Màtíyéè 14

Ìsá̰-Bàtísì kṵ́mú

¹ Ye kú daàka mɛhɛká, kà Kàdìdéè tempáàku wódo Hèdótì é yekà kà pà wɛì Sèsíì wɛmá. ² K'ó caka o dapàm̀ma è yɔ̀: Ìsá̰-Bàtísì-dà. Ò yá̰ńtà-á-ma-ní, ye kú kpɛ́mú-dà tee k'ò káá ye kú nɔɔtì è pa̰kú pɔ́ńtápa̰á̰ma.

³ Mɛnń, Hèdótì-dà de kɔ̰́ɔ̰̀ nùdi kà pá cɛ̰ɛ̰́ Ìsá̰à̰, óò dáká, óò ká̰ńtá kódedí mɛhɛká. Ò de hḭn mɛma, o ya̰ǹn Fìdípù poòo kpɛ́mú-dà ò de ta̰ntà-ko, kà p'òò toò Hèdòdíátì, ⁴ è yá̰á̰ Ìsá̰à̰ de ò cakú è tonà: A pú sànà é tódá Hèdòdíátì k'ó n'yòǹ a poòo. ⁵ Kà Hèdótì é m'pɛnti è kó kɔ̀ù Ìsá̰à̰, è há̰ wani nìpa, mìì tee-sá mɛmpa de ò dìi Weèdi wɛtɛ̰́náko-dà. ⁶ Kà daadí pɛdá, daadí pà de pɛdà-di Hèdótì, k'ó pa̰á̰ kúúdi ye kpɛ́mú. Kà Hèdòdíátì sepàǹn é haá nìpa pà de yíí-pa-ní yìhìka, k'yé naaka Hèdótì sàma. ⁷ K'ó wɛ̰́ha è yɔ̀ ò kó kɔ̰́ɔ̰́-ma ye sepàǹn, ò k'óò cɔ̀hà-sa wɛǹni. ⁸ N'ɔ̀ɔ màà tencí hḭ́ǹka, k'yèe sepàǹn óò caka è yɔ̀: N kɔ̰́ɔ̰́-ní miì mɔ́-mɔ́ńyà̰ Ìsá̰-Bàtísì yudí pɛ̀dɛ́ńtì mɛhɛká.

⁹ Kà wódo yàma yɔ̀ kɔ̰̀. Ò há̰ de yɔ̀ɔ-má wɛ̰́hàpu o cà̰m̀ma yìhìka tá, k'ó kɔ̰́ɔ̰́ nùdi è yɔ̀ pá nì n'ɔ̀ɔ̀ kɔ̰́ɔ̰́. ¹⁰ K'ó tɔn nìdo k'ó taá fiìta-ní Ìsá̰à̰ yudí kódedí mɛhɛká. ¹¹ Kà pá nì tàa-ní pɛ̀dɛ́ńtì mɛhɛká, é tɛ̀ni é nì kɔ̰́ɔ̰́ ye sepàǹn, k'ó taá nì kɔ̰́ɔ̰́ o màa. ¹² Kà Ìsá̰à̰ dapàm̀ma é tɛ̀ni é tódá o wɔ̰̀ǹku, é taá kù dáná. Ye kú dàhàka, kà pá taá caka Sèsíì mìì pa̰à̰-sa.

Sèsíì dià nìpa tòhìka kànùm̀

¹³ Sèsíì yèkaà-ma mɛma, é yídá ye pesá, é dúú hà̰à̰pu, é ka̰há bɛ̀m̀bɛ̀ni nìpa de kɔ́ɔ́-di, o cɔ̰́ɔ̰̀di pesá. Àmá, kà nìpa é mà yèkà, é yɛɛ̀ni yɔtí mɛhɛká, óò tṵ̀na nà pa tàka. ¹⁴ Ò tɛ̀i é yɛɛ̀ni tíń wɔ̀ni hà̰à̰pu mɛhɛká, é dɛ́há nìku dɔ́ɔ́di, kà séèma óò cɛ̰dí ku hḭ́ǹka, k'ó kpekàna mɔkàpa mɛ̀m̀pà de péé-pa ku mɛhɛká.

¹⁵ Kà yohokú é yodá, k'òo dapàm̀ma óò hɛ́tá-ho óò caka è yɔ̀: Wèǹku koò pú kadí, nìì mɛ̀ɛ kɔ́ɔ́ bɛ̀m̀bɛ̀nì mɛnì. Wihìna nìpa kà pá taá yɔbíímú mɛhɛká é dontá dipú. ¹⁶ Kà Sèsíì é pà tɛ̰́ná è yɔ̀: Yè pú békú pá ka̰há. Nɛ mɔ́mpá pà kɔ̰́ɔ̰́ kà pá dii. ¹⁷ Àmá, kà p'óò caka è yɔ̀: Ti káá miì pɛ̰́ɛ̰̀pa pànùm̀-dà nà num̀bííhí hìdɛ́ɛ́ sá̰à̰di. ¹⁸ K'ó pà caka è yɔ̀: Yè nà n ya̰à̰-nà-ní miì.

¹⁹ K'ó caka nìpa è yɔ̀ pá kaàdi míti hḭ́ǹka. K'ó tódá ye pɛ̰́ɛ̰̀pa panùm̀ka, n'ɛ̀ɛ num̀bííhí hidɛ́ɛ̀ka, é wáńtá hḭ́ǹka, é sɛda Weèdi. K'ó wɛ́ha ye pɛ̰́ɛ̰̀pa é pà kɔ̰́ɔ̰́ o dapàm̀ma, kà pá pà totá nìpa. ²⁰ Pa wɛǹni kà pá dii, é dɛn. K'òo dapàm̀ma é tíká mìì sɔ̰́ńtà-sa, k'yé sṵ́ná náḿbòhi píì-hìdɛ́ɛ́. ²¹ Mɛ̀m̀pà de dii-pá ye dipú, daapá de yɔ̀ɔ-ɔ́-ma tòhìka kànùm̀ kpɛ́ɛmá, è m'bààsí poòpa nà bííhí.

Sèsíì cèn nɛ́ɛmá hḭ́ǹka

²² Ye kú dàhàka, kà Sèsíì é ceḿ caka o dapàm̀ma è yɔ̀ pá dìsi hà̰à̰pu hḭ́ǹka, é n'nihí é deéta ye baàdi sóìdi tɔɔ̀di, k'òo mɔ́nń ní n'wihìnì nìku. ²³ Ò kù wìhìnà-ma é yɔ̀ɔ, é dìsi ta̰à̰di hḭ́ǹka o cɔ̰́ɔ̰̀di pesá, è kó pa̰á̰ weèdɔɔ̀pu. Kà yèǹka é yɔ̀ɔ bóka, k'ò káà péé ye pesá o cɔ̰́ɔ̰̀di. ²⁴ È hɔ̰́tà ye hà̰à̰pu yɔ̀ɔ nátá-nà-pu kpeèdi, kà yakú é kpetá-ní è heu è mù coó-nà, kà nɛ́ɛsa̰nhí mù fá̰kápu. ²⁵ K'hé n'kɔ́dí wentá-pu, k'ó yíí taá o dapàm̀ma bɛ́ka, è cèǹtì-ho ye baàdi nɛ́ɛmá hḭ́ǹka. ²⁶ O dapàm̀ma ò dɛ́hà-ma k'ò cèǹtì-ní nɛ́ɛmá hḭ́ǹka, kà pa bɔ̀ti é pùdi dɛ́dɛ́í kà pà yɔ̀: Bekebeédi-dà. Pa wantafɔ̰̀di mɛhɛká, kà pá tóó dawòka. ²⁷ Ye wɔ̀ni kà Sèsíì é cemá pà caka è yɔ̀: Nɛ bɔ̀ti dá m'pudì, mmí-dà, nɛ dá n'wani. ²⁸ Kà Píyɛ́ɛ̀ óò caka è yɔ̀: N Teù, kà fɔ̰́ń-dà nà mɔ́ma, k'á héé ká n cèn nɛ́ɛmá hḭ́ǹka é tɛ̀i-ho a pesá. ²⁹ Kà Sèsíì óò tɛ̰́ná è yɔ̀: Ya̰ní! Kà Píyɛ́ɛ̀ é yɛɛ̀ni ye hà̰à̰pu mɛhɛká, é cèn nɛ́ɛmá hḭ́ǹka, é taá Sèsíì bɛ́ka. ³⁰ W'àá de hɔ̰́tà-ma yakú kpenì tá, kà wantafɔ̰̀di óò cɛ̰dí, k'ó cetá è ním̀ nɛ́ɛmá mɛhɛká, ye wɔ̀ni k'ó kpákada è yɔ̀: N Teù, n fḭ́hìna! ³¹ Ye pesá nà yè pesá, kà Sèsíì é dɛɛ̀da o nɔ̀ku óò cɛ̰ɛ̰́, óò caka è yɔ̀: A dandaní pú wɛhi báà cɛ̰́ma. Baà tee k'á pa̰á̰ màmàhìma? ³² Kà pá dúú pa dɛ́ɛ̀di ye hà̰à̰pu mɛhɛká, k'yèe yakú é cɛ̰́ṵ́dá. ³³ Mɛ̀m̀pà de péé-pa ye hà̰à̰pu mɛhɛká, kà pá hìù pa dúùka Sèsíì yìhìka, è yɔ̀: Mɔ́masí-dà a yòǹ-ma Weèdi bíitá.

Sèsíì kpekànà mɔkàpa Sènɛ̀sàdɛ́tì tempáàku mɛhɛká

³⁴ Kà pá dehà é deèta ye baàdi, é ta̰ntá Sènɛ̀sàdɛ́tì tempáàku mɛ́hɛká. ³⁵ K'yèe pesá nìpa é ceḿ bantá Sèsíì, é dɛɛ̀da páàti wɛǹni é caka nìpa è yɔ̀ ò tɛ̀ni. Kà p'óò toha-ní mɔkàpa wɛǹni. ³⁶ Kà p'òò sɛ́ɛ́kú è yɔ̀ ó héé kà pá pḭ́ń báà o tókédɛudí yàǹyàǹti. Mɛ̀m̀pà kú wɛnnì de hɔ̰́ ò pḭ́ń-pa, de hɔ̰́ kpeka-á-ma.