Mádíkì 12

Wɛbemú yohènamá nà tɔntɔnsḭ̀ma

¹ Ye kú dàhàka, kà Sèsíì é cetá è pà cakú wɛbemú yohènamá. K'ò yɔ̀: Nìi òcɔ̰́ǹ-dà híúwà o yɛ̀di pɛ́ɛ̀sɔ̰ná, é maá maafá é nì yéńtá, é tɔ̰̀ṵ̀ fɔ̰̀ɔ̰̀ku ò kó n'nípù-ku kú mɛhɛká o tebíiká, é yíí maá yɛ̀di ceípa cɔ̰̀ǹcɔ̰̀ni dɛudí. Ò yɔ̀ɔ-má miya̰, é pɛha tɔntɔm̀ma é nì pà ceá è yɔ̀ kà tebíiká biù nà mɛmpá kà pá n'tookú, ye wɔ̀ni é ka̰há cà̰ǹku. ² Pɛ́ɛ̀sɔ̰ná bii tḭ́ń daadí, k'ó tɔn o dapàǹn òcɔ̰́ ye yɛ̀di tɔntɔm̀ma pesá, è yɔ̀ p'óò kɔ̰́ɔ̰́-ní o kú tebíiká. ³ K'yèe dapàǹn é tɛ̀i, kà p'óò cɛ̰ɛ̰́ óò podí, óò bɔ̀hà-ní o nɔɔ̀kpehí. ⁴ K'yèe yɛ̀di yaǹn é tṵ́má tɔn pa pesá o dapàǹn tɔɔ̀o. K'ó tɛ̀i kà pá bɔ́di o yuudí, óò tèù-nà. ⁵ K'ó tṵ́má tɔn o dapàǹn ta̰á̰ko, k'ó tɛ̀i kà p'óò kɔ̀ù. Ye kú dàhàka, kà pá mà hḭn o dapàm̀ma tɔɔ̀pa dɔ́ɔ́di ò de tɔn-pá, é podí pàcɔ̰́, é kɔ̀ù tɔɔ̀pa. ⁶ Ye yɛ̀di yaǹn bíitá cɔ̰́ɔ̰̀di-dà de ò sɔ̰́ńtà-nà, k'ò tà dɔ́sí sukú. K'ó tà tɔn dèǹdèma pa pesá è màhu è tonà: Pà kó wampa-á-ma n bíitá. ⁷ K'yèe yɛ̀di tɔntɔm̀ma mɛ̀ɛ caka pa tɔɔ̀pa è yɔ̀: Ǹtɛ-nà mɛ̀ǹǹ kó wáńtá kpàa-kó ye yɛ̀di. Héé-nà kà t'óò kɔ̀ù, k'yé teha kà ní hḭn ti kpɛ́ɛdí. ⁸ Kà pá cɛ̰ɛ̰́ ye bíitá é tà kɔ̀ù, é tà tódá é tà wɛ́í ye yɛ̀di bɛ́ɛ́kú. ⁹ K'ó pà béka ye wɔ̀ni è yɔ̀: Toò, ntɛ́ yɛ̀di yaǹn kó hḭmà ye wɔ̀ni? Ò kó tɛ̀ni-í-ma-ní, é héé kà pá kɔ̀ù ye tɔntɔm̀ma, ye wɔ̀ni k'ó pɛha tɔɔ̀pa é nì pà ceá. ¹⁰ Nɛ pú kaàn Weèdi wɛmá mɛhɛká kà pà yɔ̀:

Tá̰à̰di maápa de wɛ́i-dí,

mɛní-dà tón é hḭn tá̰à̰di mɛ̀nì púsí-di nàmɔ̀ni kpɛ̰kpɛ̰kamá sukú.

¹¹ Bateó-dà pa̰nà ye kú pa̰á̰mà,

kà mà yòǹ pa̰á̰sàma ti yìhìka.

¹² K'yèe Sùwífùpa kpɛ̰́m̀ma é pɛha pà kó hḭmá óò cɛ̰dí, è há̰ wani nìku. Pà de bantà-á-ma è yɔ̀ Sèsíì de a̰nì mɛmpá-dà n'ɛ̀ɛ wɛbemù yohènamà. Kà pá yídá é ka̰há óò hédá.

Dàm̀póò bodáma Hɔ̀dɔ́m̀ wódo Sèsáà

¹³ Kà pá tɔn-ní Sèsíì pesá Fàdísìpa pàcɔ̰́, nà Èdótì kpɛ́ɛpá è yɔ̀ pá tɛ̀ni óò díhìna wɛmá kó yetá. ¹⁴ Kà pá tɛ̀ni óò caka è yɔ̀: Dakpɛ̰́ǹn, ti yá̰á̰-ma è yɔ̀ a cakú mɔ́ma-dà. A mɛ̀ɛ pú wani òcɔ̰́ǹ bá k'ò dɔ́sí k'ó n'yòm̀pu. Àmá, a biɔhɔnì nìdo yònà é n'fòùkaàma-dà Weèdi cɔ̀ku mɛhɛká. Há̰kà, ti kpɛ̰́ńtìnùka ti pɛ̰ḭ-ḭ́-dà nùdi è yɔ̀ tí m'bopù dàm̀póò Hɔ̀dɔ́m̀ wódo? Tí m'bopù nkɛ́ɛ̀-ɛ̀ ti dá m'bopù? ¹⁵ Sèsíì há̰ de yá̰á̰-ma è yɔ̀ pà yòǹ yam̀pèǹtací-dà, k'ó pà tɛ̰́ná è yɔ̀: Badà tee kà nɛ n bɛǹ? N ya̰à̰-nà-ní díimáàdi nìcɔ̰́ ká n nì dɛ́há. ¹⁶ Kà p'óò tɛɛ̀ní nìcɔ̰́, k'ó pà béka è yɔ̀: Woò tee dìkù mɛ̀ǹkù dàdi-kù, nà wà̰a̰cì mɛ̀ǹcì péé-cì ni hḭ́ńkà? Kà p'óò tɛ̰́ná è yɔ̀: Hɔ̀dɔ́m̀ wódo-dà. ¹⁷ Ye wɔ̀ni k'ó pà caka è yɔ̀: Kɔ̰́ɔ̰́-nà Hɔ̀dɔ́m̀ wódo mìì yòǹ-sa o kpɛ́ɛsá, é kɔ̰́ɔ̰́ Weèdi mìì mɛ̀ɛ té yòǹ-sa ni kpɛ́ɛsá. K'yé pà dii dɛ́dɛ́í n'ɔ̀ɔ̀ de pà tɛ̰́ńkáàma.

Békàma kpíípa yá̰ńtáma hḭ́ǹka

¹⁸ Kà Sàdúkìpa, nìpa mɛ̀m̀pà pú dań-pa è yɔ̀ kpíípa kó wáńtá yá̰ńtá, kà pa pàcɔ̰́ é tɛ̀ni Sèsíì pesá, óò béka è yɔ̀: ¹⁹ Dakpɛ̰́ǹn, ǹtɛ kpɛ̰́ǹti nùdi Mɔ̀yísì ti kɔ̰́ɔ̰̀-di, ò yɔ̀: Kà nìdo pú káá-nà o poòo bída è kpíi, o ya̰ǹn-dà yònà é hɔɔ̀ta o poòo, óò pɛɛ́-nà bííhí k'yé teha k'òo fùdi dá fédí. ²⁰ Ǹtɛ há̰kà kà nìi pàyehì de péé, è yòǹ kúcàpa. Kà Pɔ̀ɔ é kádá poòo é kpíí è pú pɛdà bída. ²¹ Kà Sàbí é hɔɔ̀ta o poòo, è mɛ̀ɛ té kpíí è p'óò pɛɛ̀-nà bída. K'yèe kú niìya̰ é pa̰ná nà ta̰á̰ko. ²² K'yé sɔ̰katá mɛma kà pá kpíí pa yehìka p'oòcɔ̰́ǹ p'óò pɛɛ̀-nà bída. Pà kpíi-má pa wɛǹni mɛma, k'yèe poòo mɛ̀ɛ té tṵṵ̀na é kpíí. ²³ Kpíípa kó yá̰ńtá tḭ́ń daadí, pa yehìkà mɛhɛkà, ò kó n'yòǹ pa wodà kú pooò-dà, è yá̰á̰ pa wɛǹni de ò kádà-á-dà-ma? ²⁴ Kà Sèsíì é pà tɛ̰́ná è yɔ̀: Ǹtɛ-nà mìì tee-sá kà nɛ péé yetáma mɛhɛká: Nɛ pú yá̰á̰ Weèdi wɛmá, nɛ mɛ̀ɛ pú tṵ́mà yá̰á̰ Weèdi kpeèti sá̰pu. ²⁵ Kpíípa kó yá̰ńtá tḭ́ń daadí, daapá koò pú kó kádá poòpa, poòpa mɛ̀ɛ koò pú kó yan daapá, àmá pà kó n'yònà Weèdi tɔntɔndipá yòm̀pu-dà hḭ́ǹka mɛhɛká. ²⁶ Mìì héé-sa kpíípa yá̰ńtáma wɛmá, nɛ pú kaàn Mɔ̀yísì pɔ̀kàta mɛhɛká, Weèdi de ò hḭ́mpú túku mɛ̀ǹkù de cɔ́hú-ku ha̰mú è há̰ pú yon ku pesá-a? Weèdi de yɔ̀: N yòǹ Àbààhám̀, nà Ìsáákì, nà Sàkɔ́pù Weèdi-dà^a. ²⁷ Weèdi pú yòǹ kpíípa Weèdi, nì yòǹ mɛ̀m̀pà fòù-pa Weèdi-dà. Nɛ yetáma péé-sa-dà dɛ́dɛ́í.

Kpɛ̰́ǹti nùdi mɛ̀nì ha̰tà-di tɔɔ̀ka

²⁸ Ye de hɔ̰́tà kpɛ̰́ńtìnùka biɔhànakó òcɔ̰́ǹ-dà yè péé, é yekà nɔ̀nɔ̀hicí pà de toó-cí, nà Sèsíì de tɛ̰́ńkáàma kú bookú Sàdúkìpa k'yè coó. K'óò pàdi-ho, óò béka è yɔ̀: Kpɛ̰́ǹti nùka wɛǹni mɛhɛká, m̀mɔ́ni-dà héé yudí? ²⁹ Kà Sèsíì óò tɛ̰́ná è yɔ̀: Ǹtɛ mɛ̀nì yòǹ-di yudí: Ìsìdàyɛ́dìpa-nà, besí-nà é yekà sukú! Weèdi ti Bateó yòǹ Bateó òcɔ̰́-dà pɔ́pɔ́ú. ³⁰ A yònà é n'dɔ́sí Weèdi a Bateó n'àa yàma wɛǹni-dà, n'àa sèdi wɛǹni, n'àa yam̀màhàdi wɛǹni, n'àa kpeèti wɛǹni. ³¹ Ǹtɛ kpɛ̰́ǹti nùdi tɔɔ̀di mɛ̀nì nì tṵ̀n-dí-ní: Á n'dɔ́sí a tɔɔ̀o é n'yònà a mɔ́nń. Kpɛ̰́ǹti nùdi nìcɔ̰́nì koò pú péé è há̰tà mɛnkà ka dɛ́ɛ̀kà. ³² K'yèe kpɛ̰́ńtìnùka biɔhànakó óò caka è yɔ̀: Yè sudi dakpɛ̰́ǹn! A cakáà mɔ́ma-dà è yɔ̀ Weèdi yòǹ nìcɔ̰́-dà, mɛni bààsí tɔɔ̀di koò kɔ́. ³³ Kà nìi nì dɔ́sí n'ɔ̀ɔ yàma wɛǹni, n'ɔ̀ɔ yam̀màhàdi wɛǹni, n'ɔ̀ɔ kpeèti wɛǹni, è tṵ́mà dɔ́sí o tɔɔ̀o è yònà o mɔ́nń, yè ha̰tà-á-ma nɔpeédɔ̀hɔ̀di a kó pa̰á̰-di Weèdi kpɛ́mú, nà dɔ̀hɔ̀ka tɔɔ̀ka wɛǹni. ³⁴ Sèsíì hɔ̰́tà-ma ò màhaà dɛ́dɛ́í é nɛɛ́ tɛ̰́ná, k'óò caka è yɔ̀: A pú dɛu-nà aa dúú-ma Weèdi wóòti mɛhɛká. Ye kú dàhàka, òcɔ̰́ǹ de koò pú teháà é pádá kṵnnɔ̀ǹfa óò béka màcɔ̰́mà.

Dàfítì nà Kídísì pà yòm̀pu

³⁵ Kà Sèsíì é tóó wɛmá è pà biɔhànì Weèdi hɔ̰́ɔ̰̀ta mɛhɛká, ye wɔ̀ni é pà béka è yɔ̀: Ntɛ́ kpɛ̰́ńtìnùka biɔhànapá kó hḭmà é n'yɔ̀ Kídísì, Weèdi ta̰kadáko^b yòǹ Dàfítì yaàbíidí-dà sá̰à̰di? ³⁶ Seèwendí de sṵ́nà-ma Dàfítì, k'òo mɔ́nń-dà é wɛdá è yɔ̀: Bateó Weèdi cakáà n Teó è yɔ̀: Ya̰ní é kaàdi n hiòma, háá é n'sànà n kó héé-ma k'á cèn a kà̰à̰tɔɔ̀pa hḭ́ǹka. ³⁷ Dàfítì mɔ́nń-dà de ò yíí è yɔ̀ o Teó. Ntɛ́ yè kó hḭmà, k'ó tṵ́má é n'yòǹ-nà Dàfítì yaàbíidí? Nìku dɔ́ɔ́di-dà de ò besí k'yè kù nadi sàma.

Sèsíì cakú nìpa è yɔ̀ pá pa̰á̰ yɔkàma nà kpɛ̰́ńtìnùka biɔhànapá.

³⁸ Ò de pà cakú o biɔhànamá mɛhɛká è tonà: Nɛ́ pa̰á̰ yɔkàma nà kpɛ̰́ńtìnùka biɔhànapá. Pà naanà é báá tókedɛutí-dà é n'centì peètamá bɛ̀m̀bɛ̀ka mɛhɛká, kà pà pà cùnì, è pà dɔnti. ³⁹ Pà naanà kaàceceká-dà Weèdi wɛmá biɔhà-nàmɔ̀ka mɛhɛká, nà dikàdikú pesá. ⁴⁰ Mɛmpá-dà fèùdì kpíipoòti káá-sa wɛǹni, àá té tódá wɔ̀ni sàma é n'dɔń Weèdi è kpɛ̀i pá pà yíí niìcoópa. Pa kú toòka yɔ̰́ḿma kó wáńtá ha̰tá-ma tɔɔ̀pa kpɛ́ɛmá.

Kpíipoòku kùcɔ̰́kù pa̰a̰dí

⁴¹ Kà Sèsíì é taá kaàdi è coó-nà pà de tanì-sa dící Weèdi hɔ̰́ɔ̰̀ta mɛhɛká, è cɔ́ti nìpa de cì tàǹkumá kú bookú. Kà kápa dɔ́ɔ́di tanì dící sàma. ⁴² Kà kpíipoòku kùcɔ̰́kù, kà kù yòǹ pɛ́íta, é tɛ̀ni é taàa díimáámú mùdɛ́ɛ́ kà mù pú tɛ̀i yècḭ́ḭ̀. ⁴³ Kà Sèsíì é yíí o dapàm̀ma é pà caka è yɔ̀: Mɔ́ma-dà n nɛ cakú-ma. Kpíipookù pɛ́íkù, mɛnku tàà-fà dífà, fà ha̰tà-á-ma tɔɔ̀pa wɛǹni kpɛ́cí, ⁴⁴ mìì tee-sá mɛmpa pa wɛnnì, pà tàà dící pà de pú kɛɛ̀hi-cí-dà pa díisàci hḭ́ǹka. Àmá mɛnku, nà kù baà yòǹ-sà pɛ́íta, kù tàà kù de káá-fa wɛǹni-dà è kó n'fòù-nà.