Tɔná 2

Weèdi Sèdi tɛ̀mmá-ní

¹ Pà̰ǹtèkótì kúúdi daadí tɛ̀i-má, kà weèdɔɔ̀pa é peèta pa wɛǹni bɛ̀m̀bɛ̀ni nìcɔ̰́. ² Ye wɔ̀ni n'ɛ̀ɛ wɔ̀ni, kà hodí é yɛɛ̀ni nà hḭ́ǹka è yònà yakpeèku heu-má, é tɛ̀ni sṵ́ná nàmɔ̀ni pà de péé-di kú mɛhɛká. ³ Ye wɔ̀ni, kà pá dɛ́há yècḭ́ḭ̀ k'yé fodá-ní è yònà ha̰dencí. Kà cí totá totá, é basí bá pa mɛ̀ǹǹ dɛ̀ɛ̀-ko hḭ́ǹka. ⁴ Kà Weèdi Sèdi é pà sṵ́ná pa wɛǹni, kà pá cemá cetá è wɛì boocí tɔcí wɛmá é n'yònà nì de pà pɛ̰ḭ è yɔ̀ pá wɛdá-ci.

⁵ È hɔ̰́tà Sèdìsàdɛ́m̀ mɛhɛká, Sùwífùpa yè péé è tṵ̀n Weèdi sukú, è yɛ̀ni-nà-ní teǹka heèka wɛǹni. ⁶ Pà yèkaà-ma ye hodí, kà pá tíká-ní dɔ́ɔ́di. K'yé pà dii pa wɛǹni sàma, mìì tee-sá bá pa mɛ̀ǹǹ dɛ̀ɛ̀-ko de you k'yèe weèdɔɔ̀pa wɛì o bookú wɛmá-dà. ⁷ Yè de pà dii kà pà tṵ́mà sɛ̰̀ɛ̰-ɛ̰́-ma ye kú pa̰á̰mà, kà pà wɛì è toò: Ye nìpà mɛ̀m̀pà wɛì-pà, Kàdìdéè yam̀ma dɔ pa wɛnnì? ⁸ Ntɛ́ y'àá hḭmà, kà ti you kà pà wɛì bá ti mɛ̀ǹǹ dɛ̀ɛ̀-ko bookú wɛmá? ⁹ Ti mɛhɛkà, nìpa péé-dà è yɛ̀ni Pátì teǹka, kà tɔɔ̀pa yɛɛ̀ni Mɛ̀ɛ́tì nà Èdám̀ teǹka, tɔɔ̀pa Mɛ̀sòpòtàmíì, tɔɔ̀pa Sùdéè nà Kàpàdósì, tɔɔ̀pa Pɔ̰́ɔ̰̀, tɔɔ̀pa Àsíì tempáàku, ¹⁰ tɔɔ̀pa Fìdìsíì, tɔɔ̀pa Pà̰ǹfìdíì, tɔɔ̀pa Èsípútì, tɔɔ̀pa Dìbíì yɔtí mɛ̀ǹtì hɛ́dí-nà-ti Sìdɛ́nì teǹka, kà tɔɔ̀pa yɛɛ̀ni nà Hɔ̀dɔ́m̀, ¹¹ tɔɔ̀pa nà Kɛ́dɛ́tì, tɔɔ̀pa nà Àdàbíì. Ti mɛhɛkà, pàcɔ̰́ yòǹ Sùwífùpa-dà, kà tɔɔ̀pa pú yòǹ Sùwífùpa àá tṵ̀n pa weèdɔɔ̀pu. Nà mɛma, kà ti you kà pà wɛì Weèdi pa̰á̰sàma ti boocí wɛmá mɛhɛká!

¹² Yè de pà dii-í-ma dɛ́dɛ́í pa wɛǹni, bá pà koò pú yá̰á̰ pà kó n'yɔ̀mù, kà pà békú pà tɔɔ̀pa è tonà: Miì kpɛ̀i é n'yɔ̀ badà? ¹³ Àmá, kà pàcɔ̰́ dɛhɛkú ye weèdɔɔ̀pa è tonà: Pà bɔń naàma-dà!

Píyɛ́ɛ̀ cakáà-ma wɛmá nìku

¹⁴ Ye wɔ̀ni, kà Píyɛ́ɛ̀ nà tɔntɔndipá tɔɔ̀pa píì-òcɔ̰́ é yíí nɛɛ̀hi, k'ó wɛɛ́ kpeéma é caka ye nìku è yɔ̀: Nɛ́na Sùwífùpa, nà nɛ́na mɛ̀m̀pà kú wɛnnì péé-pa Sèdìsàdɛ́m̀ mɛhɛká, besí-nà é yekà sukú n kpɛ̀i é n'yɔ̀pu. ¹⁵ Ye nìpà pú bɔń naàma k'yé n'yònà nɛ maàkumá, mìì tee-sá yè káà yòǹ wɔ̀ni màwɔ́ì-dà ká̰ńyɛ̰̀ǹfa. ¹⁶ Àmá, sá̰mà-dà Weèdi wɛtɛ̰́náko Sòwɛ́dì de cakáà-sa pa̰à̰-ma. Ò de wɛdà è yɔ̀

¹⁷ Weèdi yɔ̀: Dadèǹdèka mɛhɛká,

n kó cṵń n Sèdi-dà niìfòùo wɛǹni hḭ́ǹka.

Nɛ bíidahí nà nɛ bíipohí kó n'tɛ̰́nì n hḭ́mpú-dà,

kà nɛ dapàm̀ma n'dɛ́hù bɛkàma,

kà nɛ dakpɛ̰́nhí n'dɛ́hù pa̰á̰sàma hi dɔhɔ̀ti mɛhɛká.

¹⁸ Mɔ́ma-dà, ye kú daàka mɛhɛká,

n kó cṵń-ma n Sèdi n dehèpa hḭ́ǹka,

daapá yoo poòpa, kà pá n'tɛ̰́nì n hḭ́mpú.

¹⁹ N kó pa̰á̰ pa̰á̰sàma-dà hḭ́ǹka,

é pa̰á̰ pɔ́ńtáyḭḭ́pa teǹka hḭ́ǹka,

kà nɛ́ dɛ́há hḭ̀ma, nà ha̰mú, nà yúkú wɔ́ɔ̀di.

²⁰ Ye daàka mɛhɛká, wèǹku kó bikà-á-ma,

kà cḭ̀ma é hṵɛ̰dá é n'yònà hḭ̀ma,

kà Bateó daadí há̰ nɛɛ́ tɛ̀ni,

daadí mɛ̀nì yòǹ-di daasàdi è tṵ́mà suu sukú.

²¹ Ye wɔ̀ni, nìi mɛ̀ǹǹ kú wɛnnì

kó kɔń-nà-ko Teó,

kó fḭ́tá-ma.

²² Ìsìdàyɛ́dì nìpa-nà, besí-nà é yekà n kó nɛ caka-sá: Weèdi yɛɛ̀-nà Sèsíì Nàsàdɛ́tì kóoó-dà é pa̰á̰ pɔ́ńtápa̰á̰ma, nà pɔ́ńtáyḭḭ́pa, nà kpeèti pa̰á̰ma nɛ cɔhɔ̀ka, nɛ mɔ́mpá mà yá̰á̰-dà-ma. Ma kú bookú-dà Weèdi nɛ bɛkáà-ma è yɔ̀ mɛní-d'òò tɔn-ní. ²³ Mɛnń-dà pà tàà-ma nɛ nɔ̀hi mɛhɛká, é n'yònà Weèdi de ta̰kadà-ma, nà nì de hḭ́nà-sa è yɔ̀ yé pa̰ná. Nɛ́na-dà héè kà mɛ̀m̀pà pú yá̰á̰-pa Weèdi óò kpɛ̰́ḭ́ kpíidɔkú hḭ́ǹka, óò kɔ̀ù. ²⁴ Àmá, kà Weèdi óò yá̰hìna, óò fèda kṵ́mú dákáti mɛhɛká, mìì tee-sá yè de pú cédí kà kṵ́mú óò cá̰hìna mu nɔɔ̀ti mɛhɛká. ²⁵ Dàfítì de wɛdà-á-ma o hḭ́ǹka è yɔ̀:

N de dìi-í-ma Teó

wɔ̀ka wɛǹni n yìhìka,

ò péé n heùma-dà,

k'yé teha kà n dá n'ceùdi.

²⁶ Ye kú kpɛ́mú-dà tee, kà n yàma naa,

kà n dèǹ nà wɛ̀ɛ̀di.

Bá híúdi mɛhɛká,

n wɔ̰̀ǹku kó m'muhipú nà daḿma-dà,

²⁷ è yá̰á̰ a pú kó n wɛ́í kpííku mɛhɛká.

A pú kó hédá,

mmí, a ta̰kadáko,

ká n pɛ̰̀ḭ híúdi mɛhɛká.

²⁸ A n bɛkáà-á-ma cɔ̀ku

mɛ̀ǹkù kɔ́dì-nà-ku fòùmu mɛhɛká,

a kó nà péé-nà-á-ma,

é n sṵ́ná yaǹnaakú.

²⁹ N kúcàpa nà n potɔ̰ɔ̰̀pa-nà, héé-nà ká n nɛ caka pópóí yè hḭmpú ti yàdo Dàfítì hḭ́ǹka. Ò kpíi-í-ma, kà p'óò dáná, k'òo híúdi káà péé ti cɔhɔ̀ka háá nà yenì. ³⁰ Àmá, ò de yòǹ Weèdi wɛtɛ̰́náko-dà, è yá̰á̰ è yɔ̀ Weèdi de wɛ̰́háà óò hḭ́nà nùdi è yɔ̀ nì kó kaàna o yaàbíidí nìcɔ̰́ o wóokàtàda hḭ́ǹka. ³¹ Dàfítì de dɛnà é dɛ́há mìì kó tɛ̀ni-sá-dà-ní, ye wɔ̀ni é wɛdá Kídísì yá̰ńtáma wɛmá, è yɔ̀:

Pà p'óò wɛ́i kpííku mɛhɛká,

o wɔ̰̀ǹku mɛ̀ɛ pú pɛ̰̀ḭ híúdi mɛhɛká.

³² Ye Sèsíì n wɛì-kò kú wɛmá, Weèdi òò yá̰hìnà-á-ma, ti wɛǹni nɔ̀ǹci mɛhɛká. ³³ É yídá, kà Weèdi óò dìkànà hḭ́ǹka, óò kàna ni nɔ̀kàǹheùma, óò kɔ̰́ɔ̰́ ni Sèdi nì de hḭ́n nì kó kɔ̰́ɔ̰́-di-ní, k'ó nì ti cṵń-ní. Mií-dà nɛ mɛ̀ɛ dìi-má sá̰mà, èè you. ³⁴ Dàfítì mɔ́nń pú dìsi hḭ́ǹka, àmá ò yɔ̀:

Bateó Weèdi cakáà

n Teó è yɔ̀:

Ya̰ní kaàdi n nɔ̀kàǹheùma,

³⁵ háá é n'sànà

n kó héé-ma

k'á cèn a kà̰à̰tɔɔ̀pa hḭ́ǹka.

³⁶ Ìsìdàyɛ́dì nìku wɛǹni yònà é n'yá̰á̰-ma mɔ́masí hḭ́ǹka è yɔ̀, ye Sèsíì nɛ kpɛ̰́ḭ́-ko kpíidɔkú hḭ́ǹka, Weèdi hḭn-kó-dà Teó, é tṵ́má óò hḭn Kídísì.

³⁷ Pà yèkaà-ma ye wɛmá, kà má pà pḭ́ń dɛ́dɛ́í. Kà pá béka Píyɛ́ɛ̀ nà tɔntɔndipá tɔɔ̀pa è yɔ̀: Ti kúcàpa-nà, ntɛ́ ti yònà é hḭmà-dà?

³⁸ Kà Píyɛ́ɛ̀ é pà tɛ̰́ná è yɔ̀: Peǹta-nà pa̰á̰ma, kà bá mɛ̀ǹǹ dɛ̀ɛ̀-ko é héé kà p'óò cóńtá nà Kídísì yèdi, k'yé teha kà Weèdi é nɛ deèda nɛ sḭ̀ḭ̀ma. Ye wɔ̀ni, nɛ kó dɛ́tá-ma Weèdi Sèdi mɛ̀nì yòǹ-di ni pa̰dí, ³⁹ è yá̰á̰ Weèdi hḭ́nà ye nùdì nɛ kpɛ́mú-dà, nà nɛ bííhí kpɛ́mú, é pɛ́ɛ́-nà mɛ̀m̀pà kú wɛnnì péé-pa nátáma, nà ti Bateó Weèdi kó yíí-pa wɛǹni.

⁴⁰ Kà Píyɛ́ɛ̀ é tṵ́má pà caka wɛmá tɔɔ̀ma dɔ́ɔ́di, è kpɛ̀i é yahikàna pa wɔ̰̀ǹti kà pá teha. Ò de pà cakú è yɔ̀: Wɔ̀ǹkù mɛnkù kú nìpa yòǹ kpákpààpa-dà. Pà cɛ́dá-nà kà Weèdi é nɛ fḭ́hìna.

⁴¹ Pa mɛhɛká, kà nìpa dɔ́ɔ́di é teha Píyɛ́ɛ̀ wɛmá, é hédá kà pá pà cóńtá. Ye kú daadí, nìpa tòhìka kàta̰a̰ kpɛ́ɛmá-dà de tuɛhà weèdɔɔ̀pa dɔ́ɔ́di hḭ́ǹka. ⁴² Pà de kɔ̰́ɔ̰̀-ɔ̰́-ma pa cɔ̰́ɔ̰̀di è bekù wɔ̀ka wɛǹni Sèsíì tɔntɔndipá biɔhànamá, è fòù kúcàti mɛhɛká, è tóńkú Weèdi dipú nùdi nìcɔ̰́, è pɛ́ɛ̀ pa̰kú weèdɔɔ̀pu.

Weèdɔɔ̀pa fòùmu

⁴³ Bá mɛ̀ǹǹ dɛ̀ɛ̀-ko de káá Weèdi wantafɔ̰̀di-dà, mìì tee-sá Sèsíì tɔntɔndipá de pa̰kú pɔ́ńtáyḭḭ́pa nà pɔ́ńtápa̰á̰ma dɔ́ɔ́di-dà. ⁴⁴ Weèdɔɔ̀pa wɛǹni de múḿ nùdi-dà, è pɛ́ɛ̀ tookú pà káá-sa wɛǹni. ⁴⁵ Pà de hɔ̰́ yɛda pa nɛǹti nà pa kááma è té tótá ye dífa-dà pa wɛǹni, bá pa mɛ̀ǹǹ dɛ̀ɛ̀-ko kpɛ̀kaàma. ⁴⁶ Daàka wɛǹni, pà de pú hɔ̰́ mɔ́ńka pà kó peèta-ma Weèdi hɔ̰́ɔ̰̀ta mɛhɛká. Pà de pɛ́ɛ̀ è yon-ń-ma Weèdi dipú pa hɔ̰́ɔ̰́hí mɛhɛká, è mù tóńkú nà yaǹnaakú nà yàma màcɔ̰́. ⁴⁷ Pà de duǹti-í-ma Weèdi, kà nìpa wɛǹni pà sɛdí. Daàka wɛǹni, kà Teó tuɛhɛ̀nì pa mɛhɛká, ò de fḭ́hínì-pa.