Mádíkì 13

Sèsíì cakú Weèdi hɔ̰́ɔ̰̀ta pɔ́dáma wɛmá

¹ Sèsíì yɛ̀tì tḭ́ń wɔ̀ni Weèdi hɔ̰́ɔ̰̀ta mɛhɛká, k'òo dapàǹn òcɔ̰́ óò caka è yɔ̀: Dakpɛ̰́ǹn, wáńtá pà maá-nà-ka tá̰à̰ka Weèdi hɔ̰́ɔ̰̀ta suukú sá̰pu. Cɔ́dí pà tà madí kà ta wɛhimú sá̰pu. ² Kà Sèsíì óò tɛ̰́ná è yɔ̀: A dìi ta maáma wɛhimú sá̰pu-iì? Ta tá̰à̰di nìcɔ̰́nì pú kó sɔ̰́ńtá é n'cɔ̰mú ni tɔɔ̀di hḭ́ǹka. Ye wɛnnì kó wáńtá é wuùdi-í-ma-ní teǹka.

Mìì kó tɛ̀ni-sá-ní teǹka hḭ́ǹka nà Sèsíì dapàm̀ma hḭ́ǹka

³ Ye kú dàhàka, kà Sèsíì é taá é kaàdi òdífùna ta̰à̰di hḭ́ǹka, è coó-nà ye Weèdi hɔ̰́ɔ̰̀ta. Kà Píyɛ́ɛ̀, nà Sàákì, nà Ìsá̰à̰ nà À̰ǹtìdéè óò béka pa cɔ̰́ɔ̰̀di pesá è yɔ̀: ⁴ Ti caka ye kú niì wɛnnì kó pa̰á̰ tḭ́ń daadí, nà yḭdó mɛ̀ǹǹ kó ti bɛka-kó wɔ̀ni yè kó tɛ̀ni-dí-ní. ⁵ Kà Sèsíì é pà caka ye wɔ̀ni è yɔ̀: Pa̰á̰-nà yɔkàma, nɛ dá teha kà nìi é nɛ yehèna. ⁶ Nìpa dɔ́ɔ́di pení-ma-ní nà n yèdi, è kó tɛ̀ni é m'báńtí è tonà: Mɛmpá-dà héé Weèdi ta̰kadáko, è mɛ̀ɛ é yehèna nìpa sàma. ⁷ Nɛ kó n'you tḭ́ń daadí kà nìpa tɔ̰ṵ ta̰à̰na yoo kà pà toò ta̰à̰na kó pa̰ná, wantafɔ̰̀di dá nɛ cɛ̰ɛ̰́. Yè békú ye kú niyà̰ é tɛ̀ni-í-ma-ní, há̰kà yè mum pú kó n'yòǹ fòùku yɔ̀ɔmá. ⁸ Bookú kó yíí-ma é dɔdi ku tɔkú ta̰à̰pu, kà wóoteǹka é yíí dɔdi ka tɔɔ̀ka ta̰à̰pu. Teǹka sa̰mpàma-dà kó pa̰á̰ páàti tìcɔ̰́ kú mɛhɛká, kà kòka é dúní. Yè kó n'yònà poòo hɔ̰́ n'kó pɛdá kà dɔnkú mɛ̀ǹkù óò cetá-ku-dà. ⁹ Nɛ́na mɛ̀ɛkà, nɛ́ n'yá̰á̰ nɛ cɔ̰́ɔ̰̀di kpɛ́mú. Pà kó wáńtá nɛ fuupa-á-ma sídàma nàmɔ̀ka mɛhɛká, é nɛ podí Weèdi wɛmá biɔhà-nàmɔ̀ka mɛhɛká. Pà kó nɛ tanà-á-ma yɔtí kpɛ̰́m̀ma yìhìka, nà wóópa yìhìka nà mmí kú kpɛ́mú, kà nɛ́ pà caka n wɛmá. ¹⁰ Yè békú pá dɛnà é caka boocí wɛǹni-dà Weèdi wɛnaamá. ¹¹ Pà kó nɛ cɛ̰ɛ̰́ tḭ́ń wɔ̀ni é nɛ n'kɔ́dí-nà sídàma nàmɔ̀ka mɛhɛká, nɛ yàma dá n'kantì nà nɛ kó taá wɛdá-sa. Nɛ́ tɛ̀i é wɛdá wɛmá Weèdi kó nɛ kɔ̰́ɔ̰́-ma ye kú wɔ̀ni, mìì tee-sá mà pú kó m'péé-nà-ní nɛ pesá, àmá Seèsuudi pesá-dà. ¹² Nìpa kó wáńtá yɛɛ-ɛ́-ma pa kúcàpa kà pá pà kɔ̀ù, kà báàpa mɛ̀ɛ té mà hḭn pa bííhí, é yídá kà bííhí sḭḭkà hi báàpa hḭ́ǹka é héé kà pá pà kɔ̀ù. ¹³ Nìpa wɛǹni kó nɛ n'sɛ̰ɛ̰́-ma nà mmí kú kpɛ́mú. Mɛ̀ǹǹ há̰ kó pa̰á̰-ko wɛ̰́ɛ̰́ma háá é deèta, mɛnń-dà kó dɛ́tá fḭ́táma.

Sɔ̀kací pa̰á̰ma mɛ̀mà kó tɛ̀ni-má-ní

¹⁴ Nɛ kó dɛ́há tḭ́ń daadí sɔ̀kací mɛ̀ǹcì kó tɛɛ̀-ci-ní fɛ̰́ṵ́dáma kà cì péé cì de pú yònà é m'péé-sa, (mɛ̀ǹǹ kàǹ-ko ye kú niyà̰ yònà é yekà-á-ma sukú yè ò cakú-sa). Mɛ̀m̀pà kó m'péé-pa Sùdéè teǹka mɛhɛká yònà é cocí-ma é dìsi ta̰à̰ka hḭ́ǹka. ¹⁵ K'yè hɔ̰́tà mɛ̀ǹǹ péé-ko o nàmɔ̀ni mùmùǹti hḭ́ǹka, ò koò dá cútá ni mɛhɛká è kpɛ̀i é tódá yècḭ́ḭ̀ é nɛɛ́ cocí. ¹⁶ K'yè mɛ̀ɛ hɔ̰́tà mɛ̀ǹǹ péé-ko yɛ̀di mɛhɛká, ò koò dá kòǹ hɔ̰́ɔ̰̀ta é tódá o tókesàdi. ¹⁷ Yè kó n'yòǹ náńkú sàku-dà poòpa mɛ̀m̀pà kó m'póń-pa ye kú daàka mɛhɛká, nà mɛ̀m̀pà kó n'yɔ̰ɔ̰̀di-pá. ¹⁸ Nɛ́ cɔhà Weèdi k'yèe kú niyà̰ dá yetá é tɛ̀ni yɔ̰ɔ̰dí mɛhɛká, ¹⁹ mìì tee-sá, ye daakà kó n'yòǹ wèéwèdo daàka-dà dɛ́dɛ́í. Ye kú wèéwèdo pú kó n'sá̰à̰-nà tɔɔ̀o òcɔ̰́ǹ, é tódá nà fòùku cetáma kà Weèdi é pa̰á̰ niìya̰ wɛǹni háá nà yenì, o tɔɔ̀o mɛ̀ɛ koò pú kaá è pení. ²⁰ Kà Bateó múńtà de pú yakàdà ye daàkà, òcɔ̰́ǹ de pú kó fḭ́tá. Àmá, ò kà yàkàdà, nìpa ò ta̰kadà-pa kpɛ́mú-dà kà pà yòǹ o kpɛ́ɛpá. ²¹ Kà nìi nɛ cakáà ye wɔ̀ni è hḭ́n: Kídísì péé miì yoo ò péé mɛnkà, nɛ dá taàa dandaní ò hḭ́mpú, ²² mìì tee-sá, niìkpákpààpa kó wáńtá tɛ̀ni-í-ma-ní é báńta nìpa è yɔ̀ pà yòǹ Weèdi ta̰kadápa, kà tɔɔ̀pa yɔ̀ pà yòǹ Weèdi wɛtɛ̰́nápa-dà. Pà kó pa̰á̰-ma pɔ́ńtáyḭḭ́pa, nà pɔ́ńtápa̰á̰ma è kpɛ̀i k'yè kó teha, kà pá yehèna Weèdi ta̰kadà-pa. ²³ Nɛ́na mɛ̀ɛkà, nɛ́ n'casí nɛ cɔ̰́ɔ̰̀di hḭ́ǹka. N nɛ cakáà-á-dà ye wɛǹni k'yè mum pú tɛ̀ni.

Niìfòùo bíitá tóḿma-ní

²⁴ Àmá ye daàka mɛhɛká, k'yèe wèéwèdo ka̰hà, wèǹku kó biìkà-á-ma, cḭ̀ma mɛ̀ɛ koò pú kó kɔ̰́ɔ̰́ ma wenkú. ²⁵ Hà̰hi kó n'dɔɔ̀-ɔ́-ma-ní nà hḭ́ǹka, kà nɔɔ̀ti^a mɛ̀ǹtì púsí-ti mìì péé-sa wɛǹni hḭ́ǹka é sa̰mpà. ²⁶ Ye wɔ̀ni-dà pà kó dɛ́há-ma Niìfòùo bíitá kà tá foó-ní wɔɔ̀ka mɛhɛká, nà nɔɔ̀ti sàti, nà wɛhimú. ²⁷ Ye daadí, tà kó tɔn-ń-ma Weèdi tɔntɔndipá teǹka nà ka nùdi, kà pá tíkáná Weèdi ta̰kadà-pa bá kà pà péé-sa.

Biɔhànamá ka̰nka̰mú ti kɔ̰́nì-ma

²⁸ Nɛ́ cɔ́dí é yekà sukú biɔhànamá ka̰nka̰mú tepú kɔ̰́nì-ma. Kà mu dɛ̀ɛcí yɔ̀a pḭǹtapú, kà fa̰à̰ti pɔ̰ntà, nɛ yá̰á̰-ma ye wɔ̀ni è yɔ̀ bíhidí-dà tɔ́sí. ²⁹ Ma cɔ̰́ɔ̰̀di-dà mɛ̀ɛtékà, kà nɛ dɛ́hà tḭ́ń daadí k'yèe kú niyà̰ tɛ̀ni, kà nɛ́ n'yá̰á̰ è yɔ̀ Niìfòùo bíitá tɛ̀mmá tɔ́sí-ma kà tà dòsi há̰ńnùdi. ³⁰ Mɔ́masí-dà n nɛ cakú-ma, wɔ̀ǹkù mɛnkù kú nìpa pú kó kpíí pa wɛǹni, k'yèe kú niì wɛǹni mum pú tɛ̀ni. ³¹ Hḭ́ǹka nà teǹka kó yɔ̀ɔ-ɔ́-ma, àmá n wɛmá pú kó yɔ̀ɔ daadí yènì.

Weèdi cɔ̰́ɔ̰̀di-dà yá̰á̰ Teó kó tóní tḭ́ń daadí

³² Mɛ̀ɛkà, mìì héé-sa daadí nà wɔ̀ni tà kó tɛ̀ni-dí-ní, òcɔ̰́ǹ p'éè yá̰á̰. Bá Weèdi tɔntɔndipá mɛ̀m̀pà péé-pa hḭ́ǹka nà ni Bíitá mɔ́ntá p'éè yá̰á̰, Báàa cɔ̰́ɔ̰̀di bààsí. ³³ Pa̰á̰-nà yɔkàma! Nɛ́ n'you nɛ dá n'dɔɔ́, mìì tee-sá nɛ pú yá̰á̰ ye wɔ̀ni pení tḭ́ń daadí. ³⁴ Yè kó n'yònà dɔɔ̀o òcɔ̰́ǹ kɔ́dí-ma-dà cà̰ǹku, é kɔ̰́ɔ̰́ o dehàpa kpɛ̰́ǹti o hɔ̰́ɔ̰̀ta hḭ́ǹka, bá mɛ̀ǹǹ dɛ̀ɛ̀-ko n'ɔ̀ɔ tɔmú. K'ó yíí caka mɛ̀ǹǹ ceí-ko o hɔ̰́ɔ̰̀ta há̰ńnùdi è yɔ̀ ó n'you ò dá dɔɔ́. ³⁵ Ye kpɛ́mú, nɛ́ n'you nɛ dá n'dɔɔ́, mìì tee-sá nɛ pú yá̰á̰ hɔ̰́ɔ̰̀ta yaǹn kó koní tḭ́ń wɔ̀ni. K'yè púdí yè kó n'yòǹ yohokú-dà yoo yèǹkàcɔ̀hɔ̀ka, yoo kóokɔncí yoo ká̰ńyɛ̰̀ǹfa. ³⁶ Nɛ́ dá teha k'ó koní é tɛ̀ni é nɛ sɛ́ńtá kà nɛ dɔɔ́. ³⁷ N nɛ cakú-sà-ní, n yè cakú nìpa wɛǹni-dà: Nɛ́ n'you nɛ dá n'dɔɔ́.