Mádíkì 9

¹ Kà Sèsíì é tṵ́má pà caka è yɔ̀: N nɛ cakú bemú-dà, pàcɔ̰́ péé-ma miì è kó dɛ́há Weèdi wóòti nà ti kpeèti é nɛɛ́ kpíí.

Sèsíì wɔ̰̀ǹti pentà

² Kà daàka kàkɔ̀dì é ka̰há, kà Sèsíì é tódá Píyɛ́ɛ̀, nà Ìsákì, nà Ìsá̰à̰, kà pá dìsi ta̰dɛudí nìcɔ̰́nì kú hḭ́ǹka, é tɛ̀i é m'péé ye pesá pa cɔ̰́ɔ̰̀di. Pà péé-sa-dà, k'òo wɔ̰̀ǹti é peǹta pa yìhìka. ³ K'òo báatí é pɛ́ídá wɛ́dɛ́dɛ́ è sìkàdi, bá nɛmpɔkàdakó òcɔ̰́ǹ kɔ́ɔ́ tenkà mɛnkà kú hḭ́ǹka è kó nɛɛ́ pɔkàda nɛǹti é tì pɛ́íkàna ma kú bookú. ⁴ Ye pesá, kà pá n'hɔ̰́tà Èdíì nà Mɔ̀yísì fodá-ní òò wɛì-nà. ⁵ Kà Píyɛ́ɛ̀ óò caka è yɔ̀: Dakpɛ̰́ǹn, yè sudi tí m'péé miì-dà. Héé kà tí pḭ́ná fḭ́ḭná nàta̰a̰, fɔ̰́ń kùcɔ̰́, Mɔ̀yísì kùcɔ̰́, Èdíì tɔkú.

⁶ Ò de wɛì mɛma, mìì tee-sá, ò de koò pú yá̰á̰ ò kó n'hḭ́mù. Wantafɔ̰̀di-dà de pà cɛ̰ɛ̰́ dɛ́dɛ́í pa wɛǹni. ⁷ Kà pá dɛ́há, kà wɔ́ɔ̀di é tɛ̀ni é pà cḭ̀na ni wɛ̰́ma. N'ɛ̀ɛ wɔ́ɔ̀di mɛhɛká-ní, kà pá yekà Weèdi boòku kà kù tonà: Mɛnǹ yòǹ n bíitá-dà, n tà dɔ́sí-ma sukú, tà besí-nà. ⁸ Ye wɔ̀ni n'ɛ̀ɛ wɔ̀ni, kà pá wáń-wáńtá pà koò pú dɛ́hà òcɔ̰́ǹ Sèsíì bààsí nà mɛmpá.

⁹ Kà pá n'sḭ́ńti-ní ye ta̰à̰di, kà Sèsíì é pà caka è yɔ̀ pà dá yetá ca-caka òcɔ̰́ǹ pà dɛ́hà-sa, háá é n'sànà Niìfòùo bíitá kó yá̰ńtá-ma-ní kpíípa mɛhɛká. ¹⁰ Kà pá m'maàhu ye wɛmá hḭ́ǹka, è békú pa tɔɔ̀pa è tonà: Ò kpɛ̀i é n'yɔ̀ badà, ò kó yá̰ńtá-ní kpíípa mɛhɛká?

¹¹ Kà p'óò béka è yɔ̀: Baà tee kà Weèdi kpɛ̰́ńtìnùka biɔhànapá wɛì è toò: Yè békáà Èdíì-dà é cetá tóní? ¹² K'ó pà tɛ̰́ná è yɔ̀: Mɔ́masí-dà, Èdíì yònà é cetá tóní-ma-ní é tɛ̀ni dɔ̀hà niìi wɛǹni yè de yòm̀pu. Badà há̰ tee kà pá wa̰à̰ta Weèdi wɛmá pɔ̀kàta mɛhɛká è yɔ̀, Niìfòùo bíitá yònà é dii náńkú-dà sàma, pà mɛ̀ɛ pú kó tà kɛ̀da yècɛ̰́ɛ̰̀? ¹³ Àmá, n nɛ cakú è yɔ̀ Èdíì yɔ̀ɔ tóḿpu-dà-ní, kà p'óò pa̰á̰ pà kpɛ̀i-sá wɛǹni, k'yé n'yònà pà wà̰kaàma Weèdi pɔ̀kàta mɛhɛká o hḭ́ǹka.

Sèsíì bɔ̀haà wɛɛ̀kupá bíitá tàcɔ̰́tà kú mɛhɛká

¹⁴ Pà tóńti-ní tḭ́ń wɔ̀ni o dapàm̀ma tɔɔ̀pa pesá, é tɛ̀ni dɛ́há nìku dɔ́ɔ́di kà kù pà yéńtà, kà Weèdi kpɛ̰́ńtìnùka biɔhànapá pà nɔ̀hù-nà. ¹⁵ Ye nìpa dɛ́hà-ma Sèsíì, k'yé pà dii sàma, kà pá cemá cocí é taá o peèta-nà-pu, è k'óò dɔwa. ¹⁶ K'ó béka o dapàm̀ma è yɔ̀: Nɛ pà nɔ̀hù-nà m̀mɔ́ńya̰ kú hḭ́ńkà-dà?

¹⁷ K'òòcɔ̰́ǹ óò tɛ̰́ná-ní ye nìku mɛhɛká è yɔ̀: Dakpɛ̰́ǹn, m'a tɛɛ̀-ní n bíitá-dà, kà wɛɛ̀kupá péé ta mɛhɛká, è yení tà kó wɛɛ́-ma. ¹⁸ Kà pà baà yíì-di bɛ̀m̀bɛ̀ni, pà hɔ̰́ tà hɛ́í-ma teǹka, kà nuǹtá̰ḿpúùti té n'yɛɛ̀hu-ní ta nùdi mɛhɛká, kà tá n'kédì ta nìka, è té hḭn setedemu. Ká n cɔhà a dapàm̀ma è yɔ̀ pá pà bɔ̀hà, kà pá hɛ̰ka.

¹⁹ K'ó pà caka è yɔ̀: Dandankɔ́ɔ̀pà nɛ́na! Háá wɔ̀ni m̀mɔ́ni-dà n baà kó nɛ m'péé-nà-ma? Háá daadí m̀mɔ́ni-dà n kó m'pa̰kú-ma mùyɔ̰ nɛ hḭ́ǹka? N ya̰à̰-nà-ní ye bíítà miì!

²⁰ Kà pá tà n'ɔ̀ɔ̀ tɛɛ̀ní. Ye wɛɛ̀kupá dɛ́hà tḭ́ń wɔ̀ni Sèsíì, é cemá tà sà̰m̀pà kpeéma, kà tá dɔdi teǹka è bíípú kà nuǹtá̰ḿpúùti yɛɛ̀hu-ní ta nùdi mɛhɛká. ²¹ K'ó béka ta báàa è yɔ̀: Háá-nà daadí m̀mɔ́ni-dà yè tà hɔ̰n-má mɛma?

K'ò yɔ̀: Háá-nà ta bíkáḿbíikú. ²² Cɔ̀kumá dɔ́ɔ́di, pà hɔ̰́ tà hɛ́í-ma ha̰mú mɛhɛká yoo nɛ́ɛmá mɛhɛká, è kpɛ̀i é tà kɔ̀ù. Àmá, k'à kó nɛɛ́ é pa̰á̰ yècɛ̰́ɛ̰̀, k'á ti kɔń séèma, é ti tempanà.

²³ Kà Sèsíì óò tɛ̰́ná è yɔ̀: A yɔ̀ kà n kó nɛdá dó? Mɛ̀ǹǹ dań-ko, pà kó pa̰á̰-ma niìi wɛǹni o kpɛ́mú.

²⁴ Ye wɔ̀ni n'ɛ̀ɛ wɔ̀ni, k'yèe bíitá báàa é wɛɛ́ kpeéma è yɔ̀: N dań-ma. N tempanà, mìì tee-sá, n dandaní pú wɛhi.

²⁵ Sèsíì hɔ̰́tà-ma nìku dɔ́ɔ́di tíkánì-ní, k'ó wɛ́di-nà ye wɛɛ̀kupá è yɔ̀: Wɛɛ̀kupà nɛ́na mɛ̀m̀pà wònì-pa è dákánì nìi denfá, mmí-dà mà nɛ hḭ́n, yɛ̀ɛ̀-nà ye bíítà mɛhɛkà nɛ mɛ̀ɛ koò dá tóní daadí yènì! ²⁶ K'yèe wɛɛ̀kupá é tóó hodí, é sa̰mpà ye bíitá kpeéma é yɛ̀dì ta mɛhɛká. Tà de yònà tà kpíi-má-dà, kà nìpa dɔ́ɔ́di toò: Tà kpíi-í-ma. ²⁷ Àmá, kà Sèsíì é cɛ̰ɛ̰́ ta nɔ̀ku é tà yíkàna-ní, kà tá yídá é nɛɛ̀hi.

²⁸ Sèsíì kṵn tḭ́ń wɔ̀ni hɔ̰́ɔ̰̀ta, k'òo dapàm̀ma óò béka pa cɔ̰́ɔ̰̀di pesá è yɔ̀: Baà tee kà tḭ́ńti pú nɛɛ̀ é bɔhà ye wɛɛ̀kupà-ní?

²⁹ K'ó pà tɛ̰́ná è yɔ̀: Ye kú wɛɛ̀kupà bookù, nà weèdɔɔ̀pu^a cɔ̰́ɔ̰̀di-dà pà hɔ̰́ nɛɛ́ pà bɔ̀hà-nà-ma.

Sèsíì tṵ́mà cakú o kṵ́mú n'ɔ̀ɔ yá̰ńtáma wɛmá

³⁰ Ye kú dàhàka, kà pá yídá ye pesá é butá Kàdìdéè tempáàku mɛhɛká. Sèsíì de pú kpɛ̀i pá n'yá̰á̰ ò péé-kà bɛ́kà, ³¹ mìì tee-sá, ò de biɔhànì o dapàm̀ma-dà è pà cakú è tonà: Pà kó taàa-á-ma Niìfòùo bíitá nìpa nɔ̀hi mɛhɛká, kà pá tà kɔ̀ù, data̰à̰di daadí, kà tá yá̰ńtá-ní kpíípa mɛhɛká. ³² O dapàm̀ma há̰ de pú yeèkaà ye wɛmà kpɛ̀i é n'yɔ̀pu, pà mɛ̀ɛ de pú nɛɛ̀ é cḭḭ̀na kṵnnɔ̀ǹfa óò béka.

Wodà yòǹ sào ti cɔhɔ̀kà?

³³ Kà pá ta̰ntá Kàpɛ̀ɛ̀nàúm̀. Pà péé tḭ́ń wɔ̀ni hɔ̰́ɔ̰̀ta mɛhɛká, kà Sèsíì é béka o dapàm̀ma è yɔ̀: M̀mɔ́ńya̰-dà nɛ de nɔhù-ma-ní cɔ̀ku?

³⁴ Kà pá n'yòǹ cém̀, mìì tee-sá, pà de nɔhù-ú-ma-ní cɔ̀ku è kó yá̰dá pa mɛ̀ǹǹ yòǹ-ko sào. ³⁵ K'ó kaàdi é yíí ye o dapàm̀ma píì-pàdɛ́ɛ́ é pà caka è yɔ̀: Kà n'ɔɔ̀cɔ̰́ǹ kpɛ̀i é n'yòǹ sào, k'ó hḭn dèǹdèǹn tɔɔ̀pa wɛǹni mɛhɛká, é n'dehú pa kpɛ́mú.

³⁶ Ye kú dàhàka, k'ó tódá bíitá sḭ̀m̀mɔ́ǹta é tà nɛ̀hìna pa cɔhɔ̀ka, é tà hòpu-nà, é yɔ̀ɔ é pà caka è yɔ̀: ³⁷ Mɛ̀ǹǹ kó codá-ko bíítà mɛntà kú tɔɔ̀ta nà n yèdi, mmí mɔ́nń-dà ò codà-ma. Mɛ̀ǹǹ mɛ̀ɛ n codà-ko, ò pú codà mmí mɔ́-mɔ́nń, ò codà mɛ̀ǹǹ n tɔn-kó-dà-ní.

Mɛ̀ǹǹ pú yení-ko ti pa̰á̰ma, ò yòǹ ti kóoó-dà

³⁸ Kà Ìsá̰à̰ óò caka è yɔ̀: Dakpɛ̰́ǹn, ti dɛ́hà-á-ma nìdo òcɔ̰́ǹ, k'ò yún a yèdi è bɔ̀hu-nà wɛɛ̀kupá nìpa mɛhɛká, kà ti mɛ̀ɛ óò bɔ̀hà, mìì tee-sá, ò pú yòǹ ti kóoó.

³⁹ K'óò tɛ̰́ná è yɔ̀: Dá ò bɔ̀hà-nà, mìì tee-sá, ye yaǹn kɔ́ɔ́ è kó yíí n yèdi é pa̰á̰ pɔ́ńtápa̰á̰ma, é tṵ́má é fidí é wɛɛ́ kpákpààma n hḭ́ǹka. ⁴⁰ Mɛ̀ǹǹ pú ti sɛ̰ɛ̰́-ko, ò yòǹ ti kóoó-dà. ⁴¹ Wɛbemú-dà n nɛ cakú-ma: Mɛ̀ǹǹ kú wɛǹni kó nɛ pa̰a̰-kó nɛ́ɛmá kà nɛ́ yà̰à̰, è yɔ̀ nɛ yòm̀pu kpɛ́mú Kídísì kpɛ́ɛpá, ò pú kó mɔ́ńka o boutí.

Tɔɔ̀o yehènamá

⁴² Kà mɛ̀ǹǹ yehènà-ko bííhì mɛ̀ǹhì n dań-hì hi tàcɔ̰́ kà tà fénà ta dandaní, yè kó n'tɔ̰u-ṵ́-ma pá yíná ye yaǹn tá̰a̰sàku o fɔ̰̀ɔ̰kú, óò ká̰ńtá dàmɛ́dì mɛhɛká. ⁴³ K'àa nɔ̀ku-dà héè k'à pa̰kú sḭ̀ḭ̀ma, k'á kù fìta. Ye tɔ̰ṵ-ṵ́-ma á dúú fòùmu mɛ̀mù bá yɔ̀ɔ-pú mɛhɛká nà nɔ̀ku kùcɔ̰́, n'àa kó n'káá-ma hìdɛ́ɛ́ è há̰ dúú ha̰bíiní, ha̰mú mɛ̀mù pú kɔ̰́n-pú mɛhɛká. ⁴⁴ [Ye pesá, bɛùka mɛ̀ǹkà yon-ká wɔ̰̀ǹti pú hɔ̰́ kpíí, ha̰mú mɛ̀ɛ pú hɔ̰́ kpíí.] ⁴⁵ K'àa tàdi-dà héè k'à pa̰kú sḭ̀ḭ̀ma, k'á nì fìta. Yè tɔ̰ṵ-ṵ́-ma á dúú fòùmu mɛ̀mù bá yɔ̀ɔ-pú mɛhɛká nà tàdi nìcɔ̰́, n'àa kó n'káá-ma kàdɛ́ɛ́ è há̰ dúú ha̰bíiní mɛhɛká. ⁴⁶ [Ye pesá, bɛùka mɛ̀ǹkà yon-ká wɔ̰̀ǹti pú hɔ̰́ kpíí, ha̰mú mɛ̀ɛ pú hɔ̰́ kpíí.] ⁴⁷ K'àa nɔ̀ǹfa-dà héè k'à pa̰kú sḭ̀ḭ̀ma, k'á fà kokadá. Yè tɔ̰ṵ-ṵ́-ma á dúú Weèdi wóòti mɛhɛká nà nɔ̀ǹfa fàcɔ̰́, n'àa kó n'káá-ma cìdɛ́ɛ́ è há̰ dúú ha̰bíiní mɛhɛká. ⁴⁸ Ye pesá, bɛùka mɛ̀ǹkà yon-ká wɔ̰̀ǹti pú hɔ̰́ kpíí, ha̰mú mɛ̀ɛ pú hɔ̰́ kpíí. ⁴⁹ Bá mɛ̀ǹǹ dɛ̀ɛ̀-ko kó yɛ̀ɛ̀ náńkú ha̰mú mɛhɛká-dà, k'yé teha k'òo fòùmu é dɛ́tá kɔ́kɔ́mú, é weka póí.

⁵⁰ Kɔ́kɔ́mú yòǹ niìi suu-sá-dà. Àmá, kà mù fénà mu naakú, pà kó tṵ́má mù nakàna nà ba? Nɛ fòùmu ní n'nadi é n'yònà kɔ́kɔ́mú, k'yé teha kà nɛ́ n'naa-nà nɛ tɔɔ̀pa.