sá nɛ́na mɛ̀m̀pà yòǹ-pà niìkpákpààpa? Mìì sṵ́n-sá nìi yàma mɛhɛká, mií-dà ò wɛì-ma. ³⁵ Niìmɔ́nń suumá hɔ̰́ yɛɛ̀ni-nà-ní o mɛkanaaká mɛhɛká-dà, kà niìkpákpààdo kpákpààma té yɛɛ̀ni-nà-ní o mɛkatohiká mɛhɛká. ³⁶ N nɛ cakú-ma, sídàma daadí, Weèdi kó béka-á-ma nìpa kà pá nì caka mìì de tee-sá kà pá wɛdá wɛhéhécíhi wɛǹni, ³⁷ è yá̰á̰, n'àa wɛmá hḭ́ǹka-dà Weèdi kó wáńtá áa síi-má, áa pṵ́tá yoo áa kɔ̰́ɔ̰́ yetádi.

Nìpa békú pɔ́ńtáyḭdó

³⁸ Ye wɔ̀ni, kà Weèdi kpɛ̰́ńtìnùka biɔhànapá pàcɔ̰́ nà Fàdísìpa é caka Sèsíì è yɔ̀: Dakpɛ̰́ǹn, ti kpɛ̀i á pa̰á̰ pɔ́ńtáyḭdó-dà kà tí dɛ́há.

³⁹ Kà Sèsíì é pà tɛ̰́ná è yɔ̀: Wɔ̀ǹkù mɛnkù kú nìpa pú coó, pà mɛ̀ɛ pú tṵ̀n Weèdi hḭ́mpú, mɛmpá-dà békú n pa̰á̰ pɔ́ńtáyḭdó. Pà pú kó dɛ́há pɔ́ńtáyḭdó tɔɔ̀o òcɔ̰́ǹ k'yè pú yòǹ Weèdi wɛtɛ̰́náko Sònásì kóoó. ⁴⁰ K'yé n'yònà Sònásì de pa̰à̰-ma weǹtṵ́ṵká kàta̰a̰ nà yèǹka kàta̰a̰ num̀bíisàta pɛutí mɛhɛká, ma kú bookú-dà Niìfòùo bíitá kó pa̰á̰-ma weǹtṵ́ṵká kàta̰a̰ nà yèǹka kàta̰a̰ teǹka mɛhɛká. ⁴¹ Sídàma daadí, Nìnífù yɔtí kpɛ́ɛpá kó yídá-ma wɔ̀ǹkù mɛnkù kú nìpa yìhìka, é pà kɔ̰́ɔ̰́ yetádi, mìì tee-sá Sònásì de pà cakáà Weèdi wɛmá kà pá peǹta-á-ma fòùmu. Òcɔ̰́ǹ há̰ péé-ma miì è ha̰tà-nà Sònásì. ⁴² Sídàma daadí, poòo mɛ̀ǹǹ de wóó-ko Sàbáà teǹka, kó yídá-ma wɔ̀ǹkù mɛnkù kú nìpa yìhìka, é pà kɔ̰́ɔ̰́ yetádi, mìì tee-sá ò de yíì-ní nà dɛùma-dà, é tɛ̀ni è kó besí wódo Sàdòmɔ́ɔ̀ yaǹfòùma. Òcɔ̰́ǹ há̰ péé-ma miì è ha̰tà-nà Sàdòmɔ́ɔ̀.

Kà wɛɛ̀ko yɛɛ̀ nìi mɛhɛká, ò kó nɛɛ́-ma é tóní

⁴³ Kà wɛɛ̀ko yɛɛ̀ nìi mɛhɛká, ò hɔ̰́ ka̰há-ma é taá n'centì cèǹtì càwenkú mɛhɛká è pɛnti bɛ̀m̀bɛ̀ni ò kó muhipa-dí. K'ò pú dɛ́hà, ⁴⁴ ò hɔ̰́ caka o cɔ̰́ɔ̰̀di-dà è yɔ̀: N kó tón-ń-ma n hɔ̰́ɔ̰̀ta n yɛɛ̀ni-tá-ní kú mɛhɛká. K'ò té tóní é tɛ̀ni è hɔ̰́tà pà tà pɛ́dà, è tà dɔ̀haà dɛ́dɛ́í kà tà dɔɔ́ ta kpeèdi. ⁴⁵ Ye wɔ̀ni, ò hɔ̰́ tón-ń-ma é taá pɛha-ní wɛɛ̀kupá tɔɔ̀pa pàyehì, mɛ̀m̀pà dɔ̀haà sḭ̀ǹ-pa óò ha̰tá, kà pá tóní é tɛ̀ni é dúú ye nìdo mɛhɛká é kaàdi. Ye wɔ̀ni, k'òo pemá té dɔ̀hà é dɔnka é ha̰tá-nà ye wɛɛ̀ko de mum p'óò yídà k'yè yòm̀pu.

Mɛ̀m̀pà yòǹ-pa Sèsíì màa n'ɔ̀ɔ ya̰nhí

⁴⁶ Sèsíì de káà wɛì-nà nìku-dà, k'òo màa n'ɔ̀ɔ ya̰nhí é tɛ̀ni é nɛɛ̀hi tapaàdi è kpɛ̀i óò wɛɛ́-nà. [\v 47 K'òòcɔ̰́ǹ óò caka è yɔ̀: A màa n'àa ya̰nhí nɛɛ̀hi tapaàdi è kpɛ̀i áa wɛɛ́-nà.] ⁴⁸ Kà Sèsíì é tɛ̰́ná ye nìdo è yɔ̀: Wodà héé n màa? M̀mɔ́ḿpa-dà héé n ya̰nhí? ⁴⁹ K'ó fedí n'ɔ̀ɔ nɔ̀ku o dapàm̀ma è yɔ̀: Ǹtɛ n màa nà n ya̰nhí. ⁵⁰ Mɛ̀ǹǹ pa̰kú-ko n Báàa mɛ̀ǹǹ péé-ko hḭ́ǹka kpɛ̀i-sá, ye yaǹn-dà yòǹ n màa, nà ya̰ǹta, nà n potɔ̰ɔ̰̀ɔ̰.