Mádíkì 8

Sèsíì dià nìpa tòhìka kànàhì

¹ Ye kú daàka mɛhɛká, kà nìku dɔ́ɔ́di é tṵ́má peèta Sèsíì pesá, è kɔ́ɔ́ kù kó dii-sá. Mɛmá-dà, k'ó yíí o dapàm̀ma é pà caka è yɔ̀: ² Séèma-dà n káá n'ɛ̀ɛ nìkù kpɛ́mú, mìì tee-sá yè hḭn daàka kàta̰a̰-dà mɛmà, kà kù n péé-nà kù koò pú káá kù kó dii-sá. ³ Kà n mɛ̀ɛ hḭ́n kú kòǹ nà kòni, kù kó hɛ̰ka-á-ma ta̰ntápu, mìì tee-sá ku nìi pàcɔ̰́ yɛɛ̀ni dɛùma-dà.

⁴ K'òo dapàm̀ma óò tɛ̰́ná è yɔ̀: Ti péé miì foǹni mɛhɛká-dà, ti kó haá ya-dà dimá é diá é dɛnkàna nìkù mɛnkù kú wɛnnì?

⁵ K'ó pà béka è yɔ̀: Pɛ̰́ɛ̰̀pa pàdɛɛ-dà nɛ káá-ma?

Kà pà yɔ̀: Pàyehì.

⁶ K'ó caka ye wɔ̀ni ye nìku è yɔ̀ kú kaàdi teǹka. K'ó tódá ye pɛ̰́ɛ̰̀pa payehìka, é sɛda Weèdi, é pà wɛ́ha é kɔ̰́ɔ̰́ o dapàm̀ma è yɔ̀ pá pà totá ye nìku wɛǹni, kà pá mà hḭn. ⁷ Pà de tṵ́mà káá-ma séèka. K'ó sɛda Weèdi nà ka kpɛ́mú, é caka o dapàm̀ma è yɔ̀ pà mɛ̀ɛ té kà totá nìpa. ⁸ Kà pá dii é dɛn. K'òo dapàm̀ma é tíká ye fììka mɛ̀ǹkà de sɔ̰́ńtà-ka, kà ká sṵ́ná náḿbòhi hìyehì. ⁹ Nìpa mɛ̀m̀pà de dii-pá de yɔ̀ɔ-ɔ́-ma tòhìka kànàhì kpɛ́ɛmá. Ye kú dàhàka, kà Sèsíì é pà wìhìna. ¹⁰ Ò pà wìhìnà-ma, é cemá dúú hà̰à̰pu mɛhɛká n'ɔ̀ɔ dapàm̀ma, kà pá ka̰há tempáàku pà toò-ku Dàdìmànùtáà.

Fàdísìpa békú pɔ́ńtápa̰á̰ma

¹¹ Kà Fàdísìpa é tɛ̀ni é cetá-nà Sèsíì nɔ̀nɔ̀hicí, è kpɛ̀i óò bɛń é dɛ́há k'ò péé-nà-ní Weèdi pesá-dà. Kà p'óò béka è yɔ̀ ó pa̰á̰ pɔ́ńtápa̰á̰ma mɛ̀mà péé-nà-ma-ní hḭ́ǹka. ¹² K'ó fueha fuehècɛ̰́hídi è yɔ̀: Badà tee kà wɔ̀ǹkù mɛnkù kú nìpa békú pɔ́ńtápa̰á̰ma? N nɛ cakú wɛbemú-dà, pà pú kó dɛ́há pɔ́ńtápa̰á̰ma màcɔ̰́mà. ¹³ Ye kú dàhàka, k'ó pà hédá ye pesá, é dúú hà̰à̰pu mɛhɛká, é deèta ye baàdi sóìdi tɔɔ̀di.

Pa̰á̰-nà yɔkàma nà Fàdísìpa nà wódo Hèdótì

¹⁴ Kà Sèsíì dapàm̀ma de dúí pà kó tódá-ma pɛ̰́ɛ̰̀pa. Pà de káá òcɔ̰́-dà pa hà̰à̰pu mɛhɛká. ¹⁵ K'ó pà caka è yɔ̀: Pa̰á̰-nà yɔkàma nà Fàdísìpa pɛ̰́ɛ̰̀ yòmu yíkànasá nà wódo Hèdótì kpɛ́ɛsá hḭ́ǹka.

¹⁶ K'òo dapàm̀ma é cetá è wɛì-nà pa tɔɔ̀pa è tonà: Ò ti wɛì-nà mɛma, mìì tee-sá ti pú toó-ma kpɛ́mú-dà pɛ̰́ɛ̰̀pa.

¹⁷ K'ó bantá pà de wɛì-sa é pà béka è yɔ̀: Baà tee kà nɛ wɛì è tonà nɛ pú toó-sa-ní kpɛ́mú-dà pɛ̰́ɛ̰̀pa? Nɛ mum pú yá̰dà nɛ mɛ̀ɛ mum pú yeèkeè? Nɛ toòka-dà kpenì nkɛ́ɛ̀? ¹⁸ Nɛ káá-dà-ma nɔ̀ǹci, nɛ pú dìi-a? Nɛ káá-dà-ma toùka, nɛ pú you-a? Nɛ koò pú dèn, ¹⁹ n wɛ́háà tḭ́ń daadí pɛ̰́ɛ̰̀pa pànùm̀, kà nìpa tòhìka kànùm̀ é pà dii? Náḿbòhi hìdɛɛ-dà nɛ de tíkà-ma mìì sɔ̰́ńtà-sa?

Kà p'óò tɛ̰́ná è yɔ̀: Píì-hìdɛ́ɛ́.

²⁰ K'ò tṵ́mà yɔ̀: N há̰ de wɛ́háà pɛ̰́ɛ̰̀pa pàyehì kà nìpa tòhìka kànàhì é pà dii, kà nɛ́ tíká sɔ̰́nyá̰ náḿbòhi hìdɛɛ-dà?

Kà pà yɔ̀: Hìyehì.

²¹ K'ò yɔ̀: Kà n'aá mum pú yeèkaà?

Sèsíì kpekànà yɔ̀ǹn Bɛ̀tìsàìdáà

²² Kà pá ta̰ntá yɔtí pà toò-ti Bɛ̀tìsàìdáà, é tɛ̀i ye pesá kà p'óò tɛɛ̀-ní yɔ̀ǹn, óò sɛ́úka è yɔ̀ óò pḭ́ń k'ó kpeka. ²³ K'ó cɛ̰ɛ̰́ ye yɔ̀ǹn nɔ̀ku, óò dɛ̀di óò dèna ye yɔtí, é tɛ̀i é pa̰á̰ o nɔ̀ǹci nuǹtɔ̰tí, é cɔ̰ná o nɔ̀hi o hḭ́ǹka óò béka è yɔ̀: A dìi yècḭ́ḭ̀?

²⁴ K'yèe yɔ̀ǹn é diìda-ní è yɔ̀: N dìi-í-ma nìpa, àmá n pà dìi kà pà yònà tená-dà è cèǹtì. ²⁵ K'ó tṵ́má cɔ̰ná o nɔ̀hi ye yɔ̀ǹn nɔ̀ǹci hḭ́ǹka, k'ó diìda fa̰ṵ. Ò de kpekáà-á-ma, è kó nɛɛ́ baàta niìi wɛǹni nà dɛùma. ²⁶ Kà Sèsíì óò caka è yɔ̀: Tɔɔ̀ta é kòǹ a hɔ̰́ɔ̰̀ta, a dá cemá tón yɔtí cɔhɔ̀ka.

Píyɛ́ɛ̀ wɛdà è yɔ̀ Sèsíì yòǹ Weèdi ta̰kadáko

²⁷ Ye kú dàhàka, Sèsíì n'ɔ̀ɔ dapàm̀ma kà pá n'kɔ́dí yɔbící mɛ̀ǹcì yéńtà-ci Sèsàdéè-Fìdípù yɔtí, é n'sá̰á̰ cɔ̀ku, k'ó pà béka è yɔ̀: Nìpa wɛì n hḭ́ǹka è toò n yòǹ wodà?

²⁸ Kà p'óò tɛ̰́ná è yɔ̀: Pàcɔ̰́ toò a yòǹ Ìsá̰-Bàtísì-dà, kà tɔɔ̀pa toò a yòǹ Èdíì, é yíí kà tɔɔ̀pa tṵ́mà toò a yòǹ Weèdi wɛtɛ̰́nápa tɔɔ̀pa p'oòcɔ̰́-dà.

²⁹ K'ó tṵ́má pà béka è yɔ̀: Nɛ́na há̰kà tá, nɛ toò n yòǹ wodà? Kà Píyɛ́ɛ̀ óò tɛ̰́ná è yɔ̀: A yòǹ Weèdi Ta̰kadáko^a-dà. ³⁰ Mɛmá-dà, kà Sèsíì é pà fedí há̰ḿbíifá é pà caka è yɔ̀ pà dá yetá mà caka òcɔ̰́ǹ.

Sèsíì wɛì o kṵ́mú n'ɔ̀ɔ yá̰ńtáma wɛmá, nà nìi yònà óò tṵ̀ǹkàma

³¹ Ye wɔ̀ni, k'ó cetá o dapàm̀ma biɔhànapú, é pà caka è yɔ̀: Yè békú-ma Niìfòùo bíitá é dii náńkú sàma. Yɔtí kpɛ̰́m̀ma, nà dɔ̀hàka yam̀ma kpɛ̰́m̀ma, nà Weèdi kpɛ̰́ńtìnùka biɔhànapá kó tà yee-é-ma, é tà kɔ̀ù, data̰á̰di kà tá yá̰ńtá-ní. ³² Ò de pà cakáà ye wɛmá pópóí-dà. Mɛmá-dà, kà Píyɛ́ɛ̀ óò yíí bɛ́ɛ́kú é tɛ̀i óò wɛ́di-nà è yɔ̀ ò dá n'wɛkú mɛma kú bookú. ³³ Àmá, kà Sèsíì é fitá é wáńtá o dapàm̀ma é kɛ̰̀ḭ-nà Píyɛ́ɛ̀ è yɔ̀: Nátá n pesà Wɛɛ̀kupá wódo fɔ̰́ń! A yam̀màhàka pú yòǹ Weèdi kpɛ́ɛká, kà yòǹ nìpa kpɛ́ɛká-dà.

³⁴ Ye kú dàhàka, kà Sèsíì é yíí ye nìku n'ɔ̀ɔ dapàm̀ma é pà caka è yɔ̀: Kà mɛ̀ǹǹ kpɛ̀i é n tṵṵ̀na-kó, k'ó héé o mɔ́nń dɔ́kàma, é tóó o kpíidɔkú^b é toó é n tṵṵ̀na. ³⁵ Mɛ̀ǹǹ kó n'kpɛ̀i-kó é fḭ́hìna o fòùmu, ò kó mù féná-ma. Kà mɛ̀ǹǹ mɛ̀ɛ mù fénà-ko nà n kpɛ́mú, nà Weèdi wɛnaamá kpɛ́mú, ò kó wáńtá mù fḭ́hìna-á-ma. ³⁶ Cɔ́ńtídi m̀mɔ́ni-dà nìi kó n'káá-ma, k'ò dɛ́tà fòùku kpɛ́ɛsá wɛǹni, àá fénà o fòùmu? ³⁷ M̀mɔ́ńya̰-dà ò kó nɛɛ́ kɔ̰́ɔ̰́-ma é tṵ́má mù dontá? ³⁸ Kà fɛ̀ci káá nìdo nà n kó n'yòǹ-ma o dakpɛ̰́ǹn, n'ɔ̀ɔ̀ kó n'cunì-ma n wɛmá sá̰kù kú nìpà cɔhɔ̀ka, mɛ̀m̀pà pú cɔ́dí-pa è tṵ́mà yení Weèdi, fɛ̀ci-dà mɛ̀ɛ té kó wáńtá nà n káá o kpɛ́mú, mmí niìfòùo bíitá, n kó tóní tḭ́ń daadí nà Weèdi tɔntɔnwenipá n Báàa *wɛhimú mɛhɛká.