Dúkì 1

Sèsíì wɛnaamá Dúkì wà̰haà-ma

Mìì tee-sá Dúkì pɔ̀kàta wa̰hàma

¹ Dapàǹkpɛ̰́ǹn Tèòfídì, nìpa dɔ́ɔ́di wɛ̰́ɛ̰́-ma é wa̰hà niìi mìì pa̰à̰-sa wɛǹni ti cɔhɔ̀kà. ² Pà cakáà-á-ma pópóí é n'yònà mɛ̀m̀pà de yè dɛ́hà-pa nà pa nɔ̀ǹci nà cetáma kà pá pà towá è yɔ̀ pá caka Weèdi wɛmá de ti cakáà-sa. ³ Mɛmá-dà tee, ká n mɛ̀ɛ té béka dɛ́dɛ́í mìì pa̰à̰-sa wɛǹni nà cetáma-ní, è kpɛ̀i áa wa̰hà ye wɛmà cóńcodí, nà mà tṵ̀n-tṵ̀ǹkaàma ma tɔɔ̀ma, ⁴ k'yé teha k'á dɔ̀hà é yá̰dá è yɔ̀ p'àà biɔhànà-sa yòǹ bemú-dà.

Weèdi tɔntɔndikó cakú Ìsá̰-Bàtísì pɛdáma

⁵ Hèdótì de yòǹ tḭ́ń wɔ̀ni wódo Sùdéè teǹka, kà dɔ̀hɔ̀ka yaǹn òcɔ̰́ǹ-dà péé dɔ̀hɔ̀ka yam̀ma hòǹhòni pà toò-di Àbìyáà mɛhɛká, k'òo yèdi toò Sàkàdíì. O poòo de yòǹ Ànɔ́ɔ̀ yaàbíidí-dà, kà p'òò toò Èdìsàbɛ́tì. ⁶ Pà de coó-ma pa dɛ́ɛ̀di Weèdi yìhìka, è tṵ̀n Weèdi kpɛ̰́ńtìnùka wɛǹni nà ni hɔ̰́ɔ̰wencí kpɛ́ɛká yè békáàma sukú. ⁷ P'àá de kɔ́ɔ́ bída, mìì tee-sá, Èdìsàbɛ́tì de yòǹ poyɛ̰tadá-dà, kà pà tṵ́mà kpɛ̰́ń pa dɛ́ɛ̀di sàma.

⁸ Daadí yènì, kà Sàkàdíì é m'pa̰kú o dɔ̀hɔ̀di tɔná Weèdi hɔ̰́ɔ̰̀ta mɛhɛká, è yá̰á̰, o kú hòǹhòni wɔ̀ni-dà de tɛ̀i. ⁹ K'yé n'yònà dɔ̀hɔ̀ka yam̀ma pa̰á̰ma, kà pá ta̰á̰ tɛ́tɛ́ é baàta Sàkàdíì è yɔ̀ ó dúú Bateó nàmɔ̀ni bɛ̀m̀bɛ̀ǹwentí mɛhɛká é tɛ̀i é pa̰ná tùdàdépa wunáma dɔ̀hɔ̀di. ¹⁰ K'yèe wunáma wɔ̀ni é tɛ̀i, k'ó dúú é tɛ̀i é m'pa̰kú ye dɔ̀hɔ̀di, kà Weèdi dɔɔ̀pa tɔɔ̀pa dɔ́ɔ́di péé tapaàdi è dɔń Weèdi. ¹¹ Ye wɔ̀ni, kà Weèdi tɔntɔndikó óò fodá-ní è nɛ̀hi cɔ̰̀ǹcɔ̰̀ni pà wunì-di kú hḭ́ǹka tùdàdépa, ni nɔ̀ǹkàheùma. ¹² Sàkàdíì ò dɛ́hà-ma, k'òo bɔ̀ti yɔ̀ fàù, kà wantafɔ̰̀di óò cɛ̰ɛ̰́. ¹³ Àmá, kà Weèdi tɔntɔndikó óò caka è yɔ̀: Wantafɔ̰̀di d'áa cɛ̰ɛ̰́ Sàkàdíì, mìì tee-sá, Weèdi yeèkaà-á-ma a cɔhàma. A poòo Èdìsàbɛ́tì kó póń-ma áa pɛdá bíidatá k'á tà pa̰a̰ yèdi è yɔ̀ Ìsá̰à̰. ¹⁴ Yè kó n'àà n'yòǹ wɛ̀ɛ̀di-dà nà yaǹnasàku, kà nìku dɔ́ɔ́di é haá nà ta pɛdáma kpɛ́mú, ¹⁵ mìì tee-sá, tà kó n'yòǹ niìsào-dà Bateó yìhìka. Tà pú kó n'yɔ̰ǹ dìfɛ̰́ɛ̰̀ yoo naàbeèma wɛǹni. Weèdi Sèdi-dà kó tà n'sṵ́nà nà ta yṵṵ̀ pɛutí mɛhɛká. ¹⁶ Tà kó tɛ̰́ná-ní Ìsìdàyɛ́dì bííhí dɔ́ɔ́di yàma, Bateó hi Weèdi bɛ́ka-dà. ¹⁷ Tà kó n'nihí-ní Weèdi yìhìka é n'yòǹ Weèdi wɛcako-dà, kà Sèdi mɛ̀nì de kɔ̰́nì-di kpeèti Weèdi wɛtɛ̰́náko Èdíì é tà m'péé-nà, k'yé teha kà tá múná báàpa nà pa bííhí yàma, kà topúyoupá é dɛ́tá niìcoópa yaǹfòùma. Mɛmá-dà tà kó dɔ̀hà-ma nìku yàma kà kú cehèna pa̰á̰ma é codá Bateó Weèdi.

¹⁸ Kà Sàkàdíì óò béka è yɔ̀: Ntɛ́ n kó hḭmà é bantá è yɔ̀ a wɛɛ̀ bemú-dà? N yòǹ dakpɛ̰́ǹta-dà kà n poòo mɛ̀ɛ té kpɛ̰́ń.

¹⁹ Kà Weèdi tɔntɔndikó óò tɛ̰́ná è yɔ̀: Mmí, n yòǹ Kàbìyɛ́dì-dà. N péé-ní Weèdi pesá-dà è nì dehú. Mɛní-dà n tɔn-ní è yɔ̀ n tɛ̀n'áa caka ye kú wɛnaamà mɛmà. ²⁰ Àmá, a pú mà teháà. K'yèe wɔ̀ni Weèdi kpɛ̀i-dí tɛ̀ni, mà baà kó pa̰á̰-ma. Mɛmá-dà tee a kó hḭn-má mùko, a koò pú kó nɛɛ́ é wɛdá háá é n'sàà-nà daadí mà kó pa̰á̰-di.

²¹ Ye kú wɔ̀ni, kà nìku ceí Sàkàdíì, k'yè kù yon n'ɔ̀ɔ̀ yókú-ma sàma Weèdi nàmɔ̀ni mɛhɛká. ²² Ò há̰ yɔ̀ɔ é yɛɛ̀ni tḭ́ń wɔ̀ni, ò pú nɛɛ̀ é pà wɛɛ́-nà, kà pá bantá è yɔ̀ ò dɛ́hà Weèdi bɛkàma-dà ye Weèdi nàmɔ̀ni mɛhɛká. Ò de pà wɛì-nà wòni-dà, è koò pú kó nɛɛ́ é wɛdá.

²³ Sàkàdíì pa̰à̰ tḭ́ń daadí o tɔná Weèdi hɔ̰́ɔ̰̀ta mɛhɛká é yɔ̀ɔ, é tón é kòǹ o hɔ̰́ɔ̰̀ta. ²⁴ Ye kú dàhàka, k'òo poòo Èdìsàbɛ́tì é póń, é n'yòǹ weèka kànùm̀ o hɔ̰́ɔ̰̀ta mɛhɛká, ò pú yɛɛ̀hu. Ò de cakú o cɔ̰́ɔ̰̀di è tonà: ²⁵ Dɛ́há Bateó n pa̰à̰-sa. O wɔ̀ni tɛ̀i sá̰mà-ní k'ó n deèda mìì de yòǹ-sa n fɛ̀ci nìpa yìhìka.

Weèdi tɔntɔndikó cakú è yɔ̀ pà kó pɛdá Sèsíì

²⁶ O weèkɔɔ̀dí mɛhɛká, kà Weèdi é tɔn ni tɔntɔndikó Kàbìyɛ́dì, è yɔ̀ ó taá yɔtí pà toò-ti Nàsàdɛ́tì kà tì péé Kàdìdéè teǹka mɛhɛká. ²⁷ Nì d'oò tɔn *sepàǹn òcɔ̰́ǹ kú pesà-dà, kà p'òò tonà Màdíì, k'ò pú yá̰á̰ dɔù, k'ò yòǹ Sòsɛ́fù pocɛ̰ǹni. Ye Sòsɛ́fù de yòǹ wódo Dàfítì yaàbíidí-dà. ²⁸ K'yèe Weèdi tɔntɔndikó é tɛ̀i é dúú o hɔ̰́ɔ̰̀ta mɛhɛká óò dɔa è yɔ̀: Wɛ̀ɛ̀di é n'àà m'péé-nà Màdí, fɔ̰́ń Weèdi pa̰à̰-ko ni pa̰á̰suusàma. Bateó aa péé-nà-á-ma.

²⁹ Màdíì yèkaà-ma mɛma, k'òo yàma é buupa dɛ́dɛ́í k'ó béka o cɔ̰́ɔ̰̀di ye dɔɔ̀mù bookù kpɛ̀i é n'yɔ̀pu.

³⁰ K'yèe Weèdi tɔntɔndikó óò caka è yɔ̀: Dá n'wani Màdíì, mìì tee-sá, Weèdi-d'àà pa̰à̰ ni pa̰á̰suumá. ³¹ Ǹtɛ, a kó póń-ma é pɛdá bíidatá é tà pa̰a̰ yèdi è yɔ̀ Sèsíì. ³² Ò kó n'yòǹ niìsào-dà, kà p'óò yíí è yɔ̀ Sàwèǹku bíitá, kà ti Bateó Weèdi óò wóná wóòti é n'yònà o yàdo Dàfítì. ³³ Ò kó wódí-ma Ìsìdàyɛ́dì bííhí hḭ́ǹka, k'òo wóòti é n'kɔ́ɔ́ yɔ̀ɔmá.

³⁴ Kà Màdíì óò béka è yɔ̀: Ntɛ́ n kó hḭmà é póń, n pú yá̰á̰ dɔù?

³⁵ Kà weèdi tɔntɔndikó óò tɛ̰́ná è yɔ̀: Weèdi Sèdi-dà kó cútá-ní a hḭ́ǹka, kà Sàwèǹku kpeèti áa cḭḭ̀na é n'yònà wɛ̰́ma. Mɛmá-dà tee bíitá a kó pɛɛ́-ta kó n'weni-má, kà pá tà n'yún Weèdi bíitá. ³⁶ Ǹtɛ a wentɔɔ̀o Èdìsàbɛ́tì pà de toò-ko poyɛ̰tadá, ò mɛ̀ɛ té póń-ma o kpɛ̰́ńtì-yèǹka è kó pɛdá bíidatá. N'ɔ̀ɔ̀ póń-ma, o weèkɔɔ̀di-dà mɛmà, ³⁷ mìì tee-sá, Weèdi kó nɛɛ́ pa̰á̰-ma niìya̰ wɛǹni.

³⁸ Kà Màdíì óò tɛ̰́ná è yɔ̀: N yòǹ Bateó deho-dà, yé pa̰ná n hḭ́ǹka é n'yònà a wɛkáàma kú bookú. Ye wɔ̀ni, kà Weèdi tɔntɔndikó é yɛ̀dì é ka̰há.

Màdíì taá Èdìsàbɛ́tì dɔɔ̀pu

³⁹ Ye daàka kà cɔ̰́ɔ̰̀di mɛhɛká, kà Màdíì é yídá feǹ-fem̀ma, é taá yɔtí tìcɔ̰́tì kà tì péé Sùdéè ta̰à̰ka mɛhɛká. ⁴⁰ K'ó tɛ̀i é dúú Sàkàdíì hɔ̰́ɔ̰̀ta mɛhɛká é dɔa Èdìsàbɛ́tì. ⁴¹ Èdìsàbɛ́tì yèkaà-ma Màdíì dɔɔ̀mu, k'òo bíitá é nampa o pɛutí mɛhɛká, kà Weèdi Sèdi óò sṵ́ná. ⁴² Ye wɔ̀ni, k'ó yoòda boòku kpeéma è yɔ̀: Weèdi aa kónà-á-ma poòpa tɔɔ̀pa wɛǹni mɛhɛká k'yé ha̰tá, é pɛ́ɛ́ é kóná-nà bíitá a póń-ta. ⁴³ Mmí héé wodà, kà n Bateó màa é tɛ̀ni n dɔɔ̀pu? ⁴⁴ A dìi-ì, n yeèkaà-ma a dɔɔ̀mu, kà yaǹnaakú-dà é cɛ̰ɛ̰́ bíitá n pɛutí mɛhɛká kà tá nampa. ⁴⁵ A yòǹ yaǹnaakú yaǹn-dà, mìì tee-sá a taà dandaní è yɔ̀ Bateó a cakáà-sa wɛǹni kó pa̰á̰-ma.

Màdíì nɛ́yɛ̰̀ǹfa

⁴⁶ Kà Màdíì é deèn è yɔ̀:

N duǹti Bateó wɛhimú-dà,

⁴⁷ kà yaǹnaakú sṵ́nà n yàma mɛhɛká

nà Weèdi n Fḭ́hìnɔ kpɛ́mú,

⁴⁸ mìì tee-sá, nì dèǹtà n kpɛ́mú,

mmí ni deho mɛ̀ǹǹ pú yòǹ-ko yècɛ̰́ɛ̰̀.

É tódá sá̰mà háá nà wɔ̀ǹci wɛǹni mɛhɛká,

nìku kó nà n yún è tonà wɛ̀ɛ̀di yaǹn-dà,

⁴⁹ mìì tee-sá, Weèdi nɔɔ̀ti wɛǹni kpɛ́ɛdí

pa̰à̰ niìya̰ sàsa-dà n kpɛ́mú.

Ni yèdi weni-í-ma.

⁵⁰ Ni séèma kɔḿma pú kó yɔ̀ɔ daadí yènì

mɛ̀m̀pà nì cùnì-pa hḭ́ǹka.

⁵¹ Nì bɛkáà ni nɔ̀ku kpeèti sá̰pu-dà,

é wihìna mɛ̀m̀pà káá-pa fóńfóǹti pa yàma mɛhɛká.

⁵² Nì cúhínà-á-ma wóópa pa wóokàhi hḭ́ǹka,

é yíkàna nìpa pà pú kɛɛ̀hi-pá.

⁵³ Nì dɛnkànà kòni káá-pa

nà káma sàma,

é bɔhà káápa pa nɔɔ̀kpehí.

⁵⁴ Nì tempáà-nà-á-ma ni dehèpa Ìsìdàyɛ́dìpa.

Nì pú dúi n'a pà kɔń-ma séèma,

⁵⁵ k'yé n'yònà nì de hḭ́nà-di nùdi

kà nì kɔ́ɔ́ yɔ̀ɔmá,

Àbààhám̀ n'ɔ̀ɔ yaàbíiká, ti yààpa.

⁵⁶ Kà Màdíì é pa̰á̰ Èdìsàbɛ́tì hɔ̰́ɔ̰̀ta cḭ̀ma màta̰a̰ kpɛ́ɛmá, ye kú dàhàka k'ó tón é kòǹ o hɔ̰́ɔ̰̀ta.

Ìsá̰-Bàtísì pɛdáma

⁵⁷ Kà Èdìsàbɛ́tì pɛdáma daadí é tɛ̀i, k'ó pɛdá bíidatá. ⁵⁸ K'òo dentɔɔ̀pa n'ɔ̀ɔ hɔ̰́ɔ̰́tà kpɛ́ɛpá é yekà è yɔ̀ Bateó de ò kɔń séèma, k'yè mɛ̀ɛ té pà naaka.

⁵⁹ Ye bíitá káá tḭ́ń daadí daàka kànìì, kà pá tɛ̀ni ta ca̰ndápu. Kà pá n'kpɛ̀i é tà cetá ta báà yèdi è yɔ̀ Sàkàdíì,

⁶⁰ àmá, kà ta màa é yeda è yɔ̀ ta yèdi-dà kó n'dɛɛ̀ Ìsá̰à̰.

⁶¹ Kà p'óò tɛ̰́ná è yɔ̀: Òcɔ̰́ǹ kɔ́ɔ́ a fùdi mɛhɛká kà p'òò yún ye yèdì.

⁶² Kà pá béka Sàkàdíì nà wòni, è kó yá̰dá yèdi ò kpɛ̀i é yíí-di o bíitá. ⁶³ Kà Sàkàdíì é béka dawɛwa̰hàta, kà pá tà n'ɔ̀ɔ̀ tɛɛ̀-ní, k'ó wa̰à̰ta ta hḭ́ǹka è yɔ̀: Ta yèdi-dà Ìsá̰à̰. K'yé pà dii pa wɛǹni. ⁶⁴ Ye pesá nà ye pesá, k'òo denfá dákádá k'ó tṵ́má nɛɛ́ é wɛdá, è dùǹti Weèdi. ⁶⁵ Ye wɔ̀ni, kà wandafɔ̰̀di é cɛ̰ɛ̰́ yɔtí mɛ̀ǹtì yè tɔ́sí-nà-ti wɛǹni nìpa. Sùdéè ta̰à̰ka tempáàku mɛhɛká wɛǹni, kà nìpa cakú pa tɔɔ̀pa ye wɛmá. ⁶⁶ Mɛ̀m̀pà kú wɛnnì de yeèkaà-pa ye wɛmá de maàhu-ú-ma ma hḭ́ǹka è békú pa cɔ̰́ɔ̰̀di è tonà: Ntɛ́ ye bíítà-ní tà kó ya̰dá é n'sá̰à̰?

Mɔ́masí, Bateó kpeèti de tà péé-nà-á-ma.

Sàkàdíì dùǹti Weèdi nà ni pa̰á̰sàma kpɛ́mú

⁶⁷ Kà Weèdi Sèdi é sṵ́ná ye bíitá báàa Sàkàdíì, k'ó cetá è wɛì è yònà Weèdi wɛtɛ̰́náko è toò:

⁶⁸ Duntà-nà Bateó,

Ìsìdàyɛ́dì nìku Weèdi,

mìì tee-sá ò tɛ̀ni é kù tempanà é kù fḭ́hìna.

⁶⁹ Ò tɔn-ní Fḭ́hìnɔ

mɛ̀ǹǹ káá-ko kpeèti-dà ti kpɛ́mú

o deho Dàfítì fùdi mɛhɛká,

⁷⁰ é n'yònà ò de mà wɛɛ̀-ma-ní

nà dekáà wɔ̀ni o wɛtɛ̰́náwempá nùka mɛhɛká è yɔ̀,

⁷¹ ò kó kɔ̰́ɔ̰́-ní Fḭ́hìnɔ

k'ó tɛ̀ni ti fḭ́hìna

ti kà̰à̰tɔ̀pa nà mɛ̀m̀pà ti sɛ̰ɛ̰́-pa wɛǹni nɔ̀hi mɛhɛká.

⁷² Ò dèǹtà-á-ma o múnáwenimá kpɛ́mú,

é kɔń ti yààpa séèma.

⁷³ Ò de wɛ̰́háà-á-ma

ti yàdo Àbààhám̀ pesá,

⁷⁴ è yɔ̀ ò kó ti fḭ́hìna ti kà̰à̰tɔɔ̀pa nɔ̀hi mɛhɛká,

é héé kà t'óò n'tɔǹ

kà wandafɔ̰̀di n'kɔ́ɔ́,

⁷⁵ k'yé teha kà tí n'weni

é tṵ́má é n'coó o yìhìka

ti daàka wɛǹni fòùmu mɛhɛká.

⁷⁶ Fɔ̰́ń n bidà,

pà k'áa yíí Sàwèǹku Wɛtɛ̰́náko-dà,

mìì tee-sá fɔ̰́ń-dà kó nihí Bateó yìhìka

é dɔ̀hà o cɔ̀ci,

⁷⁷ é caka o nìku

è yɔ̀ ò kó kù dèda-á-ma ku sḭ̀ḭ̀ma

é kù fḭ́hìna.

⁷⁸ Ti Weèdi mɛhɛká nadi sàma-dà,

kà nì tṵ́mà káá séèma kɔḿma.

Mɛmá-dà tee nì kó ti kɔ̰́ɔ̰́-ma-ní hḭ́ǹka wenikú

kà kú tɛ̀ni é sikàdà ti hḭ́ǹka

é n'yònà wèǹku yɛtì-ma-ní,

⁷⁹ é wekàna mɛ̀m̀pà fòù-pa yḭ́ḭ̀pu mɛhɛká

è wani kṵ́mú,

k'yé teha kà ní ti túdí wɛ̀ɛ̀di cɔ̀ku mɛhɛká.

⁸⁰ K'yèe bíitá de n'kpɛ̰́ǹ-ní, è pa̰kú yàma, é taá é n'fòù càwenkú mɛhɛká, háá é n'sà-nà daadí tà bɛkáà-dí ta cɔ̰́ɔ̰̀di Ìsìdàyɛ́dìpa.